Néra Njékaḭkulaje 26:18 - Maktub gə́ To gə Kəmee

¹⁸ mba kari ar kəm dee inja, kar dee d’ḭ ne dan loondul’g teḛ ne dan kàrá ləm, mba kar dee d’unda rɔ dee ji siŋgamoŋ’g lə Njekurai ti d’ɔm ne ji Ala’g lé ləma, mba kar dee d’ɔm meḛ dee dɔm’g mba kar məəm ti mbidi dɔ kaiya’g lə dee ɓó gə kar dee d’isi gə deḛ gə́ to gə kəmee lé d’iŋga sə dee nénoji lé tɔ.

Néra Njékaḭkulaje 26:18 ပူးပေါင်းရင်းမြစ်များ

Pakɔsje 119:18

Maji kari ar kəm inja Mba karm m’orè ne kəm sḭ Dɔ tornduije gə́ maji dum lé ya.

Pakɔsje 146:8

Njesigənea̰ lé ar kəm njékəmtɔje teḛ ləm, Deḛ gə́ d’wa koŋgoŋ lé Njesigənea̰ nja ndɔji dee Ar dee d’aar dana njoroŋ ləma, Njéra né gə́ gə dɔ najee-je lé kara Njesigənea̰ lé unda dee dan kəmee’g ya ləm tɔ.

Esai 29:18

Mee ndəa’g neelé njémbikuduje d’a koo ta Gə́ to mee maktub’g gə mbi dee ləm, Njékəmtɔje gə́ d’oo loo el lé D’a kunda ne loo mee loo gə́ ndul njudu-njudu’g teḛ ləm tɔ.

Esai 32:3

Deḛ gə́ d’oo loo lé Kəm dee a tel libi el ŋga ləm, Deḛ gə́ d’oo ta lé D’a kur mbi dee gèŋ ləm tɔ.

Esai 35:5

Yen ɓa kəm njékəmtɔje a kinja ləm, Mbi njémbikuduje kara d’a kinja bərəŋ ləm tɔ,

Esai 42:16

M’a kar njékəmtɔje njaa rəw’d Gə́ deḛ gər kédé el ləm, M’a kɔr no̰ dee dan kila-rəwje Gə́ deḛ gər kédé el ləm tɔ, M’a kar loondul tel to gə́ lookàr no̰ dee’g ləm, M’a kar looje gə́ to guduru-guduru Tel d’asəna rai-rai ləm tɔ. Yee ɓa gə́ né gə́ m’a gə ra Ɓó m’a kuba gée kya̰ el.

Esai 42:7

Gə mba kar kəm njékəmtɔje teḛ ləm, Gə mba kar deḛ gə́ d’wa dee ɓər lé D’unda loo teḛ ləma, Kar deḛ gə́ d’udu dee duu-loo gə́ loondul’g lé D’unda loo teḛ ləm tɔ.

Esai 43:8

Deḛ gə́ kəm dee to keneŋ Nɛ d’oo loo el ləm, Gə deḛ gə́ mbi dee to keneŋ Nɛ d’oo ne ta el ləm tɔ lé Maji kar dee d’unda loo teḛ raga.

Esai 49:6

Yeḛ pana: To né gə́ lam ba bèe ya Gə mba karm m’to kura lə neḛ Gə mba kam m’un ginkoji Jakobje m’ur dee tar ləm, Gə mba kam m’tel gə ges Israɛlje gə́ nai lé ləm tɔ. Neḛ nja n’undam mba kam m’to lookàr lə ginkoji dəwje gə raŋg ləm, Gə mba kam m’un ta kaji lə neḛ M’aw ne saar m’teḛ ne gwɔi naŋg’d ləm tɔ.

Esai 9:2

I ar bula lə koso-dəwje ḭ dɔ maree’d gə́ kédé-kédé ləm, I ar dee boo-rɔlelje ləm tɔ, Deḛ ra ne rɔlel nɔḭ’g To gə́ ra ne rɔlel naḭ kinja kó’g bèe ləm, To gə́ d’al ne rɔ dee loo-kai-na̰ nébanrɔ’g bèe ləm tɔ.

Matiyo 4:10

Yen ŋga Jeju ulá pana: Njekurai, ɔd tam’g gə gogo mbata deḛ ndaŋg mee maktub’g pana: Mbaidɔmbaije Ala ləi lé yeḛ ya kára ba ɓa i a kunda barmba nea̰’g ləm, yeḛ nja kára ba kiao ɓa i a ra né karee ləm tɔ.

Matiyo 4:16

Dəwje neelé gə́ d’isi dan loondul’g lé Deḛ nja d’oo loo gə́ ndogó wər-wər ləm, Deḛ neelé gə́ ndil yoo dəb dɔ dee’g bigim lé Loo un kudu ndogó dɔ dee’g ləm tɔ.

Lugu 1:77

Mba kar koso-dəwje ləa gər ne gin kaji gə́ yeḛ a kaji dee Kɔr ne ɓaŋg kaiyaje lə dee ləm tɔ.

Lugu 1:79

Mba ndogó dɔ dəwje gə́ d’isi loo gə́ ndul njudu-njudu’g Gə d’isi loo gə́ ndil yoo dəb dɔ dee’g bigim ləm, Mba kar sí j’oo loo kila gɔl sí rəw meekulɔm’g lé ləm tɔ.

Lugu 2:32

Yee neelé to lookàr gə́ a ndogó jol-jol dɔ ginkoji dəwje gə raŋg’g ləm, A kula rɔnduba dɔ koso-dəwje ləi gə́ Israɛl lé ləm tɔ.

Lugu 24:45

Yen ŋga yeḛ ar meḛ dee tɔ kujita gə mba kar dee gər ne gin ta gə́ mee maktub gə́ to gə kəmee lé tɔ.

Lugu 24:47

d’a kila mber ta kwa ndòo rɔ dɔ kaiya’g gə ta kɔr kaiya dɔ dəwje’g ləm tɔ gə ria-yeḛ kar ginkoji dəwje gə raŋg ya ndá d’a kun kudee Jerusalem ya.

Lugu 4:18

Ndil Mbaidɔmbaije dəb dɔm’g Mbata yeḛ nja wa dɔm gə ubu Mba karm m’ila mber tagə́maji lé m’ar njéndooje ya. Yeḛ ulam gə mba karm m’ila mber ta kɔr ɓər dɔ deḛ gə́ d’wa dee ɓər ləm, Mba karm m’ula njékəmtɔje ta kəm deḛ gə́ a gə kinja kar dee d’oo ne loo ləm, Mba kar deḛ gə́ d’udu dee kəi lé d’a kila rɔ dee ləma,

Tagə́maji gə́ Ja̰ ndang 17:17

Maji kari ula kankəmta meḛ dee’g ɔr dee ne unda dee gə kəmee doi, ta ləi to kankəmta ya.

Tagə́maji gə́ Ja̰ ndang 3:19

Ta gə́ wa dɔ dəwje lé ɓa nee: mbata lookàr ree naŋg nee mba̰ nɛ deḛ ndigi loondul unda lookàr mbata néra dee to majel.

Tagə́maji gə́ Ja̰ ndang 4:10

Jeju ilá keneŋ pana: Ɓó lé i gər nojikwa gə́ Ala lé a kwa gə dəwje ɓa gər yeḛ gə́ kwɔii mán pana: Ar neḛ mán n’ai ndá i nja a kḭ kédé kwɔiyee mán-kai, bèe lé yeḛ kara a kari mán gə́ àr yal-yal gə́ aḭ teḛ kuji-kuji tɔ.

Tagə́maji gə́ Ja̰ ndang 4:14

Nɛ nana ɓa a kai mán gə́ m’a karee neelé ndá kunda a tɔlee gogo el ŋga. Man gə́ m’a karee lé a tel to ŋgira mán mée’g gə́ a kaḭ teḛ kuji-kuji ndá yeḛ a si gə kəmə gə́ gə no̰ lé mée’g.

Tagə́maji gə́ Ja̰ ndang 8:12

Jeju un ta gə́ raŋg ula dee pana: Ma m’to lookàr lə njé gə́ naŋg nee. Yeḛ gə́ un rəw goom’g ndá a njaa loondul’g el nɛ yeḛ a nai dan lookàr’g gə́ ka̰ si ne gə kəmə lé.

Tagə́maji gə́ Ja̰ ndang 9:39

Yen ŋga Jeju ulá pana: Ma lé m’ree naŋg nee mba gaŋg rəwta loo kára ba sur mba kar njé gə́ d’oo loo el d’oo loo ləm, mba kar deḛ gə́ d’oo loo lé tel to njékəmtɔje ləm tɔ.

Tagə́maji gə́ Ja̰ ndang 9:5

Loo gə́ ma m’nai dɔ naŋg nee ɓəi lé ma m’to lookàr lə dəwje gə́ dɔ naŋg nee ya.

Néra Njékaḭkulaje 10:43

Njéteggintaje lai d’ɔr goo ta ləa pana: Nana ɓa gə́ ɔm mée dəa’g ndá mbɔl dɔ ria-yeḛ nja ɓa ɓaŋg kaiya a kɔr ne dɔ njea’g neelé ɓəi.

Néra Njékaḭkulaje 13:47

Mbata Mbaidɔmbaije un ndia ar sí togə́bè pana: Neḛ n’undai gə́ lookàr lə ginkoji dəwje gə raŋg Mba kari un ta kaji lé aw ne saar teḛ ne gwɔi naŋg’d.

Néra Njékaḭkulaje 15:9

Yeḛ ɔr kəm síjeḛ ɓəd el ləm, yeḛ ɔr kəm dee-deḛ ɓəd el ləm tɔ. Meekun lə dee ɓa yeḛ ɔr ne won kaiya meḛ dee’g.

Néra Njékaḭkulaje 2:38

Piɛrə ila dee keneŋ pana: Waje ndòo rɔ sí dɔ kaiya’g lə sí ləm, ar deeje ra sí batɛm gə ri Jeju Kristi ləm tɔ mba kar mée ti mbidi dɔ kaiyaje’g lə sí. Bèe ɓa seḭ a kiŋgaje ne Ndilmeenda gə́ d’wɔji-kwɔji kar sí gə́ kar lé ya.

Néra Njékaḭkulaje 20:21

Ma m’ula ne Jibje gə Grekje ta kwa ndòo rɔ dɔ kaiya’g lə dee rɔ Ala’g lé ɓó gə kar dee d’un ne meḛ dee d’ar Mbaidɔmbaije Jeju Kristi.

Néra Njékaḭkulaje 20:32

Ɓasinè lé m’ɔm sí ji Ala’g ləm, gə m’ɔm sí ta noji ləa gə́ askəm rɔd sí mba kar sí iŋgaje nénoji lə sí gə njémeendaje na̰’d lai.

Néra Njékaḭkulaje 26:19

Mbai Agripa, yee gə́ bèe ɓa né gə́ ḭ dara gə́ ram gə́ mḭdi lé m’ɔs rəw el.

Néra Njékaḭkulaje 26:23

Deḛje neelé pana: Kristi lé némeeko̰ a gə rəa ləm, yeḛ nja a to dəw gə́ doŋgɔr gə́ a teḛ dan njé gə́ d’wəi’g ləma, yeḛ nja a kila mber ta lə lookàr lé kar koso-dəwje ləm, ginkoji dəwje gə raŋg ləm tɔ.

Néra Njékaḭkulaje 3:19

Bèe ndá waje ndòo rɔ sí dɔ kaiya’g lə sí ɔsje badm telje mba kar kaiya lə sí ɔr ndɔs-ndɔs ləm,

Néra Njékaḭkulaje 5:31

Ala lé unee gə jikɔlee undá tar aree to gə́ Mbai ləm, gə Njekaji dəwje ləm tɔ, gə mba kar Israɛlje d’wa ne ndòo rɔ dee dɔ kaiya’g lə dee kar mée ti ne mbidi dɔ’g.

Njé gə́ Rɔmə 8:17

Ɓó lé jeḛ n’to ŋganeeje ndá jeḛ n’to njékiŋga nédɔji síje lé. Ɓó lé jeḛ j’ula rɔ sí ndubu gə Kristi na̰’d gə mba kiŋga səa rɔnduba na̰’d ndá j’a to njékiŋga nédɔjije lə Ala na̰’d gə Kristi tɔ.

1 Njé gə́ Kɔrḭtə 1:2

jeḛ ndaŋg maktub nee j’ar Eglisə lə Ala gə́ to Kɔrḭtə, deḛ gə́ Jeju Kristi ɔr dee unda dee gə kəmee mba kar dee to njémeendaje lé deḛ gə́ gə loo lai ɓar ri Mbaidɔmbaije lə sí Jeju Kristi, yeḛ gə́ to Mbaidɔmbaije lə dee ləm, gə ka̰ síjeḛ ləm tɔ lé keneŋ.

1 Njé gə́ Kɔrḭtə 1:30

Togə́bè ɓa Ala nja ɔm sí na̰’d gə Jeju Kristi, yeḛ gə́ Ala nja undá gə́ kəmkàr lə sí ləm, gə njekɔr ta dɔ sí no̰ Ala’g lé ləm, gə nékunda sí gə kəmee lə sí ləma, gə nékoga dɔ sí ləm tɔ,

2 Njé gə́ Kɔrḭtə 4:4

Deḛ gə́ meḛ dee ndər dɔ kɔs Ala rəw’g lé njetaa loo-kɔg gə́ dɔ naŋg nee ɓasinè lé yeḛ nja tɔ kəm dee wə-wə nà Tagə́maji gə́ wɔji dɔ rɔnduba lə Kristi gə́ njekɔr rɔ Ala pai-pai lé a ndogó no̰ dee’g.

2 Njé gə́ Kɔrḭtə 4:6

Mbata Ala nja gə́ pa pana: Maji kar lookàr tḭ loondul kad lé yeḛ nja ar lookàr tḭ loondul meḛ sí’g kad mba kar sí n’gər ne rɔnduba lə Ala gə́ ndogó kəm Jeju Kristi’g lé.

2 Njé gə́ Kɔrḭtə 6:14

Yije rɔ sí kər-kər gə́ rɔ njépole-magəje’g el. See meekarabasur a kɔr kura gə nékalta wa. See lookàr a kwa boa gə loondul ra wa.

Njé gə́ Galati 2:20

Ma m’ɗar rɔm gə Kristi na̰’d, ɓó lé m’isi kəmba ndá kara to ma el ŋga, nɛ Kristi ɓa si kəmba məəm’g, ɓó lé m’isi kəmba gə darɔm ɓasinè ndá kara meekun gə́ m’un m’ar Ŋgon-Ala lé ɓa m’isi ne kəmba. Yeḛ nja ɓa undam dan kəmee’g, ya̰ rəa ar yoo mbata ləm tɔ.

Njé gə́ Galati 3:14

Bèe ɓa gə mba kar dɔkaisəgərə gə́ Ala un ne ndia ar Abrakam lé njépole-magəje d’iŋga gin Jeju Kristi’g lé ləm, jeḛ kara mbɔl dɔ meekun lé ɓa j’iŋga ne Ndil gə́ Ala un ne ndia mba kar sí lé ləm tɔ.

Njé gə́ Galati 3:2

Aa ooje ma m’ndigi dəji sí ta kára ba mba koo ta sí’g. See néra sí gə́ seḭ raje gin godndu’g lé ɓa, seḭ iŋgaje ne Ndil əsé ta meekun gə́ d’ila mberee d’ar sí gə́ seḭ taaje lé see yee ɓa seḭ iŋgaje ne Ndil wa.

Njé gə́ Epesə 1:11

Mbɔl dɔ Kristi lé ɓa jeḛ n’tel n’to ne nédɔji ləa gə goo kuma̰ gə́ yeḛ nja kuma̰ sí mée’g kédé gə́ dɔtar, yeḛ nja ɓa unda ne néje lai gə goo nduree-nduree to gə́ mée wɔji

Njé gə́ Epesə 1:14

Ndilmeenda lé to ta nédɔji lə sí gə́ jeḛ n’taa dɔtar gə́ wɔji dɔ kuga gə́ Ala uga ne dɔ deḛ gə́ yeḛ wa dee gə́ kea̰ lé gə mba pidi ne rɔnduba ləa.

Njé gə́ Epesə 1:18

Ma m’kwɔiyee mba kar kəmkàr gə́ àr raŋg-raŋg to ne meḛ sí mba kar sí gərje ne némeekundayel gə́ wɔji dɔ ɓar gə́ yeḛ ɓar sí ne ləm, gə boo-ronduba lə nédɔji gə́ yeḛ unda gə kəmee mbata lə deḛ gə́ to gə kəmee ləma,

Njé gə́ Epesə 1:7

Mbɔl dɔ məsee-yeḛ nja ɓa jeḛ j’iŋga ne nékoga dɔ sí gə́ ɔr kaiya dɔ sí’g gə goo boo-noji ləa

Njé gə́ Epesə 2:8

Tɔgərɔ ya, noji ɓa seḭ ajije ne goo meekun’g lə sí. To né gə́ Ala ɓa ar sí ɓó to né gə́ ḭ rɔ sí-seḭ’g el.

Njé gə́ Epesə 4:18

Kəmkàr lə dee lé loondul dəb dɔ’g rigim ləm, kəmə gə́ ka̰ Ala lé deḛ gər ndiaa el ləm tɔ mbata d’wa meḛ dee kədərə dɔ mbə gə́ nai meḛ dee’g ɓəi.

Njé gə́ Epesə 5:11

Kula ra ŋgan loondulje lé to kula gə́ dəa ɔs bo̰-bo̰, bèe ndá tɔje kée gə́ raga ɓó ɔmje na̰’d sə dee keneŋ yəg el.

Njé gə́ Epesə 5:14

Gelee gə́ nee ɓa, yeḛ pa ne pana: I gə́ toɓi lé teḛ kəmi, Unda loo teḛ dan njé gə́ d’wəi’g Ndá Kristi a ndogó nɔḭ’g.

Njé gə́ Epesə 5:8

Kédé lé seḭ toje gə́ ka̰ loondul, nɛ ɓasinè seḭ ɔmje na̰’d gə Mbaidɔmbaije toje ne ka̰ lookàr ya. Bèe ndá njaaje asəna gə ŋgan lookàrje.

Njé gə́ Epesə 6:12

Mbata darɔ dəw əsé məsee ɓa jeḛ j’oma̰ səa el, nɛ dəw-dɔ-looje ləm, gə njéko̰ɓeeje ləm, gə mbai dɔ naŋg gə́ ka̰ loondul’gje ləma, gə ndilje gə́ majel gə́ d’aw pən dara’g ləm tɔ lé deḛ ɓa jeḛ j’oma̰ sə dee ya.

2 Timote 2:26

Yen ɓa gum lə njekurai gə́ yeḛ uba dee naŋg bus kiri dee dɔ na̰’d mba kar dee ra né gə́ mée wɔji lé d’a teḛ sɔd ne rɔ dee danee’g.

Ǝbrəje 10:10

Mbɔl dɔ torndu neelé ɓa yeḛ ɔr sí unda sí ne gə kəmee gə darɔ Jeju Kristi gə́ yeḛ ya̰ ar Ala lé gɔl kára ba kiao gə́ ŋgaŋgee.

Ǝbrəje 10:14

Mbata mbɔl dɔ nékar Ala kára ba kiao gə́ yeḛ un aree lé ɓa yeḛ ar deḛ gə́ to gə kəmee tel to ne maji d’ɔr njoroŋ.

Ǝbrəje 11:6

Tɔgərɔ ya, ɓó lé meekun godo ndá dəw kára kara askəm taa kəm Ala el. Mbata kɔm mee dɔ Ala’g kée to gə́ yeḛ si gən ləm, kée gə́ yeḛ gə́ a kar nana gə́ ndolè uba maji ləm tɔ lé yee ɓa gə́ kuma̰ kar dəw rəm ne pər gə́ rɔ Ala’g ya.

Ǝbrəje 9:15

Togə́bè ɓa, yeḛ to ne njekaar dana gə goo manrɔ gə́ sigi lé mba kar deḛ gə́ deḛ ɓar dee lé d’a kwa səa nénduba gə́ to gə no̰ gə goo ndukun gə́ Ala un ar dee. Mbata kwəi gə́ yeḛ wəi lé yeḛ udu ne kəm kalta lə dee gə́ d’al ne dɔ manrɔ gə́ dɔtar lé.

Maktub gə́ Jak ula ne ar ngan-Allaje 2:5

Ooje ta nee maji, ŋgakɔmje gə́ m’unda sí dan kəm’g: See Ala ɔr kəm deḛ gə́ to gə́ njéndooje kəm dəwje gə́ naŋg nee mba kar dee to bao-meekunje ləm, mba kar ɓeeko̰ gə́ yeḛ un ndia mba kar deḛ gə́ d’undá dan kəm dee’g lé d’a to njeaje ya ləm tɔ lé el wa.

1 Piɛrə 1:4

Yee ɓa j’iŋga ne nénoji gə́ a kunda naŋg el ləm, a mina̰ el ləma, a ndòlé el ləm tɔ gə́ yeḛ unda kul dara

1 Piɛrə 2:25

Kédé lé seḭ toje asəna gə badje gə́ d’aw kori-kori bèe, nɛ ɓasinè seḭ telje gə́ rɔ njekul sí’g ləm, gə rɔ njekaa dɔ sí’g ləm tɔ.

1 Piɛrə 2:9

Nɛ seḭ lé seḭ toje ginkoji dəwje gə́ Ala mbər sí ləm, seḭje toje njékinjanéməsje gə́ gin sí to gə́ mbai ləm, seḭ toje ginkoji dəwje gə́ toje gə kəmee ɓəd ləma, seḭ toje ka̰ Ala nja doŋgɔ doi ləm tɔ mba kar sí ilaje ne riɓar dɔ yeḛ gə́ ɔr sí dan loondul gə́ ndul njudu-njudu’g unda sí dan lookàr’g ləa gə́ àr raŋg-raŋg lé.

1 Ja̰ 1:9

Ɓó lé jeḛ n’teggin kaiya lə sí gə́ raga ndá yeḛ to njemeenda londoŋ gə njemeekarabasur mba kar mée ti mbidi dɔ’g ləm, mba kɔr won néra gə́ kori-kori lə sí ɓə̰dərə-ɓə̰dərə ləm tɔ.

1 Ja̰ 2:12

Ŋganəmje, ma m’ndaŋg maktub nee m’ar sí mbata mbɔl dɔ ria-yeḛ nja kaiyaje lə sí ɔr dɔ sí’g mba̰.

1 Ja̰ 3:8

Yeḛ gə́ ra kaiya ndá yeḛ to gə́ ka̰ njekurai mbata njekurai lé un kudu ra kaiya kédé gə́ dɔtar saar ɓasinè. Nɛ Ŋgon-Ala lé unda loo teḛ gə mba tuji néraje lə njekurai lé.

1 Ja̰ 5:19

Jeḛ n’gər gao, jeḛ lé n’to gə́ ka̰ Ala ləm, loo gə́ naŋg nee bura nai gel siŋgamoŋ lə njetakori’g ləm tɔ.

Jude 1:1

Ma Jude, kura lə Jeju Kristi ləm, gə ŋgoko̰ Jak ləm tɔ lé m’ndaŋg maktub nee m’ar dee-deḛ gə́ Ala Bɔ-dəwje ɓar dee ləm, unda dee dan kəmee’g ləma, aḭ bada dɔ dee’g mba kar Jeju Kristi lé ləm tɔ.

Loo gə́ killa rea kəm Ja̰’g 21:27

Né gə́ rara gə́ to né gə́ mina̰ əsé ram-dəw gə́ ula rəa dan néndɔlje’g əsé dan néŋgɔmje’g lé d’a kandə mee ɓee’g neelé el. Deḛ gə́ ri dee to mee maktub kəmə’g lə Ŋgonbad lé ɓa d’a kandə keneŋ ya.