Nehemi 9:32 - Maktub gə́ To gə Kəmee

³² Nɛ ɓasinè, əi Ala lə sí, Ala gə́ boo Njesiŋgamoŋ gə́ to ɓəl kədm-kədm, I gə́ aa dɔ manrɔ ləi ləm, Ar məəi ɔr jol-jol ləm tɔ lé Nékəmndooje lai gə́ ra síjeḛ ləm, gə mbaije lə sí ləm, Gə ŋgan-mbaije lə sí ləm, Gə njékinjanéməsje lə sí ləm, Gə njéteggintaje lə sí ləm, Gə bɔ síje-je ləma, Gə koso-dəwje ləi lai ləm tɔ Un kudee mee ndəa’g lə mbaije gə́ Asiri Saar teḛ ne ɓogənè lé Maji kari oo gə́ né gə́ lam ba kəmi’g el.

Nehemi 9:32 ပူးပေါင်းရင်းမြစ်များ

1 Mbaije 8:23

Ǝi Njesigənea̰, Ala lə Israɛlje. Ala gə́ to gə́ i bèe lé godo mee dara’g ləm, gə dɔ naŋg nee ləm tɔ. I aa dɔ manrɔ ləi gə meekarabasur ləi wɔji ne dɔ kuraje ləi gə́ njaa nɔḭ’d gə meendakaḭ lé.

2 Mbaije 15:19

Pul, mbai gə́ Asiri andə mee ɓee’g gə rɔ, ndá Menahem ar Pul larnda as nékwɔji kwɔi-lə-né tɔl-dɔg-loo-rɔ-munda (300) mba karee la ne səa kar ɓeeko̰ ləa to ne njaŋg meḛ jia’g.

2 Mbaije 15:29

Mee ndəa’g lə Péka, mbai gə́ Israɛl lé Tiglat-Pileser, mbai gə́ Asiri ree taa Ijo̰ ləm, gə Abel-Bet-Maaka ləm, gə Janoa ləm, gə Kedes ləm, gə Asɔr ləm, gə Galaad ləm, gə Galile ləma, gə ɓeeje lai gə́ Neptali ləm tɔ ndá yeḛ wa dəwje gə́ keneŋ gə́ ɓər aw sə dee Asiri.

2 Mbaije 17:23

saar loo gə́ Njesigənea̰ tuba Israɛlje nea̰’g ɔm dee əw, to gə́ yeḛ pa ne gə ndu kuraje ləa lai gə́ to njéteggintaje lé. Gelee gə́ nee ɓa d’wa ne Israɛlje ɓər d’aw ne sə dee əw mee ɓee gə́ Asiri ar dee d’isi lée’g neelé saar teḛ ne mee ndəa gən.

2 Mbaije 17:3

Salmanasar, mbai gə́ Asiri ḭ aw rɔ səa ndá tədee rɔ, bèe ɓa Ojee ula dəa nea̰’g ləm, uga lar-gədɓee aree ləm tɔ.

2 Mbaije 17:6

Loo gə́ ləb ko̰ɓee lə Ojee as jinaikara ndá mbai gə́ Asiri taa ɓee gə́ Samari, tɔɓəi yeḛ wa Israɛlje ɓər aw sə dee Asiri. Yeḛ ar dee d’isi Halah ləm, gə mbɔr Habor, baa gə́ Gosan’g ləma, gə mee ɓee-booje’g lə Medəje ləm tɔ.

2 Mbaije 23:29

Mee ndəa gən lé ɓa Parao̰ Neko, mbai gə́ Ejiptə ɔr rɔ aw rɔ gə mbai gə́ Asiri mbɔr baa gə́ Epratə’g lé. Yen ŋga Jojias, mbai teḛ aw iŋgá tɔ. Leegeneeya loo gə́ kəm Parao̰ oso dəa’g ndá yeḛ tɔlee mee ɓee gə́ Megido tɔ.

2 Mbaije 25:7

Ŋgalə Sedesias lé deḛ tḭja gwɔs dee kəmee’g ya, tɔɓəi deḛ tɔr guburu kəm Sedesias ləm, deḛ təa gə kúla lar gə́ kas ləm tɔ, d’aw səa Babilɔn.

Esdras 4:10

gə ges koso-dəwje gə́ raŋg gə́ Osnapar, dəw gə́ boo gə́ to njeriɓar lé wa dee gə́ ɓər ree sə dee unda dee mee ɓee-boo’d gə́ Samari gə looje gə́ raŋg gə́ to kel tura-baa’g nee ləm tɔ.

Esdras 4:2

Ndá deḛ ree rɔ Jorobabel’g gə rɔ deḛ gə́ to mbai dɔ gel-bɔje lə dee lé, d’ula dee pana: Jeḛ ndigi ra sə sí kəi gə́ seḭ aw raje lé na̰’d. Mbata jeḛ kara j’wa Ala meḛ sí’g to gə́ seḭ raje bèe ləm, jeḛ j’inja nékinjanéməsje j’aree ləm tɔ, un kudee mee ndəa gə́ Esar-Hado̰, mbai gə́ Asiri ree ne sə sí loo gə́ nee’g lé.

Esdras 9:13

Nɛ gə goo néje lai gə́ teḛ dɔ sí’g mbata lə néra gə́ yèr lə sí, gə ta gə́ boo gə́ wa dɔ sí lé əi Ala lə sí, i ar bo̰ néra sí ɔs ta sí’g gə goo bula lə kaiya ra sí el, ar ɓasinè kara i ŋgəm njé gə́ na̰je ar dee teḛ dan né gə́ bèe’g tɔ.

Nehemi 1:5

Ma m’pana: Ǝi Njesigənea̰, Ala, i gə́ to mbai dɔ dara ləm, i gə́ to Ala gə́ boo gə́ to ɓəl kədm-kədm ləm, i gə́ aa dɔ manrɔ ləi kər-kər ləma, i gə́ to njekookəmtondoo lə deḛ gə́ d’undai dan kəm dee’g d’aa ne dɔ godnduije kər-kər ləm tɔ lé

Pakɔsje 47:2

Seḭ koso-dəwje lai lé Waje ji sí rag-rag! Ɔrje ne ndu sí gə́ tar wəl Gə rɔlel gə́ rɔ Ala’g lə sí ya.

Pakɔsje 66:3

Ulaje Ala pajena: Néraije lé to ɓəl kədm-kədm, Njéba̰je ləi lé kara bɔr bèli Mbata boo-siŋgamoŋ ləi ya.

Pakɔsje 66:5

Gə́ reeje, aaje néraje lə Ala ooje! Loo gə́ yeḛ ra né ar dəwje ndá Yeḛ to ɓəl kədm-kədm.

Teḛ-Raga 18:8

Moyis ndaji ta néje lai gə́ Njesigənea̰ ra gə Parao̰ gə njé gə́ Ejiptə mbata lə Israɛlje ləm, gə némeekonje lai gə́ teḛ dɔ dee’g rəbə ləma, gə rəbee gə́ Njesigənea̰ ɔr dee ne keneŋ ləm tɔ, ar məmeeje oo.

Esai 9:6

Ko̰ɓee ləa a kḭ dɔ maree’d gə́ kédé-kédé ləm, Meelɔm gə́ ka̰ kalimbai lə Dabid Gə ka̰ ɓeeko̰ ləa lé rudee a kun ɗiao el ləm tɔ. Néra gə́ danasur Gə né gə́ to gə dɔ najee lé ɓa D’a karee to ne njaŋg ləm, D’a gədee ne ləm tɔ Un kudee ɓasinè saar-saar gə no̰: Yee ɓa ŋgur né gə́ ra Njesigənea̰ gə́ njeboo-néje lé A karee ra née ya.

Loo gə́ killa rea kəm Daniel’g 9:4

Ma m’ra tamaji ta Njesigənea̰ Ala’g ləm, tɔɓəi m’tɔr ndum m’aree togə́bè m’pana: Ǝi Mbaidɔmbaije, Ala gə́ boo gə́ to ɓəl kədm-kədm lé, i gə́ aa dɔ manrɔ ləi kər-kər ləm, oo ne kəmtondoo lə deḛ gə́ d’undai dan kəm dee’g d’aa ne dɔ godnduije kər-kər ləm tɔ!

Loo gə́ killa rea kəm Daniel’g 9:6

Ta gə́ kuraje ləi gə́ to njéteggintaje pa gə rii d’ar mbaije lə sí ləm, gə ŋgan-mbaije lə sí ləm, gə bɔ síje-je ləma, gə koso-dəwje lai mee ɓee’g ləm tɔ lé jeḛ j’unje mbi sí dɔ’g rəw.

Loo gə́ killa rea kəm Daniel’g 9:8

Ǝi Mbaidɔmbaije, rɔkul wa kəm síjeḛ ya, gə kəm mbaije lə sí ləm, gə kəm ŋgan-mbaije lə sí ləma, gə kəm bɔ síje-je ləm tɔ mbata jeḛ n’raje kaiya j’ɔsje ne ta ləi rəw ya.

Ləbije 26:18

Ɓó lé seḭ ooje ta ləm el ya ɓəi ndá m’a kar bo̰ néra sí ɔs ta sí’g unda nje gə́ kédé as gɔl siri mbata lə kaiyaje lə sí.

Ləbije 26:21

Ɓó lé seḭ ɔsmje rəw ləm ndigije kooje ta ləm el ləm tɔ ndá m’a kar bo̰ néra sí ɔs ta sí’g unda nje gə́ kédé as gɔl siri gə goo kaiyaje lə sí.

Ləbije 26:24

m’a kar bo̰ néra sí ɔs ta sí’g unda nje gə́ kédé as gɔl siri mbata kaiyaje lə sí ləm tɔ.

Ləbije 26:28

m’a kɔs sí rəw gə oŋg gə́ to ɓəl kədm-kədm, tɔɓəi m’a kar bo̰ néra sí ɔs ta sí’g unda nje gə́ kédé as gɔl siri mbata kaiyaje lə sí ləm tɔ.

Tel tura Godndu 7:12

Ɓó lé seḭ ilaje koji dɔ ndukunje’g nee ləm, ɓó lé seḭ aaje dɔ dee gə mba ra née ləm tɔ ndá Ala lə sí gə́ Njesigənea̰ a kaa dɔ manrɔ ləa kər-kər gə mbata lə sí ləm, gə dɔ koo kəmtondoo gə́ yeḛ man ne rəa ar bɔ síje-je lé ləm tɔ.

Tel tura Godndu 7:13

Yeḛ a kunda sí dan kəmee’g ləm, yeḛ a tɔr ndia dɔ sí’g ləma, a kar sí ɔsje goo na̰ gə́ kédé-kédé ləm tɔ, yeḛ a tɔr ndia dɔ ŋgan síje gə́ meḛ sí’g ləm, gə dɔ kandə néje gə́ dɔ naŋg’d lə sí: kó ləm, mán-nduú ləma, gə ubu ləm tɔ, a tɔr ndia dɔ nékulje’g lə sí gə́ lam-lam əsé gə́ boi-boi kar dee d’oji na̰ mee ɓee gə́ yeḛ man ne rəa ar bɔ síje-je gə mba kar sí lé tɔ.

Tel tura Godndu 7:21

Maji kar sí undaje bala no̰ dee’g el, mbata Ala lə sí gə́ Njesigənea̰ si mbuna sí’g, yeḛ to Ala gə́ boo gə́ to ɓəl kədm-kədm.

Tel tura Godndu 7:9

Bèe ndá maji kar sí gərje gao to gə́ Ala lə sí gə́ Njesigənea̰ lé yeḛ nja to Ala gə́ gəd ya. Ginka dəwje gə́ d’undá dan kəm dee’g d’aa ne dɔ ndukunje ləa kər-kər lé, yeḛ to Ala gə́ aar njaŋg dɔ manrɔ’g ləa ləm oo kəmtondoo lə dee ləm tɔ saar loo tɔl-dɔg (1.000) ya.