Nehemi 5:5 - Maktub gə́ To gə Kəmee

⁵ Lé bèe ya kara darɔ sí to asəna gə darɔ ŋgako̰ síje ya ləm, ŋgan síjeḛje to d’asəna gə ŋgan dee-deḛje ya ləm tɔ, nɛ aa ooje, jeḛ j’arje ŋgan síje gə́ diŋgam gə njé gə́ dené ra kula ɓər tɔɓəi ŋgan síje gə́ dené gə́ na̰je tel to ne ɓərje mba̰ tɔ, jeḛ kara siŋga sí godo ləm, ndɔje lə sí gə ndɔ-nduúje lə sí to ka̰ njé gə́ raŋg ləm tɔ.

Nehemi 5:5 ပူးပေါင်းရင်းမြစ်များ

Gḭ-Néje 29:14

Yen ŋga Laba̰ pana: Tɔgərɔ ya, i to siŋgarɔm ləm gə dakasrɔm ya ləm tɔ. Ndá Jakob si rɔ Laba̰’g as naḭ kára doŋgɔ.

Gḭ-Néje 37:27

Gə́ reeje, ar sí ndogeeje gə Ismaelje ɓó ar sí n’tɔleeje el mbata yeḛ to ŋgoko̰ sí gə́ to darɔ sí ya. Yen ŋga ŋgakea̰je taa ta ləa lé rəgm.

2 Mbaije 4:1

Dené kára mbuna denéje’g lə njéteggintaje ra ndòo rɔ Elije’g pana: Ŋgabmje gə́ to kura ləi lé wəi, nɛ i gər gao to gə́ yeḛ lé to njekwa Njesigənea̰ mée’g. Nɛ njeɓaŋ ree mba taa ŋganəmje gə́ joo gə mba kwa dee gə́ ɓərje ləa.

Gosota-Kəmkàrje 22:7

Bao lé o̰ ɓee dɔ njéndooje’g ləm, Yeḛ gə́ tona né lé tel to ɓər lə yeḛ gə́ njekaree toná né lé tɔ.

Esai 50:1

Njesigənea̰ pa togə́bè pana: Ɓó lé m’tuba ko̰ síje ndá See maktub tḭ-na̰ gə́ m’tubá ne lé ɓa to ra wa. Ulamje see na̰ ɓa mbuna njéɓaŋje’g ləm lé M’wa sí m’aree wa. Aa ooje, ɓó lé seḭ awje ɓər ndá Néra kori-korije lə sí ɓa gə́ gelee ləm, Ɓó lé m’tuba ko̰ síje ndá Kaiyaje lə sí ɓa gə́ gelee ləm tɔ.

Esai 58:7

Ar dəw gə́ ɓó tɔlee muru ləi o̰ səi ləm, Ar njenékəmndoo gə́ kəi-kula-dəa godo aw mee kəi’g ləi ləm, Ɓó lé i oo dəw gə́ aw kudee dum ba ndá Aree né ula rəa’g ləma, Tel giri ila ar yeḛ gə́ to tana səi lé el ləm tɔ.

Matiyo 18:25

Nékoga ɓaŋgee dəa’g godo ndá ɓéeje un ndia ar dee gə mba kar dee d’wa darəa-yeḛ gə dené ləa gə ŋganeeje gə néje ləa lɔd ndogo dee mba kya̰ laree kuga ne ɓaŋgee.