Nehemi 3:5 - Maktub gə́ To gə Kəmee

⁵ mbɔr dee-deḛ’g lé dəwje gə́ Tekoa ɓa ra kula keneŋ nɛ dəwje lə dee gə́ boo boo ɓa d’oso kul no̰ njékaa dɔ kulaje’g lə dee neelé el.

Nehemi 3:5 ပူးပေါင်းရင်းမြစ်များ

2 Samel 14:2

Ndá yeḛ ula kula Tekoa ar dee saŋg dené kára gə́ to njekəmkàr aree ree rəa’g ndá Joab ulá pana: Maji kari ra rɔi asəna gə njekwa ndòo yoo bèe. I a kula kubu-kwa-ndòo rɔi’g ləm, i a ndəm ubu el asəna gə dené gə́ wa ndòo yoo ləw ba bèe ləm tɔ.

2 Sôrta Gḭka Israɛlje 11:6

Yeḛ ila ndògo-bɔrɔ gugu ne dɔ Betlehem, gə Etam, gə Tekoa,

Nehemi 3:27

Goo dee-deḛ’g lé njé gə́ Tekoa ɓa ra kula gɔl dəb ndògo-bɔrɔ gə́ raŋg loo gə́ wɔji dɔ kəi-kaar-kɔgərɔ gə́ duu dɔ loo gə́ teḛ raga saar ndògo-bɔrɔ gə́ dɔdərloo’g.

Nehemi 3:4

Mbɔr dee-deḛ’g ndá Meremot, ŋgolə Uri gə́ to ŋgolə Hakos ɓa ra kula gɔl ndògo-bɔrɔ ləm, mbɔr dee-deḛ’g ndá Mesulam, ŋgolə Berekia gə́ to ŋgolə Mesejabeel ɓa ra kula ləm, mbɔr dee-deḛ’g tɔɓəi Sadɔk, ŋgolə Baana ɓa ra kula keneŋ ləma,

Nehemi 3:6

Jojada, ŋgolə Pasəa, gə Mesulam, ŋgolə Besodia, deḛ lé gɔl tarəwkɔg gə́ ləw. Deḛ dolè dəa ləm, deḛ tula tabidi-rəwje keneŋ ləma, d’ila pəgərə-larje gə kageeje keneŋ ləm tɔ.

Jeremi 27:12

Ma m’ula Sedesias, mbai gə́ Juda taje neelé togə́bè ya to m’pana: Ulaje gwɔb sí taaje ne néməməna̰ lə mbai gə́ Babilɔn osoje ne gelee’g ləm, gə gel koso-dəwje’g ləa ləm tɔ ndá a síje ne kəmba ya.

Jeremi 27:2

Njesigənea̰ ulam ta togə́bè pana: Ra kúla larje ləm, gə néməmənaje ləm tɔ ɔm dee gwɔbi’g.

Jeremi 27:8

Ɓó lé ginkoji dəwje əsé ɓeeko̰ mbad koso gel Nebukadnesar, mbai gə́ Babilɔn ləm, d’ula gwɔb dee taa ne néməməna̰ lə mbai gə́ Babilɔn el ləm tɔ ndá m’a kar bo̰ néra ginkoji dəwje lai neelé ɔs ta dee’g gə kiambas ləm, gə ɓoo-boo ləma, gə yoo-koso ləm tɔ saar kar dee d’udu bo̰. Njesigənea̰ ɓa pa bèe.

Jeremi 6:1

Seḭ Bḛjamije, undaje loo teḛje Mee ɓee gə́ Jerusalem. Imje to̰to̰ mee ɓee gə́ Tekoa ləm, Waje nékwɔji loo-rɔ tar mee ɓee Gə́ Bet-Hakerem ləm tɔ, Mbata némeeko̰ ḭ dɔgel si ree To nétuji gə́ boo.

Amɔs 1:1

Taje lə Amɔs gə́ to yeḛ gə́ kára mbuna njékulbadje’d gə́ Tekoa lé. Némḭdije gə́ yeḛ oo wɔji dɔ Israɛl mee ndəa gə́ Ojias to ne mbai gə́ Juda ləm, Jeroboam, ŋgolə Joas to ne mbai gə́ Israɛl ləm tɔ lé ləb joo ɓad ɓa kar naŋg yə ɓəi lé.

Matiyo 11:29

Ulaje dɔ sí ləm, taaje néməməna̰ ləm ləma, taaje ne ta ləm gə́ m’wɔji sí lé ndaŋgje dɔɓəŋgərə sí’g ləm tɔ mbata ma m’to dəw gə́ kul ləm, m’ula dɔm m’aw yururu ləm tɔ. Togə́bè ɓa seḭ a kiŋgaje loo-kwa-rɔ sí keneŋ.

Néra Njékaḭkulaje 15:10

Bèe ndá see ban ɓa seḭ aḭje mee Ala ɓasinè ulaje ne nékodo gə́ wɔi gə́ dum dɔ ka síje gə dɔ síjeḛ’g lé gwɔb njékwakiláje’g bèe ɓəi wa.

1 Njé gə́ Kɔrḭtə 1:26

Ŋgakɔmje, tenje ooje, mbuna sí-seḭ gə́ yeḛ ɓar sí neelé njékəmkàrje gə́ wɔji dɔ kəmkàr lə dəwje lé el ləm, njésiŋgamoŋje kara bula el ləma, dəwje gə́ boo-boo kara bula el ləm tɔ.

Njéga̰g-Rəwtaje 5:23

Kura lə Njesigənea̰ gə́ dara pana: Ilaje ndɔl dɔ ɓee gə́ Meroj’g, Ilaje ndɔl ya, ilaje ndɔl dɔ dəwje’g ləa, Mbata deḛ ree la gə Njesigənea̰ el ləm, Deḛ la gə Njesigənea̰ mbuna bao-rɔje’g el ləm tɔ.