Nahum 3:15 - Maktub gə́ To gə Kəmee

¹⁵ Nɛ lé neelé ɓa pər a roo sí keneŋ ləm, Kiambas a tuji sí pugudu ləma, A tuji sí to gə́ beedéje bèe ləm tɔ. Maji kar sí toje dɔ na̰’d rib-rib to gə́ ndirikɔrje bèe ləm, Toje dɔ na̰’d rib-rib to gə́ beedéje bèe ləm tɔ!

Nahum 3:15 ပူးပေါင်းရင်းမြစ်များ

Esai 66:15

Mbata aa ooje, Njesigənea̰ si ree dan pər’g ləm, Pusu-rɔje ləa d’aiŋgwɔd to gə́ lel-mal bèe ləm tɔ. Yeḛ ar oŋg ləa taa pər gəgəgə ləm, Ŋgawjia gə́ ula lé to asəna gə ndo̰ pər gə́ o̰ bilim-bilim bèe ləm tɔ.

Esai 66:16

Pər ɓa Njesigənea̰ gaŋg ne rəw-taje ləa ləm, Kiambas ləa ɓa yeḛ ar bo̰ néra dəwje ɔs ne ta dee’g ləm tɔ. Deḛ gə́ Njesigənea̰ a tɔl dee lé D’a bula digi-digi.

Jeremi 51:14

Njesigənea̰ gə́ njeboo-néje Maa̰ rəa gə rəa-yeḛ nja pana: Tɔgərɔ, m’a kar dəwje Taa rɔ sí pəl-pəl to gə́ beedéje bèe Ndá deḛ d’a kur kó-rɔ wəl-wəl dɔ sí’g.

Joɛl 1:4

Né gə́ beedé-ma̰daŋje d’ya̰ ndá Beedé-booje d’o̰ lai, Né gə́ beedé-booje d’ya̰ ndá Baigo̰je d’o̰ lai, Né gə́ baigo̰je d’ya̰ ndá Lámje to̰ lém-lém tɔ.

Joɛl 2:25

Tɔgərɔ ya, néje gə́ beedéje Gə baigo̰je gə lámje gə ma̰daŋje Gə́ to bao-rɔje ləm tuji mee ləbje gə́ kédé lé M’a tel ne kar sí gogo.

Amɔs 7:1

Némḭdi gə́ Mbaidɔmbaije gə́ Njesigənea̰ tɔjim am m’oo ɓa nee: Aa ooje, yeḛ ra beedéje gə́ bula dèm-dèm loo gə́ barkəmko uba gogo sigi lé, to da-kó gə́ uba goo kó gə́ d’inja d’ar mbai kédé lé.

Nahum 2:13

Toboḭ lé to̰ da tɔlee gaŋgee mbidi-mbidi mbata lə ŋganeeje ləm, Gə mbata lə ko̰ toboḭje ləm tɔ. Yeḛ ɔm nékwaje ləa duu loo-tée’g aree rusu tub-tub tɔ.

Nahum 3:13

Aa ooje, koso-dəwje lə sí to d’asəna gə denéje gə́ mee ɓee’g lə sí ləm, Tarəwkɔgje lə ɓee lə sí teḛ to tag bə̰dəŋ no̰ njéba̰je’g lə sí ləma, Pər roo pəgərə tarəwje lə sí ləm tɔ.

Soponi 2:13

Yeḛ a kula jia par gə́ dɔgel ndá Yeḛ a tuji Asirije ləm, Yeḛ a kar ɓee gə́ Ninibə tel to nduba piu-piu ləma, Naŋg ləa a tudu kurum-kurum asəna gə dɔdilaloo bèe ləm tɔ.