Nahum 1:10 - Maktub gə́ To gə Kəmee

¹⁰ Mbata deḛ to d’asəna gə kunje gə́ d’ula na̰’d siŋ-siŋ ləm, To d’asəna gə dəwje gə́ kido tɔl dee ləm tɔ Ndá pər a roo dee dula-dula To gə́ mu gə́ tudu kurum-kurum bèe.

Nahum 1:10 ပူးပေါင်းရင်းမြစ်များ

2 Samel 13:28

Absalɔm un ndia ar kuraje ləa pana: Ooje maji, loo gə́ kido tɔl Amno̰ ar rəa lelee aree aw al rəa mbata kido ɓa m’a kula si pana: Tɔlje Amno̰! Ndá tɔleeje ya ɓó ɓəlje el, see to ma ɓa gə́ njekun ndum kar sí el wa. Aarje njaŋg ɓó gə waje diŋgam meḛ sí’g to!

Pakɔsje 118:12

Deḛ lé d’aḭ dɔm sub to gə́ tə̰jije bèe ləm, D’wəi misi to gə́ pər gə́ kṵji bèe ləm tɔ. Nɛ mbɔl dɔ ri Njesigənea̰ ɓa m’ḭ m’gaŋg dee ne mbidi-mbidi ya.

Pakɔsje 68:2

Ala ḭta ndá njéba̰je ləa sanéna̰ kad-kad ləm, Njétḭ səaje lé kara d’aḭ ne nea̰’g ləm tɔ!

Teḛ-Raga 15:7

Mbɔl dɔ boo-ronduba ləi gə́ dum dɔ loo lé Deḛ gə́ d’oma̰ səi ndá i ɓugu dee naŋg, I rɔg oŋg ləi piriŋ ila tar Ndá yeḛ roo dee dula-dula Asəna gə ləm mu bèe tɔ.

Teḛ-Raga 5:12

Dəwje neelé sanéna̰ gə loo-loo mee ɓee gə́ Ejiptə mba kwa ləm muje ŋga ɓa tor mu’g.

Esai 27:4

Ma lé oŋg godo məəm’g, Nɛ ɓó lé m’iŋga loo mba rɔ gə kunje gə kun pɔrɔrɔje ndá M’a kaw rɔ sə dee roo deḛ lai dula-dula.

Esai 47:14

Aa ooje, deḛ to d’asəna gə ləm mu Ndá pər a roo dee. Deḛ d’a kaskəm kaji rɔ dee Dan ndo̰ pər gə́ teḛ bilim-bilim’g el, A to gə́ kɔr pər gə́ dəw a ndibi el ləm, A to pər gə́ dəw a si ta’g el ləm tɔ.

Esai 5:24

Gelee gə́ nee ɓa to gə́ ndo̰ pər o̰ ne ləm mu ləm, Pər o̰ ne mu gə́ tudu ləm tɔ lé Ŋgira dee a to to gə́ né gə́ ndum bèe ləm, Pudu dee a sané pá asəna gə kor bèe ləm tɔ, Mbata deḛ d’ə̰ji godndu Njesigənea̰ gə́ njeboo-néje bəḭ-bəḭ ləm, Deḛ d’oo tapa Njemeenda lə Israɛlje gə́ né gə́ to kḛji kəm dee’g ləm tɔ.

Esai 56:12

Gə́ reeje, m’a kaw saŋg mán-nduú Ndá jeḛ j’a kaije nékai gə́ mḭ! Bèlè kara j’a ra togə́bè ya ɓəi ləm, J’a kaije yaa̰ karee ur dɔ yeḛ gə́ nee ya ɓəi ləm tɔ!

Esai 9:18

Gə goo oŋg lə Njesigənea̰ gə́ njeboo-néje lé ɓa Pər taa ne ɓee pəl-pəl Ar koso-dəwje tel to d’as ne na̰ Gə kir gə́ pər o̰ bèe, Dəw kára kara oo kəmtondoo lə ŋgokea̰ yá̰ ne el.

Jeremi 51:39

Loo gə́ meḛ dee nuŋga kəd-kəd ndá M’a kar dee d’ai né ndá M’a karee ra dee kar dee D’ya̰ rɔ dee yag dan rɔlel’g ləm, Kar dee d’oso gə ɓi gə́ to gə no̰ ɓó D’a ndel dɔ ɓi’g lé gogo el ŋga ləm tɔ. Njesigənea̰ ɓa pa bèe.

Jeremi 51:57

M’a kar nékai ra njékaa dɔ ɓeeko̰je ləa ləm, gə njékəmkàrje ləa ləm, gə njéguburuɓeeje ləa ləm, gə mbaije ləa ləma, gə bao-rɔje ləa ləm tɔ. D’a koso gə ɓi gə́ to gə no̰ pərəg ɓó d’a ndel dɔ ɓi’g neelé el ŋga. Mbai gə́ ria lə Njesigənea̰ gə́ njeboo-néje lé ɓa pa bèe.

Misee 7:4

Dəw gə́ maji ur dɔ dee’g mbuna dee’g lé To asəna gə kun pɔrɔrɔ bèe ləm, Dəw gə́ danasur ur dɔ dee’g lé Majel ur dɔ kun’g ləm tɔ. Ndɔ gə́ bo̰ néra sí a kɔs ta sí’g Gə́ njéteggintaje lə sí d’ila mberee lé nai dəb ba ŋga. Yee gə́ bèe ɓa seḭ lai meḛ sí to ne kəgəgə mba̰.

Nahum 3:11

Seḭ gə́ Ninibə ya kara némeeko̰ a ra sí to gə́ kido bèe Kar sí iyaje ne rɔ sí ləm, Seḭ ya kara a saŋgje njo̰loo kula dɔ sí keneŋ Taaje ne rɔ sí ji njéba̰je’g lə sí ləm tɔ.

1 Samel 25:36

Abigayil tel ree rɔ Nabal’g. Nɛ aa oo, yeḛ ra naḭ gə́ boo mee kəi’g ləa asəna gə naḭ gə́ ka̰ mbai bèe. Mee Nabal lelee ləm, kido rəa yaa̰ ləm tɔ. Abigayil ulá ta né gə́ lam əsé gə́ boi kára kara el saar ar loo àr.