Matiyo 6:10 - Maktub gə́ To gə Kəmee

¹⁰ Maji kar ɓeeko̰ ləi taa naŋg nee pəl-pəl ləma, Maji kar deḛ gə́ dɔ naŋg nee ra torndui d’aree ɔr rɔd to gə́ deḛ ra dara ləm tɔ.

Matiyo 6:10 ပူးပေါင်းရင်းမြစ်များ

Nehemi 9:6

I nja ɓa to Njesigənea̰, i nja kára ba kiao, I to njekunda dara gə dara gə́ to dɔ na̰’d dɔ na̰’d ləm, Gə boo-nékundaje gə́ to keneŋ ləm, Gə naŋg gə néje lai gə́ to keneŋ ləma, Gə baa-boo-kad gə néje lai gə́ to keneŋ ləm tɔ. I nja ɓa ar néje lai neelé d’aw kəmba ləm, Ar boo-nékundaje gə́ dara d’unda barmba nɔḭ’g ləm tɔ.

Pakɔsje 2:6

Yeḛ pana: Yeḛ gə́ n’undá gə́ mbai lé Neḛ nja n’wa dəa gə ubu. Dɔ mbal’g lə neḛ gə́ Sio̰ gə́ to gə kəmee doi!

Pakɔsje 40:8

Yen ɓa ma m’pana: Aa oo, m’isi m’ree (Deḛ ndaŋg ta ləm mee maktub gə́ kə́ na̰’d mber-mber’g)

Esai 2:2

Ndɔ gə́ rudu ndəaje a gə kun ɗiao ndá Dɔ mbal gə́ wɔji dɔ kəi lə Njesigənea̰ lé D’a tel tum ginee dɔ mbalje gə́ tar. Yeḛ a to tar dɔ dɔdərloo’g Ndá ginkoji dəwje gə raŋg lai d’a kaḭ kaw keneŋ.

Jeremi 23:5

Njesigənea̰ pana: Aa ooje, mee ndɔje gə́ a gə ree lé M’a kar barkəm Dabid Gə́ to njera né gə dɔ najee uba sigi, Yeḛ a ko̰ɓee gə́ mbai ləm, Yeḛ a teḛkɔr ləm, Yeḛ a gaŋg rəwta gə dɔ najee ləma, A ra né gə goo rəbee mee ɓee’g ləm tɔ.

Loo gə́ killa rea kəm Daniel’g 2:44

Mee ndəaje’g lə mbaije neelé Ala gə́ njesi mee dara’g a tum gin ɓeeko̰ gə́ a tuji nda̰ el ləm, a koso ji dəwje gə́ raŋg’d kar dee d’on dəa el ləm tɔ. Ɓeeko̰ neelé a təd ɓeeko̰je neelé lai kar dee d’udu guduru nɛ yee nja ɓa a nai gə ləbee-ləbee saar-saar gə no̰.

Loo gə́ killa rea kəm Daniel’g 7:13

Loo gə́ né ram gə́ mḭdi loondul’g lé ma m’aa loo ndá aa oo, dəw kára gə́ to tana gə ŋgon dəw bèe ree dan loo-kil’g lə ndi. Yeḛ aw pər gə́ rɔ Dəw gə́ ɓuga yaa̰’g lé ndá d’aree ree mbɔree’g dəb ya.

Loo gə́ killa rea kəm Daniel’g 7:27

Ko̰ɓee ləm, gə dum dɔ loo ləma, gə boo-ronduba lə ɓeeko̰je gə́ dɔ naŋg neelé ləm tɔ lé d’a kar koso-dəwje gə́ to njémeendaje lə Njekurdɔloo lé tɔ. Ko̰ɓee ləa to ko̰ɓee gə́ to gə no̰ ləm, njédumdɔlooje lai d’a ra né karee ləma, d’a kila ne ŋgonkoji dəa’g ləm tɔ.

Jakari 9:9

Seḭ gə́ Sio̰ lé alje rɔ sí! Seḭ gə́ Jerusalem kara ɔsje pa rɔlel to! Aa ooje, mbai lə sí si aw gə́ dɔ sí’g nee, Yeḛ to njemeekarabasur ləm, Gə njedumdɔloo ləm tɔ, Yeḛ to dəw gə́ kul yururu gə́ uba dɔ mulayḛ̀je gao si’g, To ŋgon mulayḛ̀je gə́ aḭ goo kea̰je’g ɓa yeḛ ubá.

Matiyo 12:50

Mbata nana ɓa gə́ ra torndu Bɔm gə́ si dan dara’g dana bab ndá yeḛ ɓa gə́ ŋgokɔm ləm, gə kɔnanəm ləma, gə kɔmje ləm tɔ.

Matiyo 16:28

Ma m’ula sí təsərə, njé gə́ na̰je mbuna deḛ gə́ d’isi neelé d’a kwəi el nja ɓəi ɓa d’a koo Ŋgon-dəw ree asəna gə mbai bèe gə kəm dee.

Matiyo 26:42

Yeḛ sa rəa aw ɔm gə́ gɔl joo ndá yeḛ ra ndòo ta Ala’g pana: Bɔm, ɓó lé to kəm kari taa ŋgo-kai meeko̰ nee jim’g lal kam m’ai lé el ndá m’a ra torndui karee ɔr rɔd ya.

Matiyo 3:2

Maji kar sí waje ndòo rɔ sí dɔ kaiya’g lə sí mbata ɓeeko̰ gə́ dara lé nai dəb ba ŋga.

Matiyo 4:17

Mee ndəa’g neelé Jeju un kudu kila mber pana: Maji kar sí waje ndòo rɔ sí dɔ kaiya’g lə sí mbata ɓeeko̰ gə́ dara lé nai dəb ya.

Matiyo 7:21

Dəwje gə́ ɓar rim pana: Mbai, Mbai lé d’a teḛ ɓeeko̰ gə́ dara lai el. Nɛ yeḛ gə́ ra torndu Bɔm gə́ sí dara aree ɔr rɔd ndá yeḛ nja ɓa a teḛ keneŋ.

Mark 11:10

Maji kar ndutɔr nai gə ɓeeko̰ gə́ si ree, to ɓeeko̰ lə ka síjeḛ Dabid. Hosana par gə́ sém looje gə́ tar lé tɔ.

Mark 3:35

Mbata dəw gə́ rara ɓa ra torndu Ala lé aree ɔr rɔd ndá yeḛ ɓa gə́ ŋgokɔm gə́ diŋgam əsé kɔnanəm gə́ dené əsé kɔmje gə́ njekojim tɔ.

Lugu 19:11

D’isi d’oo taje neelé ndá Jeju ila gosota gə́ raŋg keneŋ tɔɓəi mbata yeḛ si mbɔr Jerusalem’g dəb, nɛ deḛ la̰ji ta meḛ dee’g pana: Ɓeeko̰ lə Ala lé a teḛ wai ŋga.

Lugu 19:38

Deḛ pana: Maji kar dɔkaisəgərə nai gə mbai gə́ ree gə ri Mbaidɔmbaije. Maji kar meekulɔm nai gə deḛ gə́ d’isi mee dara’g ləm, maji kula rɔnduba dɔ Ala’g ləm tɔ.

Lugu 22:42

Bɔm, ɓó lé to gə́ məəi ndigi ndá ɔs ŋgo-kai-né lé rɔm’g rəw gə́ raŋg! Nɛ ra né gə́ məəi-i nja ɓa wɔji ɓó to gə́ məəm-ma ɓa wɔji el.

Tagə́maji gə́ Ja̰ ndang 4:34

Jeju ula dee pana: Ra torndu yeḛ gə́ njekulam gə kɔr suna kula lé yee ɓa gə́ nésɔm ya.

Tagə́maji gə́ Ja̰ ndang 6:40

Tɔgərɔ ya, né gə́ mee Bɔm wɔji lé ɓa to nee: Nana ɓa gə́ oo Ŋgon lé ɓa ɔm mée dəa’g ndá a si gə kəməgə́ gə no̰ lé ləm, m’a karee unda loo teḛ loo-yoo’g ndɔ gə́ rudu’g lé ləm tɔ.

Tagə́maji gə́ Ja̰ ndang 7:17

Dəw gə́ rara ɓa lé wa mée kɔgərɔ gə mba ra torndia lé ndá ta kɔr ləm gə́ m’ɔr lé m’ɔr gə ka̰ Ala əsé m’ɔr gə́ kama kara yeḛ a gər gao ya.

Néra Njékaḭkulaje 13:22

Tɔɓəi loo gə́ yeḛ uba Sawul yá̰ ndá yeḛ tel ɔr Dabid gə́ mbai lə dee aree ɔr goo taree pana: Neḛ n’iŋga Dabid, ŋgolə Isai dəw gə́ ḭ mee neḛ’g gə́ a ra torndu neḛ karee ɔr rɔd.

Néra Njékaḭkulaje 21:14

Loo gə́ yeḛ ya̰ rəw ar sí j’ula ta mée’g el lé ndá jeḛ j’yá̰ tɔ, m’pa ne pana: Maji karee to gə goo rəw gə́ Mbaidɔmbaije wɔji mée’g ya.

Néra Njékaḭkulaje 22:14

Yeḛ ulam pana: Ala lə ka síjeḛ ɔri undai gə kəmee gə mba kari gər torndia ləm, gə mba kari oo Njemeekarabasur lé ləma, gə mba kari oo ta gə́ təa’g ləm tɔ.

Njé gə́ Rɔmə 12:2

Ndaji kəm dəwje gə́ d’isi dɔ naŋg nee ɓasinè el, nɛ maji kar sí tel toje dəwje gə́ sigi gə goo takə̰ji gə́ sigi gə́ to meḛ sí’g, ɓó gə mba sí kar go̰je ne né gə́ mee Ala wɔji gə́ to maji gə mba ra ləm, gə a ta kəmee ləma, gə a to maji kɔr njal ləm tɔ.

Njé gə́ Epesə 6:6

Raje togə́bè loo gə́ d’oo sí gə kəm dee əsé gə mba taa ne kəm dəwje goo kára ba el nɛ raje to gə́ kuraje lə Kristi gə́ ra torndu Ala lé gə meendakaḭ.

Njé gə́ Kolosə 1:13

Yeḛ nja wa sí wɔgədɔ ɔr sí ji siŋgamoŋ ka̰ loondul gə́ ndul njudu-njudu ləm, yeḛ odo sí ɔm sí ɓeeko̰’g lə Ŋgonee gə́ to ŋgonkəmee lé ləm tɔ.

Njé gə́ Kolosə 1:9

Gelee nee ɓa, jeḛ kara un kudee mee ndəa gə́ taree oso mbi sí’g lé jeḛ n’lal ra tamaji ta Ala’g lé mbata lə sí el. Jeḛ n’kwɔiee mba kar sí gərje né gə́ mée ɓa wɔji lé kɔrje ne suna njal gə goo kəmkàr gə gosonégər gə́ ka̰ ndil gə́ rusu meḛ sí njḭ-njḭ lé.

1 Njé gə́ Tesalonikə 4:3

Né gə́ mee Ala ndigi lé to mba kar sí toje dəwje gə́ meḛ sí àr ŋgad-ŋgad ləm, to mba kar sí ɔgje rɔ sí dɔ mɔdkaiya’g ləm tɔ,

1 Njé gə́ Tesalonikə 5:18

raje oiyo dɔ néje’g lai mbata yee ɓa Ala wɔji kar sí-seḭ gə́ síje gin Kristi’g lé raje.

Ǝbrəje 1:14

See kuraje lə Ala gə́ dara lé to ndilje gə́ njéra né kar Ala gə́ yeḛ ula dee mba kar dee ra kula la ne gə deḛ gə́ d’a gə kiŋga kaji lé el wa.

Ǝbrəje 10:36

Mbata kai meḛ sí sam-sam ɓa gə́ kuma̰ mba kar loo gə́ seḭ raje torndu Ala areeje ɔr rɔd mba̰ ɓa seḭ a kiŋgaje ne né gə́ yeḛ un ndia mba kar sí lé ɓəi.

Ǝbrəje 10:7

Yen ɓa ma m’pana: Aa oo, m’isi m’ree. (Deḛ ndaŋg ta ləm mee maktub gə́ kə́ na̰’d mber-mber) Ǝi Ala lé, mba ra torndui karee ɔr rɔd ya.

Ǝbrəje 13:21

maji karee gɔl sí gə mba kar sí asjekəm ra né gə́ maji gə́ gə ria-ria mba tɔl ne ta torndia bém ləm, maji karee ra kula meḛ sí’g to gə́ mée ndigi gin Jeju Kristi ləm tɔ ndá maji kula rɔnduba dəa’g gə ləbee-ləbee saar gə no̰. Amen!

1 Piɛrə 2:15

Raje maji ɓa gə mba kudu ne ta gə́ sin lə mbəje, yee ɓa mee Ala ndigi togə́bè ya.

1 Piɛrə 4:2

gə mba kar loo gə́ yeḛ nai ne gə kəmee ɓəi lé yeḛ a si kəmba mba ra ne né gə́ mee Ala wɔji ɓó gə mba tɔl ne mal néje gə́ ra dəwje gə́ dɔ naŋg nee el.

Loo gə́ killa rea kəm Ja̰’g 11:15

Kura gə́ dara gə́ njekɔm dee’g siri lé im to̰to̰ ndá ndu dəwje ɓar dara doo-doo pana: Ɓeeko̰ gə́ naŋg neelé tel to ka̰ Mbaidɔmbaije lə sí gə ka̰ Kristi ləa ndá yeḛ a kuba dɔ dee gao sí tar gə ləbee-ləbee gə no̰ ya.

Loo gə́ killa rea kəm Ja̰’g 12:10

Ma m’oo ndu dəw gə́ ḭ dara ɓar ɔr loo lɔi-lɔi pana: Kaji lé ɓasinè kàree teḛ mba̰ ndá siŋgamoŋ gə tɔgmbaŋ ləm, gə ko̰ɓee lə Ala lə sí ləma, gə dɔmoŋ lə Kristi ləa ləm tɔ lé ndəa teḛ mba̰ tɔ. Mbata yeḛ wa njegaŋgta gə́ gaŋgta badə-badə ɔm ta ŋgako̰ síje no̰ Ala’g lə sí gə ndəa-ndəa dan kàrá ləm gə loondul’g ləm tɔ lé yeḛ wá ilá naŋg nee ya.

Loo gə́ killa rea kəm Ja̰’g 19:6

Tɔɓəi ma m’oo ndu ɓar asəna gə ndu boo-dəwje gə́ bula digi-digi gə́ ɓar asəna gə mán gə́ ula u-u-u bèe ləm, asəna gə ndi gə́ ndaŋg paḭ-paḭ bèe ləm tɔ pana: Aleluia! Mbata Mbaidɔmbaije Ala lə sí gə́ to Bao-siŋgamoŋ lé yeḛ nja o̰ ɓee mba̰.

Loo gə́ killa rea kəm Ja̰’g 20:4

Ma m’oo kalimbaije lé, deḛ gə́ d’isi keneŋ lé d’un ndu dee d’ar dee gə mba gaŋg rəwta. M’oo ndu dəwje gə́ goré gwɔb dee mbata goo ta lə Jeju gə goo ta lə Ala gə́ d’ɔr lé tɔ. D’wa néndaji rɔ da lé meḛ dee’g el ləm, d’iŋga nétorji ŋgo no̰ dee’g əsé ji dee’g el ləm tɔ. Deḛ tel d’isi kəmba gogo ndá d’o̰ ɓee gə Kristi na̰’d ləb dee tɔl-dɔg.