Matiyo 21:10 - Maktub gə́ To gə Kəmee

¹⁰ Loo gə́ Jeju teḛ mee ɓee gə́ Jerusalem ndá koso-dəwje gə́ mee ɓee’g neelé d’aw dɔ na̰’d pum-pum pana: See to gə́ na̰ ɓa aa’n wa.

Matiyo 21:10 ပူးပေါင်းရင်းမြစ်များ

Pa gə́ ur dɔ paje 3:6

See na̰ ɓa ḭ dɔdilaloo’g aw gə́ nee To gə́ sa pər gə́ uba tel-tel bèe, Gə́ tuu rəa gə timbá ləm, Gə né gə́ ə̰də sululu to gə́ ndiri bèe ləma, Gə néje lə njérab-néje lai Gə́ ə̰də sululu ləm tɔ nee wa.

Esai 63:1

See na̰ ɓa ḭ Bosra ɓee-boo gə́ Edɔm’g Ree gə kubu gə́ kas njir-njir rəa’g wa. Yeḛ ula kubu gə́ ndoolé yḛd-yḛd rəa’g ləm, Yeḛ njaa unda ne dəa tar Ɔm ne mée dɔ siŋgamoŋ’d ləa ləm tɔ. To ma nja m’to njepa taje gə́ gə dɔ najee ləm, M’askəm kajee ləm tɔ.

Matiyo 2:3

Loo gə́ mbai Herɔdə oo ta neelé ndá yeḛ ɓəl mée’g, njé gə́ Jerusalem lai kara meḛ dee to kəgəgə tɔ.

Matiyo 21:11

Boo-dəwje tel d’ila dee keneŋ pana: To Jeju, njetegginta gə́ Najaret mee ɓeeko̰ gə́ Galile.

Matiyo 21:9

Deḛ gə́ njaa nea̰’g gə deḛ gə́ ndɔm gée’g lé ra né tar u-u-u pana: Hosana, arje ŋgon Dabid. Maji kar dɔkaisəgərə nai gə yeḛ gə́ ree gə ri Mbaidɔmbaije lé. Hosana, arje deḛ gə́ d’isi mee loo gə́ to tar sab lé ləm tɔ.

Lugu 20:2

ndá deḛ dəjee pana: Ula sí ar sí j’oo səi, see torndu na̰ ɓa i ra ne néje gə́ togə́bè wa. Esé see na̰ ɓa un ndia ari gə mba kari ra ne néje gə́ togə́bè lé wa.

Lugu 5:21

Njéndaji-maktubje gə Parisiḛje d’un kudu kḛji ta meḛ dee’g pana: See dəw neelé to gə́ na̰ ɓa yeḛ ila ndɔl dɔ loo’g togə́bè wa. See na̰ ɓa askəm kɔr kaiya dɔ dəwje’g wa. See Ala lé nja kára ba el wa.

Lugu 7:49

Deḛ gə́ d’isi səa ta ka-nésɔ’g lé d’un kudu pata meḛ dee’g pana: See dəw neelé to gə́ na̰ to ŋga ɓa pana: Kaiyaje ya kara n’ɔr dɔ dəw’g to ŋga wa.

Lugu 9:9

Nɛ Herɔdə pana: Ja̰ lé ma m’wá m’tuga dəa m’gaŋg mba̰. Ŋga see na̰ tɔɓəi ɓa ma m’oo sor néraje ləa togə́bè tɔɓəi wa. Togə́bè yeḛ ɔd ndolee gə mba kila kəmee dəa’g kée ne tɔ.

Tagə́maji gə́ Ja̰ ndang 2:18

Jibje d’un ta dəjee pana: See némɔri gə́ ban ɓa i ra gə mba kar sí j’oo to gə́ i askəm ra ne néje gə́ togə́bè lé wa.

Néra Njékaḭkulaje 9:5

Yeḛ tel ilá keneŋ pana: Mbaidɔmbaije, see i to gə́ na̰ wa. Mbaidɔmbaije tel ilá keneŋ pana: Ma m’to gə́ Jeju gə́ i ula kəm ndòo lé ya. Nékad gə́ d’ɔs ne kudi ɓèsèsè-ɓèsèsè lé ɓó gad kudi gə́ gogo ndá a koso rɔi’g pal ya.

Rudu 1:19

Yen ŋga deḛ joo bɔr njaa na̰’d saar teḛ ne Betlehem. Loo gə́ deḛ d’andə mee ɓee gə́ Betlehem ndá dəw-mee-ɓeeje lai lé meḛ dee aw taḭ-taḭ gə mba dee ar denéje dəjee pana: See to i Naomi ya wa.

1 Samel 16:4

Samel ra to gə́ Njesigənea̰ ulá lé ndá yeḛ ɔd aw Betlehem. Ŋgatɔgje gə́ mee ɓee-boo’g neelé d’aḭ ree rəa’g gə ɓəl mee dee’g pana: See i ree gə meelɔm ya wa.