Matiyo 13:46 - Maktub gə́ To gə Kəmee

⁴⁶ Loo gə́ yeḛ iŋga mərkwɔji kára gə́ laree to ɓad-ɓad ndá yeḛ aw ndogo néje ləa lai ɓa ya̰ laree aw ndogo ne məree neelé.

Matiyo 13:46 ပူးပေါင်းရင်းမြစ်များ

Gosota-Kəmkàrje 2:4

Ɓó lé i saŋgee to gə́ saŋg ne larnda ləma Ndolè gée to gə́ nébao bèe ləm tɔ ndá

Esai 33:6

Ndɔje lə sí lai lé Seḭ a síje ne gə́ majee, Kəmkàr gə gosonégər lé To gin si dan maji’g, Ɓəl Njesigənea̰ lé To nébao lə Sio̰.

Matiyo 13:44

Ɓeeko̰ gə́ dara lé to asəna gə nébao gə́ to loo-kiya’g mee ndɔ’g. Dəw teḛ keneŋ un iya kág gə́ lée’g ya. Rea lelee yaa̰ aree aw ndogo néje ləa mba kya̰ laree ndogo ne ndɔ neelé.

Matiyo 13:45

Ɓeeko̰ gə́ dara lé to asəna gə njetelkəmlar gə́ ndolè mərkwɔjije gə́ maji-maji.

Matiyo 13:47

Ɓeeko̰ gə́ dara lé to asəna gə bura gə́ d’ɔs ne mán baa-boo d’wa ne ka̰jije gə́ gə ria-ria.

Néra Njékaḭkulaje 20:24

M’ra né kára kara gə mba taa ne rɔm el ləm, m’oo rɔm gə́ né gəd kəm dɔ’g el ləm tɔ. Né gə́ wa məəm lé kɔr suna rəw ləm gə meendakaḭ ləm, gə tɔl ta kula gə́ Mbaidɔmbaije Jeju ɔm jim’g, am m’ula dee ne tagə́maji gə́ wɔji dɔ noji lə Ala lé ləm tɔ lé yee ɓa gə́ né gə́ wa məəm ya.

Njé gə́ Galati 6:14

Né gə́ wɔji dɔm ma lé kag-dəs lə Jeju Kristi Mbaidɔmbaije lə sí lé yee ɓa ma m’ti ne rɔm dɔ’g ɓó ma m’a ti rɔm dɔ né gə́ raŋg kára kara pai godo. Gin Jeju Kristi lé m’wa naŋg nee bura m’ɗar kaar kag’d mbata ləm ləm, ma m’wa rɔm m’ɗar kar kag’d mbata lə naŋg neelé ləm tɔ.

Njé gə́ Epesə 3:8

Oiyo, ma gə́ m’nai ŋgon mbuna deḛ gə́ to gə kəmee lai lé yeḛ wa ne səm noji ɓa ɔrm ne gə mba karm m’ila mber ta nébaoje lə Kristi gə́ dum gər, m’ar njépole-magəje ləm,

Njé gə́ Kolosə 2:3

Kristi lé ndur kəmkàr ləm, gə gosɔnégərje gə́ gə ria-ria ləm tɔ lé d’ula rɔ dee rəa’g pḛ́.

Loo gə́ killa rea kəm Ja̰’g 18:12

Larlɔr ləm, gə larnda ləm, gə mərkwɔjije gə́ tila kas gə́ dum ndogo ləma, gə mərmbaije ləm tɔ, kubu gə́ d’ṵji gə kúla palégal ləm, gə kubu gə́ ndul piro-piro ləm, gə kubu gə́ bḭ-maji ləm, gə kubu gə́ kas njir-njir ləm, gə kagje gə́ gə ria-ria gə́ ə̰də sululu ləm, gə néje gə́ gə ria-ria gə́ deḛ tɔl gə ŋgaŋ kərje ləm, gə néje gə́ gə ria-ria gə́ deḛ tɔl gə́ kagje gə́ gad dee to yaa̰ ləm, gə néje gə́ deḛ léḛ gə́ larkas gə larndul ləma, gə tɔl gə kɔri mbal gə́ tila kas ləm tɔ,

Loo gə́ killa rea kəm Ja̰’g 21:21

Tarəwkəije gə́ dɔg-giree-joo neelé to mərkwɔjije ya. Tarəwkəije kára-kára lai lé to gə́ mərkwɔji ya doŋgɔ kára-kára. Tɔɓəi ndag-loo gə́ dan mee ɓee’g lé to gə́ larlɔr gə́ gəd ya, yee ndɔḭ asəna gə mán gə́ ndusu ɗəḭ-ɗəḭ bèe tɔ.