Matiyo 11:23 - Maktub gə́ To gə Kəmee

²³ I ɓee gə́ Kapernawum, see d’a kuni kundai tar dara wa. Wah! D’a rəm səi yəm saar gə́ ɓee lə yoo. Némɔrije gə́ deḛ ra mbuna sí’g, ɓó lé deḛ ra Sɔdɔm ndá saar ɓogənè kara Sɔdɔm a nai keneŋ ɓəi.

Matiyo 11:23 ပူးပေါင်းရင်းမြစ်များ

Gḭ-Néje 13:13

Dəwje gə́ Sɔdɔm lé to njémeeyèrje ləm, gə bao-kaiyaje no̰ Njesigənea̰’g ləm tɔ.

Nɔ̰-ndôo gə́ wɔji dɔ Jerusalem 2:1

Ɗi togə́bè wa. Ɓa Njesigənea̰ ar oŋg ḭ səa pu Ɓa dəb ne rigim dɔ ŋgoma̰də gə́ Sio̰’g lé wa. Boo-nérɔnduba lə Israɛl gə́ ndɔḭ wər-wər lé Yeḛ ḭ səa dara ɔsee piriŋ ilá naŋg! Yeḛ ar mée wəi dɔ nétura-gɔl-kɔm’g ləa Mee ndɔ oŋg’d ləa lé tɔ.

Ejekel 26:20

n’a kɔsi piriŋ kilai gə deḛ gə́ dubu dee mee bwa’g rɔ koso-dəwje gə́ ləw’g. N’a kari aw si gin naŋg’d naŋg loo gə́ wa ŋgɔ njag-njag gə no̰ rɔ deḛ gə́ dubu dee mee bwa’g mba kar dəw kára kara si ɓee’g ləi el ŋga, ndá n’a kunda rɔnduba kul mbata lə ɓee lə njésikəmbaje.

Ejekel 31:14

mba kar kagje lai gə́ d’aar ta manje’g lé d’a kar dee ŋgal pur-pur el ŋga ləm, mba kar sém dee teḛ tar dan barkəm deeje gə́ ndər siŋ-siŋ’d lé el ŋga ləma, mba kar kag-sɛnəje lai gə́ d’ai mán yaa̰ lé ŋgal dee a to to gə́ kédé el ŋga ləm tɔ. Mbata deḛ lai lé yoo ɓa wɔji dɔ dee kar dee d’aw gin naŋg’d bər mbuna dəwje lai gə́ dubu dee bwa-dɔɓar’g na̰’d.

Ejekel 32:18

I ŋgon-dəw lé, no̰ koso-dəwje gə́ Ejiptə gə́ bula digi-digi lé sii ne mbigi-mbigi, ɔs Ejiptəje gə ŋgalə ginkoji dəwje gə raŋg gə́ dené gə́ to njésiŋgamoŋje ɔm dee gin naŋg’d gə́ bər gə njé gə́ dubu dee bwa-dɔɓar’g na̰’d.

Ejekel 32:24

Lée nee ɓa mbai gə́ Elam to keneŋ ar njé’g ləa gə́ bula digi-digi gugu dɔ dɔɓaree sub, deḛ lai lé d’wəi yoo-kiambas ya. Deḛ to njépole-magəje gə́ d’aw gin naŋg’d gə́ bər lé deḛ gə́ to njékɔm ɓəl-boo mee ɓee’g lə njé gə́ d’isi kəmba ndá deḛ d’aw gə rɔkul-boo lə dee rɔ njé gə́ dubu dee bwa-dɔɓar’g.

Abdias 1:4

Ɓó lé i ula kəi-sii tar to gə́ ka̰ niŋgatə̰də bèe Esé ula kəi ləi mbuna kéréméje’g kara M’a kɔsi kalaŋ kilai naŋg ya, Njesigənea̰ ɓa pa bèe.

Matiyo 10:15

Ma nja m’ula sí təsərə, ndɔ gaŋg-rəwta lé rəwta gə́ d’a gaŋg dɔ ɓee’g neelé a kur dɔ ka̰ Sɔdɔm gə Gɔmɔr tɔ.

Matiyo 16:18

Ma nja m’ulai təsərə: I to Piɛrə, dɔ mbal neelé m’a rɔd Eglisə ləm dɔ’g. Lé riri gə́ a gə teḛ gə tarəw gə́ ɓee lə yoo kara a koma̰ səa pi ya.

Matiyo 17:24

Loo gə́ deḛ teḛ Kapernawum ndá deḛ gə́ taa lar-gədɓee gə́ kəm ŋgan larnda joo-joo lé dar Piɛrə bus dəjee pana: See ɓéije a kuga lar-gədɓee gə́ kəm ŋgan larnda joo-joo lé el wa.

Matiyo 4:13

Yeḛ ḭ Najaret aw si Kapernawum mbɔr baa-boo’g dəb, mee ɓeeko̰ gə́ Jabulo̰ gə Neptali

Matiyo 8:5

Loo gə́ Jeju unda dɔ Kapernawum dəb ndá ɓé-njérɔje rəm pər gə́ rəa’g to təa’g pəgə-pəgə ulá pana:

Lugu 10:15

I ɓee gə́ Kapernawum gə́ d’uni gə́ tar saar gə́ dara lé d’a rəm səi gə́ naŋg saar gə́ ɓee lə yoo ya.

Lugu 14:11

Mbata nana ɓa gə́ unda dəa gə́ tar ndá d’a karee ula dəa ya, nɛ nana ɓa gə́ ula dəa lé ndá d’a karee unda dəa gə́ tar tɔ.

Lugu 16:23

Yeḛ si loo-si njé gə́ d’wəi’g ndá dan néurti gə́ rəa lé yeḛ un kəmee gə́ tar aa ne loo oo Abrakam si ŋgərəŋ ndá yeḛ oo Lajarə si mbɔree’g tɔ.

Lugu 4:23

Jeju ila dee keneŋ pana: Seḭ a kawje saar a kɔrje gosota nee gə́ pana: I njekuma̰-kaji lé aji darɔi-i nja ar sí j’oo səi. Seḭ a kɔrje kwɔjije ne dɔm paje ne səm pana: Néje lai gə́ m’ra Kapernawum gə́ seḭ ooje taree lé maji karm m’ra mee ɓee-kojim’g nee m’ar sí ooje səm tɔ.

Néra Njékaḭkulaje 2:27

Mbata i a kya̰ neḛ ɓee lə njé gə́ d’wəi’g lé el ləm, Njemeenda ləi lé i a kyá̰ karee unda naŋg ndəs el ləm tɔ.

Néra Njékaḭkulaje 2:31

Teḛ dɔkumbwa’g lə Kristi lé Dabid oo pa taree kédé pana: D’a kuba kankəmrea kyá̰ ɓee lə yoo el ləm, Darea kara a kunda naŋg ndəs el ləm tɔ.

Jude 1:7

Tɔɓəi Sɔdɔm gə Gɔmɔr gə ɓeeje gə́ gugu dɔ deḛ gə́ d’ula rɔ dee dan kaiya’g d’ar mal néje gə́ mina̰ ula pər meḛ dee’g lé deḛje neelé bo̰ néra dee ɔs ta dee’g dan pər gə́ o̰ bilim-bilim gə́ to gə no̰. Ala unda dee no̰ sí’g unda rɔ dee ar sí j’oo, wɔji ne pia gə́ a gə ra sə sí lé ya tɔ kən.

Loo gə́ killa rea kəm Ja̰’g 1:18

Neḛ n’to gə́ dɔtar ləm, n’to gə́ rudu ləma, n’to Njesikəmba ləm tɔ. Neḛ n’wəi kédé mba̰, nɛ aa oo, n’isi kəmba gə ləb neḛ-ləb neḛ gə no̰. Nékɔrtarəw lə yoo gə ɓee lə njé gə́ d’wəi lé n’wa ji neḛ’g.

Loo gə́ killa rea kəm Ja̰’g 11:8

Yoo dee a to naŋg ŋgaŋ nada mee ɓee-boo’g gə́ d’unda ria gə goso d’wɔji ne dɔ Sɔdɔm gə Ejiptə ləm, gə ɓee gə́ ɗar Mbaidɔmbaije lə dee kaar kag’d keneŋ ləm tɔ.

Loo gə́ killa rea kəm Ja̰’g 20:13

Baa-boo-kad un deḛ gə́ d’wəi keneŋ lad-lad ree sə dee ləm, yoo gə ɓee lə yoo lé d’un deḛ gə́ d’wəi keneŋ lad-lad ree sə dee ləm tɔ. Deḛ gaŋgta dɔ dee’g kára-kára lai gə goo néra dee.

Loo gə́ killa rea kəm Ja̰’g 6:8

M’aa loo gərərə ndá m’oo kunda-mwɔji ḭ keneŋ. Njekubá lé ria lə yoo tɔɓəi ɓee lə njé gə́ d’wəi lé aw səa na̰’d. D’un ndu dee d’ar dee gə mba tɔl dəwje gə́ dɔ naŋg nee gə́ dəb kára nɛ debee nai munda, mba tuji ne dəwje gə kiambas ləm, gə ɓoo-boo ləm, gə rɔko̰ ləma, gə da-ŋgaŋkasje gə́ dɔ naŋg nee ləm tɔ.