Mark 6:48 - Maktub gə́ To gə Kəmee

⁴⁸ Yeḛ oo dee d’oma̰ tasəra mbata lel ɔs dee gə́ gogo-gogo. Gel bagbé ndá yeḛ njaa dɔ mán’g si aw gə́ rɔ dee’g, un kəmee rəw unda gə́ raŋg mba kuru dee dəs.

Mark 6:48 ပူးပေါင်းရင်းမြစ်များ

Gḭ-Néje 19:2

Tɔɓəi yeḛ pana: Aa ooje, mbaije ləm, m’ra ndòo rɔ sí’g, maji kar sí a̰dje mee kəi’g lə kura lə sí mba to keneŋ loondul’g nee. Seḭ a togoje gɔl sí ndá seḭ a kḭje gə ndɔ rad ɓa mba kaw kəm sí gə́ kédé ɓəi. Deḛ tel d’ilá keneŋ pana: Wah! Loondul gə́ neelé jeḛ j’a to raga nee ya.

Gḭ-Néje 32:26

Loo gə́ dəw neelé oo to gə́ yeḛ askəm dumee el ndá yeḛ unda bəgəree. Bèe ɓa bəgərə Jakob al loo gə́ yeḛ si uba səa mula lé.

Maktub gə́ wɔji dɔ Jɔb 9:8

Yeḛ nja gə karee ba naji dara ləm, Yeḛ dum dɔ mán baa-boo-kadje’g ləm tɔ.

Pakɔsje 104:3

Yeḛ ra loo-siée dɔ manje gə́ tar ləm, Yeḛ ar kil-lə-ndi to gə́ pusu-rɔ ləa ləma, Yeḛ aḭ ŋgwɔd dɔ bag lel’g lé ləm tɔ.

Pakɔsje 93:4

Njesigənea̰ lé to njesiŋgamoŋ mee looje gə́ dará’g Ur ne dɔ baa-booje gə́ tuga poŋgm-poŋgm’g ləm, Ur ne dɔ ndu paŋgəm mán baa-boo-kad’g Gə́ turu tuma̰-tuma̰ lé ləm tɔ.

Teḛ-Raga 14:24

Ta lookàr’g dəb ndá, Njesigənea̰ gə́ si dan pər’g gə dan mum’g lé aa loo oo loo-si njé gə́ Ejiptə ndá, yeḛ ra né ar njé gə́ Ejiptə lé d’aw dɔ na̰’d bèe pum-pum loo-si dee’g.

Esai 54:11

I ɓee-boo gə́ Jerusalem gə́ némeeko̰ rai Ar lel-boo ɓirii nɛ dəw kára kara gə́ njegɔli godo lé! Aa oo, m’a ra néra ma̰dje ləi gə kɔr mbalje ləi ləm, M’a tum geli gə jər sapir ləm tɔ.

Matiyo 14:24

Njétoje teḛ dan baa-boo’g dana bab ndá paŋgəm mán tuga ar to toso bigiri-bigiri ar lel ɔs dee rəw.

Matiyo 24:43

Ooje maji, ɓó lé njekəi gər loo gə́ njeɓogo a gə ree dəa’g loondul’g ndá yeḛ a ra kəmee ra kaa mba kar njeɓogo andə mee kəi’g ləa el.

Mark 13:35

Bèe ndá maji kar sí síje dɔkəji sí’g kəgəgə mbata seḭ gərje ndɔ ree lə mbai gə́ njekəi lé el. Kàrkemetag əsé dan loo bab əsé gə kona gə́ no̰, əsé teḛ gə ndɔ rad kara seḭ gərje el.

Mark 6:47

Kàr godo mba̰, ar to sí aw dan baa-boo’g ndá Jeju nja gə karee ba nai naŋg gogo.

Mark 6:49

Loo gə́ deḛ d’ée loo njaa gə́ yeḛ si njaa dɔ mán’g lé ndá d’ée asəna gə njabaw-dəw bèe, ar dee d’ḭ ra ne wəl-wəl

Lugu 12:38

Lé yeḛ a tel dan loo bab əsé jidɔɓee’g ɓa lé iŋga dee loo-si gə́ d’isi dɔkəji dee’g pèrèrè kara deḛ kuraje neelé rɔ dee a lel dee ya.

Lugu 24:28

Loo gə́ deḛ d’unda dɔ ɓee gə́ d’isi d’aw gə́ keneŋ lé dəb ndá yeḛ ra to gə́ lə yeḛ a gə dəs tar bèe səm.

Tagə́maji gə́ Ja̰ ndang 1:13

Gin koji lə debeeje neelé ḭ məs dəw əsé malee gə́ rəa el nɛ gin koji dee lé to ka̰ Ala nja.

1 Samel 11:11

Bèlè lookàree Sawul kai boo-njérɔje loo munda. Deḛ d’ur dan loo-si Amo̰je’g kàr-ŋgəm-loo’d gə́ gə ndɔ ndá deḛ rɔ sə dee saar kàr ɔs keḭ-keḭ. Deḛ gə́ teḛ ta yoo’g lé sané na̰ kad-kad ɓó a koo dəwje joo ta na̰’d el.