Malasi 2:11 - Maktub gə́ To gə Kəmee

¹¹ Judaje lé d’uba goo manrɔ lə dee d’ya̰ ya. Deḛ ra néraje gə́ ram Jerusalem ləm gə mee ɓee gə́ Israɛl lai ləm tɔ. Mbata né gə́ d’unda gə kəmee d’ar Njesigənea̰ gə́ yeḛ nja unda dan kəmee’g lé Judaje d’ila ndɔl dɔ’g. Deḛ taa denéje gə́ to njépole-magəje.

Malasi 2:11 ပူးပေါင်းရင်းမြစ်များ

Esdras 10:2

Yen ŋga Sekania, ŋgolə Jehiel gə́ to gə́ mbuna gel-bɔje’g lə Elam lé un ta ula Esdras pana: Jeḛ n’raje kaiya j’ɔs ne Ala lə sí rəw loo gə́ jeḛ n’taaje denéje gə́ ginkoji dee raŋg gə́ mee ɓee’g neelé. Nɛ lé bèe kara ɓasinè né gə́ kəm kar Israɛlje d’unda meḛ dee yel dɔ’g lé to keneŋ ya ɓəi.

Esdras 9:12

Bèe ndá maji kar sí j’ar ŋgan síje gə́ dené taa ŋgan deeje gə́ diŋgam el ləm, j’a taaje ŋgan deeje gə́ dené kar ŋgan síje gə́ diŋgam el ləma, j’a saŋgje goo si dan maji’g lə dee əsé dan nébaoje’g lə dee el ləm tɔ saar gə no̰. Bèe ɓa siŋga sí a kḭ ne dɔ maree’g ləm, j’a sɔje ne némajije lə ɓee neelé ləma, j’a karee to ne gə́ nénduba lə ŋgan síje saar gə no̰ ləm tɔ.

Pakɔsje 106:28

D’ɔm na̰’d sad gə magə Baal-Peɔr ləm, D’usɔ da gə́ d’inja gə́ məs d’ar dəwje gə́ d’wəi lé ləm tɔ.

Jeremi 2:3

Israɛlje lé to gə kəmee Mbata lə Njesigənea̰ ləm, Deḛ to kandə néje ləa gə́ doŋgɔr ləm tɔ. Deḛ lai gə́ d’usɔ kandə néje neelé D’ar taree wa dɔ dee ləm, Nékəmndoo oso ne dɔ dee’g ləm tɔ, Njesigənea̰ ɓa pa bèe.

Jeremi 3:10

Lée gə goo néje neelé lai kara Judaje gə́ to njéhulaije gə́ to ŋgako̰ deeje gə́ dené lé tel ree rɔm’g gə mee kára ba el. Deḛ ra gə́ néŋgɔm ya. Njesigənea̰ ɓa pa bèe.

Jeremi 7:10

Tɔɓəi seḭ reeje aarje no̰m’g, mee kəi’g nee gə́ ɓar rim keneŋ lé ndá seḭ pajena: Ta ɔr dɔ sí’g mba̰! ... Yee ɓa gə mba ra ne néje gə́ mina̰ lai neelé gə́ kédé-kédé.

Ejekel 18:13

ɓó lé yee wɔji né dɔ maree’g ɓa ar dee tona mba kiŋga ne manee dɔ’g ləm tɔ ndá see ŋgon neelé a si kəmba ya wa. Yeḛ a si kəmba el, yeḛ ra néje nee lai gə́ mina̰ ndá maji karee wəi! Maji kar ta məsee wa dəa-yeḛ ya.

Ejekel 22:11

Mee ɓee-boo’g ləi lé nana kara ra né gə́ mina̰ gə dené lə maree ləm, nana kara ra nékɔb gə məmeeje gə́ dené ar rəa mina̰ ne ləma, nana kara ila rɔkul dɔ ŋgokea̰ gə́ dené gə́ to ŋgolə bɔbeeje ləm tɔ.

Ojee 6:7

Deḛ d’ya̰ goo ta manrɔ lə dee To gə́ dəwje gə́ kari ba bèe, Yee gə́ bèe ɓa deḛ d’ubam d’ya̰’m ne.

Ləbije 20:26

Seḭ a toje dəwje gə́ to gə kəmee doi mbata ləm, mbata ma nja m’to Njesigənea̰ gə́ m’to gə kəmee doi lé tɔ, ma m’kɔdə sí m’ɔr sí mbuna ginkoji dəwje gə raŋg’g mba kar sí toje kamaje ya doŋgɔ doi.

Malasi 1:1

Ndərta gə́ Njesigənea̰ pa ar Israɛlje gə ndu Malasi.

Tel tura Godndu 14:2

Mbata seḭ toje koso-dəwje gə́ toje gə kəmee gə mbata lə Ala lə sí gə́ Njesigənea̰. Ala lə sí gə́ Njesigənea̰ mbər sí gə mba kar sí toje gə́ kea̰je ya mbuna koso-dəwje lai gə́ dɔ naŋg nee.

Loo gə́ killa rea kəm Ja̰’g 21:8

Nɛ njérəmje ləm, gə njépole-magəje ləm, gə ram-dəwje ləm, gə njetɔl dəwje ləm, gə njémɔdkaiyaje ləm, gə njékərgosoje ləm, gə njépole-magəje ləma, gə njéŋgɔmje lai ləm tɔ lé deḛ nja d’a kiŋga loo lə dee dan pər gə́ tad rəg-rəg gə́ o̰ bilim-bilim gə́ kṵjee teḛ kas njir-njir lé yee ɓa to gə́ yoo gə́ joo lé ya.

Njéga̰g-Rəwtaje 3:6

Deḛ taa ŋgan deeje gə́ dené gə́ denéje lə dee ləm, deḛ d’ar ŋgan deeje gə́ diŋgam taa ŋgan dee-deḛje gə́ dené ləma, deḛ pole magəje lə dee ləm tɔ.