Yen ŋga mbai dɔ njémeekəije ləm, yeḛ gə́ njekaa dɔ ɓee-boo ləm, gə ŋgatɔgje ləma, gə njékaa dɔ ŋganje ləm tɔ, d’ula kula rɔ Jehu’g pana: Jeḛ n’to kuraje ləi ləm, néje lai gə́ i a kula sí lé j’a ra ya ləm tɔ, nɛ jeḛ j’a kundaje dəw kára kara gə́ mbai el. Ndá maji kari ra né gə́ məəi-i ya ndigi.
Njé gə́ Gabao̰ d’ula kula rɔ Juje’g loo-siée’g Gilgal d’ulá pana: Maji kari uba kuraje ləi ya̰ dee gə goo ŋgalee el ləm, ḭ kalaŋ gə tɔgi ree rɔ sí’g taa sí ɔm sí tar la ne sə sí ləm tɔ, mbata mbaije lə Amɔrje lai gə́ d’isi kaar mbal’g lé d’unda siŋga dee na̰’d rɔ sə sí.
Ŋgatɔgje lə sí gə koso-dəwje lai gə́ d’isi mee ɓee’g lə sí lé d’ula sí pana: Maji kar sí odoje nésɔje gə́ ka̰ sɔ njaa ne rəbə ji sí’g awje aw tilaje ne kəm dee ndá a kula deeje pajena: Jeḛ n’toje kuraje lə sí, ɓasinè maji kar sí ɔmje sə sí na̰’d.
nɛ un kudee mee ndəa’g neelé yeḛ wɔji-kwɔji kar dee tel to njétuga-kagje gə njéto-manje gə mbata lə koso-dəwje ləm, gə mbata lə loo-nékinjaməs lə Njesigənea̰ mee loo gə́ Njesigənea̰ a gə kɔr kəmee ɓəi ləm tɔ, yee ɓa deḛ ra togə́bè saar teḛ ne mee ndəa gən.