Jeremi 51:15 - Maktub gə́ To gə Kəmee

¹⁵ Njesigənea̰ unda naŋg Gə goo siŋgamoŋ ləa ləm, Yeḛ tum gin naŋg nee Gə goo kəmkàr ləa ləma, Yeḛ naji dara gə goo gosonégər ləa ləm tɔ.

Jeremi 51:15 ပူးပေါင်းရင်းမြစ်များ

Maktub gə́ wɔji dɔ Jɔb 9:8

Yeḛ nja gə karee ba naji dara ləm, Yeḛ dum dɔ mán baa-boo-kadje’g ləm tɔ.

Pakɔsje 104:2

Lookàr gə́ ɔr jol-jol lé Yeḛ ula rəa’g to gə́ kubu gə́ ŋgal yududu bèe ləm, Yeḛ naji dara to gə́ lab ne mbogo bèe ləm tɔ.

Pakɔsje 104:24

Ǝi Njesigənea̰ kula raije lé bula yaa̰ ya. I ra dee lai-lai gə kəmkàree ya ləm, Némajije ləi lé kara Taa dɔ naŋg nee pəl-pəl ya ləm tɔ.

Pakɔsje 107:25

Yeḛ pata ar lel-boo ula Ar paŋgəm mán baa-boo-kad tuga ne poŋgm-poŋgm.

Pakɔsje 136:5

Yeḛ gə́ to njera dara gə goo gosonégər lé Mbata meekɔrjol ləa lé to saar-saar gə no̰.

Gosota-Kəmkàrje 3:19

Gə goo kəmkàr ɓa Njesigənea̰ Unda ne naŋg nee ləm, Gə goo gosonégər lé ɓa Yeḛ ar dara to ne njaŋg ləm tɔ,

Esai 40:22

Yeḛ nja ɓa si dɔ gwɔi naŋg’d gə́ tar Ndá deḛ gə́ d’isi dɔ naŋg’d lé To d’asəna gə beedéje bèe, Yeḛ naji dara To gə́ dəw naji ne kubu gə́ wɔilɔ bèe ləm, Yeḛ la dara To gə́ dəw la ne kəi-kubu mba si keneŋ bèe ləm tɔ.

Esai 40:26

Unje kəm sí gə́ tar ooje loo! See na̰ ɓa ra néje neelé wa. See na̰ ɓa ar boo-néje gə́ dara D’aw gə rəw lə dee lə dee wa. Yeḛ ɓar deḛ lai gə goo ri dee ri dee, Gə goo boo-dɔmoŋ ləa ləm, Gə siŋgamoŋgee gə́ dum dɔ loo ləm tɔ lé Yeḛ gə́ kára kara gə́ a lal ndigi təa’g lé godo.

Esai 42:5

Ala gə́ to Njesigənea̰ Yeḛ gə́ njekunda dara karee tad rəg-rəg ləm, Yeḛ gə́ unda naŋg nee gə néje lai gə́ to keneŋ ləm, Yeḛ gə́ ar koso-dəwje gə́ d’isi keneŋ d’əmə ləma, Ar deḛ gə́ d’isi keneŋ d’aw kəmba ləm tɔ lé Pa togə́bè pana:

Esai 44:24

Njesigənea̰, njekoga dɔ sí, Yeḛ gə́ njekuba sí meḛ ko̰ síje’g lé Pa togə́bè pana: Ma m’to Njesigənea̰ gə́ njekunda néje lai, Ma nja kára ba gə́ njenaji dara ləm, Ma nja kára ba gə́ njetḭ mee naŋg karee tad rəg-rəg ləm tɔ.

Esai 45:12

Ma nja ɓa m’unda naŋg ləm, M’unda dəw m’aree si keneŋ ləm tɔ, Ma nja ɓa m’naji dara ləm, Ma nja ɓa m’unda boo-néje lai keneŋ gə lée-lée ləm tɔ.

Esai 48:13

Jim-ma ɓa m’tum ne gin naŋg nee, Jikɔlm ɓa m’naji ne dara ləm tɔ, Ma m’ɓar dee ndá Léegəneeya deḛ teḛ d’aar.

Esai 51:13

Seḭ arje meḛ sí wəi dɔ Njesigənea̰ gə́ njekunda sí’g lé Yeḛ gə́ naji dara gə tum gel naŋg nee. Seḭ undaje bala gə ndɔje kára-kára lai No̰ oŋg’d lə njekula kəm loo ndòo, Mbata yeḛ saŋg loo gə mba tuji sí pugudu! See oŋg lə njekula kəm loo ndòo lé ɓa to ra wa.

Jeremi 27:5

To ma nja m’ra dɔ naŋg, gə dəwje, gə daje gə́ d’aw keneŋ gə goo siŋgamoŋ ləm gə́ ur dɔ loo ləm, gə jim gə́ m’ula ndiŋ ləm tɔ ndá dɔ naŋg lé m’ar dəw to gə́ məəm ya ndigi.

Jeremi 32:17

Ǝi Mbaidɔmbaije gə́ Njesigənea̰, aa oo, i ra dara gə naŋg nee gə boo-siŋgamoŋ ləi ləm, gə goo jii gə́ un loo lad-lad ləm tɔ. Né kára kara gə́ njedumi godo.

Jakari 12:1

Ndərta gə́ Njesigənea̰ pa wɔji ne dɔ Israɛl. Njesigənea̰ gə́ to njenaji dara ləm, Gə njetum gel naŋg nee ləma, Gə njera ndil dəw gə́ to mée’g ləm tɔ lé pa togə́bè pana:

Néra Njékaḭkulaje 14:15

Deḛ pata tɔg pir pana: Seḭ dəwje lé see ban ɓa seḭ raje ne né bèe wa. Jeḛ lé jeḛ n’to gə́ dəwje to gə́ seḭ nja tɔ. Jeḛ j’ula sí tagə́maji gə mba kar sí ya̰je ne goo magəje gə́ gə mḭdé ba nee mba telje rɔ sí goo Ala gə́ njesikəmba’g lé. Yeḛ nja ɓa gə́ njekunda dara gə naŋg nee gə baa-boo-kad gə néje lai gə́ to keneŋ.

Néra Njékaḭkulaje 17:24

Ala gə́ njekunda naŋg nee gə néje lai gə́ to keneŋ lé yeḛ to Mbai dɔ dara gə dɔ naŋg nee tɔ. Bèe ndá yeḛ si mee kəi gə́ ji dəw ɓa ra el.

Njé gə́ Rɔmə 1:20

Nɛ néje gə́ maji kɔr njoroŋ lə Ala gə́ dumkoo ləm, gə siŋgamoŋ ləa gə́ to gə no̰ ləma, gə rɔkunda ləa gə́ yeḛ unda ləm tɔ lé inja kəm dəwje’g təsərə, ndɔ tum gel naŋg saar ɓasinè, mbata néreaje lai ɔr ginee njai ar dee d’oo. Bèe ndá loo kunda goso lə dəwje godo ŋga,

Njé gə́ Rɔmə 11:33

Ala lé boo-nébaoje ləa ləm, kəmkàr ləa ləma, négərje ləa ləm tɔ lé to boo-néje gə́ al dɔ loo sula ya. Rəwta-gaŋg ləa dum gər ləm, dɔ rəwje ləa kara dum gər ləm tɔ.

Loo gə́ killa rea kəm Ja̰’g 4:11

Mbaidɔmbaije, Ala lə sí, I nja askəm kiŋga rɔnduba ləm, gə riɓar ləma, Gə siŋgamoŋ gə tɔgmbaŋ ləm tɔ, Mbata i nja unda néje lai ləm, Rəw gə́ i nja wɔji ɓa deḛ d’isi ne ləma, I ra dee ne ləm tɔ.