Jeremi 34:22 - Maktub gə́ To gə Kəmee

²² Aa ooje, m’a kun ndum kar dee tel ree mee ɓee-boo’g neelé, deḛ d’a rɔ gə ɓee-booje neelé ləm, d’a taa ləma, d’a roo pər ləm tɔ. Tɔɓəi m’a kar ɓee-booje gə́ Juda tel to gə́ dɔdilaloo gə́ dəw godo keneŋ ya.

Jeremi 34:22 ပူးပေါင်းရင်းမြစ်များ

2 Samel 16:11

Dabid ula Abisai gə kuraje ləa lai pana: Aa ooje, ŋgon məəm ya ndigi tɔlm, nɛ ɓəd ɓa dəw gə́ Bḛjami nee ɓəi wa! Yá̰je areeje ila ndɔl dɔm’g mbata Njesigənea̰ ɓa ulá gə mba karee ra bèe ya.

2 Mbaije 25:6

Deḛ d’wa mbai d’aw səa rɔ mbai gə́ Babilɔn lé loo gə́ Ribla, ndá deḛ gaŋgta dəa’g keneŋ.

2 Mbaije 25:9

Yeḛ roo kəi lə Njesigənea̰ ləm, gə kəi lə mbai ləma, gə kəije lai gə́ Jerusalem ləm tɔ, tɔɓəi yeḛ tila pər dɔ kəije gə́ boo-boo’g lai tɔ.

2 Sôrta Gḭka Israɛlje 36:17

Togə́bè ɓa Njesigənea̰ ar mbaije lə Kaldeje d’ḭ rɔ sə dee ndá yeḛ tɔl basaje gə kiambas mee loo’g lə deḛ gə́ to gə kəmee’g. Yeḛ ya̰ basa əsé ŋgoma̰də əsé ɓuga əsé dəw gə́ dəa pudu lé kəmba el nɛ yeḛ ya̰ deḛ lai jia’g ya.

Esai 13:3

Ma m’un ndum m’ar koso-dəwje ləm Gə́ m’unda dee gə kəmee, Ma m’ɓar bao-rɔje, Deḛ gə́ d’al rɔ dee dɔ riɓar’g ləm Gə mba kar dee riba dɔ oŋg ləm pərəg lé.

Esai 24:12

Tuji-boo nai mee ɓee-boo’g Ar tarəwkɔgje gə́ tɔs dee lé tuji pugudu-pugudu.

Esai 37:26

See néje gə́ teḛ lé I oo to gə́ neḛ ɓa n’wa dɔ gɔl dee ləw ba ləm, N’wɔji mee neḛ’g njaŋg kédé gə́ ləw lé ləm tɔ el wa. Ɓasinè n’ar dee d’aw lée’g béréré, Yee gə́ bèe ɓa n’ya̰ loo n’ari Ar ɓee-booje gə́ siŋga dee to lé Tel to d’asəna gə néje gə́ d’wa dee kugu dɔ na̰’d bèe.

Esai 6:11

Ma m’dəjee m’pana: See a to bèe saar ndɔ gə́ ra wa. Ndá yeḛ ilam’g pana: Saar kar ɓee-booje neelé tuji pugudu Kar dee tel to nduba piu-piu, Saar kar dəw kára kara nai mee kəi’g el Gə mba kar ɓee neelé tel to nduba.

Esai 64:10

Kəi lə sí gə́ to gə kəmee gə maji dum Loo gə́ bɔ síje-je d’ula rɔnduba dɔi’g keneŋ lé Pər rée dula-dula ya, Néje lə sí lai gə́ gad dee to yaa̰ lé Tuji pugudu-pugudu tɔ.

Jeremi 2:15

Ŋgan toboḭje d’inja miḭ Ra ne hər-hər dɔ dee’g, Deḛ d’ar ɓee lə dee to dɔ nduba, Ɓee-booje lə dee roo dula-dula Ar dəw kára kara ra ɓee keneŋ el.

Jeremi 32:29

Kaldeje gə́ rɔ gə ɓee-boo neelé d’a kandə keneŋ ndá d’a kila pər dɔ’g mba roo ne ɓee-boo neelé na̰’d gə kəije gə́ deḛ tuu né gə́ ə̰də sululu dɔ’g d’ar magə Baal ləm, gə́ deḛ saga nékar naŋg keneŋ d’ar magəje gə mba kar oŋg ḭ ne səm pu lé ləm tɔ.

Jeremi 33:10

Njesigənea̰ pa togə́bè pana: Lée neelé gə́ seḭ paje ta dɔ’g pajena: To dɔdilaloo gə́ dəwje gə daje godo keneŋ lé d’a koo mee ɓee-booje gə́ Juda ləm, gə mba̰-rəwje gə́ Jerusalem gə́ tuji pugudu ar dəwje gə daje godo keneŋ ləm tɔ lé

Jeremi 34:2

Njesigənea̰ Ala lə Israɛlje pa togə́bè pana: Maji kam m’aw m’ula Sedesias, mbai gə́ Juda pana: Njesigənea̰ pa togə́bè pana: Aa oo, m’a gə kuba ɓee-boo neelé kya̰ ji mbai gə́ Babilɔn’g karee roo.

Jeremi 38:23

D’a kaw gə denéje ləi lai gə ŋganije kaw kar Kaldeje ndá i a teḛ meḛ ji dee’g el ləm, mbai gə́ Babilɔn a kwai gə jia peb ləm, a roo ɓee-boo nee ləm tɔ.

Jeremi 39:8

Kaldeje roo kəi lə mbai gə kəije lə koso-dəwje ləm, deḛ təd ndògo-bɔrɔ gə́ Jerusalem kərm-kərm ləm tɔ.

Jeremi 4:7

Toboḭ ḭ loo-kum’g unda loo teḛ ləm, Njetuji ginkoji dəwje gə raŋg lé Uba loo-tée ya̰ Si njaa gə mba tuji ɓee lə sí, Ɓee-booje lə sí d’a tuji pugudu-pugudu ləm, Dəw kára kara a nai keneŋ el ləm tɔ.

Jeremi 44:22

Njesigənea̰ askəm kila mée gə́ kédé-kédé el mbata néra meeyèrje lə sí ləm, gə mbata néraje gə́ mina̰ gə́ seḭ raje lé ləm tɔ. Yee ɓa ɓee lə sí tuji ne pugudu ləm, tel to ne dɔ nduba ləma, tel to ne nékila ndɔl dɔ’g ləm tɔ, to gə́ dəwje lai d’oo ne ɓogənè lé.

Jeremi 50:13

Dəw kára kara a si keneŋ el Mbata oŋg lə Njesigənea̰, Yee a to dɔ nduba. Nana kara gə́ a dəs mbɔr Babilɔn’g Ndá kaaree a kwá paḭ karee ra wah! Dɔ nékəmndooje’g lai gə́ teḛ dəa’g lé.

Jeremi 52:13

Yeḛ roo kəi lə Njesigənea̰ ləm, gə kəi lə mbai ləma, gə kəije lai gə́ Jerusalem ləm tɔ, tɔɓəi yeḛ tila pər dɔ kəije gə́ boo-boo’g lai tɔ.

Jeremi 52:7

Yen ŋga njérɔje gə́ Babilɔn tɔs ndògo-bɔrɔ lə ɓee-boo mbudu. Ndá njérɔje lai d’unda loo mee ɓee-boo’g loondul’g teḛ d’aḭ gə tarəw gə́ to mbuna ndògo-bɔrɔje gə́ joo mbɔr loo-ndɔ’g lə mbai, loo gə́ Kaldeje d’aḭ dɔ ɓee-boo sub gə rɔ lé. Njékaḭje d’aḭ gə rəw gə́ aw ndag-loo’g.

Jeremi 9:11

See dəw gə́ ra ɓa gə́ njekəmkàr Gə́ gər gin néje neelé wa. Yeḛ gə́ Njesigənea̰ ulá ta lé maji karee pa! See gelee ban ɓa ɓee tuji ləm, Pər roo to gə́ dɔdilaloo gə́ dəw kára kara Dəs keneŋ el ləm tɔ wa.

Nɔ̰-ndôo gə́ wɔji dɔ Jerusalem 1:1

Ɗi togə́bè wa. Ɓee-boo gə́ kédé dəwje taa loo keneŋ pəl-pəl lé Tel to dɔ nduba wa. Yee tel to asəna gə njekəisiŋga bèe! Kédé yee ur dɔ ɓeeje lə ginkoji dəwje gə raŋg lai ləm, Ria ɓar yaa̰ mbuna ɓeeko̰je’g lai ləm tɔ Nɛ yee tel to asəna gə njera kula kari ba ŋga!

Ejekel 13:22

Mbata seḭ arje mee njemeekarabasur pélé wəs-wəs gə taŋgɔmje loo gə́ neḛ nja n’ula kəmee ndòo el ləm, mbata seḭ arje ji njemeeyèr ɓar mèr-mèr mba kɔgee ne loo kuba rəw néra ləa gə́ majel kya̰ mba si ne kəmba ləm tɔ.

Amɔs 3:6

See d’a kim to̰to̰ karee ɓar mee ɓee-boo’g Lal kar dəwje d’unda bala wa. See nékəmndoo a teḛ dɔ ɓee-boo’g Lal kar Njesigənea̰ to njegelee wa.

Misee 7:13

Ges ɓee gə́ nai lé a tel to dɔdilaloo Mbata dəwje gə́ d’isi keneŋ Mbata lə kandə néra gə́ yèr lə dee lé.

Jakari 1:12

Yen ŋga kura lə Njesigənea̰ lé un ta dəji pana: Njesigənea̰ gə́ njeboo-néje, see saar ndɔ gə́ ra ɓa i a lal koo kəmtondoo lə njé gə́ Jerusalem gə ɓee-booje gə́ Juda, dee gə́ i ar məəi ḭ səi jugugu dɔ dee’g as ləb rɔ-siri mba̰ lé wa.

Jakari 7:14

Neḛ n’sané dee mbuna ginkoji dəwje gə raŋg’d Gə́ deḛ gər dee el ləm, Ɓee lə dee tel to dɔnduba tor dee’g Ar dəw kára kara dəs keneŋ aw Esé tel keneŋ el ləm tɔ. Ɓee gə́ maji dum lé deḛ d’aree tel to dɔdilaloo ya.

Matiyo 22:7

Mbai lé oo ndá mée ḭ səa pu aree ɔr njérɔje ləa ar dee d’aw mba kar njétɔl dəwje neelé d’udu ləm, gə roo ɓee lə dee dula-dula ləm tɔ.