Jeremi 25:14 - Maktub gə́ To gə Kəmee

¹⁴ Mbata ginkoji dəwje gə raŋg gə́ to njésiŋgamoŋje ləm, gə mbaije gə́ boo-boo ləm tɔ lé d’a tel kwa dee-deḛ nja ɓər ndá n’a kuga dee gə goo néra dee ləm, gə goo kula gə́ ji dee ɓa ra ləm tɔ.

Jeremi 25:14 ပူးပေါင်းရင်းမြစ်များ

Pakɔsje 137:8

I ɓee gə́ Babilɔn, i gə́ a gə tuji pugudu lé Rɔlel nai gə yeḛ gə́ ra səi né togə́bè ləm, Gə́ ra səi némajel to gə́ i ra sə síjeḛ bèe ya ləm tɔ.

Esai 13:4

Ooje kaa né gə́ ɓar dɔ mbalje’g Asəna gə koso-dəwje gə́ bula digi-digi bèe, Ooje ndu koso-dəwje mee ɓeeko̰je Gə́ d’aw dɔ na̰’d pum-pum To gə́ ginkoji dəwje gə́ mbo̰ dɔ na̰, Njesigənea̰ gə́ njeboo-néje tən njérɔje ləa Gə́ d’a gə kaw loo-rɔ’g lé.

Esai 14:2

Ginkoji dəwje gə raŋg d’a kwa dee kaw sə dee mee ɓeeje’g lə dee gogo ndá ŋgaka Israɛlje d’a taa ɓee neelé gə́ né ka̰ dee-deḛ asəna gə kuraje gə́ diŋgam gə njé gə́ dené bèe, d’a kwa dee-deḛ gə́ d’wa dee ɓər kédé lé gə́ ɓərje lə dee ləm, d’a ko̰ɓee dɔ deḛ gə́ kédé d’ula kəm dee ndòo lé ləm tɔ.

Esai 66:6

Ndu dəw gə́ ɓar pénéné gə́ ḭ mee ɓee-boo’g ləm, Ndu dəw gə́ ɓar gə́ ḭ mee kəi gə́ to gə kəmee’g ləm tɔ lé, To ndu Njesigənea̰ Gə́ njekoga-dɔ-ji njéba̰je ləa ya.

Jeremi 27:7

Ginkoji dəwje gə raŋg lai d’a ra né karee-yeḛ ləm, gə ŋgonee ləma, gə ŋgokea ləm tɔ saar kar ndɔ gə́ wɔji dɔ ɓee ləa teḛ kar ginkoji dəwje gə raŋg gə́ to njésiŋgamoŋje, gə mbaije gə́ boo-boo dum ne dɔ ɓee ləa.

Jeremi 32:19

I to njemajidum dɔ rəw kwɔji nékəmra’g ləm, i to njesiŋgamoŋ dɔ kula rai’g ləm tɔ. Kəmi oo panjaa dəwje lai gə mba kar nana kara iŋga né gə́ wɔji gə goo panjaa ləa-ləa ləm, gə goo kula rəa-rəa ləm tɔ.

Jeremi 50:41

Aa ooje, koso-dəwje d’ḭ dɔgel D’aw gə́ nee ləm, Ginkoji dəwje gə́ bula digi-digi Gə mbaije gə́ njésiŋgamoŋje D’uba naŋg d’ḭ rudu naŋg’d ree ləm tɔ.

Jeremi 50:9

Mbata aa ooje, m’a kar ginkoji dəwje gə raŋg gə́ boo-boo ləm, Gə́ bula digi-digi ləm tɔ lé D’a kḭ ɓee gə́ dɔgel mba rɔ gə Babilɔnje. D’a tɔs rɔ dee gə mba kaw rɔ sə dee Ndá d’a dum dɔ dee, Kag ɓandaŋgje lə dee to asəna gə ka̰ njegər goso rɔ Gə́ ḭ loo-rɔ’g tel gə jia kari el.

Jeremi 51:6

Ḭje Babilɔn aḭje ləm, Maji kar nana kara taa rəa ta yoo’g ləm tɔ Nà banelə seḭ a tujije səa na̰’d! Mbata to kàr dalba̰ lə Njesigənea̰, Yeḛ a ra səa né gə goo kula reaje.

Loo gə́ killa rea kəm Daniel’g 5:28

PARSIN: D’a kunda kəm ɓeeko̰ ləi dana kai kar Medəje gə Persəje.

Ojee 9:7

Ndɔje gə́ ka̰ kar bo̰ néra dee ɔs ta dee’g lé Teḛ mba̰ ləm, Ndɔje gə́ ka̰ kuga dɔ ji dee lé Teḛ mba̰ ləm tɔ. Israɛlje d’a koo kea̰ gao ya! Néra kori-korije lə sí gə kaltaje lə sí gə́ al dɔ loo sula lé ɓa Ar sí ooje ne njetegginta gə́ mbə-dəw ləm, Dəw gə́ ndil Ala dəb dəa’g lé Seḭ éeje ne gə́ dəw gə́ dəa tel wagəsa ləm tɔ.