Jakari 8:12 - Maktub gə́ To gə Kəmee

¹² Mbata kandə néje gə́ deḛ dubu lé A teḛkɔr ləm, Nduú a kul bo̰-bo̰ gə ka̰dee ləm, Naŋg a kar dee nésɔ dee ləma, Dara a kar dee mán-tàl ləm tɔ, Bèe ɓa n’a kar ges koso-dəwje gə́ nai neelé D’al rɔ dee wɔji dɔ néje’g neelé lai ya.

Jakari 8:12 ပူးပေါင်းရင်းမြစ်များ

Gḭ-Néje 26:12

Isaak dubu kó dɔ naŋg’d neelé ndá mee ləb gə́ neelé yeḛ iŋga kó aree uru kugu. Mbata Njesigənea̰ tɔr ndia dəa’g saar-aar ya.

Gḭ-Néje 27:28

Maji kar Ala ari mán tàl gə́ ḭ dara ləm, Gə ubu lə naŋg nee ləma, Gə kó gə mán-nduú yaa̰ ləm tɔ!

1 Mbaije 17:1

Eli, dəw gə́ Tisbe gə́ dɔ naŋg gə́ Galaad lé ula Akab pana: Njesigənea̰ Ala lə Israɛlje gə́ m’to kura ləa lé to Njesikəmba! Mee ləbje’g neelé tàl a kwa el ləm, ndi kara a kər el ləm tɔ nɛ gə goo ta gə́ ma nja m’a pa ɓa.

Pakɔsje 72:3

Mbɔl dɔ meekarabasur ləi ɓa Dɔ mbalje gə dɔdərlooje lé D’a kar koso-dəwje d’isi ne gə meekulɔm.

Pakɔsje 85:12

Meenda londoŋ uba dɔ naŋg nee Ndá meekarabasur gə́ to dan dara’g lé Ila kəmee oo tɔ.

Gosota-Kəmkàrje 19:12

Oŋg lə mbai lé to asəna gə ndu kinja miḭ lə toboḭ bèe ləm, Koo kəmtondoo ləa lé to asəna gə mán-tàl gə́ wa dɔ mu’g bèe ləm tɔ.

Esai 30:23

Yen ŋga yeḛ a kar ndi ər dɔ nédubu gə́ seḭ dubuje dɔ naŋg’d lé Ndá kandə nésɔ gə́ dɔ naŋg a kar sí lé A lel ta sí’g ləm, a kul sí ləm tɔ, Mee ndəa gən lé koso-nékulje lə sí D’a ko̰ mu loo-ko̰-mu’g lə dee gə́ tad rəg-rəg lé.

Esai 61:7

Rɔkul ɓa seḭ iŋgaje kédé Nɛ a kiŋgaje né ka̰ sí dɔ maree’g gɔl joo toree’g ləm, Boo-rɔkul ɓa deḛ d’isi ne kédé Nɛ d’a kal rɔ dee gə mba né ka̰ dee-deḛ ɓəi ləm tɔ, D’a kiŋga ne né gə́ to ka̰ dee Dɔ maree’g gɔl joo mee ɓee’g lə dee ləm, Rɔlel lə dee a to saar gə no̰ ləm tɔ.

Jeremi 31:12

D’a ree ra ne wəl gə rɔlel Dɔ dɔdərlooje gə́ Sio̰, D’a kaiŋgwɔd gə́ dɔ némajije’g Le Njesigənea̰ gə́ to wa ləm, Gə mán-nduú gə́ sigi ləm, gə ubu ləm, Gə badje ləma, gə maŋgje ləm tɔ, Meḛ dee a to kasəna gə loo-kamnaḭ Gə́ saga mán keneŋ bèe Ndá d’a si dan némeeko̰’g el ŋga.

Ejekel 34:28

D’a to nékunda banrɔ mbuna ginkoji dəwje gə raŋg’g el ŋga ləm, daje gə́ mee wala’g d’a sɔ dee el ŋga ləm tɔ ndá d’a si gə́ majee ɓó dəw kára kara a kɔm ɓəl dɔ dee’g el ŋga.

Ejekel 36:12

N’a kar koso-dəwje lə neḛ gə́ Israɛl ree njaa mee ɓee’g neelé ndá d’a taa ɓee lé karee to né ka̰ dee-deḛ, ɓee lé a to gə́ nénduba lə dee ləm, i a kar dee d’isi lal ŋganje el ŋga ləm tɔ.

Ejekel 36:30

N’a kar kandə kagje gə kandə néndɔje lə sí ḭ dɔ maree’d gə́ kédé-kédé mba kar rɔkul-boo lə ɓoo-boo tibi mbɔr sí mbuna ginkoji dəwje gə raŋg’g el ŋga.

Ejekel 36:9

Aa ooje, mee neḛ a to dɔ sí’g ləm, n’a tel rɔ neḛ gə́ rɔ sí’g ləm tɔ ndá seḭ a toje gə́ loo-ndɔje gə́ dubu néje keneŋ.

Ojee 13:3

Gelee gə́ nee ɓa d’a to ne kasəna Gə mum gə́ oso teḛ gə́ ndɔ ləm, D’a to ne kasəna Gə mán tàl gə́ wa waga ɓa gəḭ ɓəi ləm, D’a to ne kasəna Gə tisa kó gə́ lel sané kad loo-kunda-kó’g bèe ləma, D’a to ne kasəna Gə sa pər gə́ teḛ kəmbolè’g bèe ləm tɔ.

Ojee 14:5

Njesigənea̰ pa togə́bè pana: M’a gɔl dee dɔ rəmje’g lə dee ləm, M’a kunda dee dan kəm’g Gə meenda kɔr jol-jol ləm tɔ, Mbata oŋg ləm gə́ ḭ səm pu dɔ dee’g lé Wəi bèm mba̰.

Joɛl 2:19

Njesigənea̰ ila koso-dəwje’g ləa pana: M’a kula gə kó gə mán-nduú gə́ kul gə ubu Gə mba karee as sí nag ya. Tɔɓəi m’a kya̰ loo kar ginkoji dəwje gə raŋg D’ila rɔkul dɔ sí’g bèe el ŋga.

Joɛl 2:22

Seḭ daje gə́ wala lé ɓəlje el Mbata ndag-looje gə́ dɔdilaloo’g lé D’a tel kidi gogo ləm, Kagje d’a kandə gə kandə dee njim-njim ləma, Kag-kodé gə kag-nduú d’a kar sí nébaoje lə dee ləm tɔ.

Ləbije 26:3

Ɓó lé seḭ ilaje koji dɔ godndumje’g ləm, lé seḭ aaje dɔ godndumje kər-kər raje née ləm tɔ ndá

Soponi 3:13

Ges Israɛlje gə́ nai lé D’a ra né gə́ kori-kori el ŋga ləm, D’a pata ŋgɔm el ləma, Dəw a kiŋga ta sukəmloo ta dee’g el ləm tɔ, Nɛ d’a kul rɔ dee ləm, d’a kwa rɔ dee ləm tɔ Ndá dəw kára kara a kɔm ɓəl dɔ dee’g el.

Ajee 1:10

Gelee gə́ nee ɓa dara ɔg sí ne mán ndi ləm, naŋg kara ɔg sí ne kandə néje ləa ləm tɔ.

Ajee 2:18

Maji kar sí síje gèŋ ə̰jije ooje néje gə́ dəs mee ndəa gən saar mee ndɔ gə́ njekɔm’g rɔ-joo-giree-sɔ’g lə naḭ gə́ njekɔm’g jinaikara, un kudee mee ndəa gə́ deḛ tum ne gel kəi lə Njesigənea̰ lé síje gèŋ ə̰jije ooje ɓa!

Ajee 2:19

See néje gə́ ka̰ dubu nai mee damje’g ya ɓəi wa. Kag-nduúje əsé kag-kodéje əsé kag-dḭje əsé kag-koiyoje kara d’andə el. Nɛ un kudee mee ndəaje gə́ nee lé n’a tel tɔr ndu neḛ dɔ sí’g ya.

Jakari 8:6

Njesigənea̰ gə́ njeboo-néje pa togə́bè pana: Ɓó lé néje neelé to gə́ nékɔb Kəm ges koso-dəwje gə́ nai mee ndəa gən lé See a to gə́ nékɔb kəm neḛ Njesigənea̰’d gə́ njeboo-néje lé to wa.

Malasi 3:11

Néje gə́ d’a gə tuji kó lə sí lé m’a ndaŋg dee mbata lə sí ndá d’a tuji dɔ kó lə sí gə́ a gə teḛ mbi lé el ləm, nduú gə́ mee ndɔje’g lə sí kara d’a lal kandə el ləm tɔ. Njesigənea̰ gə́ njeboo-néje lé ɓa pa bèe.

Matiyo 6:33

Saŋje ɓeeko̰ lə Ala gə meekarabasur ləa kédé ɓa néje lai neelé yeḛ a kar sí dɔ’g ɓəi.

1 Njé gə́ Kɔrḭtə 3:21

Maji kar dəw kára kara ti rəa dɔ dəwje’g el mbata néje lai to gə́ ka̰ sí ya:

Tel tura Godndu 32:2

Maji kar ta ndoo ləm taa loo pəl-pəl asəna gə ndi gə́ ər bèe ləm Ta ləm tɔ asəna gə mán-tàl Gə́ wa dɔ naŋg bèe ləm Asəna gə ndi dodaŋ Gə́ ər dɔ mu gə́ idi lururu’g ləma Asəna gə mán ndi Gə́ ula kəŋgəŋ-kəŋgəŋ dɔ mu’g bèe ləm tɔ!

Tel tura Godndu 33:13

Yeḛ pata dɔ ginkoji Jisepje’g pana: Ɓee lə dee a kiŋga ndutɔr Ji Njesigənea̰’g, Nénoji gə́ maji dum gə́ ḭ dara gə́ to mán-tàl ləm, Gə manje gə́ maji dum gə́ gel naŋg’d ləm,

Tel tura Godndu 33:28

Israɛlje d’isi dan meekulɔm’g, Kəm-rəw-manje lə Jakobje to gə kəmee ɓəd Mee ɓee gə́ kó gə mán-nduú to keneŋ, Tàl ḭ mee dara’g ləa wa dɔ’g tɔ.

Maktub gə́ Jak ula ne ar ngan-Allaje 3:18

Deḛ gə́ saŋg rəw mba kɔm dəwje na̰’d gə meelɔm lé meekarabasur ɓa deḛ yel kée ya.