Jakari 14:20 - Maktub gə́ To gə Kəmee

²⁰ Mee ndəa’g neelé d’a ndaŋg taree dɔ ma̰dje gə́ gwɔs kundaje’g Pana: TO GƎ KƎMEE ƁƎD KAR NJESIGƎNEA̰. Tɔɓəi ŋgoroje gə́ mee kəi’g lə Njesigənea̰ lé D’a to kasəna gə baije gə́ to no̰ loo-nékinjaməs’g bèe.

Jakari 14:20 ပူးပေါင်းရင်းမြစ်များ

1 Mbaije 7:50

Bai-gelje gə́ ka̰ togo rɔ gə kiaje Gə baije gə ka-larje gə əb-pər gə́ ra gə larlɔr gə́ àr ŋgad-ŋgad, Kula larje gə́ ka̰ tɔ tabidi-rəwkəije gə́ ra gə larlɔr Mbata mée gə́ kəi gə́ to tarəwkəi gə́ to gə kəmee doi ləm, Gə mbata tabidi rəw-kəi gə́ to tarəwkəi lə kəi-si-Ala gə́ to gə kəmee ləm tɔ.

2 Sôrta Gḭka Israɛlje 4:8

Yeḛ ra tabulje dɔg ndá unda dee mee kəi gə́ to gə kəmee’g, mi dɔkɔl ləm gə mi dɔgel ləm tɔ. Yeḛ léḛ larlɔr gə́ karmbije as dɔg.

Pakɔsje 110:3

Loo gə́ i mbo̰ njérɔje ləi dɔ na̰’d ndá Koso-dəwje ləi lé rɔ dee wɔilɔ ne pélé-pélé, Loo gə́ mabra uba bər ndá Siŋgai gə́ basi’g lé tel ree rɔi’g Asəna gə tàl bèe Mbuna néɗɔi-rɔ gə́ to gə kəmee’g lé.

Teḛ-Raga 25:29

D’a ra ka-larje gə karmbije gə ŋgo-dɔ-manje gə baije gə́ wɔji dəa mba tər ne néje naŋg, d’a ra dee gə larlɔr gə́ àr ŋgad-ŋgad.

Teḛ-Raga 37:16

Yeḛ ra nékulaje lai gə́ wɔji dəa gə́ d’a gə kunda dɔ tabul’g neelé as ka-larje ləm, gə karmbije ləm, gə ŋgo dɔ manje ləma, gə baije gə́ ka̰ tər ne néje naŋg ləm tɔ, yee ra dee gə larlɔr gə́ àr ŋgad-ŋgad ya.

Teḛ-Raga 39:30

Deḛ léḛ larlɔr gə́ àr ŋgad-ŋgad ra gə́ mbɔr gə́ to gə kəmee bèe ndá deḛ tḭja né keneŋ to gə́ tḭja ne nétorjije bèe pana: TO GƎ KƎMEE KAR NJESIGƎNEA̰.

Esai 23:18

Nɛ nékiŋgaje lə dee gə nékoga-dɔ-ji dee gə́ mina̰ lé d’a kunda dee gə kəmee kar Njesigənea̰ ɓó d’a mbo̰ dee dɔ na̰’d əsé d’a ŋgəm dee gə́ ŋgəm el, mbata nékiŋgaje lə dee lé d’a kar deḛ gə́ d’isi no̰ Njesigənea̰’g mba kar dee d’isi ne dan nékul rɔ dee’g bèdèg ləm, kar dee d’iŋga ne kubuje gə́ bḭ-maji ləm tɔ.

Esai 52:1

Teḛje kəm sí, seḭ gə́ síje Sio̰! Teḛje kəm sí, undaje siŋga sí dɔ maree’g, Ulaje kubu-naḭ rɔ sí’g, Seḭ gə́ Jerusalem, ɓee-boo gə́ to gə kəmee! Mbata deḛ gə́ lal kinja tamɔd dee gə njé gə́ mina̰ lé D’a kandə mee ɓee’g lə sí el ŋga.

Jeremi 31:40

Wəl-loo kɔm nin dəwje gə́ bu to keneŋ lai ləm, gə loo-ndɔje lai saar teḛ ne kəm-rəw-mán gə́ Sedro̰ ləma, saar teḛ ne kil tarəwkɔg gə́ ria lə Rəw-kaw-kundaje gə́ to par gə́ bər ləm tɔ lé d’a kunda dee gə kəmee kar Njesigənea̰ ndá d’a koso nda̰ el ləm, d’a tuji nda̰ el ləm tɔ saar gə no̰.

Ejekel 45:1

Loo gə́ seḭ a raje tḛ́ kaije ne na̰ ɓee karee to gə́ né ka̰ sí ka̰ sí lé ndá seḭ a kaije dəb ɓee karje ŋgalee as kag-kwɔji-né tɔl-dɔg-loo rɔ joo giree-mi (25.000) ləm, tadee as kag-kwɔji-né tɔl-dɔg-loo dɔg (10.000) ləm tɔ, kundaje gə́ nékar gə́ to gə kəmee mbata lə Njesigənea̰, loo neelé lai a to loo gə́ to gə kəmee.

Ləbije 8:9

Yeḛ ula dɔgugu dəa’g ndá tɔ mbɔr gə́ ra gə larlɔr no̰ dɔgugu’d gə́ to dɔgugu gə́ to gə kəmee lé, to gə́ Njesigənea̰ un ne ndia aree mba karee ra lé tɔ.

Abdias 1:17

Nɛ kaji a to dɔ mbal gə́ Sio̰’d Gə́ a to gə kəmee ləm, Ginkoji Jakobje lé D’a tel taa nénduba lə dee gogo ya ləm tɔ.

Soponi 2:11

Njesigənea̰ a to ɓəl kədm-kədm kəm dee’g Mbata yeḛ a tuji magəje lai gə́ dɔ naŋg nee pugudu-pugudu ya, Yee ɓa nana kara a kunda barmba nea̰’g mee ɓee’g ləa ləm, Gə dɔgoré-looje’g lə ginkoji dəwje gə raŋg ləm tɔ.

Jakari 14:19

Yee ɓa a to bo̰ néra Ejiptəje gə́ a kɔs ta dee’g ləm, Gə bo̰ néra ginkoji dəwje gə raŋg lai Gə́ lal kaw ra naḭ gə́ wɔji dɔ kəi-surumje Gə́ a kɔs ta dee’g lé ləm tɔ.

Jakari 8:3

Njesigənea̰ pa togə́bè pana: Neḛ n’tel n’ree Sio̰, Neḛ ndigi si dan njé gə́ Jerusalem’g. D’a ɓar Jerusalem lé ɓee-boo gə́ njekila koji ləm, Mbal lə Njesigənea̰ gə́ njeboo-néje lé D’a ɓaree mbal gə́ to gə kəmee ləm tɔ.

Jakari 9:15

Njesigənea̰ gə́ njeboo-néje a kaa dɔ dee, D’a tuji loo pugudu ləm, D’a dum dɔ kɔri-ər yɔroŋ-dooje lə njéba̰je lə dee ləm tɔ, D’a kai né ləm, D’a kunda bula to gə́ njékai mán-nduú gə́ mḭje bèe ləm tɔ, Nékai a rusu meḛ dee to gə́ mán gə́ rusu ŋgo-dɔ-mán bèe ləm, To gə́ məs gə́ aḭ dɔkum loo-nékinjaməs’g bèe ləm tɔ.

Malasi 1:11

Un kudee loo kuba’g lə kàr saar teḛ ne loo kuru naŋg’d ləa jig ya rim ɓar mḭ mbuna ginkoji dəwje gə raŋg’g. Gə looje lai-lai lé deḛ roo né gə́ ə̰də sululu keneŋ d’unda ne no̰ rim ya ləm, deḛ d’odo nékarje gə́ àr ŋgad-ŋgad ləm tɔ, mbata rim gə́ ɓar mḭ mbuna ginkoji dəwje gə raŋg’g lé ya. Njesigənea̰ gə́ njeboo-néje lé ɓa pa bèe.

Bula lə Israɛlje 4:14

nékulaje lai gə́ deḛ ra ne kula keneŋ lé d’a kunda dee dɔ kubu’g lé togə́bè: jo-pərje ləm, kag-larje gə́ ta dee tɔ ja̰-ja̰ ləm, əbje ləm, baije ləma, gə nékulaje lai gə́ wɔji dɔ loo-nékinjaməs ləm tɔ, tɔɓəi d’a lab nékɔn dəa gə́ ra gə ndar da gə́ ɓaree dopḭ dɔ’g, tɔɓəi d’a tula kunda kagje ka̰ kodo loo-nékinjaməs lé keneŋ tɔ.

Bula lə Israɛlje 4:7

D’a lab kubu gə́ ndul piro-piro dɔ tabul’d gə́ wɔji dɔ pil muru gə́ to gə kəmee lé ndá d’a kunda kaje gə karmbije gə ŋgo-dɔ-manje gə baije gə́ ka̰ tər ne néje naŋg lé dɔ kubu gə́ lab dɔ’g lé, ndá pil muru a lal dəa el tɔ,

Bula lə Israɛlje 7:13

Néje gə́ yeḛ ree ne ɓa to nee: ka-larnda gə́ kwɔi ləa as ŋgan nékwɔji kwɔi-lə-né tɔl-dɔg gə dəa tɔl-munda ləm, bai-larnda gə́ kwɔi ləa as ŋgan nékwɔji kwɔi-lə-né tɔl siri ləm tɔ gə goo nékwɔji-né gə́ wɔji dɔ kəi-kubu gə́ to gə kəmee dɔi, nduji gə́ ndá léréré gə́ mbɔḭ gə ubu rusu néje neelé joo bɔr mbata lə nékar gə́ ka̰ nduji lé tɔ,

Bula lə Israɛlje 7:19

Néje gə́ yeḛ ree ne ɓa to nee: ka-larnda gə́ kwɔi ləa as ŋgan nékwɔji kwɔi-lə-né tɔl-dɔg gə dəa tɔl-munda ləm, bai-larnda gə́ kwɔi ləa as ŋgan nékwɔji kwɔi-lə-né tɔl siri ləm tɔ gə goo nékwɔji-né gə́ wɔji dɔ kəi-kubu gə́ to gə kəmee dɔi lé, nduji gə́ ndá léréré gə́ mbɔḭ gə ubu rusu néje neelé joo bɔr mbata lə nékar gə́ ka̰ nduji lé,

Lugu 11:41

Néje gə́ to ŋgaw meḛ sí’g ɓa waje arje njénékəmtondooje ɓa néje lai a to néje gə́ àr mbata lə sí ɓəi tɔ.

Néra Njékaḭkulaje 10:15

Ndu dəw ɓar aree oo ɔm gə́ gɔl joo pana: Né gə́ Ala ɓaree né gə́ àr ŋgad-ŋgad lé maji kari ɓaree né gə́ ram el.

Néra Njékaḭkulaje 10:28

Yeḛ ula dee pana: Seḭ gərje gao, d’ɔg Jib gə́ rara kara loo karee wa kura gə dəw gə́ dɔ ɓee’d gə́ raŋg ləm, d’ɔgee loo kila gɔlee mee kəi’g ləa ləm tɔ. Nɛ Ala am m’oo to gə́ dəw gə́ rara kara m’a ɓaree né gə́ mina̰ əsé né ram el.

Néra Njékaḭkulaje 11:9

Ndu dəw ḭ ɓar dara ɔm gə́ gɔl joo am m’oo pana: Né gə́ Ala ɓaree né gə́ àr ŋgad-ŋgad lé maji kam m’ɓaree né gə́ ram el.

Néra Njékaḭkulaje 15:9

Yeḛ ɔr kəm síjeḛ ɓəd el ləm, yeḛ ɔr kəm dee-deḛ ɓəd el ləm tɔ. Meekun lə dee ɓa yeḛ ɔr ne won kaiya meḛ dee’g.

Njé gə́ Kolosə 3:17

Né gə́ rara gə́ seḭ raje lé tapa sí əsé néra sí kara raje gə ri Mbaidɔmbaije Jeju, raje ne Ala Bɔ-dəwje oiyo gə mbəa-yeḛ nja tɔ.

1 Piɛrə 2:5

Seḭje kara toje asəna gə mbalje gə́ to kəmba gə́ d’odo sí rɔd sí dɔ na̰’g mba ra ne kankəm kəi gə́ ka̰ Ndil lé ləm, kar sí toje njékinjanéməsje gə́ d’unda sí gə kəmee mba kar sí unje nékinjaməs gə́ ka̰ ndil lé gə ri Jeju Kristi gə́ a taa kəm Ala rəgm lé ləm tɔ.

1 Piɛrə 2:9

Nɛ seḭ lé seḭ toje ginkoji dəwje gə́ Ala mbər sí ləm, seḭje toje njékinjanéməsje gə́ gin sí to gə́ mbai ləm, seḭ toje ginkoji dəwje gə́ toje gə kəmee ɓəd ləma, seḭ toje ka̰ Ala nja doŋgɔ doi ləm tɔ mba kar sí ilaje ne riɓar dɔ yeḛ gə́ ɔr sí dan loondul gə́ ndul njudu-njudu’g unda sí dan lookàr’g ləa gə́ àr raŋg-raŋg lé.

1 Piɛrə 4:11

Lé nana ɓa gə́ pata ndá maji karee pa kankəmta lə Ala ya. Lé nana ɓa gə́ ra kula ra Ala ndá maji karee ra gə goo siŋgamoŋ gə́ Ala a karee ya, togə́bè ɓa néje lai gə́ seḭ a raje lé Jeju Kristi a koo loo kula ne rɔnduba dɔ Ala’g tɔ. Rɔnduba ləm, gə siŋgamoŋ ləm tɔ lé to kea̰-yeḛ gə ləbee-ləbee saar-saar gə no̰ ya. Amen.

Loo gə́ killa rea kəm Ja̰’g 1:6

yeḛ unda sí gə́ gin ɓeeko̰ gə́ kára ba ar sí n’tojee njékinjanéməsje gə́ ka̰ Bɔbeeje Ala ləm tɔ. Maji karee yeḛ nja to Bao-ronduba gə Njedum dɔ loo gə ləbee-ləbee gə no̰. Amen.

Loo gə́ killa rea kəm Ja̰’g 20:6

Deḛ gə́ d’a teḛ dɔkumbwa gə́ dɔtar lé rɔ dee a lel dee ləm, d’a to dəwje to gə́ gə kəmee ləm tɔ. Yoo gə́ joo a ɓar ri dee el ŋga, nɛ d’a to njékinjanéməsje lə Ala gə ka̰ Kristi tɔ ndá d’a ko̰ səa ɓee na̰’d as ləb dee tɔl-dɔg.

Loo gə́ killa rea kəm Ja̰’g 5:10

I gɔl dee mbo̰ dee na̰’d gin ɓeeko̰ gə́ kára ba ləm, ar dee to ne njékinjanéməsje gə́ ka̰ Ala ləm tɔ ndá d’a ko̰ɓee dɔ naŋg ne.

1 Samel 2:14

Ndá yeḛ tɔs ne né mee jo-pər’g ləm, mee ŋgoro-pər’g ləm, mee jo-muru’g ləma, gə mee jo gə́ boi’g ləm tɔ. Né gə́ rara gə́ karmbi-lar gə́ təa tɔ jàn ɔs un ndá njekinjanéməs lé taa gə́ né kea̰-yeḛ nja. Yee ɓa gə́ néra gə́ deḛ ra kəm Israɛlje’g lai gə́ ree loo gə́ Silo’g lé.