Jakari 14:2 - Maktub gə́ To gə Kəmee

² Ma mbo̰ ginkoji dəwje gə raŋg lai Gə mba kar dee rɔ gə Jerusalem, D’a taa ɓee-boo ləm, d’a buu mee kəije buu-buu ləm, D’a kur dɔ denéje’g ləm tɔ, Ges dəwje gə́ mee ɓee-boo’g lé D’a kaw ɓər, Nɛ ges koso-dəwje gə́ nai lé D’a tuji deḛ lai mee ɓee-boo’g el.

Jakari 14:2 ပူးပေါင်းရင်းမြစ်များ

Esai 13:16

D’a kunda ŋgan deeje kəm dee’g ya vaga-vaga tɔl dee ləm, D’a buu mee kəije lə dee buu-buu ləma, D’a kur dɔ denéje’g lə dee ləm tɔ.

Esai 4:3

Bèe ɓa ges njé gə́ Sio̰ gə ges njé gə́ Jerusalem Gə́ nai d’a ɓar dee njémeendaje, To nana ɓa gə́ Njesigənea̰ ndaŋg ria Mbuna deḛ gə́ d’isi kəmba Jerusalem lé.

Esai 5:26

Yeḛ un nétɔji gə́ tar Ɓar ne ginkoji dəwje gə raŋg gə́ d’isi əw ləm, Yeḛ ɓar ginkoji dəwje gə́ kára Gə kól gwɔi naŋg ləm tɔ Ndá aa ooje, deḛ d’ɔs rɔ dee ɓad gə rɔkwɔilɔ ree.

Esai 65:18

Nɛ maji kar sí raje rɔlel ləm, Sije dan kalrɔ’g ta-ta ləm tɔ Gə mbata lə né gə́ m’a gə kunda, Mbata m’a gə kunda Jerusalem gə́ nékalrɔ ləm, M’a gə kunda koso-dəwje ləa gə́ nérɔlel ləm tɔ.

Jeremi 21:4

Njesigənea̰, Ala lə Israɛlje pa togə́bè pana: Aa ooje, nérɔje gə́ to ji sí’d gə́ seḭ aw rɔje ne gə mbai gə́ Babilɔn gir ndògo-bɔrɔje’g ləm, gə Kaldeje gə́ d’aḭ dɔ sí sub gə rɔ ləm tɔ lé n’a tel ta dee gə́ dɔ sí-seḭ’g ndá n’a mbo̰ dee dan mee ɓee-boo’g neelé tɔ.

Jeremi 34:1

Ta gə́ Njesigənea̰ ula Jeremi gə rɔtaje nee loo gə́ Nebukadnesar, mbai gə́ Babilɔn gə njérɔje ləa lai ləm, gə ɓeeko̰je lai gə́ mee ɓeeje gə́ yeḛ o̰ ləma, gə koso-dəwje lai ləm tɔ d’aw rɔ gə njé gə́ Jerusalem gə ɓee-booje lai gə́ wɔji dəa lé ɓa nee:

Nɔ̰-ndôo gə́ wɔji dɔ Jerusalem 1:10

Njékula kəm dee ndooje lé Saa némajije lə dee Gə́ to ŋgonkəm dee lé lai-lai ya, Deḛ d’oo ginkoji dəwje gə raŋg Gə́ d’andə mee kəi’g lə deḛ gə́ to gə kəmee Nɛ deḛje neelé kédé lé i un ndui Ɔg dee ne loo kila gɔl dee Loo mbo̰ dɔ na̰’d ləi el lé.

Ejekel 5:8

ndá yee gə́ bèe ɓa Mbaidɔmbaije gə́ Njesigənea̰ pa ne ta togə́bè pana: Aa ooje, neḛ n’aw sə sí gə ta tɔɓəi n’a gə gaŋgta dɔ sí’g kəm ginkoji dəwje gə raŋg’g.

Joɛl 3:2

Tɔgərɔ ya, mee ndəaje’g neelé Kuraje gə́ diŋgam gə njé gə́ dené kara M’a kɔm Ndiləm dɔ dee’g tɔ.

Amɔs 7:17

Gelee gə́ nee ɓa, aa oo, ta gə́ Njesigənea̰ pa ɓa nee: Dené ləi a tel to gə́ kaiya-dené mee ɓee’g ləm, Ŋganije gə́ diŋgam gə njé gə́ dené lé D’a kwəi yoo-kiambas ləma, D’a kai ndɔ ləi gə kúla-kwɔji-né Kar njé gə́ raŋg ləm tɔ. I ya kara a kwəi dɔ naŋg gə́ mina̰’g Ndá d’a kwa Israɛlje dɔ naŋg’d lə dee Kaw sə dee gə́ ɓər Dɔ ɓee gə́ raŋg’d gə́ əw ya tɔ.

Jakari 12:2

Aa ooje, n’a kar Jerusalem tel to ŋgo kai oŋg lə neḛ ndá koso-dəwje lai gə́ gugu giree ləm, gə Judaje ləm tɔ lé d’a kai karee ila kəm dee kar dee d’aw jogè-jogè loo gə́ d’a kaḭ dɔ Jerusalem sub gə rɔ lé.

Jakari 12:3

Mee ndəa’g neelé n’a kar Jerusalem to asəna gə biri mbal gə́ wɔi yaa̰ mbata lə koso-dəwje lai. Deḛ lai gə́ ndigi karee ḭta gogo lé d’a kiŋga doo keneŋ ndá ginkoji dəwje gə raŋg lai gə́ dɔ naŋg nee d’a kɔm na̰’d mba rɔ səa.

Jakari 12:9

Meḛ ndəa’g neelé n’a kula rɔ neḛ ndubu gə mba tuji ginkoji dəwje gə raŋg lai gə́ d’a gə ree rɔ gə Jerusalem lé.

Matiyo 22:7

Mbai lé oo ndá mée ḭ səa pu aree ɔr njérɔje ləa ar dee d’aw mba kar njétɔl dəwje neelé d’udu ləm, gə roo ɓee lə dee dula-dula ləm tɔ.

Mark 13:14

Loo gə́ seḭ a kooje né gə́ mina̰ gə́ ka̰ tuji ne loo gə́ kəm karee teḛ keneŋ el lé (maji kar yeḛ gə́ tura ta neelé ndá ra kəmee ra kaa keneŋ ya) yen ndá maji kar deḛ gə́ d’isi Jude lé d’aḭ d’aw dɔ mbalje’g ləm,

Mark 13:19

Néɓəŋgərəti gə́ a gə ra dəwje mee ndəaje’g neelé un kudee ndɔ gə́ Ala tum ne gin naŋg nee saar ɓasinè lé dəw oo garee gə́ togə́bè kédé nda̰ el ləm, a koo togə́bè gogo nda̰ bèe el ya ləm tɔ.

Lugu 2:1

Mee ndəaje’g neelé Sesar Auguste un ndia mba kar dee tura dəwje lai-lai dɔ naŋg nee kunda ne ri dee mee maktub-tura-dəwje’g.