Jakari 10:2 - Maktub gə́ To gə Kəmee

² Mbata magəje lé pa taje gə́ kari ba ləm, Njénékooje lé teggin taŋgɔm ləma, Nije gə́ d’ɔr gée lé to néje gə́ ŋgɔm Gə́ gɔl ne meḛ dəwje gə ta gə́ kari ba ləm tɔ. Gelee gə́ nee ɓa d’ila ne mbir-mbir to gə́ koso-badje bèe ləm, D’isi ne dan nékəmndoo’g Mbata njekul dee godo ləm tɔ.

Jakari 10:2 ပူးပေါင်းရင်းမြစ်များ

Gḭ-Néje 31:19

Loo gə́ Laba̰ aw mba kinja bḭ badje ləa ndá Rasel ɓogo magəje lə bɔbeeje,

1 Mbaije 22:17

Mise tel ilá keneŋ pana: Ma m’oo Israɛlje lai gə́ sanéna̰ dɔ mbalje’g To gə́ badje gə́ njekul dee godo bèe, Bèe ɓa Njesigənea̰ pana: Dəwje neelé ɓée deeje godo. Maji kar nana kara tel ree mee kəi’g ləa gə meekulɔm ya.

Maktub gə́ wɔji dɔ Jɔb 13:4

Seḭ lé taŋgɔm ɓa gə́ takə̰ji lə sí ləm, Seḭ lai lé toje njékuma̰ kaji rɔje gə́ gə mḭdé ba ləm tɔ.

Maktub gə́ wɔji dɔ Jɔb 21:34

See gelee ban ɓa seḭ ulamje ta gɔl məəm gə́ gə mḭdé ba wa. Ges ta gə́ seḭ ilamje keneŋ lé to ta sukəmloo ya.

Esai 41:29

Aa ooje, deḛ lai to né gə́ kari ba ləm, Kula ra dee to gə́ né el ləma, Magəje lə dee kara to gə́ lel gə́ ula kari ba ləm tɔ.

Esai 44:25

M’tuji nétɔjije lə njétegginta gə́ ŋgɔmje ləm, M’ar njénékooje tel to mbəje ləm tɔ, M’rəm gə kəmkàr lə njékəmkàrje ləm, Négər lə dee lé ma m’telee gə́ némbə ləm tɔ.

Esai 44:9

Njé kuba magəje lé to gə́ dəwje gə́ kari ba ya lai. Kula ra dee gə́ maji yaa̰ lé askəm ra né kára kara el, Kula ra dee lé nja ɔr gel rɔ dee woḭ. Deḛ d’oo loo el ləm, gosonégər lə dee godo ləm tɔ Gə mba kar rɔkul dəb ne dɔ njéra deeje’g.

Esai 46:5

See na̰ ɓa seḭ a kasje kəm kwáje kwɔjimje ne kaareeje as səm wa. See na̰ ɓa a kamje m’to tana səa kar síjeḛ səa n’taje gə na̰ pai-pai wa.

Jeremi 10:8

Deḛ lai to gə́ mbəje gə njégərnéelje, Gosɔnégər lə dee to gə́ né gə́ kari ba: To gə́ kag!

Jeremi 14:13

M’ilá keneŋ m’pana: Ǝi Mbaidɔmbaije gə́ Njesigənea̰, aa oo, njéteggintaje d’ula dee pana: D’a koo kiambas gogo el ŋga ləm, ɓoo-boo a teḛ dɔ dee’g gogo el ŋga ləm tɔ. Nɛ lée neelé i a kar dee d’isi dan kankəm meekulɔm’g.

Jeremi 14:22

See mbuna magəje’g lə ginkoji dəwje gə raŋg lé Yee gə́ ar ndi ər to keneŋ wa. Esé see dara ɓa ar ndi ər wa. See to i Njesigənea̰, Ala lə sí el wa. Jeḛ j’unda meḛ sí yel gə́ dɔi’g, Mbata to i ya ɓa ra néje neelé lai.

Jeremi 23:17

Deḛ d’ula njékḛji neḛ bəḭ-bəḭje pana: Njesigənea̰ pana: Seḭ a kiŋgaje meelɔm, Tɔɓəi deḛ d’ula Njé njaa gə goo takə̰ji gə́ meḛ dee’gje pana: Némajel kára kara a teḛ dɔ sí’g el.

Jeremi 23:32

Njesigənea̰ pana: Aa ooje, njéteggin ni-ŋgɔmje gə́ d’ɔr gée d’ar koso-dəwje lə neḛ ndəm ne gə goo taŋgɔmje gə́ lel ta dee’g lé neḛ n’aw sə dee gə ta, Njesigənea̰ ɓa pa bèe. Neḛ n’ula dee el ləm, n’un ndu neḛ n’ar dee el ləma, maji dee gə́ tḛ́ bèe ya kara to mba koso-dəwje el ləm tɔ.

Jeremi 27:10

Mbata deḛ teggin taŋgɔm ɓa d’ar sí gə mba kam m’tuba sí ne mee ɓee’g lə sí m’ɔm sí əw ləm, gə mba kar sí uduje ne ləm tɔ.

Jeremi 27:14

Njéteggintaje gə́ d’ula sí pana: Mbai gə́ Babilɔn a kwa sí ɓər el lé maji kar sí ooje ta lə dee el. Mbata ginta gə́ deḛ teg d’ar sí lé to taŋgɔm.

Jeremi 27:9

Bèe ndá ta lə njéteggintaje lə sí, gə njéndo̰-ərje lə sí, gə njékoo-né-gə-nije lə sí, gə njétən kéréméje lə sí, gə njémbeḛje lə sí gə́ d’ula sí pana: Seḭ a kosoje gel mbai gə́ Babilɔn’g el lé maji kar sí ooje el.

Jeremi 28:15

Tɔɓəi Jeremi, njetegginta ula Hanania njetegginta lé pana: Hanania, maji kari ur mbi oo ne ta nee! Njesigənea̰ ulai el nɛ i ɓa ula koso-dəwje nee ta gə́ ŋgɔm ba.

Jeremi 29:8

Mbata Njesigənea̰ gə́ njeboo-néje gə́ to Ala lə Israɛlje lé pa togə́bè pana: Maji kar sí ya̰je loo arje njéteggintaje lə sí, gə njénékooje lə sí gə́ d’isi mbuna sí’g lé su kəm sí el. Ɔmje meḛ sí dɔ njekɔr gel nije gə́ d’aw d’ɔr gel nije lə sí lé el ləm tɔ.

Jeremi 37:19

See njéteggintaje lə sí gə́ tegginta pana: Mbai gə́ Babilɔn a ree rɔ sə sí-seḭ əsé ɓee nee el lé d’əd ra ɓəi wa.

Jeremi 50:17

Israɛl lé to ŋgon badə gə́ ndəm Gə́ toboḭje tuba gée, Mbai gə́ Asiri ɓa gə́ njesɔ dakasee kédé, yeḛ gə́ rudu lé to Nebukadnesar, mbai gə́ Babilɔn ndá yeḛ təd siŋga rém-rém.

Jeremi 51:23

I ɓa m’uni m’tuji ne njekulbadje gə koso-nékulje ləa ləm, I ɓa m’uni m’tuji ne njendɔ gə bɔ maŋgje ləa ləma, I ɓa m’uni m’tuji ne njéguburuɓeeje gə mbaije ləm tɔ.

Jeremi 6:14

Deḛ tɔ ta doo lə koso-dəwje ləm Gə goo rəbee el Ndá pana: Meelɔm! Meelɔm! Nɛ meelɔm godo,

Jeremi 8:11

Deḛ tɔ ta doo lə koso-dəwje ləm Gə goo rəbee el Ndá deḛ pana: Meelɔm! Meelɔm! Nɛ meelɔm godo.

Nɔ̰-ndôo gə́ wɔji dɔ Jerusalem 2:14

Némḭdije gə́ njéteggintaje ləi d’oo lé To néje gə́ kari ba ləm, Gə néje gə́ ŋgɔm ləm tɔ, Mbata deḛ teggin kaiya raije gə́ raga Mba kɔr ne ta ɓər dɔi’g el, Deḛ d’ula sí ta némḭdije gə́ ŋgɔm ləm, Gə sukəmloo ləm tɔ.

Ejekel 21:21

Unda siŋgai dɔ maree’g Tel rɔi par gə́ dɔkɔl! Aar njaŋg tel rɔi par gə́ dɔgel! Tɔji kiambas ləi gə looje lai Gə́ tel kəmi gə́ keneŋ.

Ejekel 21:29

Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: To gə́ seḭ arje meḛ sí olé dɔ néra kori-korije’g lə sí loo gə́ seḭ arje kaltaje lə sí to ne raga ndəgəsə ləm, seḭ arje néra síje lé riba ne dɔ kaiya ra síje pərəg ləm tɔ lé, to gə́ seḭ arje meḛ sí olé dɔ’g ndá yeḛ a kwa sí gə jia peb ya!

Ejekel 34:5

Deḛ sanéna̰ mbata njekul dee godo, deḛ tel to nékwa lə daje lai mee wala’g ləm, deḛ sanéna̰ kad-kad ləm tɔ.

Ejekel 34:8

Neḛ n’to njesikəmba! Mbaidɔmbaije gə́ Njesigənea̰ pa togə́bè pana: To gə́ badje lə neḛ to nékunda banrɔ ləm, deḛ tel to nékwa lə daje lai gə́ mee wala’g ləm tɔ mbata njékul deeje gə́ godo ləm, mbata njékulbadje lə neḛ d’ar meḛ dee to dɔ badje’g lə neḛ el ləma, deḛ d’ul rɔ dee-deḛ ya yaa̰ ɓó deḛ d’aw gə badje lə neḛ loo-ko̰-mu’g el ləm tɔ ndá

Ojee 3:4

Mbata Israɛlje lé d’a gə si kur dee əw lal mbai ləm, lal dəw dɔ dee ləm, lal nékinjanéməsje gə néndajije ləma, lal ŋgɔ-njekinjanéməs gə nékoo-ndukunje lə Ala ləm tɔ.

Misee 2:12

Ǝi Jakobje! M’a mbo̰ sí dɔ na̰’d gə gin sí lai ya. M’a mbo̰ ges Israɛlje dɔ na̰’d To gə́ mbo̰ ne badje loo-kaar dee’g bèe ləm, To gə́ koso-nékulje loo-ko̰-mu’g lə dee bèe ləm tɔ, Bèe ɓa ndu dəwje a ɓar wəl-wəl keneŋ.

Habakuk 2:18

Néndaji gə́ tɔl lé see majee to ɗi mbata lə njetɔlee wa. Néndaji gə́ léḛ gə́ ndoo ne né gə ŋgɔm Gə mba kar njerea unda tar ɔm mée dɔ’g Loo gə́ yeḛ si ra magəje gə́ ta mundu lé kara see majee to ɗi wa.

Jakari 11:17

Meeko̰ a koso dɔ njekulbadje gə́ gə mḭdé ba Gə́ tusu badje ləa ya̰ dee. Maji kar kiambas tuji kag jia gə kəmee gə́ dɔkɔl! Maji kar kag jia tudu kurum ləm, Kar kəmee gə́ dɔkɔl tɔ kab ya ləm tɔ.

Bula lə Israɛlje 27:17

mba karee teḛ no̰ dee’g aw raga ləm, gə tel no̰ dee’g ree ɓee ləm tɔ, mba karee ɔr no̰ dee teḛ sə dee raga ləm, ɔr no̰ dee tel sə dee ɓee ləm tɔ, bèe ɓa mba kar koso-dəwje lə Njesigənea̰ lé d’a to kasəna gə badje gə́ njekul dee godo lé bèe el.

Matiyo 9:36

Loo gə́ yeḛ oo koso-dəwje ndá mée aw taḭ-taḭ mbata yeḛ oo dee asəna gə ŋgan badje gə́ lab ɔr dee ləm, njekul dee kara godo ləm tɔ.

Mark 6:34

Loo gə́ Jeju unda loo mee to’g teḛ aa loo oo boo-dəwje gə́ bula digi-digi lé ndá mée tɔsee gə no̰ mbigi-mbigi dɔ dee’g mbata yeḛ oo dee asəna gə badje gə́ njekul dee godo. Bèe ɓa yeḛ un kudu ndoo dee ne néje ɓəd-ɓəd loo bula tɔ.

Tel tura Godndu 13:2

Ɓó lé njetegginta kára ḭ dan sí’g əsé njeni gə́ pata nétɔji əsé nédumkoo ləm,

Njéga̰g-Rəwtaje 18:14

Yen ŋga dəwje mi gə́ d’aw gə mba tən ɓee gə́ Layis koo lé d’un ta dəji ŋgako̰ deeje pana: See seḭ gərje to gə́ mee kəije’g neelé loo-kwa-Ala-mee’g to keneŋ ləm, néndaji magəje to keneŋ ləma, néndaji gə́ tɔl gə́ tɔl gə yeḛ gə́ léḛ gə́ léḛ to keneŋ ləm tɔ wa. Ɓasinè maji kar sí ooje né gə́ kəm ra ɓa.