Habakuk 1:6 - Maktub gə́ To gə Kəmee

⁶ Aa ooje, n’a gə kɔs Kaldeje ɓɔḭ-ɓɔḭ Deḛ lé to koso-dəwje gə́ to njéo̰gje gə njémeekḭ juguguje ləm, Deḛ d’unda tad ɓee gə dɔ naŋg dana gaŋg Gə mba kaw taa loo-sije gə́ to ka̰ dee-deḛ el lé ləm tɔ.

Habakuk 1:6 ပူးပေါင်းရင်းမြစ်များ

2 Mbaije 24:1

Mee ləb ko̰ɓee’g lə Jojakim lé Nebukadnesar, mbai gə́ Babilɔn ɔr rɔ aw rɔ səa. Jojakim ula dəa nea̰’g as ləb munda ɓa yeḛ tel ḭ səa ɔsee rəw ɓəi.

2 Mbaije 24:2

Yen ŋga Njesigənea̰ ula kudu njérɔje gə́ Kalde, gə kudu njérɔje gə́ Siri, gə kudu njérɔje gə́ Moab, gə kudu njérɔje gə́ Amo̰ mba kar dee rɔ gə Jojakim lé, yeḛ ula dee ar dee rɔ gə Judaje mba tuji dee gə goo ta gə́ Njesigənea̰ pa gə ndu kuraje ləa gə́ to njéteggintaje lé.

2 Sôrta Gḭka Israɛlje 36:17

Togə́bè ɓa Njesigənea̰ ar mbaije lə Kaldeje d’ḭ rɔ sə dee ndá yeḛ tɔl basaje gə kiambas mee loo’g lə deḛ gə́ to gə kəmee’g. Yeḛ ya̰ basa əsé ŋgoma̰də əsé ɓuga əsé dəw gə́ dəa pudu lé kəmba el nɛ yeḛ ya̰ deḛ lai jia’g ya.

2 Sôrta Gḭka Israɛlje 36:6

Nebukadnesar, mbai gə́ Babilɔn ɔr rɔ aw rɔ səa ndá yeḛ wá teá gə kúla lar gə́ kas aw səa Babilɔn tɔ.

Esai 23:13

Aaje loo ooje njéɓeeje gə́ Kalde, Deḛ gə́ to koso-dəwje kédé el lé Deḛ to dəwje gə́ d’isi dɔdilaloo’g Ɓa njé gə́ Asiri tum ne gin ɓee d’ar dee, Deḛ d’unda kəije gə́ duu dɔ loo keneŋ ləm, Deḛ təd kəi-mbaije gə́ Tir ləma, Deḛ tuji dee pugudu-pugudu ləm tɔ.

Jeremi 13:20

I ɓee gə́ Jerusalem, un kəmi gə́ tar Oo ne njéba̰je ləi Deḛ d’ḭ par gə́ dɔgel d’aw ree. See koso-dəwje gə́ d’ari Gə́ to koso-dəwje Gə́ d’ula rɔnduba dɔi’g lé d’əd ra wa.

Jeremi 21:4

Njesigənea̰, Ala lə Israɛlje pa togə́bè pana: Aa ooje, nérɔje gə́ to ji sí’d gə́ seḭ aw rɔje ne gə mbai gə́ Babilɔn gir ndògo-bɔrɔje’g ləm, gə Kaldeje gə́ d’aḭ dɔ sí sub gə rɔ ləm tɔ lé n’a tel ta dee gə́ dɔ sí-seḭ’g ndá n’a mbo̰ dee dan mee ɓee-boo’g neelé tɔ.

Jeremi 21:7

Njesigənea̰ pana: Gée’g gogo ndá n’a kuba Sedesias, mbai gə́ Juda, gə kuraje ləa, gə koso-dəwje gə́ teḛ ta yoo-koso’g gə ta kiambas’g, gə ji njéba̰je’g lə dee lé kya̰ dee ji Nebukadnesar, mbai gə́ Babilɔn’g ləm, gə ji njéba̰je’g lə dee ləma, gə ji deḛ gə́ ndigi kar dee d’wəi ləm tɔ. Yen ɓa Nebukadnesar a tɔl dee gə kiambas ɓó yeḛ a kya̰ dee el ləm, a koo kəmtondoo lə dee el ləma, mée a kaw taḭ-taḭ mbata lə dee el ləm tɔ.

Jeremi 25:9

aa ooje, n’a gə kula kula ɓar koso-dəwje lai gə́ d’isi dɔgel ləm, n’a kula kula kar kura lə neḛ Nebukadnesar, mbai gə́ Babilɔn ləm tɔ. N’a karee ree rɔ gə ɓee nee gə dəw-mee-ɓeeje gə́ keneŋ ləm, gə ginkoji dəwje gə raŋg gə́ nee lai gə́ gugu dəa ləm tɔ mba tuji dee pugudu ləm, mba kar dee tel gə́ néno̰ ləm, gə nékula sul dɔ’g ləma, gə nétuji gə́ to gə no̰ ləm tɔ. Njesigənea̰ ɓa pa bèe.

Jeremi 30:5

Njesigənea̰ pa togə́bè pana: Jeḛ j’oo ndu kii gə́ to ɓəl kədm-kədm, To néɓəl kədm-kədm ɓó To némeelɔm el.

Jeremi 4:11

Mee ndəa’g neelé D’a kula koso-dəwje nee ləm Gə ɓee gə́ Jerusalem ləm tɔ pana: Lel gə́ nuŋga kəd-kəd ḭ dɔdərlooje gə́ dɔdilaloo’g Ula rəw-kaw’g lə ŋgolə koso-dəwje ləm gə́ dené Nɛ gə mba tó ne kó el ləm, Gə mba gɔl ne kandə né el ləm tɔ.

Jeremi 4:6

Waje nétɔji tar par gə́ Sio̰! Aḭje ɓó aarje naŋg el! Mbata m’a gə kar némeeko̰ gə nétuji gə́ boo D’a kḭ par gə́ dɔgel ree.

Jeremi 4:8

Gelee gə́ nee ɓa maji kar sí ulaje kubu-kwa-ndòo rɔ sí’g No̰je ne ləm, gə tuma̰je ne ŋgururu-ŋgururu ləm tɔ, Mbata oŋg lə Njesigənea̰ gə́ to asəna gə pər bèe lé a lal sí el.

Jeremi 5:15

Aa ooje, m’a kar ginkoji dəwje D’ḭ loo gə́ əw’g ya ree Mba rɔ sə sí, seḭ gel-bɔje lə Israɛl, Njesigənea̰ ɓa pa bèe. To ginkoji dəwje gə́ to njésiŋgamoŋje ləm, To ginkoji dəwje gə́ ləw ləm, To ginkoji dəwje gə́ seḭ gərje takɔji dee el ləma, Dɔ ta gə́ deḛ pa kara Seḭ a gərje el ləm tɔ.

Jeremi 8:10

Gelee gə́ nee ɓa n’a kar denéje lə dee Tel to ne ka̰ njé gə́ raŋg ləm, Loo-ndɔje lə dee n’a kar njé gə́ raŋg Taa gə́ ka̰ dee ləm tɔ. Mbata un kudee dɔ dəwje gə́ gɔ-gɔ’g Saar teḛ ne dɔ njé gə́ boo-boo’g lé Mal kiŋga né gə́ gə goo rəbee el Ra dee ŋgwɔd-ŋgwɔd. Un kudee dɔ njéteggintaje’g Saar teḛ ne dɔ njékinjanéməsje’g lé Deḛ lai to njésukəmlooje.

Ejekel 16:40

D’a ree gə dəw-bulaje mba kiŋgai ne ləm, d’a tilai gə kɔri-ər ləma, d’a ga̰gi mbidi-mbidi gə kiambas ləm tɔ,

Ejekel 21:31

Mbaidɔmbaije gə́ Njesigənea̰ pa togə́bè pana: D’a kɔr jɔg ləm, d’a kɔr dɔgugu ləm tɔ! Néje d’a tel to ɓəd. Yeḛ gə́ d’aree ula dəa lé d’a karee unda dəa tar ləm, yeḛ gə́ d’aree unda dəa tar lé d’a karee ula dəa ləm tɔ.

Ejekel 28:7

aa oo, n’a kɔm dəw-dɔ-ɓeeje gə́ to ɓəl kədm-kədm unda dəwje gə́ raŋg dɔi’g, deḛ d’a tɔr kiambas lə dee tuji ne maji kəmkàr ləi ləm, d’a tibi yiro dɔ maji péd-péd’g ləi ləm tɔ.

Ejekel 31:12

Dəw-dɔ-ɓeeje gə́ to njéra nékərm-kərmje kunda mar deeje mbuna ginkoji dəwje gə raŋg’g lé tugá jəg-jəg d’ubá wɔg d’yá̰. Barkəmeeje toso dɔ mbalje’g gə mee wəl-looje’g lai ləm, barkəmeeje gə́ lam-lam lé təd d’ɔm kəm kila-rəw-ma̰je’g lai gə́ mee ɓee’g ləm tɔ ndá koso-dəwje lai gə́ dɔ naŋg nee d’ɔr rɔ dee ndilee’g d’ubá d’yá̰.

Joɛl 2:3

Loo gə́ to no̰ dee’g lé To asəna gə pər gə́ roo loo dula-dula bèe ləm, Loo gə́ goo dee’g lé To asəna gə ndo̰ pər gə́ o̰ loo rug-rug bèe ləm tɔ, Dɔ naŋg gə́ no̰ dee’g kédé lé To asəna gə loo-ndɔ gə́ Edḛ bèe, Nɛ goo dee’g gogo ndá Loo tel to dɔdilaloo gə́ majel, Né kára kara nai keneŋ el.