Esai 9:4 - Maktub gə́ To gə Kəmee

⁴ Mbata markob-rɔje lai gə́ d’aw ne loo-rɔ’g ləm, Gə kubu-rɔje lai gə́ rogo dan məs’g ləm tɔ lé D’a kɔm dee pər’d Kar dee roo dula-dula ya.

Esai 9:4 ပူးပေါင်းရင်းမြစ်များ

Gḭ-Néje 27:40

Mbɔl dɔ kiambas ləi ɓa i a si ne kəmba ləm, I a ra ɓər lə ŋgokɔḭ ləm tɔ. Nɛ loo gə́ i a kila tar gə́ yo gə́ nee Ndá i a təd néməməna̰ ləa gwɔsi’g.

Pakɔsje 125:3

Mbata kag-mbai gə́ ka̰ meeyèr lé A ko̰ɓee dɔ njémeekarabasurje’g el Gə mba kar njémeekarabasurje lé D’ula ji dee par gə́ néra gə́ kori-kori’g lé el.

Pakɔsje 81:6

Yee ɓa to ndukun gə́ yeḛ un ar gel-bɔje lə Jisəb Loo gə́ d’aw mba rɔ gə njé gə́ Ejiptə lé. M’oo ndu dəw ɓar ya nɛ m’gər debee el. Yeḛ pana:

Esai 10:16

Gelee gə́ nee ɓa Mbaidɔmbaije, Gə́ to Mbaidɔmbaije gə́ njeboo-néje lé A kula gə né gə́ a kar njérɔje ləa Gə́ rɔ dee to kɔgərɔ-kɔgərɔ lé D’a kəŋg ne kəŋ-kəŋ, Tɔɓəi gin boo-ronduba ləa lé Né a nduba gə́ raga keneŋ To gə́ pər gə́ o̰ bèe.

Esai 10:5

Njesigənea̰ pana: Meeko̰ a koso dɔ Asirije’d Gə́ to ndəi gə́ wɔji dɔ oŋg ləm Ndəi gə́ to ji dee’g lé ɓa To nékula gə́ wɔji dɔ boo-oŋg ləm tɔ.

Esai 14:25

M’a təd Asirije rém-rém mee ɓee’g ləm ləm, M’a tuba dee gə gɔlm dɔ mbalje’g ləm ləm tɔ, Néməməna lə dee a godo gwɔb dee’g ləm, D’a kɔr nékodo lə dee gə́ wɔi lé dɔ tam dee’g ləm tɔ.

Esai 16:4

Ya̰je loo arje Moabje gə́ tuba dee lé Ree d’isi mee ɓeeje’g lə sí ləm, Maji kar sí toje gə́ njo̰loo-kiya-rɔ lə dee No̰ njetujiloo’g ləm tɔ. Mbata nékəmndoo a godo ləm, Njetuji loo lé a kunda ŋgaŋ buguru ləma, Yeḛ gə́ njetuba ɓee gə gɔlee lé a sané pá ləm tɔ.

Esai 47:6

Ma m’ar məəm ḭ səm pu dɔ koso-dəwje’g ləm, M’ila ndɔl dɔ nédɔji’g ləm Ndá ma m’uba dee m’ya̰ dee meḛ jii’g, Nɛ seḭ arje meḛ sí aw taḭ-taḭ dɔ dee’g el ləm, Seḭ arje néməməna̰ lə sí wɔi gwɔb ɓuga’g ləm tɔ.

Esai 49:26

Njékula kəm sí ndooje lé M’a kar dee d’usɔ dakasrɔ dee-deḛ ya ləm, M’a kar dee d’ai məs dee karee oso kəm dee’g To gə́ mán-nduú gə́ sigi bèe ləm tɔ. Dəwje lai d’a koo to gə́ ma m’to Njesigənea̰ Gə́ njekaji sí ləm, M’to njekoga dɔ sí Gə́ to njesiŋgamoŋ lə Jakob ləm tɔ.

Esai 51:13

Seḭ arje meḛ sí wəi dɔ Njesigənea̰ gə́ njekunda sí’g lé Yeḛ gə́ naji dara gə tum gel naŋg nee. Seḭ undaje bala gə ndɔje kára-kára lai No̰ oŋg’d lə njekula kəm loo ndòo, Mbata yeḛ saŋg loo gə mba tuji sí pugudu! See oŋg lə njekula kəm loo ndòo lé ɓa to ra wa.

Esai 52:2

Ḭje tar kundaje kor rɔ sí’g! Ḭje tar síje dɔ loo-si sí’g, Seḭ gə́ Jerusalem! Tuduje kúla gə́ to gwɔs sí’g, Seḭ ŋgalə Sio̰ gə́ toje ɓərje lé!

Esai 54:14

I a kaar njaŋg gə goo néra gə́ gə dɔ najee, Nékula kəmi ndòo a tibi mbɔri el, Mbata né kára gə́ i a ɓəlee ndəb ne pəd-pəd lé a godo, Mbata a tibi mbɔri nda̰ el.

Esai 9:5

Mbata d’oji ŋgon d’ar sí ləm, D’ar sí ŋgon gə́ diŋgam ləm tɔ, Ko̰ɓee lé a to dɔ tamee’g, D’a kunda ria lə Njemaji dum ləm, Gə Njekwɔji ta kəmkàr ləm, Gə Ala gə́ njesiŋgamoŋ ləm, Gə Bɔ gə́ Njesigənea̰ ləma, Gə Mbai gə́ njemeelom ləm tɔ.

Jeremi 30:8

Njesigənea̰ gə́ njeboo-néje lé pana: Mee ndəa’g neelé m’a təd néməməna̰ gə́ wɔi gwɔs sí’g ləm, m’a gaŋg kulaje gə́ d’wa sí ne lé mbidi-mbidi ti ləm tɔ. Dəw-dɔ-ɓeeje d’a kisi gə́ dəw dɔ sí el ŋga.

Jeremi 48:17

Seḭ lai gə́ guguje dəa sub lé ləm, Gə seḭ lai gə́ gərje ria ləm tɔ lé, Maji kar sí nea̰je siije mbigi-mbigi pajena: Kag-mbai siŋgamoŋ nee Gə́ majidum lé see təd to gə́ ban wa.

Ləbije 26:13

Ma m’to Njesigənea̰, Ala lə sí gə́ m’ar sí undaje loo mee ɓee gə́ Ejiptə teḛje ləm, m’ɔr sí kula ɓər’g ləm tɔ, ma m’gaŋg kúla néməməna̰ gə́ to gwɔb sí’g m’ar sí undaje dɔ sí tar njaaje ne ya.

Nahum 1:13

Ɓasinè m’a tuji néməməna̰ ləa gə́ to gwɔs sí’g ləm, M’a gaŋg kulaje gə́ tɔ sí ne mbidi-mbidi ləm tɔ.