Esai 61:11 - Maktub gə́ To gə Kəmee

¹¹ Mbata to gə́ dɔ naŋg ar kandə né gə́ dubu keneŋ lé idi ləm, To gə́ loo-kamnaḭ ar kandə néje gə́ dubu keneŋ d’uba ləm tɔ lé Mbaidɔmbaije gə́ Njesigənea̰ a kar kaji gə néra gə́ gə dɔ najee uba Kəm ginkoji dəwje gə raŋg’g lai togə́bè tɔ.

Esai 61:11 ပူးပေါင်းရင်းမြစ်များ

Gḭ-Néje 1:11

Tɔɓəi Ala pana: Maji kar naŋg lé kinja gə muje gə kamje ɓagəsa gə kandə dee mee dee’g mee dee’g ləm, gə kagje gə́ ka̰ sɔ kandə dee gə́ d’andə gə kandə dee ɓəd-ɓəd ləma, gə kagje gə́ kandə dee gə́ ka̰ dubu to mee dee’g mee dee’g dɔ naŋg nee ləm tɔ. Ndá to lée’g bèe ya.

Pakɔsje 72:16

Ko a to gə́ naŋg rib-rib mee ɓee’g ləm, Gə dɔ sém mbalje’g ləm tɔ: Dɔ kó a kula tar yəgə-yəgə to gə́ dɔ kagje gə́ Liba̰ bèe ləm, Dəwje kara d’a kidi pug-pug mee ɓee-booje’g asəna gə muje gə́ to dɔ naŋg’d bèe ləm tɔ.

Pakɔsje 72:3

Mbɔl dɔ meekarabasur ləi ɓa Dɔ mbalje gə dɔdərlooje lé D’a kar koso-dəwje d’isi ne gə meekulɔm.

Pakɔsje 85:11

Meemaji gə meenda londoŋ d’iŋga na̰ ləm, Meekarabasur gə meelɔm d’wa na̰ rib ləm tɔ.

Pa gə́ ur dɔ paje 4:16

I lel gə́ dɔgel lé maji kari ḭ ləm, I lel gə́ dɔkɔl lé maji kari ree ləm tɔ Ula dɔ loo-ma̰a-kagje’g ləm, Ar baḭ néje gə́ ə̰də sululu Taa loo keneŋ pəl-pəl ləm tɔ, Maji kar yeḛ gə́ m’unda dan kəm’g lé Andə loo-ma̰a-kagje’g ləa Maji karee sɔ kandə kagje ləa gə́ maji dum lé.

Esai 4:2

Mee ndəa gən lé barkəm Njesigənea̰ a tel kidi Gə rɔndɔḭ ləm, gə rɔnduba ləm tɔ, Ndá kandə né gə́ mee ɓee’g lé A tel bə̰dərə bə̰ ləm, A tel maji péd-péd ləm tɔ, Mbata lə Israɛlje gə́ teḛ ta yoo’g lé.

Esai 45:23

Ma nja ma man rɔm gə rim ləm, Kankəmta ɓa teḛ tam’g Ɓó m’a telee ɓəd el ŋga ləm tɔ, Nana kara a rəm gə no̰ kəjee naŋg nɔm’g ləm, Dəw gə́ rara kara a kubu rəa gə rim-ma ya ləm tɔ.

Esai 45:24

Dəwje d’a kulam pana: Néra gə́ danasur gə siŋgamoŋ lé To rɔ Njesigənea̰’g ya kára ba ɓa. Deḛ lai gə́ meḛ dee ḭ sə dee pu dəa’g lé D’a tel ree rəa’g ndá Rɔkul a ra dee.

Esai 45:8

Maji kar néra gə́ gə dɔ najee lé Ḭ mee dara’g ər to gə́ ndi bèe ləm, Kar pélé lə ndi yəm dɔ naŋg nee ləm tɔ! Maji kar dɔ naŋg ta̰ ar kaji ra tɔg keneŋ ləm, Ar néra gə́ gə goo rəbee uba keneŋ səa na̰’d ləm tɔ! Ma Njesigənea̰ m’to gə́ njekunda néje neelé lai.

Esai 46:13

M’ar néra gə́ gə dɔ najee ləm ree M’aree to mbɔr sí’g dəb ɓó to əw el, Kaji ləm kara a tila gə́ tila el tɔ. M’a kar kaji to mee ɓee gə́ Sio̰’g ləm, M’a kar rɔnduba ləm ɔm dɔ Israɛlje’g ləm tɔ.

Esai 48:18

Ǝi! ɓó lé seḭ urje mbi sí gèŋ dɔ torndum’g ndá Si maji lə sí a to to gə́ mán baa bèe ləm, Rɔlel lə sí a to kasəna gə paŋgəm mán baa-boo bèe ləm tɔ,

Esai 58:11

Njesigənea̰ a to njekɔrnoḭ ya ta-ta ləm, Yeḛ a kar məəi nda̰ tub Mee looje gə́ tudu kurum-kurum’g ləm, Yeḛ a kar barkəmrɔije tel ŋgəŋ ŋgəŋ-ŋgəŋ ləm, I a to kasəna gə loo-kamnaḭ Gə́ saga mán dɔ’g ləma, A to kasəna gə ŋgira mán Gə́ manje d’yi keneŋ tə el ləm tɔ.

Esai 60:18

Dəw a koo ta néra gə́ kərm-kərm mee ɓee’g ləi el ŋga ləm, D’a koo ta tuji gə tuji-boo dɔ naŋg’d ləi el ŋga ləm tɔ, I a kunda ri kaji dɔ ndògo-bɔrɔje’g ləi ləm, A kunda ri rɔnduba dɔ tarəwkɔgje’g ləi ləm tɔ.

Esai 60:21

Koso-dəwje ləi lai D’a to njéra né gə́ gə dɔ najee-je ləm, D’a kiŋga ɓee lé gə́ ka̰ dee gə no̰ ləm tɔ, Yee ɓa to barkəmkag gə́ ma ɓa ma̰a ləm, To kula gə́ jim ɓa ra ləm tɔ Gə mba karee ula rɔnduba dɔm’g.

Esai 62:1

Gə goo kunda gə́ m’unda Sio̰ dan kəm’g lé ɓa M’a si ne dɔ mundu el ləm, Gə goo kunda gə́ m’unda Jerusalem dan kəm’g lé ɓa M’a kwa ne rɔm nda̰ el ləm tɔ Saar kar kaji ləa teḛ To gə́ kàr gə́ uba kuji’g bèe ləm, Saar kàr kɔr dɔ kúla’g ləa teḛ Asəna gə pərŋgel gə́ ndogó bèe ləm tɔ.

Esai 62:2

Togə́bè ɓa ginkoji dəwje gə raŋg d’a koo kaji ləi ləm, Mbaije d’a koo rɔnduba ləi ləm tɔ Ndá d’a ɓari gə rii gə́ sigi Gə́ ta Njesigənea̰ ɓa a teḛ kunda ne dɔi’g.

Esai 62:7

Maji kar sí areeje wa rəa el Saar karee gɔl ne Jerusalem gogo Gə mba karee to gə́ nérɔnduba gə́ dɔ naŋg nee.

Matiyo 13:23

Kandə kər gə́ oso dɔ naŋg gə́ maji kó’g lé to asəna gə dəw gə́ oo ta neelé ləm, gə gər ginee ləm tɔ. Dəw neelé nai gə́ kər gə́ andə tɔl əsé rɔ-misa̰ əsé rɔ-munda tɔ.

Matiyo 13:3

Yeḛ ula dee ta gə gosota wɔji ne dɔ néje bula pana:

Matiyo 13:8

Yee gə́ raŋg teḛ pə ɔm dɔ naŋg gə́ maji kó’g ndá andə yaa̰, yee gə́ ná ndá andə tɔl, yee gə́ ná ndá andə rɔ-misa̰, yee gə́ ná ndá andə rɔ-munda tɔ.

1 Piɛrə 2:9

Nɛ seḭ lé seḭ toje ginkoji dəwje gə́ Ala mbər sí ləm, seḭje toje njékinjanéməsje gə́ gin sí to gə́ mbai ləm, seḭ toje ginkoji dəwje gə́ toje gə kəmee ɓəd ləma, seḭ toje ka̰ Ala nja doŋgɔ doi ləm tɔ mba kar sí ilaje ne riɓar dɔ yeḛ gə́ ɔr sí dan loondul gə́ ndul njudu-njudu’g unda sí dan lookàr’g ləa gə́ àr raŋg-raŋg lé.