Esai 60:6 - Maktub gə́ To gə Kəmee

⁶ Koso-jambalje gə́ bula digi-digi lé D’a taa ɓee ləi pəl-pəl Gə jambalje gə́ Madian gə Epa, D’a kḭ Seba ɓa ree, D’a kodo larlɔr gə néje gə́ ə̰də sululu ləm, D’a pidi ne Njesigənea̰ dɔ néreaje’g ləm tɔ.

Esai 60:6 ပူးပေါင်းရင်းမြစ်များ

Gḭ-Néje 10:7

Ri ŋgalə Kus ɓa nee: Saba, Habila, Sabta, Raema gə Sabteka. Ri ŋgalə Raema ɓa nee: Seba gə Dedan.

Gḭ-Néje 25:13

Aa ooje, ri ŋgalə Ismael gə goo ri dee ləm, gə goo ginkoji dee ləm tɔ ɓa nee: Nebajot to ŋgondər Ismael, gə Kedar, gə Abdeel, gə Mibsam,

1 Mbaije 10:2

Yeḛ ree Jerusalem gə njédan géeje bula yaa̰ ləm, gə jambalje gə́ d’odo néje gə́ ə̰də sululu gə larlɔr yaa̰ gə jərje gə́ gad dee to yaa̰ ləm tɔ. Yeḛ ree ne rɔ Salomo̰’g ɓa ɔr ne səa sor néje lai gə́ to mée’g tɔ.

2 Mbaije 8:9

Ajael aw gə jambalje rɔ-sɔ gə́ d’odo némajije gə́ Damas gə mba kar njetegginta lé. Loo gə́ yeḛ ree iŋgá mba̰ ndá yeḛ ulá pana: Ŋgoni Ben-Adad, mbai gə́ Siri ɓa ulam rɔi’g pana: Rɔko̰ neelé see a kya̰ neḛ ya wa.

1 Sôrta Gḭka-Israɛlje 1:33

Ŋgalə Madian ɓa ri dee to nee: Epa, gə Eper, gə Enok, gə Abida gə Elda. Deḛ lai neelé to ŋgalə Ketura.

2 Sôrta Gḭka Israɛlje 9:1

Mbai gə́ dené gə́ Seba oo ta riɓar lə Salomo̰ ndá yeḛ ree Jerusalem gə mba kaḭ mee gə ta dəjije gə́ kədərə. Yeḛ ree gə dəwje gə́ gée’g bula yaa̰ ləm, gə jambalje gə́ d’odo néje gə́ ə̰də sululu ləm, gə larlɔr yaa̰ ləma, gə jərje gə́ gad dee to yaa̰ ləm tɔ. Yeḛ ree ne rɔ Salomo̰’g ulá ne taje lai gə́ to mée’g.

Pakɔsje 67:4

Ǝi Ala, maji kar koso-dəwje lé pidii, Maji kar koso-dəwje lai d’ɔs gajii ya.

Pakɔsje 72:10

Mbaije gə́ Tarsis gə deḛ gə́ d’isi dɔgoré-loo’g lé D’a karee nékoga-dɔ-rɔ dee ləm, Mbaije gə́ Saba gə Seba lé D’a karee nénojije ləm tɔ.

Pakɔsje 72:15

D’a si kəmba karee ne larlɔr gə́ Seba ləm, D’a ra tamaji mbata ləa ta-ta lal kila ta dee naŋg ləma, D’a tɔr ndu dee dəa’g gə ndɔ dee ndɔ dee ya ləm tɔ.

Esai 30:6

Ndərta gə́ wɔji dɔ da-kulje gə́ kel dɔkɔl! Deḛ d’unda mee ɓee gə́ néurti gə nékəmndoo to keneŋ gaŋg, To loo gə́ ko̰ toboḭ gə bɔ toboḭ ree keneŋ ləm, Li-meewai gə da-kɔb gə́ ḭ gə bagee ree keneŋ ləm tɔ, Deḛ d’odo nékiŋgaje lə dee gir mulayḛ̀je-je’g lə dee ləm, D’odo nébaoje lə dee dɔ dun jambalje’g ləm tɔ D’aw ne d’ar koso-dəwje gə́ d’askəm ra né kára kara mbata lə dee el.

Esai 42:10

Ɔsje pa gə́ sigi arje Njesigənea̰, Ɔsje pa pideeje ne Areeje ɔr gwɔi naŋg nee njal, Seḭ gə́ awje dɔ baa-boo-kad’g Gə seḭ gə́ síje ta’g ləm, Seḭ dɔgoré-looje gə dəwje lai gə́ d’isi keneŋ ləm tɔ.

Esai 45:14

Njesigənea̰ ula Israɛlje togə́bè pana: Nékiŋgaje lə Ejiptəje, gə nérabje lə Etiopije Gə ka̰ Sabaje gə́ kagrɔ dee ŋgal pur-pur lé D’a dəs ree rɔ sí’g ndá D’a tel to gə́ ka̰ sí-seḭ. Koso-dəwje neelé d’a njaa goo sí’g ləm, D’a dəs gə kúla lar rɔ dee’g ləma, D’a kunda barmba no̰ sí’g ra ne ndòo rɔ sí’g kula sí ne pana: Tɔgərɔ, Ala si rɔ sí-seḭ’g ya kára ba ləm, Ala gə́ raŋg gə́ njekorè dəa godo ləm tɔ.

Esai 60:9

Mbata dɔgoré-looje d’unda meḛ dee yel dɔm’g ləm, Batoje gə́ Tarsis ɓa to gə́ ŋgaw ta deeje Gə mba kaw kodo ŋganije gə́ loo gə́ əw’g ree sə dee Gə larnda gə larlɔr lə dee ləm tɔ Gə mbata ri Njesigənea̰, Ala ləi, Yeḛ gə́ to Njerɔkunda lə Israɛlje gə́ ula rɔnduba dɔi’g lé.

Esai 61:6

Nɛ seḭ lé d’a ɓar sí njékinjanéməsje lə Njesigənea̰ ləm, D’a kunda ri sí gə́ kuraje lə Ala lə sí ləm tɔ. Seḭ a kubaje maji nébaoje lə ginkoji dəwje gə raŋg ləm, Seḭ a ndubaje rɔ sí ká gə néro̰dubaje lə dee ləm tɔ.

Jeremi 6:20

Ubu gə́ ə̰də sululu gə́ d’ḭ ne Seba ləm, Gə kamnaḭje gə́ d’ə̰də lel Gə́ d’ḭ ne dɔ ɓee gə́ əw ləm tɔ lé See m’aw ndòo dee wa. Nékinjaməsje lə sí gə́ ka̰ roo lé Lelm el ləm, Nékinjaməsje lə sí gə́ raŋg kara Taa kəm el ləm tɔ.

Ejekel 27:22

Njérab néndogoje gə́ Seba gə Raema lé seḭ sə deeje toje njéndogo gə na̰ néje. Deḛ to njé ree gə néje lai gə́ ə̰də sululu gə́ maji dum ləm, gə jərje lai gə́ gad dee to yaa̰ gə gel dee gel dee ləma, gə larlɔr ləm tɔ d’unda dee loo-rab néndogoje’g ləi.

Soponi 3:10

Njékwa neḛ meḛ dee’gje Gə́ to koso-dəwje lə neḛ gə́ sanéna̰ lé D’a kḭ kel tura-baa gə́ Etiopi’g nu lé Ree gə nékarje kar neḛ.

Jakari 14:16

Deḛ lai gə́ nai mbuna ginkoji dəwje gə raŋg’d Gə́ ree rɔ gə Jerusalem lé D’a ree gə ləb dee ləb dee Gə mba kunda barmba dəb kəm dee naŋg No̰ Mbai gə́ to Njesigənea̰ gə́ njeboo-néje’g ləm, Gə mba ra naḭ gə́ wɔji dɔ kəi-surumje ləm tɔ.

Malasi 1:11

Un kudee loo kuba’g lə kàr saar teḛ ne loo kuru naŋg’d ləa jig ya rim ɓar mḭ mbuna ginkoji dəwje gə raŋg’g. Gə looje lai-lai lé deḛ roo né gə́ ə̰də sululu keneŋ d’unda ne no̰ rim ya ləm, deḛ d’odo nékarje gə́ àr ŋgad-ŋgad ləm tɔ, mbata rim gə́ ɓar mḭ mbuna ginkoji dəwje gə raŋg’g lé ya. Njesigənea̰ gə́ njeboo-néje lé ɓa pa bèe.

Matiyo 2:11

Deḛ d’andə mee kəi’g ndá d’oo ŋgonkas gə kea̰je gə́ Mari lé. Deḛ d’unda barmba dəb kəm dee naŋg nea̰’g. Tɔɓəi deḛ teḛ gə nébaoje lə dee d’wa ne səa noji, d’aree larlɔr ləm, gə no̰ kag gə́ ə̰də sululu ləma, gə timbá ləm tɔ.

Njé gə́ Rɔmə 15:9

Nɛ njépole-magəje d’ula rɔnduba dɔ Ala’g gə mba meekɔrjol ləa gə goo ta gə́ ndaŋg mee maktub’g pana: Gelee gə́ nee ɓa m’a pidii mbuna ginkoji dəwje gə raŋg’g ləm, M’a kɔs pa kula ne rɔnduba rɔ rii’g ləm tɔ.

Tel tura Godndu 32:43

Seḭ ginkoji dəwje gə raŋg ɔsje pa Ulaje ne rɔnduba dɔ koso-dəwje’g ləa! Mbata Njesigənea̰ dal ba̰ məs kuraje ləa ləm, Yeḛ dal ba̰ né gə́ njéba̰je ləa Ra ləm tɔ ndá Yeḛ uga dɔ ɓee ləa ləm Gə dɔ koso-dəwje ləa ləm tɔ.

Njé gə́ Pilibə 2:17

Ɓó lé məsm a kaḭ kula naŋg ndá m’a koo gə́ nékinjaməs gə nékarnoji gə́ m’ar sí mba gɔl ne meekun lə sí, yee ɓa ma m’ra ne rɔlel m’al ne rɔm sə sí na̰’d.

1 Piɛrə 2:5

Seḭje kara toje asəna gə mbalje gə́ to kəmba gə́ d’odo sí rɔd sí dɔ na̰’g mba ra ne kankəm kəi gə́ ka̰ Ndil lé ləm, kar sí toje njékinjanéməsje gə́ d’unda sí gə kəmee mba kar sí unje nékinjaməs gə́ ka̰ ndil lé gə ri Jeju Kristi gə́ a taa kəm Ala rəgm lé ləm tɔ.

1 Piɛrə 2:9

Nɛ seḭ lé seḭ toje ginkoji dəwje gə́ Ala mbər sí ləm, seḭje toje njékinjanéməsje gə́ gin sí to gə́ mbai ləm, seḭ toje ginkoji dəwje gə́ toje gə kəmee ɓəd ləma, seḭ toje ka̰ Ala nja doŋgɔ doi ləm tɔ mba kar sí ilaje ne riɓar dɔ yeḛ gə́ ɔr sí dan loondul gə́ ndul njudu-njudu’g unda sí dan lookàr’g ləa gə́ àr raŋg-raŋg lé.

Njéga̰g-Rəwtaje 6:5

Mbata deḛ d’aw gə koso-nékulje lə dee gə kəi-kubuje lə dee ləm, deḛ d’aw dèm-dèm to gə́ beedéje gə́ dum tura bèe ləm tɔ, deḛ gə jambalje lə dee lé bula digi-digi ndá ree mee ɓee’g neelé mba tujee tɔ.

Njéga̰g-Rəwtaje 7:12

Madianje ləm, Amalekje ləma, gə njé gə́ Bər ləm tɔ lé yal na̰ pə mee wəl-loo’g, bula digi-digi to gə́ beedéje bèe ləm, jambalje lə dee kara dum tura to gə́ nagəra gə́ ta baa-boo-kad’g bèe ləm tɔ.