Esai 59:4 - Maktub gə́ To gə Kəmee

⁴ Dəw kára kara səg maree Gə goo rəbee bèe el ləm, Dəw kára kara ɔr kəm ta Gə goo néra gə́ danasur el ləm tɔ. Deḛ d’ɔm meḛ dee dɔ né gə́ gə mḭdé ba’g Pa ne taŋgɔmje ləm, Deḛ d’əskèm né gə́ majel ləm Néra gə́ majel ɓa d’ojee ləm tɔ.

Esai 59:4 ပူးပေါင်းရင်းမြစ်များ

Maktub gə́ wɔji dɔ Jɔb 15:31

Ɓó lé yeḛ ɔm mée dɔ né gə́ majel’g ndá yeḛ ər kəm rəa Mbata né gə́ majel lé a tel to nékoga-dɔ-jia.

Maktub gə́ wɔji dɔ Jɔb 15:35

Yeḛ gə́ taa kèm néra gə́ majel ndá oji néra gə́ majel Gə́ ra tɔg mée’g ɓa tel su kəmee-yeḛ ləm tɔ.

Pakɔsje 12:3

Taŋgɔmje ɓa d’ula na̰ mbuna na̰’g wɔr-wɔr ləm, Ta gə́ ta dee’g ɓa deḛ lèbè ne kəm na̰ ləma, Deḛ pata gə meḛ dee gə́ joo ləm tɔ.

Pakɔsje 62:10

Oiyo, dəwje lé to né gə́ əḭ el. Dəwje lé to néŋgɔm to! Ɓó lé orè dee na̰’d wɔji kwɔi lə dee dɔ nékwɔji-kwɔi lə néje ndá D’wɔilɔ pélé-pélé unda lel gə́ tó pu bèe ba ya.

Pakɔsje 62:4

See ndɔ gə́ ra ɓa seḭ a kəwje kḭ kɔmje na̰ dɔ dəw’g lé wa. See ndɔ gə́ ra ɓa seḭ lai a kəwje kḭ saŋgje loo mbata kṵdáje Kareje to asəna gə ndògo-bɔrɔ gə́ to podé lé Esé asəna gə ŋgalaŋ gə́ unda naŋg bèe lé wa.

Pakɔsje 7:15

Aa ooje, njemeeyèr lé Wa dɔ gɔl néra majel jəb, Yeḛ əskèm néraje gə́ kori-kori ndá Yeḛ oji taŋgɔm ɓa.

Gosota-Kəmkàrje 4:16

Mbata deḛ toɓi el ya saar njen Ra né gə́ majel ya ɓa, Ɓi oso kəm dee’g el ya saar njen D’ar dəw kára oso ya ɓa tɔ,

Esai 10:1

Meeko̰ a koso dɔ deḛ gə́ To njékun ndukunje gə goo rəbee el ləm, Gə deḛ gə́ ndaŋg maktub-gaŋg-rəwta Gə́ gə dɔ najee el ləm tɔ.

Esai 26:18

Jeḛ n’taaje kèm ləm, ndóo ula sí ndubu ləm tɔ Nɛ loo gə́ j’ojije ndá j’ojije lel ba, Ɓee neelé aji sí el ləm, Dəwje gə́ mee ɓee’g kara d’oji ŋganje el ləm tɔ.

Esai 28:15

Seḭ pajena: Jeḛ manje rɔ sí j’ar yoo ləm, Jeḛ j’ɔmje ta lə sí na̰’d gə ɓee lə njé gə́ d’wəi ləm tɔ, Loo gə́ néyoo gə́ a kun loo lad-lad a dəs Ndá a teḛ dɔ sí’g el, Mbata taŋgɔmje ɓa gə́ njo̰loo-kula-dɔ lə sí ləm, Néra gə́ gə goo rəbee el ɓa gə́ né gə́ o̰ dɔ sí ləm tɔ.

Esai 29:20

Mbata njéra né kərm-kərmje gə njékula sul dɔ loo’gje lé D’a godo ləm, Deḛ gə́ d’isi kəmba dɔ néra gə́ majel’g lé kara D’a kar dee d’udu guduru ləm tɔ.

Esai 30:12

Gelee gə́ nee ɓa yeḛ gə́ to Njerɔkunda lə Israɛlje lé pa ne pana: To gə́ seḭ mbadje ta neelé ləm, Seḭ undaje meḛ sí dɔ néra kərm-kərm’g Gə néra gə́ gə goo rəbee’g el ləma, Seḭ gədje rɔ sí dɔ dee’g ləm tɔ ndá

Esai 30:9

Mbata to koso-dəwje gə́ njékaltaje ləm, Deḛ to ŋganje gə́ njépa taŋgɔmje ləma, Deḛ to ŋganje gə́ ndigi koo godndu Njesigənea̰ lé el ləm tɔ.

Esai 33:11

Né gə́ seḭ wɔjije mba raje lé To asəna gə ləm mu, Bèe ɓa loo gə́ néje neelé teḛ ndá A to mu ba, Kəmə gə́ seḭ ilaje pugudu lé To pər gə́ a gə roo sí.

Esai 44:20

Yeḛ munu bu pər, Mée əree aree ndəm Ndá yeḛ askəm kaji rəa pai godo ləm, Askəm pa pana: Néŋgɔm ɓa to ji neḛ’g lé a pa bèe el ləm tɔ.

Esai 47:10

Seḭ ɔmje meḛ sí dɔ meeyèr’g lə sí, Seḭ pajena: Dəw kára kara oo sí el! Kəmkàr lə sí gə négər lə sí lé su kəm sí Ndá seḭ paje meḛ sí’g pajena: Seḭ nja gə kar sí ba Ɓó dəw gə́ raŋg kára kara godo, Seḭ nja gə́ kar sí ba!

Esai 5:18

Meeko̰ a koso dɔ deḛ gə́ Ndɔr néra gə́ kori-korije goo dee’g gə kulaje gə́ ŋgɔm ləm, Gə deḛ gə́ ndɔr kaiya goo dee’g To gə́ ndɔr ne pusu-kodo-né gə kúla bèe ləm tɔ.

Esai 5:7

Ndɔ-nduú lə Njesigənea̰ gə́ njeboo-néje lé Yee ɓa to gel-bɔje lə Israɛl. Dəwje gə́ Juda lé To gə́ loo ndɔ gə́ yeḛ unda dan kəmee’g. Yeḛ unda mée yel gə mba koo ne néra gə́ danasur rɔ dee’g Nɛ aa ooje, məs ɓa d’ila! Yeḛ unda mée yel gə mba koo ne néra gə́ gə dɔ najee Nɛ aa ooje, ndu kii no̰ ndòo ɓa oo keneŋ!

Esai 59:15

Kankəmta sané pá ləm, Dəw gə́ unda rəa ɓad dɔ néra gə́ majel’g ndá Deḛ taa néje ləa lai gə́ taa ləm tɔ. Njesigənea̰ aa loo gə kəm dɔbee Oo to gə́ néra gə́ danasur godo.

Esai 59:16

Yeḛ oo to gə́ dəw kára kara taa ne Dɔ deḛ gə́ d’ula kəm dee ndòo el ləm, Kaaree wá paḭ mbata dəw kára kara Gə́ njekɔr kəm ta lə dee godo ləm tɔ, Yen ŋga ji siŋgamoŋ lə Njesigənea̰ ɓa ree la sə dee ləm, Meekarabasur ləa-yeḛ gəd dee ləm tɔ.

Esai 59:3

Mbata məs wa ji sí mbəgə-mbəgə ləm, Ŋgan ji sí ra néje gə́ majel ləm tɔ, Taŋgɔm rusu ta sí tub-tub ləm, Ndo̰ sí teḛ gə ta néra gə́ kori-kori ləm tɔ.

Esai 64:7

Lé bèe kara əi Njesigənea̰, I to bɔ síje ya, Jeḛ n’toje gə́ a̰ji Nɛ i ɓa gə́ njekuba sí, Jeḛ n’toje kula gə́ jii ɓa ra.

Esai 9:15

Deḛ gə́ d’ɔr no̰ koso-dəwje neelé D’ar dee ndəm ləm, Deḛ gə́ d’ya̰ loo d’ar dee d’ɔr no̰ dee lé Deḛ ndəm ne rəw ləm tɔ.

Jeremi 48:7

Mbata i ɔm məəi dɔ kula raije’g ləm, Gə dɔ nébaoje’g ləi ləm tɔ lé Ndá i kara d’a dum dɔi tɔ. Ala ləi gə́ ria lə Kemos lé A kaw ɓee-ɓər’g Gə njékinjanéməsje gə mbaije ləa na̰’d.

Jeremi 5:1

Awje gə́ mba̰-rəwje ɓəd-ɓəd Mee ɓee gə́ Jerusalem, Aaje loo ooje ləm, dəjije na̰ ləma, Saŋje ndaa-looje ləa ləm tɔ, Ɓó lé seḭ iŋgaje dəw kára keneŋ Gə́ to njera nédana Gə́ ɔm na̰’d gə kankəmta, Ɓó lé dəw gə́ bèe si keneŋ ndá M’a kar məəm oso lemsé dɔ njé gə́ Jerusalem’g ya.

Jeremi 7:4

Undaje meḛ sí yel dɔ ta sukəmlooje gə́ pana: Loo neelé to kəi lə Njesigənea̰, to kəi lə Njesigənea̰ ya bèe el.

Jeremi 7:8

Nɛ seḭ undaje meḛ sí yel gə́ dɔ ta sukəmlooje gə́ as ra né kára kara el.

Ojee 4:1

Seḭ Israɛlje lé maji kar sí ooje ta lə Njesigənea̰! Mbata Njesigənea̰ aw gə ta mba kila dɔ dəw-mee-ɓeeje’g neelé Mbata kankəmta godo mee ɓee’g neelé ləm, Meekɔrjol godo keneŋ ləma, Gər Ala kara godo keneŋ ləm tɔ.

Misee 2:1

Meeko̰ a koso dɔ deḛ gə́ la̰ji tor néra gə́ kori-kori meḛ dee’g D’wa dɔ gɔlee jəb dɔ tira-to dee’g! Loo gə́ loo àr yərərə ndá d’aw ra née Loo gə́ d’ɔm siŋgamoŋ rəa lé ji dee’g tɔ.

Néra Njékaḭkulaje 24:9

Jibje kara d’ɔm ta lə dee keneŋ bura pana: Yeḛ ra togə́bè ya.

Maktub gə́ Jak ula ne ar ngan-Allaje 1:15

Tɔɓəi malee lé a keskèm ɓa a koji kaiya ɓəi. Kaiya lé loo gə́ tɔg as lée mba̰ ndá oji yoo tɔ.