Esai 48:20 - Maktub gə́ To gə Kəmee

²⁰ Undaje loo mee ɓee gə́ Babilɔn teḛje ləm, Ḭje dan Kaldeje’g aḭje ləm tɔ! Paje gə ndu kalrɔ, ilaje ne mberee Ar deḛje gə́ d’isi gwɔi naŋg’d d’oo taree Pajena: Njesigənea̰ uga dɔ kura ləa Jakob!

Esai 48:20 ပူးပေါင်းရင်းမြစ်များ

2 Samel 7:23

See ginkoji dəwje gə́ ra ɓa tana gə koso-dəwje ləi gə́ Israɛl wa. I Ala ree uga dɔ dee mba kar dee to koso-dəwje ləi ləm, gə mba kar rii ɓar ne ləma, mba ra ne némɔrije gə néje gə́ to ɓəl kədm-kədm mbata maji lə deḛ gə ɓee lə dee ləm tɔ loo gə́ i tuba ginkoji dəwje gə raŋg gə magəje lə dee no̰ koso-dəwje’g ləi gə́ i uga dɔ dee mee ɓee’d gə́ Ejiptə lé.

Esdras 2:1

Aa ooje, deḛ gə́ dəb ɓeeko̰’d gə́ d’ḭ ɓee-ɓər’g tel ree lé ɓa nee, to dee gə́ Nebukadnesar, mbai gə́ Babilɔn wa dee gə́ ɓər aw sə dee Babilɔn lé. Deḛ tel ree Jerusalem dɔ naŋg gə́ Juda, ndá nana kara aw mee ɓee-boo’g ləa-ləa ya.

Pakɔsje 126:1

Pakɔs kḭ kaw tuga ne loo ɗao-ɗao gə́ tar. Loo gə́ Njesigənea̰ ar deḛ gə́ d’wa dee gə́ ɓər Sio̰ tel ree ɓée ndá Jeḛ n’to j’asəna gə deḛ gə́ d’oo né gə́ ni bèe.

Esai 12:1

Mee ndəa’g neelé i a pa pana: Ǝi Njesigənea̰, ma m’pidii Mbata kédé oŋg ləi ḭ səi pu dɔm’g, Nɛ oŋg ləi lé tel wəi bèm Ndá i tel gɔl məəm.

Esai 12:4

Mee ndəa’g neelé seḭ a pajena: Pidije Njesigənea̰ ɓarje ne ria ləm, Ilaje mbər néreaje mbuna koso-dəwje’g Arje meḛ dee olé ne dɔ riɓar’g ləa ləm tɔ!

Esai 24:14

Deḛ d’ɔr ndu dee gə́ tar wəl gə rɔkal, Deḛ gə́ d’ḭ dɔ-gó lé d’ɔs pa D’ula ne rɔnduba dɔ Njesigənea̰’g.

Esai 26:1

Mee ndəa’g neelé d’a kɔs pa nee mee ɓee gə́ Juda pana: Ɓee-boo lə sí lé siŋgá to yaa̰, Njesigənea̰ aa dɔ ndògo-bɔrɔ ləa ləm, Yee aa dɔ gadloo-kula-rɔ sí keneŋ ləm tɔ.

Esai 42:10

Ɔsje pa gə́ sigi arje Njesigənea̰, Ɔsje pa pideeje ne Areeje ɔr gwɔi naŋg nee njal, Seḭ gə́ awje dɔ baa-boo-kad’g Gə seḭ gə́ síje ta’g ləm, Seḭ dɔgoré-looje gə dəwje lai gə́ d’isi keneŋ ləm tɔ.

Esai 43:1

Nɛ ɓasinè Njesigənea̰, yeḛ gə́ njekunda sí-seḭ njé’g lə Jakob ləm, Gə yeḛ gə́ njekuba sí-seḭ Israɛlje ləm tɔ lé Pa togə́bè pana: Maji kar sí ɓəlje el Mbata ma nja m’uga dɔ sí, Ma m’ɓar sí gə ri sí Ndá seḭ toje kamaje ya!

Esai 44:22

Ma m’bɔr nékaltaje lə sí mbɔji Asəna gə kil-lə-ndi gə́ dəs bèe ləm, M’bɔr kaiyaje lə sí mbɔji Asəna gə mum gə́ sané bèe ləm tɔ, Gə́ telje reeje rɔm’g Mbata ma m’uga dɔ sí mba̰.

Esai 48:6

Seḭ ooje ta néje neelé gə mbi sí mba̰. Loo gə́ d’aw lée’g béréré mba̰ ndá See seḭ a kilaje mberee el wa. Un kudee ɓasinè m’a gə kula sí ta néje gə́ sigi Gə́ to loo-kiya’d gə́ seḭ gər deeje el.

Esai 49:13

Dara, maji kari ra rɔlel! Dɔ naŋg, maji kari si gə rɔkal! Mbata Njesigənea̰ gɔl meḛ dəwje ləa ləm, Yeḛ oo kəmtondoo lə njénékəmndooje ləa ləm tɔ.

Esai 49:6

Yeḛ pana: To né gə́ lam ba bèe ya Gə mba karm m’to kura lə neḛ Gə mba kam m’un ginkoji Jakobje m’ur dee tar ləm, Gə mba kam m’tel gə ges Israɛlje gə́ nai lé ləm tɔ. Neḛ nja n’undam mba kam m’to lookàr lə ginkoji dəwje gə raŋg ləm, Gə mba kam m’un ta kaji lə neḛ M’aw ne saar m’teḛ ne gwɔi naŋg’d ləm tɔ.

Esai 51:14

Waga ndá yeḛ gə́ rugu koŋgoŋ gel kúla lar’g lé A kɔr dəa kúla’g, Yeḛ a kwəi duu-loo’g el ləm, Nésɔ a lalee el ləm tɔ.

Esai 52:10

Njesigənea̰ ula ji meenda ləa ndiŋ Kəm ginkoji dəwje gə raŋg’g lai ar dee d’oo, Dəw-kundaje lai gə́ d’ɔr rudu naŋg nee rɔd lé D’a koo kaji gə́ Ala lə sí gə kəm dee nda̰-nda̰ ya.

Esai 52:11

Ḭje lée’g neelé undaje loo teḛje, gə́ teḛje ya! Tibije mbɔr né gə́ mina̰ kára kara el! Saaje rɔ sí rɔ dee’g. Ɔrje won kaiya rɔ sí’g, Seḭ gə́ odoje nékulaje lə Njesigənea̰ lé!

Esai 52:9

Seḭ dɔ ndubaje gə́ Jerusalem gə́ tujije lé Ndubaje rɔ sí na̰’d gə pa rɔlel! Mbata Njesigənea̰ gɔl meḛ koso-dəwje ləa ləm, Yeḛ taa dɔ njé gə́ Jerusalem ləm tɔ.

Esai 62:11

Aa ooje, ta gə́ Njesigənea̰ ila mberee Aree oso gə loo mbidi-mbidi dɔ naŋg nee pana: Ulaje koso-dəwje gə́ Sio̰ pajena: Aa ooje, njekaji sí si aw gə́ rɔ sí’g nee, Aa ooje, nékoga-dɔ-ji ləa lé to meḛ jia’g ləm, Nékoga-dɔ-jia lé to nea̰’g ləm tɔ.

Esai 63:9

Dan nékəmndooje’g lə deḛ lai lé D’isi lal njela sə dee el, Kura ləa gə́ dara gə́ aar nea̰’g lé To njekaji dee, Dan meenoji gə kookəmtondoo’g ləa lé Yeḛ nja uga ne dɔ dee. Ta-ta mee ndɔje gə́ ləw lé Yeḛ gəd dee ləm, Yeḛ odo dee ləm tɔ.

Jeremi 31:10

Seḭ ginkoji dəwje gə raŋg, Ooje ta lə Njesigənea̰, Ndá ilaje mberee dɔgoré-looje Gə́ əw lé pajena: Yeḛ gə́ sané Israɛlje kédé lé A tel mbo̰ dee dɔ na̰’d Ndá yeḛ a kaa dɔ dee to gə́ njekulbadje Aa ne dɔ koso-badje ləa bèe.

Jeremi 31:11

Mbata Njesigənea̰ uga dɔ Jakobje Ɔr dee ne ji njeba̰ gə́ siŋgá ur dɔ dee’g.

Jeremi 31:21

Seḭ Israɛlje gə́ toje asəna gə ŋgoma̰də lé Maji kar sí telje Undaje nétɔji kuru loo lə sí ləm, Urje kag-tɔji rəwje lə sí ləm tɔ, Undaje kəmkàr dɔ rəw’d Gə́ to kila-rəwkaw sí’g Telje reeje mee ɓee-booje’d Gə́ neelé gə́ to ka̰ sí!

Jeremi 50:2

Maji kar sí ilaje mberee Arje ginkoji dəwje gə raŋg ləm, Areeje oso mbi dee’g ləma, Undaje nétɔji tar ləm tɔ. Ilaje mberee ɓó iyaje dɔ né kára el! Pajena: Deḛ taa Babilɔn mba̰ ya! Magə-Bel nai gə rɔkul ləm, Magə-Merodak lé tədee njigi-njigi ləm tɔ! Magəje ləa nai gə rɔkul ləm, Magəje ləa təd njigi-njigi ləm tɔ.

Jeremi 50:28

Ooje ndu kii lə njékaḭje, Deḛ gə́ d’ḭ Babilɔn d’aḭ lé D’aw d’ila mber dalba̰ Le Ala lə sí gə́ Njesigənea̰ Mee ɓee gə́ Sio̰, Dalba̰ gə́ wɔji dɔ kəi ləa gə́ to gə kəmee lé,

Jeremi 50:8

Maji kar sí ḭje Babilɔn aḭje, Undaje loo mee ɓee gə́ Kalde teḛje, Maji kar sí toje asəna gə bàl bya̰je Gə́ d’ɔr no̰ koso-nékulje bèe.

Jeremi 51:45

Seḭ koso-dəwje ləm, Undaje loo keneŋ teḛje, Gə mba kar nana kara teḛ ne Ta oŋg-boo’g lə Njesigənea̰ aji ne rəa.

Jeremi 51:48

Baŋga rɔlel a kḭ mee dara’g Gə dɔ naŋg nee ɓar kiu-kiu dɔ Babilɔn’g Gə dɔ néje lai gə́ to keneŋ. Mbata njétujilooje d’a kḭ dɔgel Ree ɓugu na̰ dəa’g. Njesigənea̰ ɓa pa bèe.

Jeremi 51:6

Ḭje Babilɔn aḭje ləm, Maji kar nana kara taa rəa ta yoo’g ləm tɔ Nà banelə seḭ a tujije səa na̰’d! Mbata to kàr dalba̰ lə Njesigənea̰, Yeḛ a ra səa né gə goo kula reaje.

Jakari 10:8

N’a ɓar dee gə kɔl ndá d’a mbo̰ dɔ na̰ Mbata neḛ n’uga dɔ dee, Ndá bula lə dee a kḭ dɔ maree’d gə́ kédé-kédé to gə́ kédé ya.

Jakari 2:10

Njesigənea̰ pana: Seḭ gə́ ma m’sané sí dɔkum looje gə́ sɔ lé Maji kar sí ḭje ɓee gə́ dɔgel aḭje. Njesigənea̰ pa bèe.

Tel tura Godndu 30:4

Lé d’a kwa sí kaw sə sí kaw kila sí gwɔi dara’g kara Ala lə sí gə́ Njesigənea̰ a mbo̰ sí dɔ na̰’d kar sí ḭje lé gə́ neelé ləm, lé gə́ neelé ɓa yeḛ a kaw saŋg sí keneŋ ləm tɔ.

Loo gə́ killa rea kəm Ja̰’g 18:20

Seḭ gə́ dara lé raje rɔlel dəa’g! Seḭ gə́ njémeendaje gə njékaḭkulaje gə njéteggintaje lé alje rɔ sí to! Mbata Ala ila ta dəa’g ra ne ta lə sí gə goo rəbee mba̰.

Loo gə́ killa rea kəm Ja̰’g 18:4

M’oo ndu dəw gə́ raŋg ɓar dara pana: Koso-dəwje ləm, ḭje rəa’g teḛje raga mba ra səa kaiya lé na̰’d el ləm, mba kar boo-tujije gə́ wɔji dəa lé teḛ dɔ sí’g el ləm tɔ.