Esai 43:6 - Maktub gə́ To gə Kəmee

⁶ M’a kula loo gə́ par gə́ dɔgel lé pana: Am dee! M’a kula loo gə́ par gə́ dɔkɔl lé pana: Ɔgm dee el! Arje ŋganəmje gə́ diŋgam d’ḭ ɓee gə́ əw ree ləm, Arje ŋganəmje gə́ dené kara d’ḭ gwɔi naŋg’d ree ləm tɔ.

Esai 43:6 ပူးပေါင်းရင်းမြစ်များ

Pakɔsje 107:3

Deḛ gə́ yeḛ ḭ sə dee mee ɓeeje lai Gə́ to par gə́ bər gə dɔ-gó ləm, Gə par gə́ dɔgel gə par gə́ loo gə́ baa-boo-kad to keneŋ ləm tɔ lé Maji kar dee pa togə́bè ya.

Esai 11:12

Yeḛ a kun nétɔji gə́ tar kar ginkoji dəwje gə raŋg neelé d’oo To gə́ yeḛ a gə mbo̰ Israɛlje gə́ d’wa dee gə́ ɓər lé ləm, Yeḛ a mbo̰ Judaje gə́ sanéna̰ ləm tɔ Kar dee d’ḭ dɔ kum naŋg gə́ sɔ lé tel ree.

Esai 18:7

Mee ndəa’g neelé koso-dəwje gə́ to njésiŋgamoŋje gə́ d’aw kɔgərɔ-kɔgərɔ ləm, koso-dəwje gə́ to ɓəl kədm-kədm un kudee ləw ba gə́ d’isi ne ləma, ginkoji dəwje gə́ to njésiŋgamoŋje gə́ njétuji néje lai lé, deḛ gə́ mán baaje unda ɓeeje lə dee dana gaŋg ləm tɔ lé d’a ree gə nékarje kar Njesigənea̰ gə́ njeboo-néje ya. D’a kaw ne loo gə́ ri Njesigənea̰ gə́ njeboo-néje ɓar keneŋ dɔ mbal gə́ Sio̰ ya.

Esai 27:13

Mee ndəa’g neelé d’a kim to̰to̰ gə́ boo, Bèe ɓa deḛ gə́ d’wa dee gə́ ɓər d’aw sə dee Asiri lé D’a tel ree ɓée ləm, Deḛ gə́ d’aḭ d’aw ɓee gə́ Ejiptə kara D’a tel ree ləm tɔ, Ndá deḛ d’a kunda barmba no̰ Njesigənea̰’g Dɔ mbal gə́ to gə kəmee gə́ to Jerusalem.

Esai 45:22

Telje gə́ rɔm’g nee Ndá seḭ a kajije ne, Seḭ lai gə́ síje gwɔi naŋg’d lé! Mbata ma nja m’to Ala Ɓó yeḛ gə́ raŋg godo.

Esai 49:12

Aa oo deeje, D’ḭ əw ɓa ree, Njé gə́ na̰je d’ḭ dɔgel gə dɔ-gó ləm, Njé gə raŋg d’ḭ ɓee gə́ Sinim ləm tɔ!

Esai 49:22

Mbaidɔmbaije gə́ Njesigənea̰ pa togə́bè pana: Aa ooje, m’a kun jim gə́ rɔ ginkoji dəwje gə raŋg’g Ndá m’a kunda nétɔji ləm gə́ rɔ koso-dəwje’g tɔ, D’a kodo ŋgan síje gə́ diŋgam gə kag ji dee ləm, D’a kodo njé gə́ dené dɔ tam dee’g ləm tɔ Tel ree sə dee ya.

Esai 54:3

Mbata i a taa loo par gə́ dɔ jikɔl ləm, gə dɔ jigel ləm tɔ, Ŋgakaije d’a taa loo pəl-pəl mbuna ginkoji dəwje gə raŋg’g, D’a rusu ɓee-booje gə́ to nduba lé.

Esai 60:4

Un kəmi aa ne looje gə́ gugu dɔi sub oo, Deḛ lai mbo̰ na̰ ree gə́ rɔi’g, Ŋganije gə́ diŋgam d’ḭ loo gə́ əw’g ree ləm, Ŋganije gə́ dené kara d’odo dee kag ji dee’g ləm tɔ.

Esai 60:9

Mbata dɔgoré-looje d’unda meḛ dee yel dɔm’g ləm, Batoje gə́ Tarsis ɓa to gə́ ŋgaw ta deeje Gə mba kaw kodo ŋganije gə́ loo gə́ əw’g ree sə dee Gə larnda gə larlɔr lə dee ləm tɔ Gə mbata ri Njesigənea̰, Ala ləi, Yeḛ gə́ to Njerɔkunda lə Israɛlje gə́ ula rɔnduba dɔi’g lé.

Esai 66:20

D’a ree gə ŋgako̰ síje lai gə́ d’isi mbuna ginkoji dəwje gə raŋg’g asəna gə nékar Njesigənea̰ lé, d’a ree sə dee dɔ kundaje’g ləm, gə dɔ pusuje’g ləm, gə dɔ topoije’g ləm, gə dɔ kundaje-mulayḛ̀jeje’g ləma, gə dɔ jambalje’g ləm tɔ, kaw ne sə dee saar dɔ mbal’g ləm gə́ to gə kəmee gə́ to Jerusalem asəna gə Israɛlje gə́ ree gə nékarje lə dee mee joje gə́ àr ŋgad-ŋgad mee kəi’g lə Njesigənea̰ bèe tɔ. Njesigənea̰ ɓa pa bèe.

Jeremi 23:8

Nɛ d’a pana: Njesigənea̰ to Njesikəmba, yeḛ gə́ ar ŋgaka gel-bɔje lə Israɛl d’ḭ mee ɓee gə́ dɔgel ləm, gə ɓeeje lai gə́ neḛ n’tuba dee n’ɔm dee keneŋ kédé ləm, gə n’tel sə dee n’ree sə dee mee ɓee’g lə dee ləm tɔ. Ndá d’isi mee ɓee’g lə dee ya.

Jeremi 29:14

M’a kya̰ loo kar sí iŋgamje ya. Njesigənea̰ ɓa pa bèe. M’a kar njé’g lə sí gə́ d’wa dee gə́ ɓərje lé tel ree ləm, m’a mbo̰ sí mbuna ginkoji dəwje gə raŋg’g lai gə looje lai gə́ m’tuba sí m’ɔm sí keneŋ ləm tɔ. Njesigənea̰ ɓa pa bèe. Ndá m’a tel sə sí ree sə sí loo gə́ d’wa sí keneŋ d’aw sə sí ɓee-ɓər’g lé.

Jeremi 3:14

Gə́ tel reeje, seḭ njékɔsta-rəwje, Njesigənea̰ ɓa pa bèe, mbata ma m’to ɓée síje. M’a kun sí mee ɓee-boo gə́ kára ləm, m’a kodo sí joo dan njémeekəije gə́ kára ləm tɔ. Ndá m’a kaw sə sí Sio̰.

Jeremi 31:8

A ooje, ma m’ar dee D’ḭ ɓee gə́ dɔgel tel ree ləm, Deḛ gə́ d’isi gwɔi naŋg lé kara M’a mbo̰ dee dɔ na̰’d ləm tɔ, Njékəmtɔje, gə njémədje, gə denéje Gə́ d’aw gə kèm Gə njé gə́ d’isi gə ndóo to mbuna dee’g, To dəwje gə́ bula digi-digi Ɓa tel ree lée’g neelé.

Ejekel 36:24

N’a kɔr sí mbuna ginkoji dəwje gə raŋg’g ləm, n’a kḭ sə sí mee ɓeeje’g lai mbo̰ sí dɔ na̰’d ləma, n’a tel ree sə sí mee ɓee’g lə sí gogo ləm tɔ.

Ejekel 37:21

M’a kula dee pana: Mbaidɔmbaije gə́ Njesigənea̰ pa togə́bè pana: Aa ooje, n’a kɔr Israɛlje mbuna ginkoji dəwje gə raŋg gə́ deḛ d’aw keneŋ ləm, n’a mbo̰ dee dɔ na̰’d gə looje lai ləma, n’a tel ree sə dee mee ɓee’g lə dee gogo ləm tɔ.

Jakari 6:6

Kundaje gə́ ndul gə́ ndɔr pusu-rɔ gə́ kára mbuna mareeje’g lé d’aw par gə́ ɓee gə́ to dɔgel ləm, deḛ gə́ to kunda-ndulije d’aw goo dee’g ləm tɔ. Deḛ gə́ to kunda-mwɔjije d’aw par gə́ ɓee gə́ dɔkɔl tɔ.

Tel tura Godndu 30:4

Lé d’a kwa sí kaw sə sí kaw kila sí gwɔi dara’g kara Ala lə sí gə́ Njesigənea̰ a mbo̰ sí dɔ na̰’d kar sí ḭje lé gə́ neelé ləm, lé gə́ neelé ɓa yeḛ a kaw saŋg sí keneŋ ləm tɔ.