Esai 41:10 - Maktub gə́ To gə Kəmee

¹⁰ Ɓəlje el Mbata ma m’nai sə sí, Maji kar sí aaje loo gə kəm ɓəl el Mbata ma m’to Ala lə sí, M’a kar siŋga sí ḭ dɔ maree’g ləm, M’a ree la sə sí ləma, M’a gəd sí gə jikɔlm gə́ ɓar mèr-mèr ləm tɔ.

Esai 41:10 ပူးပေါင်းရင်းမြစ်များ

Gḭ-Néje 15:1

Loo gə́ ta néje neelé dəs mba̰ ndá né gə́ mḭdi ɓa Njesigənea̰ teḛ ne dɔ Abram’g un ta ulá ne pana: Abram, ɓəl el. Ma m’to dər-rɔ ləi ndá nédɔji ləi a kal dɔ loo.

Gḭ-Néje 26:24

Njesigənea̰ teḛ dəa’g loondul’g ulá pana: Ma m’to Ala lə bɔbije gə́ Abrakam ndá ɓəl el mbata ma m’nai səi. M’a tɔr ndum dɔi’g ləm, m’a kar ŋgakaije d’ɔs goo na̰ gə́ kédé-kédé ləm tɔ gə mbata lə kura ləm gə́ Abrakam lé ya.

Gḭ-Néje 31:5

Yeḛ ula dee pana: Ma m’oo to gə́ kəm bɔ síje tel to ɓəd dɔm’g ɓó yeḛ oom to gə́ kédé lé el. Nɛ Ala lə bɔmje ɓa nai səm ya.

Gḭ-Néje 49:24

Nɛ siŋgamoŋ kag ɓandaŋg ləa to kɔgərɔ ləm, Ji njesiŋgamoŋ gə́ ka̰ Jakob lé Ar siŋga jia-yeḛ lé to ne kɔgərɔ ləm tɔ. Yeḛ tel to ne njekulbadje ləm, Gə kɔr mbal lə Israɛl ləm tɔ.

2 Samel 22:19

Deḛ d’ubam naŋg bus ndɔ néurti’g ləm ya, Nɛ Njesigənea̰ ɓa to njegədm ya tɔ.

1 Sôrta Gḭka-Israɛlje 12:18

Dabid teḛ aar no̰ dee’g un ta pa ar dee pana: Ɓó lé seḭ reeje rɔm’g gə takə̰ji gə́ maji mba la ne səm ndá məəm a kɔm sə sí na̰’d ya nɛ ɓó lé seḭ reeje gə mba kərmje kilamje ji njéba̰je’g ləm lal né gə́ majel kára gə́ m’ra ndá maji kar Ala lə ka síje-je ɓa oo gée gə mba kar bo̰ néra sí ɔs ta sí’g tɔ.

2 Sôrta Gḭka Israɛlje 20:17

To seḭ ɓa a rɔje keneŋ el, aw aarje lé gən ndá seḭ a kooje kɔm gə́ Njesigənea̰ a kɔm sí tar lé. Seḭ Judaje gə seḭ gə́ Jerusalem lé ɓəlje el ləm, ndəbje el ləm tɔ, bèlè teḛje aw iŋga deeje ndá Njesigənea̰ a nai sə sí ya.

2 Sôrta Gḭka Israɛlje 32:8

Kea̰-yeḛ to kag ji dəw ba, ka̰ síjeḛ lé to Ala lə sí gə́ Njesigənea̰ gə́ a la sə sí ləm, a rɔ mbata lə sí ləm tɔ. Koso-dəwje lé d’ɔm meḛ dee dɔ taje gə́ Ejekias, mbai gə́ Juda pa lé ya.

Pakɔsje 144:11

Maji kari taa dɔm ɔrm ne ji dəw-dɔ-ɓeeje’g To deḛ gə́ ta dee teḛ pa taŋgɔm ləm, Deḛ d’un jikɔl dee gə́ tar pa ne taŋgɔm ləm tɔ.

Pakɔsje 144:8

To deḛ gə́ ta dee teḛ pa taŋgɔm ləm, Deḛ d’un jikɔl dee gə́ tar pa ne taŋgɔm ləm tɔ.

Pakɔsje 145:14

Njesigənea̰ lé gəd deḛ lai gə́ toso lé ləm, Deḛ gə́ d’wa koŋgoŋ-koŋgoŋ lé Yeḛ nja ndɔji dee ila dee dana ləm tɔ.

Pakɔsje 147:12

Seḭ gə́ Jerusalem, maji kar sí ilaje riɓar dɔ Njesigənea̰’g, Seḭ gə́ Sio̰, pidije Ala lə sí,

Pakɔsje 18:36

I nja am dər-rɔ ləi m’aji ne ləm, Jikɔli kara gədm ləma, Mbɔl dɔ meemaji ləi ɓa m’tel m’to ne dəw gə́ boo ləm tɔ.

Pakɔsje 27:1

Pakɔs lə Dabid Njesigənea̰ lé to lookàr ləm ləm, gə kaji ləm ləm tɔ, Ŋga see na̰ ɓa m’a ɓəlee tɔɓəi wa. Njesigənea̰ lé to gə́ négəd rɔ dɔ’g ləm, Ŋga see na̰ ɓa m’a ndəb pəd-pəd nea̰’g wa.

Pakɔsje 29:11

Njesigənea̰ lé ar dəwje ləa siŋga dee ləm, Njesigənea̰ lé tɔr ndia dɔ dəwje’g ləa Ar dee d’isi ne dan rɔlel’g ləm tɔ.

Pakɔsje 33:12

Ginkoji dəwje gə́ Njesigənea̰ to Ala lə dee lé D’isi dan rɔlel’g ya, Koso-dəwje gə́ yeḛ ɔr dee unda dee gə kəmee gə́ nédɔji ləa lé Rɔ dee lel dee tɔ.

Pakɔsje 37:17

Mbata njémeeyèrje lé Kag ji dee a təd njigi-njigi Nɛ Njesigənea̰ lé Gəd njémeekarabasurje ya.

Pakɔsje 37:24

Ɓó lé debee neelé oso ndá a koso naŋg pal el Mbata Njesigənea̰ un jia ŋgəji gə́ tar ya.

Pakɔsje 41:12

Ɓó lə njeba̰ ləm lé un baŋga dɔm’g el ndá M’a gər gao to gə́ i ndigim tɔgərɔ ya.

Pakɔsje 46:11

Maji kar sí aarje gèŋ ooje to gə́ ma m’to Ala ya, Ma m’o̰ ɓee dɔ ginkoji dəwje gə raŋg’g ləm, Ma m’o̰ ɓee dɔ naŋg nee bura ləm tɔ.

Pakɔsje 46:7

Ginkoji dəwje gə raŋg lé d’aw dɔ na̰’d pum-pum D’ar ŋgira ɓeeko̰je gə́ dɔ naŋg nee yə, Yeḛ ar dee d’oo ndia ndá Dɔ naŋg ula déréré-dèrèrè gə ɓəl.

Pakɔsje 63:8

Mbata i lé to njelasəm, M’isi ne dan boo-rɔkal’g ndil bagije’g ya tɔ.

Pakɔsje 65:5

Dəw gə́ i ɔr kəmee aree rəm pər gə́ rɔi’g Mba si mee gadlooje’g ləi lé Débee neelé rɔlel nai səa ya. Rɔlel lə kəi ləi gə kàr ŋgad-ŋgad lə kəi ləi gə́ to gə kəmee A kas sí nag-nag ya.

Pakɔsje 99:4

Maji kar dee d’ila riɓar dɔ siŋgamoŋ’g Le mbai gə́ njekunda meekarabasur dan kəmee’g lé ya, Néra gə́ danasur lé I nja aree to njaŋg ləm, Meekarabasur gə néra gə́ gə dɔ najee lé kara I nja ra mbuna njé’g lə Jakob lé ləm tɔ.

Teḛ-Raga 14:13

Moyis ila koso-dəwje keneŋ pana: Ɓəlje el, aarje loo kaar sí’g mba kooje ne kaji lə Njesigənea̰ gə́ yeḛ a gə kaji sí kɔm sí ne tar mee ndɔ gə́ ɓogənè lé, mbata njé gə́ Ejiptə gə́ seḭ oo deeje ɓogənè neelé seḭ a koo deeje gogo el ŋga.

Teḛ-Raga 20:20

Moyis ula koso-dəwje neelé pana: Ɓəlje el, mbata ree gə́ Ala ree lé ree mba kaḭ meḛ sí ləm, gə mba kar ɓəl gə́ seḭ ɓəleeje lé aarje dɔ’g njaŋg ɓó gə mba kar sí raje ne kaiya nda̰ el tɔ.

Esai 12:2

Aa oo, Ala gə́ to njeginkajim, M’a kɔm məəm dəa’g jəb-jəb Ndá m’a ɓəl né kára el, Mbata Njesigənea̰, Njesigənea̰ to siŋgam ləm, Gə gin pa pidije ləm ləm tɔ, Yeḛ nja tel to njekajim.

Esai 35:4

Ulaje deḛ gə́ meḛ dee to kəgəgə lé pajena: Waje diŋgam meḛ sí’g ɓó ɓəlje el, Aa ooje, Ala lə sí lé yeḛ a ree dal ba̰ lə sí Kuga ne dɔ ji deḛ gə́ ra sə sí majel, Yeḛ a ree gə rəa-yeḛ nja mba kaji sí.

Esai 37:6

Esai ula dee pana: Aa ooje, ta gə́ seḭ a kulaje ɓée síje lé ɓa nee: Njesigənea̰ pa togə́bè pana: Maji kari ɓəl dɔ taje gə́ i oo gə́ mbai gə́ Asiri ar kuraje ləa d’ula ne sul dɔ neḛ’g lé el.

Esai 43:5

Ɓəlje el mbata ma m’nai sə sí, M’a kar ŋgaka síje d’ḭ bər ree ləm, M’a mbo̰ deḛ gə́ d’isi dɔ-gó mba ree sə dee ləm tɔ.

Esai 44:2

Njesigənea̰ gə́ njera sí ləm, Yeḛ gə njekuba sí meḛ ko̰ síje’g ləma, Yeḛ gə́ njegəd sí ləm tɔ lé Pa togə́bè pana: Seḭ njé’g lə Jakob gə́ toje kuraje ləm, Seḭ Israɛlje ləm gə́ m’ɔr sí m’unda sí gə kəmee ləm tɔ lé Ɓəlje el!

Esai 49:8

Njesigənea̰ pa togə́bè pana: Ndɔ noji’g lé m’a koo ndu sí ləm, Ndɔ kaji’g lé m’a la sə sí ləm tɔ, M’a ŋgəm sí ləm, m’a tel sí gə́ nékɔm gə ginkoji dəwje lé na̰’d ləm tɔ Gə mba tel kun ne ɓee kuree tar ləm, Mba kai ne nénduba gə́ tuji kar sí gogo lé ləm tɔ,

Esai 50:9

Aa ooje, Mbaidɔmbaije gə́ Njesigənea̰ to njela səm: See na̰ ɓa askəm kila ta dɔm’g wa. Aa ooje, d’a ɓuga ŋgisi to gə́ kubu bèe ləm, Diri a kunda dee tuŋgu-tuŋgu ləm tɔ.

Esai 52:7

Dəw gə́ ḭ dɔ sém mbal’g ree ula sí tagə́maji ləm, Gə́ ila mber ta gə́ wɔji dɔ meekulɔm ləm, Yeḛ gə́ ula sí tagə́maji ləm, Gə́ ila mber ta gə́ wɔji dɔ kaji ləma, Yeḛ gə́ ula njé gə́ Sio̰ pana: Ala lə sí lé o̰ ɓee ləm tɔ lé Gɔlee to njam-njam.

Esai 60:19

Kàr ɓa a to néndogó ləi dan kàrá el ləm, Naḭ ɓa a kar loo àr ŋgad-ŋgad dɔi’g loondul’g el ləm tɔ, Nɛ Njesigənea̰ ɓa a to lookàr ləi saar-saar gə no̰ ləm, Ala ləi ɓa a to gə́ nérɔnduba ləi ləm tɔ.

Nɔ̰-ndôo gə́ wɔji dɔ Jerusalem 3:57

Ndɔ gə́ ma m’no̰ m’ɓar ne rii lé I ree pər gə́ rɔm’g Ulam pana: Maji kam m’ɓəl el.

Loo gə́ killa rea kəm Daniel’g 10:12

Yeḛ ulam pana: I Daniel lé, maji kari ɓəl el. Mbata un kudee mee ndɔ gə́ dɔtar gə́ i wa məəi kɔgərɔ mba koo gin ta ləm, gə mba koso kul no̰ Ala’g lé ləi ləm tɔ ndá Ala oo ne taje ləi ya. Yee ɓa ma m’ree ne gə mbata taje ləi ya.

Loo gə́ killa rea kəm Daniel’g 6:16

Nɛ diŋgamje neelé d’ɔs mbai lé ɓɔḭ-ɓɔḭ d’ulá pana: Ǝi mbai, maji kari oo gao, godndu lə Medəje gə Persəje wɔji mba kar né kɔg loo ra né gə́ rara əsé godndu gə́ rara gə́ mbai unda jia keneŋ lé ndá to njaŋg ya ɓó loo telee raŋg godo.

Ojee 1:9

Njesigənea̰ ula Ojee pana: Maji kari unda ria lə Lo-Ami (kɔr gelee pana: To koso-dəwje ləm el) Mbata seḭ toje koso-dəwje ləm-ma el ləm, Ma kara m’to Ala lə sí el ləm tɔ.

Ajee 1:13

Tɔɓəi Aje, njekaḭkula lə Njesigənea̰ ula koso-dəwje gə goo ndukun lə Njesigənea̰ pana: Neḛ nja n’a nai sə sí ya, Njesigənea̰ ɓa pa bèe.

Ajee 2:5

Neḛ n’aar dɔ manrɔ’g lə neḛ gə́ neḛ man ne rɔ neḛ n’ar sí loo gə́ seḭ undaje ne loo mee ɓee gə́ Ejiptə teḛje lé ya mbata Ndil neḛ nai mbuna sí’g ya. Maji kar sí gə́ ɓəlje el!

Jakari 10:12

Mbɔl dɔ Njesigənea̰ lé N’a kar siŋga dee ḭ ne dɔ maree’g ləm, D’a kaw ne kəm dee gə́ kédé-kédé gə ria-yeḛ ləm tɔ, Njesigənea̰ ɓa pa bèe.

Jakari 10:6

N’a kar siŋga Judaje ḭ dɔ maree’d gə́ kédé-kédé ləm, N’a taa dɔ njé’g lə Jisəb ləm tɔ, N’a tel ree sə dee Mbata mee neḛ aw taḭ-taḭ mbata lə dee, Ndá d’a to kasəna gə dəwje gə́ n’uba dee n’ya̰ dee kédé el lé bèe, Mbata neḛ n’to Njesigənea̰, Ala lə dee Ndá n’a koo ta lə dee ya.

Jakari 13:9

N’a kɔm debee gə́ nai neelé dan pər’d ndá n’a ndiree to gə́ deḛ ndiri ne larnda gə mba kar siḭyee teḛ ləm, n’a naa dee to gə́ deḛ naa ne larlɔr bèe ləm tɔ. Deḛ d’a ɓar ri neḛ ndá n’a koo ta lə dee. N’a pana: To koso-dəwje lə neḛ. Ndá d’a pana: Njesigənea̰ to Ala lə síjeḛ tɔ.

Lugu 1:13

Nɛ kura gə́ dara lé ulá pana: Jakari, ɓəl el ɓó, mbata tamaji ləi gə́ i ra lé oso mbi Ala’g pad ya. Elijabed, dené ləi lé a koji səi ŋgon gə́ diŋgam ndá i a kunda ria lə Ja̰.

Lugu 1:30

Yen ɓa kura gə́ dara lé ulá pana: Mari, ɓəl el mbata Ala ila kəmi toro’g.

Njé gə́ Rɔmə 8:31

See j’a pa ban dɔ ta’g neelé ɓəi wa. Ɓó lé Ala nai sə sí ndá see na̰ ɓa a koma̰ sə sí gə dɔrea wa.

2 Njé gə́ Kɔrḭtə 12:9

Ndá yeḛ ilam keneŋ pana: Meenoji ləa a kasm nag ya, mbata siŋgamoŋ ləa a kɔr dɔ loo rəm’g ləm njal ya. Yen ɓa m’a kḭ gə́ rɔm ti ne rɔm dɔ nérəmje’g ləm mba kar siŋgamoŋ lə Kristi nai ne rɔm’g.

Njé gə́ Epesə 3:16

mba kar Ndilee ar meḛ sí gə́ kəi to kɔgərɔ-kɔgərɔ gə goo boo-ronduba ləa gə́ tur dɔ loo ləm,

Tel tura Godndu 20:1

Loo gə́ seḭ a gə kawje loo-rɔ’g gə mba rɔ gə njéba̰je lə sí ɓa, a kooje kundaje lə dee gə pusu-rɔje lə dee gə koso-dəwje lə dee gə́ bula d’unda sí ndá seḭ a ɓəl deeje el, mbata Ala lə sí gə́ Njesigənea̰ gə́ ar sí undaje loo mee ɓee gə́ Ejiptə teḛje lé nai sə sí ya.

Njé gə́ Pilibə 4:13

Mbɔl dɔ yeḛ gə́ orəm més lé lé riri kara m’askəm ra ya.

Jujé 1:9

See m’un ndum m’ari m’pana: Wa rɔi kɔgərɔ ləm, wa diŋgam məəi’g ləm tɔ, see m’pa bèe el wa. Ar ɓəl rai el ləm, ar siŋgasa wai el ləm tɔ mbata Njesigənea̰, Ala ləi a nai səi gə loo gə́ rara gə́ i a kaw keneŋ lé ya.

Njéga̰g-Rəwtaje 6:16

Njesigənea̰ ulá pana: Nɛ m’a nai səi ndá i a dum dɔ Madianje gə́ bula neelé to gə́ dəw gə́ kára ba bèe.