Esai 40:24 - Maktub gə́ To gə Kəmee

²⁴ Deḛ lé ma̰a dee el ləm, Gə dubu dee el ləma, Kag rɔ dee kara ŋgirá aw naŋg el ləm tɔ, Yeḛ ila kəmə pugudu dɔ dee’g Ndá deḛ tudu kurum-kurum ləm, Lel-mal ɓir dee Aw sə dee to gə́ ləm mu bèe ləm tɔ.

Esai 40:24 ပူးပေါင်းရင်းမြစ်များ

2 Samel 22:16

Ǝi Njesigənea̰, gə goo taji gə́ i taji dee ləm, Gə goo ndu kəmə gə́ teḛ əmi’g ləm tɔ lé Dɔ diŋgri loo gə́ gel manje teḛ ləm, Gin naŋg nee kara teḛ raga ndəgəsə kəm dee’g ləm tɔ.

2 Mbaije 10:11

Togə́bè ɓa Jehu tɔl ne gel-bɔje lə Akab lai gə́ nai Jisreel ləm, gə dəwje ləa lai gə́ boo-boo ləm, gə kuramareeje lai ləma, gə njékinjanéməsje ləa ləm tɔ, ar dəw kára kara nai el.

Maktub gə́ wɔji dɔ Jɔb 21:18

Ar dee to d’asəna gə mu gə́ lel odo bèe ləma, Ar dee to d’asəna gə tisa gə́ lel mal ɔr aw ne ləm tɔ bèe wa.

Maktub gə́ wɔji dɔ Jɔb 4:9

Kəmə gə́ Ala ila pugudu dɔ dee’g lé deḛ tuji ne ləm, Lel oŋg ləa roo dee dula-dula ləm tɔ.

Maktub gə́ wɔji dɔ Jɔb 8:17

Yeḛ dolè ŋgirá mbuna kɔr mbalje’g ləm, Yee aw saar teḛ mee ndògo-bɔrɔje’g ləm tɔ.

Pakɔsje 58:9

Maji kar dee léḛ to gə́ toro gə́ ŋgwɔiee godo bèe ləm, Maji kar dee to d’asəna gə ŋgon gə́ dené ɔr gə́ oo kəm kàr el bèe ləm tɔ.

Pakɔsje 83:13

Mbata deḛ lé pana: Ar neḛ n’taaje kəije lə Ala neelé gə́ ka̰ neḛje

Gosota-Kəmkàrje 1:27

Loo gə́ néɓəl-boo a biri sí Asəna gə lel-boo bèe ləm, Némeeko̰ a kaḭ dɔ sí sub Asəna gə lel-mal bèe ləma, Loo gə́ néurti gə nékila kúla D’a ɓugu na̰ dɔ sí’g ləm tɔ lé ndá

Esai 11:4

Nɛ yeḛ a gaŋg rəwta lə njéndooje lé gə goo rəw gə́ danasur ləm, Yeḛ a kɔr kəmta lə njénékəmndooje gə́ naŋg nee gə goo rəbee ləm, Tapea gə́ to asəna gə kag-tɔs lé Yeḛ a kunda ne naŋg nee ləma, Lel təa gə́ a tó pu lé a kar njemeeyèr wəi ne ləm tɔ.

Esai 17:11

Loo gə́ seḭ ma̰a deeje lé ndá Seḭ ulaje ŋgalaŋ siŋ-siŋ keneŋ ləm, Teḛ gə ndɔ ndá Né gə́ seḭ manje lé pudu bən ləm tɔ. Nɛ ka̰dee godo mee ndəa gə́ kəm kiŋga rɔlel keneŋ lé ya Ndá to némeeko̰ gə́ kuma̰ gə́ wɔji dəa godo.

Esai 17:13

Ndu ginkoji dəwje gə raŋg ɓar Asəna gə kaa manje gə́ ula u-u-u bèe. Njesigənea̰ ndaŋg dee sané dee Ndá d’aḭ d’aw əw Asəna gə ləm mu gə́ to dɔ mbalje’g Gə́ lel odo aw ne ləm, Asəna gə pudu kunje Gə́ lel-mal ɓir dee bèe ləm tɔ.

Esai 30:33

Un kudee ləw ba lé Deḛ gɔl loo-roo-dəwje, Deḛ gɔlee d’wɔji ne dɔ mbai gə́ Asiri, D’aree ur ləm, gə tad ləm tɔ, Loo-roo-dəwje neelé pər gə kagje taa loo keneŋ pəl-pəl, Kila kəmə pugudu lə Njesigənea̰ mbudu pər o̰ To gə́ kṵji pər gə́ kas gə́ teḛ bilim-bilim bèe.

Esai 37:7

N’a gə kɔsee ɓɔḭ-ɓɔḭ mba kar loo gə́ yeḛ oo sorta kára ndá yeḛ a tel mee ɓee’g ləa. Tɔɓəi n’a kar dee tɔlee gə kiambas dan mee ɓee’g ləa tɔ.

Esai 40:7

Mu ndòlé ləm, pudu gəḭ ləm tɔ Loo gə́ Njesigənea̰ ila kəmə pugudu dɔ dee’g ya. Tɔgərɔ koso-dəwje lé to d’asəna gə mu bèe ya.

Esai 41:16

Seḭ a tó deeje séréré-séréré Ndá lel a kɔr dee kaw sə dee əw ləm, Lel-mal a sané dee kad-kad ləm tɔ. Nɛ seḭje lé seḭ a kalje rɔ sí gə mbata lə Njesigənea̰ ləm, Seḭ a kɔsje gaji rɔ sí wɔji ne dɔ Njerɔkunda lə Israɛlje lé ləm tɔ.

Esai 41:2

See na̰ ɓa ar dəw gə́ njekur dɔ loo’g unda loo bər teḛ, Yeḛ gə́ ndu kaji ɓar gée’g lé wa. See na̰ ɓa ɔm ginkoji dəwje gə raŋg jia’g ləm, Ar mbaije d’ula dɔ dee nea̰’g ləm tɔ wa. See na̰ ɓa ar kiambas lə dee tel nduji naŋg ləm, Ar ɓandaŋgje lə dee tel to ləm mu gə́ lel ula ne bèe ləm tɔ wa.

Jeremi 22:30

Njesigənea̰ pa togə́bè pana: Undaje ri dəw neelé gə́ dəw gə́ lal ŋgon ləm, gə́ dəw gə́ teḛkɔr mee ndɔje’g ləa el ləm tɔ. Mbata ŋgokea kára kara gə́ a teḛkɔr mba si kalimbai’g lə Dabid mba ko̰ɓee dɔ Judaje’g lé godo.

Jeremi 23:19

Aa ooje, lel-boo lə Njesigənea̰ Gə́ to oŋg-boo ləa nduba rəa ləm, Ndi bura-boo aw gə́ nee ləm tɔ Ndá jura dɔ njémeeyèrje’g.

Ojee 13:15

Lée nékiŋgaje lə Eprayimje to yaa̰ mbuna ŋgako̰ deeje’g kara Lel gə́ a kḭ bər lé a kula dɔ dee’g ləm, Lel lə Njesigənea̰ a kḭ dɔdilaloo’g kula ləm tɔ Ndá kəm-rəw-manje lə dee d’a tudu kurum-kurum ləm, Manje lə dee gə́ d’aḭ kuji-kuji kara d’a kyi tə-tə ləma, Kəi-nébaoje gə́ néje gə́ to ŋgonkəm dee to keneŋ lé D’a kunda deḛ lai gə́ nébanrɔ kaw ne ləm tɔ.

Ojee 13:3

Gelee gə́ nee ɓa d’a to ne kasəna Gə mum gə́ oso teḛ gə́ ndɔ ləm, D’a to ne kasəna Gə mán tàl gə́ wa waga ɓa gəḭ ɓəi ləm, D’a to ne kasəna Gə tisa kó gə́ lel sané kad loo-kunda-kó’g bèe ləma, D’a to ne kasəna Gə sa pər gə́ teḛ kəmbolè’g bèe ləm tɔ.

Nahum 1:14

Aa ooje, né gə́ Njesigənea̰ un ne ndia wɔji ne dɔ sí-seḭ gə́ Ninibə ɓa nee: Seḭ a kiŋgaje ŋgaka síje gə́ ri sí a ɓar ne dɔ dee’g nda̰ el, N’a tɔr néndajije gə́ seḭ tɔl deeje ləm, gə lḛ̀je ləm tɔ Mee kəi-magə’d lə sí, N’a gɔl bwa-dubu sí mbata seḭ toje dəwje gə́ gə mḭdé ba.

Ajee 1:9

Seḭ undaje meḛ sí yel gə mba kinja kó yaa̰ ya nɛ aa ooje, seḭ injaje lam ba bèe. Seḭ tel reeje ne mee kəije’g lə sí ya nɛ neḛ n’tó lel pu-u dɔ’g n’sané ne. See gelee ban ɓa bèe wa. Njesigənea̰ gə́ njeboo-néje ɓa pa togə́bè pana: Gelee wɔji dɔ kəi lə neḛ gə́ tuji nɛ seḭ lé seḭ ɔsje rɔ sí ɓad arje nana kara ula rəa ndubu mbata kəi ləa-yeḛ ɓa.

Jakari 7:14

Neḛ n’sané dee mbuna ginkoji dəwje gə raŋg’d Gə́ deḛ gər dee el ləm, Ɓee lə dee tel to dɔnduba tor dee’g Ar dəw kára kara dəs keneŋ aw Esé tel keneŋ el ləm tɔ. Ɓee gə́ maji dum lé deḛ d’aree tel to dɔdilaloo ya.

Jakari 9:14

Njesigənea̰ a nduba rəa dɔ dee’g tar Ndá kandə ɓandaŋg ləa a teḛ to gə́ tel lə ndi bèe, Mbaidɔmbaije gə́ Njesigənea̰ a kar to̰to̰ ləa ɓar, Yeḛ a kaw kəmee gə́ kédé dan lel-boo gə́ dɔkɔl.