Esai 23:13 - Maktub gə́ To gə Kəmee

¹³ Aaje loo ooje njéɓeeje gə́ Kalde, Deḛ gə́ to koso-dəwje kédé el lé Deḛ to dəwje gə́ d’isi dɔdilaloo’g Ɓa njé gə́ Asiri tum ne gin ɓee d’ar dee, Deḛ d’unda kəije gə́ duu dɔ loo keneŋ ləm, Deḛ təd kəi-mbaije gə́ Tir ləma, Deḛ tuji dee pugudu-pugudu ləm tɔ.

Esai 23:13 ပူးပေါင်းရင်းမြစ်များ

Gḭ-Néje 11:28

Ndá Haran wəi kəm bɔbeeje’g Tera mee ɓee-kojee’g Ur mee ɓeeko̰ gə́ Kalde.

Gḭ-Néje 11:31

Tera ar ŋgonee gə́ Abram ləm, gə Lɔt gə́ to ŋgolə Haran, ŋgolə ŋgonee gə́ diŋgam ləma, gə məmeeje Sarai, dené lə ŋgonee Abram ləm tɔ d’aw səa. Deḛ d’ḭ Ur ɓeeko̰ gə́ Kalde na̰’d mba kaw mee ɓee gə́ Kana̰. Deḛ d’aw njal teḛ Haran ndá deḛ d’isi keneŋ.

Gḭ-Néje 11:9

Gelee gə́ nee ɓa deḛ ɓaree ne Babel mbata lé neelé ɓa Njesigənea̰ tel gwɔs dəwje lai gə́ dɔ naŋg nee lé ɓəd-ɓəd keneŋ ləm, lé neelé ɓa Njesigənea̰ sané dee ne dɔ naŋg nee gə looje lai ləm tɔ.

Gḭ-Néje 2:14

Tɔ-baa gə́ njekɔm’g munda lé ria lə Hidekel, to yee gə́ ula par gə́ bər kel ɓee gə́ Asiri. Tɔ-baa gə́ njekɔm’g sɔ lé ria lə Epratə tɔ.

2 Mbaije 17:24

Mbai gə́ Asiri ar dəwje gə́ Babilɔn, gə Kuta, gə Aba, gə Amat, gə Separbayim ree d’isi mee ɓee-booje gə́ Samari tor Israɛlje’g lé. Deḛ taa Samari gə́ ka̰ dee ndá dee d’isi mee ɓee-booje’g ləa.

2 Mbaije 20:12

Mee ndəa’g neelé Berodak-Baladan, ŋgolə Baladan, mbai gə́ Babilɔn ula gə maktub gə nénoji ar Ejekias, mbata yeḛ oo ta rɔko̰ lə Ejekias lé.

2 Sôrta Gḭka Israɛlje 33:11

Yen ŋga Njesigənea̰ ar ɓé-njérɔje gə́ Asiri ree d’wa Manasə teá gə kúla lar, deḛ teá gə kúla larkas njim-njim d’aw səa Babilɔn tɔ.

Maktub gə́ wɔji dɔ Jɔb 1:17

Loo gə́ yeḛ aw pa təa’g bèe-bèe ya ɓəi ndá yeḛ gə́ raŋg teḛ təsərə ree ula Jɔb pana: Kaldeje d’ɔm na̰’d kudu munda d’ur dɔ jambalje’g twa dee ləm, deḛ tɔl kuraje ləi gə kiambas ləm tɔ, nɛ ma nja gə karm ba m’teḛ pe’d-pe’d ta yoo’g m’ree mba kulai taree.

Pakɔsje 72:9

Deḛ gə́ d’isi dɔdilaloo’g lé D’a kɔs kəji dee naŋg nea̰’g ləm, Njéba̰je ləa lé kara D’a munu nduji naŋg ya ləm tɔ.

Esai 10:5

Njesigənea̰ pana: Meeko̰ a koso dɔ Asirije’d Gə́ to ndəi gə́ wɔji dɔ oŋg ləm Ndəi gə́ to ji dee’g lé ɓa To nékula gə́ wɔji dɔ boo-oŋg ləm tɔ.

Esai 10:7

Nɛ deḛ d’wɔji meḛ dee’g togə́bè el ləm, Yee gə́ bèe ɓa gə́ takə̰ji lə dee el ləm tɔ, Deḛ d’wɔji meḛ dee’g mba tuji loo ləm, Gə mba kar ginkoji dəwje gə raŋg gə́ bula lé D’udu guduru ləm tɔ.

Esai 13:19

Babilɔn, i gə́ to nérɔnduba lə ɓeeko̰je ləm, Gə né rɔndɔḭ lə Kaldeje ləm tɔ lé I a tel to kasəna gə Sɔdɔm gə Gɔmɔr Gə́ Ala tuji dee lé.

Esai 13:21

Daje gə́ dɔdilaloo’g d’a to keneŋ ləm, Kwɔi-booje d’a taa mee kəije lə dee pəl-pəl ləm, Miruje d’a ra loo-si dee keneŋ ləma, Bàl bya̰je gə́ wala d’a ndam keneŋ ləm tɔ.

Esai 18:6

D’a kuba dee kya̰ deḛ lai Kar yelje gə́ dɔ mbal’d Gə́ to njékusɔ mar deeje ləm, Gə daje gə́ mee wala’g ləm tɔ. Yelje gə́ njékusɔ mar deeje lé D’a si dɔ nin dee’g naḭ loo nuŋga’g ləm, Daje gə́ mee wala’g d’a kaar keneŋ naḭ kul’g ləm tɔ.

Esai 43:14

Njesigənea̰, njekoga dɔ sí Gə́ to Njerɔkunda lə Israɛlje lé Pa togə́bè pana: Gə mbata lə sí-seḭ ɓa Ma m’ula ne njeba̰ m’aree rɔ ne gə njé gə́ Babilɔn gə mbəa Ndá m’ar dee-deḛ lai gə́ to njékaḭje d’oso ləm, Gə Kaldeje gə́ d’aḭ gə batoje lə dee Gə́ d’ɔs ne gaji rɔ dee lé kara d’oso ləm tɔ.

Ejekel 23:23

Babilɔnje gə Kaldeje lai, gə Pekod, gə Soa, gə Kowa ləm, gə Asirije lai sə dee na̰’d ləm tɔ, deḛ gə́ to basaje gə́ kura yaa̰ ləm, to njéguburuɓeeje gə mbaije ləm, to mbaije gə́ njériɓarje ləma, gə njégər goso kal kundaje ləm tɔ.

Ejekel 29:18

I ŋgon-dəw lé Nebukadnesar, mbai gə́ Babilɔn ar njérɔje ləa ra kula gə́ kədərə gə mba rɔ ne gə ɓee gə́ Tir, dɔ dəwje lai rəd peni-peni ləm, dɔ tam dee mbɔr mbɔji-mbɔji ləm tɔ, nɛ yeḛ əsé njérɔje ləa d’iŋga né kára gə́ nédɔji dee mee ɓee gə́ Tir’g dɔ kula gə́ deḛ ra mba rɔ ne səa lé el.

Loo gə́ killa rea kəm Daniel’g 4:30

Léegəneeya, ta gə́ pa dɔ Nebukadnesar’g lé aw lée’g béréré. Deḛ d’ɔsee mbuna dəwje’g tubá ləm, yeḛ sɔ mu to gə́ bɔ maŋgje bèe ləma, mán tàl tən rəa’g ləm tɔ saar ar yiŋga dəa ḭ ŋgal to gə́ bèl niŋgatə̰də ləm, yel jiaje gə yel gɔleeje d’uba ŋgal to gə́ ka̰ yelje bèe ləm tɔ.

Habakuk 1:6

Aa ooje, n’a gə kɔs Kaldeje ɓɔḭ-ɓɔḭ Deḛ lé to koso-dəwje gə́ to njéo̰gje gə njémeekḭ juguguje ləm, Deḛ d’unda tad ɓee gə dɔ naŋg dana gaŋg Gə mba kaw taa loo-sije gə́ to ka̰ dee-deḛ el lé ləm tɔ.

Néra Njékaḭkulaje 7:4

Yen ŋga yeḛ uba naŋg ḭ, ya̰ ɓee lə Kaldeje, aw ra ɓee Sara̰. Tɔɓəi loo gə́ bɔbeeje wəi mba̰ ndá Ala aree ḭ keneŋ aw teḛ ɓee gə́ seḭ sije keneŋ ɓasinè lé tɔ.