Esai 14:1 - Maktub gə́ To gə Kəmee

¹ Mbata Njesigənea̰ a koo kəmtondoo lə ŋgaka Jakob ləm, yeḛ a mbər Israɛlje ya ləm tɔ ndá, a tel kunda dee mee ɓee’g lə dee gogo, dəw-dɔ-ɓeeje d’a kɔm sə dee na̰’d ləm, d’a kɔm na̰’d gə ŋgaka Jakob ləm tɔ.

Esai 14:1 ပူးပေါင်းရင်းမြစ်များ

Este 8:17

Mee dəb ɓeeko̰je kára kára lai ləm, gə mee ɓee-booje kára kára lai ləm tɔ lé loo gə́ d’ila mber ndukun lə mbai keneŋ ndá loo gə́ mbuna Jibje’g lé rɔlel gə boo-rɔkal gə ra muru-gad gə ra naḭje ɓa to keneŋ ya. Tɔɓəi dəwje bula mbuna koso-dəwje gə́ mee ɓee’g tel rɔ dee gə́ Jibje mbata ɓəl gə́ deḛ ɓəl Jibje lé ɓa unda dee badə gaŋg dee tɔ.

Pakɔsje 102:13

Nɛ i Njesigənea̰ lé o̰ ɓee saar-saar gə no̰ ya, Kolé mee dɔi’g a to mbuna ŋgaka dəwje’d gə́ kédé-kédé ya.

Pakɔsje 102:14

I a kuba naŋg kḭ tar Koo ne kəmtondoo lə njé gə́ Sio̰ ya, Mbata ndɔ koo kəmtondoo lə deḛ gə́ i wɔji njaŋg lé Kàree teḛ mba̰,

Pakɔsje 143:12

Gə goo meemaji ləi lé Ar njéba̰je ləm d’udu guduru, Ar deḛ lai gə́ to njekorè dɔm naŋgje kara d’wəi ne mburug to Mbata ma lé m’to gə́ kura ləi ya.

Pakɔsje 98:3

Yeḛ ar mée olé dɔ meemaji’g ləa gə dɔ meenda londoŋ’g ləa Gə́ wɔji dɔ gel-bɔje lə Israɛlje ləm, Kaji gə́ Ala lə sí aji sí ne lé D’oo gə loo lai-lai d’ɔr rudu naŋg nee njal ləm tɔ.

Esai 19:18

Mee ndəa’g neelé deḛ gə́ d’isi ɓee-booje’g mi gə́ mee ɓee gə́ Ejiptə lé d’a pa takɔji Kana̰je ləm, d’a man ne rɔ dee gə ri Njesigənea̰ gə́ njeboo-néje ləm tɔ. Ɓee-boo gə́ kára mbuna dee’g lé d’a kunda ria lə ɓee-boo gə́ ka̰ tuji lé.

Esai 21:1

Ndərta gə́ wɔji dɔ dɔdilaloo gə́ mbɔr baa-boo-kad’g. To gə́ lel-mal ḭ dɔ jikɔl ree ɓir bèe Ndá njeba̰ ḭ dɔdilaloo’d Gə́ to ɓee gə́ to ɓəl kədm-kədm.

Esai 27:6

Mee ndəaje gə́ d’a gə ree lé Jakob a kula ŋgirá naŋg ləm, Israɛl a kidi kar pudeeje gə barkəmeeje to keneŋ ləm tɔ Ndá ka̰dee a taa naŋg nee pəl-pəl.

Esai 41:8

Nɛ seḭ Israɛlje gə́ toje kuraje ləm, Seḭ ŋgaka Jakob gə́ ma m’ɔr sí, Seḭ ŋgaka Abrakam gə́ m’unda sí dan kəm’g lé.

Esai 41:9

Seḭ gə́ m’ɔr sí gwɔi naŋg’d ləm, M’ɓar sí ɓee gə́ əw’g m’ree sə sí ləm tɔ lé M’ula sí m’pana: Seḭ toje kuraje ləm, Ma nja m’ɔr sí ɓó m’uba sí m’ya̰ sí el.

Esai 44:1

Nɛ ɓasinè seḭ njé’g lə Jakob gə́ toje kuraje ləm, Seḭ Israɛlje gə́ m’ɔr sí m’unda sí gə kəmee ləm tɔ lé Maji kar sí ooje ta nee!

Esai 45:14

Njesigənea̰ ula Israɛlje togə́bè pana: Nékiŋgaje lə Ejiptəje, gə nérabje lə Etiopije Gə ka̰ Sabaje gə́ kagrɔ dee ŋgal pur-pur lé D’a dəs ree rɔ sí’g ndá D’a tel to gə́ ka̰ sí-seḭ. Koso-dəwje neelé d’a njaa goo sí’g ləm, D’a dəs gə kúla lar rɔ dee’g ləma, D’a kunda barmba no̰ sí’g ra ne ndòo rɔ sí’g kula sí ne pana: Tɔgərɔ, Ala si rɔ sí-seḭ’g ya kára ba ləm, Ala gə́ raŋg gə́ njekorè dəa godo ləm tɔ.

Esai 47:1

Gə́ rəm si naŋg dan babur’g I ɓee gə́ Babilɔn Gə́ kédé to asəna gə ŋgoma̰də bèe! Gə́ rəm si dɔ naŋg’d lal kalimbai, I ɓee gə́ Kalde Gə́ to asəna gə ŋgon dené lé tɔ. D’a kooi asəna gə ŋgoma̰də Gə́ ma̰də yaa̰ gə njekərkəmloo el ŋga.

Esai 49:10

Ɓó a tɔl dee el ləm, Kṵdaman a tɔl dee el ləma, Pər kàr gə́ nuŋga kəd-kəd gə kàr lé D’a kula kəm dee ndòo el ləm tɔ Mbata yeḛ gə́ mée aw taḭ-taḭ dɔ dee’g lé A to njekɔrno̰ dee Ndá yeḛ a kɔr no̰ dee par gə́ kəm-rəw-manje’g.

Esai 49:13

Dara, maji kari ra rɔlel! Dɔ naŋg, maji kari si gə rɔkal! Mbata Njesigənea̰ gɔl meḛ dəwje ləa ləm, Yeḛ oo kəmtondoo lə njénékəmndooje ləa ləm tɔ.

Esai 49:15

See mee dené a kwəi dɔ ŋgonee gə́ aw il mbəaa’g wa. See a lal kar mée aw taḭ-taḭ dɔ ŋgonee gə́ ḭ mée’g wa. Ɓó lé yeḛ ar mée wəi dəa’g kara Ma ɓa yḛ̀ m’a kar məəm wəi dɔ sí’g nda̰ el,

Esai 49:25

Njesigənea̰ pana: Tɔgərɔ ya, ɓər gə́ bao-rɔ wá lé Dəw a naree jia’g taa ləm, Néba̰rɔ lə njekorè dɔ dəwje naŋg lé A teḛ jia’g ləm tɔ, Ma nja m’a rɔ gə njéba̰je lə sí Ndá m’a kaji ne ŋgan síje kar sí.

Esai 49:7

Njesigənea̰ gə́ to njekoga-dɔ-loo ləm, Gə Njerɔkunda lə Israɛlje ləm tɔ pa togə́bè Ar yeḛ gə́ d’ə̰jee bəḭ-bəḭ Gə́ to né gə́ to kḛji kəm koso-dəwje’g ləm, Ar yeḛ gə́ to ɓər lə njésiŋgamoŋje ləm tɔ pana: Mbaije d’a kée ndá d’a kuba naŋg kḭ ləm, Mbaije kara d’a kunda barmba nea̰’g ləm tɔ, Mbata lə Njesigənea̰ gə́ to njemeenda londoŋ ləm, Mbata lə Njerɔkunda lə Israɛlje gə́ ɔrm ləm tɔ.

Esai 54:3

Mbata i a taa loo par gə́ dɔ jikɔl ləm, gə dɔ jigel ləm tɔ, Ŋgakaije d’a taa loo pəl-pəl mbuna ginkoji dəwje gə raŋg’g, D’a rusu ɓee-booje gə́ to nduba lé.

Esai 55:7

Maji kar njemeeyèr uba goo rəw ləa ya̰ ləm, Maji kar dəw gə́ njera né kori-kori uba goo takə̰jije ləa ya̰ ləm tɔ, Maji karee tel ree rɔ Njesigənea̰’g Mbata yeḛ a koo kəmtondoo ləa ləm, Maji karee tel ree rɔ Ala’g lə sí Gə́ rəa asee dɔ meekoso lemsé’g el ləm tɔ.

Esai 56:3

Maji kar dəw-dɔ-ɓee Gə́ ɔm gə Njesigənea̰ na̰’d pana: Njesigənea̰ unda neḛ ɓad Rɔ koso-dəwje’g ləa bèe el ləm, Maji kar njekuji pana: Aa ooje, neḛ n’to kag gə́ tudu bèe el ləm tɔ!

Esai 60:10

Dəw-dɔ-ɓeeje d’a gɔl ndògo-bɔrɔ ləi gogo ləm, Mbaije lə dee d’a tel to kuraje ləi ləm tɔ, Mbata loo gə́ oŋg ram lé ɓa m’kundai ya Nɛ gə goo meekoso lemsé ləm lé M’tel m’oo ne kəmtondoo ləi.

Esai 60:14

Ŋgalə njékula kəmi ndooje lé D’a ree kula dɔ dee naŋg nɔḭ’g ləm, Deḛ lai gə́ d’ḛjii bəḭ-bəḭ lé D’a ree kunda barmba gin gɔli’g ləm tɔ. D’a ɓari ɓee-boo lə Njesigənea̰, Sio̰ lə Njerɔkunda lə Israɛlje.

Esai 66:20

D’a ree gə ŋgako̰ síje lai gə́ d’isi mbuna ginkoji dəwje gə raŋg’g asəna gə nékar Njesigənea̰ lé, d’a ree sə dee dɔ kundaje’g ləm, gə dɔ pusuje’g ləm, gə dɔ topoije’g ləm, gə dɔ kundaje-mulayḛ̀jeje’g ləma, gə dɔ jambalje’g ləm tɔ, kaw ne sə dee saar dɔ mbal’g ləm gə́ to gə kəmee gə́ to Jerusalem asəna gə Israɛlje gə́ ree gə nékarje lə dee mee joje gə́ àr ŋgad-ŋgad mee kəi’g lə Njesigənea̰ bèe tɔ. Njesigənea̰ ɓa pa bèe.

Jeremi 16:15

Nɛ d’a pana: Njesigənea̰ to njesikəmba, yeḛ gə́ ar Israɛlje d’unda loo mee ɓee gə́ dɔgel gə ɓeeje lai gə́ yeḛ tuba dee ɔm dee keneŋ kédé lé! M’a tel sə dee mee ɓee’g lə dee gə́ m’ar bɔ deeje-je lé ya.

Jeremi 29:14

M’a kya̰ loo kar sí iŋgamje ya. Njesigənea̰ ɓa pa bèe. M’a kar njé’g lə sí gə́ d’wa dee gə́ ɓərje lé tel ree ləm, m’a mbo̰ sí mbuna ginkoji dəwje gə raŋg’g lai gə looje lai gə́ m’tuba sí m’ɔm sí keneŋ ləm tɔ. Njesigənea̰ ɓa pa bèe. Ndá m’a tel sə sí ree sə sí loo gə́ d’wa sí keneŋ d’aw sə sí ɓee-ɓər’g lé.

Jeremi 30:8

Njesigənea̰ gə́ njeboo-néje lé pana: Mee ndəa’g neelé m’a təd néməməna̰ gə́ wɔi gwɔs sí’g ləm, m’a gaŋg kulaje gə́ d’wa sí ne lé mbidi-mbidi ti ləm tɔ. Dəw-dɔ-ɓeeje d’a kisi gə́ dəw dɔ sí el ŋga.

Jeremi 31:4

M’a tel gɔl sí gogo ndá Seḭ a kaarje njaŋg, Seḭ Israɛlje gə́ toje asəna gə ŋgoma̰də Gə́ gər ŋgaw el! Seḭ a teḛje gə mbarèje lə sí Ndamje ne gə rɔlel gə njéboa-ndamje lə sí.

Jeremi 50:33

Njesigənea̰ gə́ njeboo-néje lé pa togə́bè pana: Israɛlje gə Judaje lé D’ula kəm dee ndòo na̰’d, Dəwje lai gə́ njékwa dee kaw sə dee Ɓee-ɓər’gje lé d’wa dee gaa-gaa Ɓó ndigi kɔm dee tar el.

Jeremi 51:51

Rɔ sí kul loo gə́ j’oo ta tajikil ləm, Sɔḭ wa kəm sí Loo gə́ dəw-dɔ-ɓeeje ree Mee loo’g lə Njesigənea̰ Gə́ to gə́ kəmee ləm tɔ.

Ejekel 16:60

Nɛ n’a kar mee neḛ olé dɔ manrɔ’g lə neḛ gə́ neḛ man n’ari loo gə́ i nai ne gə ma̰di ɓəi ndá n’a manrɔ neḛ kari gə manrɔ gə́ a to gə no̰.

Ejekel 47:22

Né gə́ to asəna gə tḛ́ bèe ɓa seḭ a kundaje ne kəmee lə sí-seḭ ləm, gə ka̰ dəw-dɔ-ɓeeje gə́ d’a si mbuna sí’d gə́ d’a koji ŋgan deeje mbuna sí’g ləm tɔ, seḭ a koo deeje gə́ kojiɓeje mbuna Israɛlje’g, né gə́ to asəna gə tḛ́ bèe ɓa deḛ d’a taa ne loo sə sí mbuna ginkoji Israɛlje’g.

Jakari 1:17

Maji kam m’ra né wəl ya tɔɓəi m’pana: Njesigənea̰ gə́ njeboo-néje pa togə́bè pana: Ɓee-booje lə neḛ d’a tel kiŋga némajije Gə́ a taa rɔ dee pəl-pəl ya ɓəi, Njesigənea̰ a gɔl mee Sio̰ ya ɓəi ləm, A tel kɔr kəm ɓee gə́ Jerusalem gə́ nékea̰ ɓəi ləm tɔ.

Malasi 1:11

Un kudee loo kuba’g lə kàr saar teḛ ne loo kuru naŋg’d ləa jig ya rim ɓar mḭ mbuna ginkoji dəwje gə raŋg’g. Gə looje lai-lai lé deḛ roo né gə́ ə̰də sululu keneŋ d’unda ne no̰ rim ya ləm, deḛ d’odo nékarje gə́ àr ŋgad-ŋgad ləm tɔ, mbata rim gə́ ɓar mḭ mbuna ginkoji dəwje gə raŋg’g lé ya. Njesigənea̰ gə́ njeboo-néje lé ɓa pa bèe.

Lugu 1:54

Kura ləa Israɛl lé yeḛ ree təa puduru ilá tar. Mbata yeḛ ar mée olé dɔ meekɔrjol’g ləa To gə́ yeḛ pa taree ar ka síje-je lé

Lugu 2:32

Yee neelé to lookàr gə́ a ndogó jol-jol dɔ ginkoji dəwje gə raŋg’g ləm, A kula rɔnduba dɔ koso-dəwje ləi gə́ Israɛl lé ləm tɔ.