Esai 11:16 - Maktub gə́ To gə Kəmee

¹⁶ Bèe ɓa rəw a to keneŋ mbata ges koso-dəwje ləa gə́ nai Gə́ teḛ ji Asirije’g To gə́ rəw to keneŋ kédé gə́ ləw mbata lə Israɛlje Mee ndəa gə́ deḛ d’unda ne loo mee ɓee gə́ Ejiptə teḛ lé tɔ.

Esai 11:16 ပူးပေါင်းရင်းမြစ်များ

Teḛ-Raga 14:22

Israɛlje d’andə mee baa-boo’g lé njaa loo gə́ tudu kurum-kurum’g ləm, mán baa-boo lé tel asəna gə ndògo bèe par gə́ dɔ jikɔl dee’g gə dɔ jigel dee’g ləm tɔ.

Esai 1:9

Ɓó lé Ala gə́ njeboo-néje Ya̰ kó ginka sí gə́ nai jəbərə ba el ndá Kàr bèe nḛ jeḛ n’telje J’asəna gə njé gə́ Sɔdɔm ləm, Jeḛ n’telje n’tana gə njé gə́ Gɔmɔr bèe ləm tɔ.

Esai 10:20

Mee ndəa’g neelé ges Israɛlje gə́ to ŋgaka Jakob gə́ nai lé d’a kəw nduna rɔ dee rɔ yeḛ gə́ njekula kəm dee ndoo’g, d’a nduna rɔ dee gə meḛ dee bura rɔ Njesigənea̰ gə́ to Njerɔkunda lə Israɛlje lé.

Esai 11:11

Mee ndəa’g neelé ya Mbaidɔmbaije a kun jia tar gɔl kára ya ɓəi Mba taa ne dɔ ges koso-dəwje gə́ nai lé gogo, Deḛ gə́ sanéna̰ mee ɓee gə́ Asiri, gə Ejiptə, Gə Patros, gə Etiopi, Gə Elam, gə Sineyar, gə Amat, Gə dɔgoré-looje gə́ dan baa-boo-kad’g tɔ.

Esai 19:23

Mee ndəa’g neelé d’a ra rəw-kwɔi karee to tag mbuna ɓee gə́ Ejiptə gə ɓee gə́ Asiri’g, Asirije d’a kaw Ejiptə ləm, Ejiptəje kara d’a kaw Asiri ləm tɔ ndá Ejiptəje gə Asirije d’a kɔm na̰’d ra né kar Njesigənea̰.

Esai 27:13

Mee ndəa’g neelé d’a kim to̰to̰ gə́ boo, Bèe ɓa deḛ gə́ d’wa dee gə́ ɓər d’aw sə dee Asiri lé D’a tel ree ɓée ləm, Deḛ gə́ d’aḭ d’aw ɓee gə́ Ejiptə kara D’a tel ree ləm tɔ, Ndá deḛ d’a kunda barmba no̰ Njesigənea̰’g Dɔ mbal gə́ to gə kəmee gə́ to Jerusalem.

Esai 49:11

M’a tel gə dɔ mbalje ləm lai Kar dee to gə́ kila-rəwje Ndá rəw-booje ləm lé D’a to kɔr-kɔr tɔ.

Esai 49:12

Aa oo deeje, D’ḭ əw ɓa ree, Njé gə́ na̰je d’ḭ dɔgel gə dɔ-gó ləm, Njé gə raŋg d’ḭ ɓee gə́ Sinim ləm tɔ!

Esai 51:10

See to i ɓa ar baa-boo-kad yi ləm, Ar manje gə́ bwa-wəl gə́ uru lé tudu kurum-kurum ləma, Ar ŋgaw dan baa gə́ uru lé Tel to gə́ rəw ar koso-dəwje ləi gə́ i uga dɔ dee lé Dəs keneŋ ləm tɔ lé el wa.

Esai 57:14

D’a pana: Wɔije, wɔije, gɔlje rəw, Tɔrje néje lai gə́ ila kag rəw-kaw koso-dəwje’g ləm.

Esai 62:10

Teḛje, teḛje tarəwkɔgje’d gə́ raga ləm, Gɔlje rəw mbata koso-dəwje ləm ləm, Wɔije, wɔije rəw, tɔrje kɔr mbalje ləma, Unje nétɔji lə sí gə́ tar gə́ rɔ koso-dəwje’g ləm tɔ!

Soponi 2:7

Ta baa-boo-kadje neelé d’a to mbata ges gel-bɔje lə Juda gə́ nai, Lée neelé ɓa d’a kul rɔ dee keneŋ: Loondul ndá d’a kwa rɔ dee mee kəije’g lə Askalo̰: Mbata Njesigənea̰, Ala lə dee lé Mée a kwəi dɔ dee’g el Ndá yeḛ a kɔr dee ɓee-ɓər’g lə dee tel ree sə dee.