See ban ɓa ɓee-boo gə́ njekila koji lé ya Tel to asəna gə kaiya-dené bèe wa! Kédé lé néra gə́ gə goo rəbee taa loo keneŋ pəl-pəl ləm, Néra gə́ gə dɔ najee ɓa ra ɓee keneŋ ləm tɔ, Nɛ ɓasinè ndá njétɔl dəwje ɓa d’isi keneŋ.
See ban ɓa i no̰ njim-njim Mbata doo gə́ i iŋga ləm, Gə to gə́ tooi əw el ləm tɔ lé wa. To mbata néra kori-kori ləi Gə́ ɔs dɔ na̰-na̰ lé ləm, Mbata kaiya raije gə́ bula Dum tura lé ləm tɔ, Ɓa ma m’ra ne səi néje neelé gə mbəa.
Né gə́ tuji, né gə́ tuji, n’a kar Jerusalem tel to né gə́ tuji! Nɛ néje neelé a teḛ el ya saar kar dəw gə́ ta sariya wɔji dəa lé a ree ndá n’a kɔm ta sariya dəa’g.
