Ejekel 18:30 - Maktub gə́ To gə Kəmee

³⁰ Gelee gə́ nee ɓa seḭ gel-bɔje lə Israɛl lé nana kara n’a gaŋgta dəa’g gə goo nérea-rəa ya. Mbaidɔmbaije gə́ Njesigənea̰ ɓa pa bèe. Ɔsje badm tel reeje, ya̰je goo kaltaje lə sí lai gə mba kar néra kori-korije lə sí tel to gel tuji lə sí el.

Ejekel 18:30 ပူးပေါင်းရင်းမြစ်များ

Esdras 10:11

Ɓasinè, maji kar sí tegje gin kaiya lə sí arje Njesigənea̰ gə́ to Ala lə bɔ síje-je ndá gə́ raje torndia. Undaje rɔ sí ɓad rɔ dəwje gə́ mee ɓee’g nee ləm, gə rɔ denéje gə́ to ginkoji gə́ raŋg’d ləm tɔ.

Njekillamber 12:14

Mbata Ala a ree gə kula ra síje lai loo-gaŋg-rəwta’g kwɔji ne dɔ néje lai gə́ to loo-ŋgəḭ’g lé, lé to né gə́ maji əsé né gə́ majel ya kara ləm tɔ.

Njekillamber 3:17

Ma m’pa məəm’g m’pana: Ala a gaŋg rəwta dɔ njera né gə́ gə dɔ najee ləm, gə dɔ njemeeyèr’g ləm tɔ, mbata néje lai ləm, gə kulaje lai ləm tɔ lé ndəa gə́ wɔji dɔ dee dɔ dee to keneŋ ya.

Esai 21:12

Njeŋgəmloo lé tel ilá keneŋ pana: Loo si àr ya Nɛ loo to bidig ɓəi. Ɓó lé seḭ ndigi dəjije ta ndá Gə́ dəjije ya, Waje ndòo rɔ sí ndá gə́ telje reeje.

Esai 59:20

Njetaa dɔ dee a ree mbata njé gə́ Sio̰ gə njé’g lə Jakob D’a kuba goo kaiyaje lə dee kya̰, Njesigənea̰ ɓa pa bèe.

Jeremi 25:5

Deḛ pana: Nana kara maji karee ɔs badm tel ya̰ rəw-kabee gə́ majel ləm, ya̰ goo néra meeyèrje ləa ləm tɔ ndá seḭ a síje mee ɓee gə́ n’ar sí-seḭ gə bɔ síje-je lé saar-saar gə no̰.

Jeremi 3:22

Gə́ tel reeje, seḭ njékɔsta-rəwje, M’a kar məəm oso lemsé Dɔ nékaltaje’g lə sí. Aa oo, yḛ̀ j’aarje nee, jeḛ n’reeje rɔi’g Mbata i to Njesigənea̰ gə́ to Ala lə sí.

Jeremi 35:15

Ma m’ula kuraje ləm lai gə́ to njéteggintaje rɔ sí’g, un kudee gə ndɔ rad ya m’ula dee m’ar dee d’aw d’ula sí pana: Ɔsje badm telje dɔ panjaa sí gə́ majel’g ləm, tel gɔlje néra síje ləma, awje goo magəje gə mba pole dee el ləm tɔ ndá seḭ a síje mee ɓee gə́ m’ar sí ləm, gə m’ar bɔ síje-je ləm tɔ. Nɛ seḭ tugaje mbi sí ooje ne ta ləm el ləm, seḭ unje mbi sí rəw dɔ’g ləm tɔ.

Jeremi 7:3

Njesigənea̰ gə́ njeboo-néje gə́ to Ala lə Israɛlje lé pa togə́bè pana: Gɔlje panjaa síje gə néra síje lé ndá m’a kya̰ sí kar sí síje lée’g neelé ya.

Ejekel 14:6

Gelee gə́ nee ɓa maji kam m’ula gel-bɔje lə Israɛl lai m’pana: Mbaidɔmbaije gə́ Njesigənea̰ pa togə́bè pana: Gə́ telje, ya̰je goo magəje lə sí ləm, unje kəm sí rəw dɔ néje’g lə sí gə́ mina̰ lai lé ləm tɔ.

Ejekel 18:21

Ɓó lə njemeeyèr uba goo kaiyaje lai gə́ yeḛ ra lé ya̰ ləm, ɓó lé yeḛ aa dɔ godnduje lə neḛ lai lé kər-kər mba ra ne né gə́ danasur gə́ gə dɔ najee ləm tɔ ndá yeḛ a si kəmba ya ɓó a kwəi el.

Ejekel 18:29

Gel-bɔje lə Israɛl pana: Rəw lə Mbaidɔmbaije to gə goo rəbee el. Seḭ gel-bɔje lə Israɛl, see rəw lə neḛ ɓa to gə goo rəbee el wa. See to rəwje lə sí-seḭ ɓa gə́ to gə goo rəbee el lé el wa.

Ejekel 24:14

Neḛ Njesigənea̰ m’pata ndá né neelé a teḛ ya, n’a ra née ləm, n’a kya̰ gée el ləma, n’a koo kəmtondoo əsé n’a tel gə ndu neḛ el ləm tɔ. D’a gaŋg rəwta dɔi’g gə goo panjaai ləm, gə nérai ləm tɔ. Mbaidɔmbaije gə́ Njesigənea̰ ɓa pa bèe.

Ejekel 33:11

Maji kam m’ula dee m’pana: Neḛ n’to njesikəmba! Mbaidɔmbaije gə́ Njesigənea̰ ɓa pa bèe, né gə́ wa mee neḛ lé to mba kar njemeeyèr wəi ɓa el nɛ karee un panjaa gə́ sigi si ne kəmba ɓa wa mee neḛ. Ɔsje badm telje, ubaje goo rəw néra gə́ majel lə sí ya̰je, see a kwəije mba ɗi tɔɓəi wa, seḭ gel-bɔje lə Israɛl.

Ejekel 33:20

Seḭ pajena: Rəw lə Mbaidɔmbaije to gə goo rəbee el. Seḭ gel-bɔje lə Israɛl lé nana kara n’a gaŋg rəwta dəa’g gə goo panjaa ləa ya.

Ejekel 33:9

Nɛ ɓó lé ma m’ula njemeeyèr mba karee uba goo rəw néra meeyèr ləa ya̰ ɓa yeḛ uba ya̰ el ndá yeḛ a kwəi dan néra kori-kori’g ləa ya nɛ ma ɓa yḛ̀ m’a kaji rɔm ya.

Ejekel 34:20

Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Aa ooje, n’a gə gaŋg rəwta mbuna badə gə́ rəa to ndəb-ndəb gə badə gə́ əŋ kəŋ-kəŋ’d.

Ejekel 36:19

Neḛ n’ar dee sanéna̰ mbuna ginkoji dəwje gə raŋg’g ndá d’isi mee ɓeeje’g ɓəd-ɓəd, neḛ n’gaŋg rəwta dɔ dee’g gə goo panjaa lə dee ləm, gə goo kula ra dee ləm tɔ.

Ejekel 43:9

Ɓasinè lé d’aw gə nékaiyaje lə dee gə nin mbaije lə dee əw sə neḛ ndá n’a si mbuna dee’g saar-saar gə no̰ ya.

Ejekel 7:27

Mbai wa ndòo yoo ləm, Ɓəl unda mbai gə́ njekaa dɔ dəb ɓeeko̰ badə gaŋgee ləma, Ji koso-dəw-mee-ɓeeje unda bala tigi-tigi ləm tɔ. N’a ra sə dee gə goo rəw-kaw deeje ləm, N’a gaŋgta dɔ dee’g gə goo néra deeje ləm tɔ, Yee ɓa d’a gər ne to gə́ neḛ n’to Njesigənea̰ ya.

Ejekel 7:3

Ɓasinè rudee teḛ dɔ sí’g ŋga. N’a gə kila oŋg lə neḛ dɔ sí’g ləm, n’a gaŋgta dɔ sí’g gə goo rəw-kaw sí’g ləma, n’a kar ta néra síje lai gə́ mina̰ lé wa dɔ sí ləm tɔ.

Loo gə́ killa rea kəm Daniel’g 9:13

Tuji-boo neelé teḛ dɔ sí’g gə goo taree gə́ ndaŋg mee maktub godndu Moyis’g ya. Nɛ jeḛ n’toje ta Njesigənea̰, Ala’g lə sí pəgə-pəgə el ləm, j’ubaje goo néra kori-korije lə sí j’ya̰ el ləma, jeḛ n’tugaje mbi sí mba koo ne kankəmta ləi el ləm tɔ.

Ojee 12:6

Njesigənea̰ to Ala gə́ njeboo-néje, Ria to Njesigənea̰ ya.

Jakari 1:4

Maji kar sí toje asjena gə ka síje-je gə́ njéteggintaje gə́ dɔtar d’ula dee ta pana: Njesigənea̰ gə́ njeboo-néje pa togə́bè pana: Maji kar sí ubaje goo panjaa sí gə néra sí gə́ majel lé ya̰je. Nɛ dee d’oo el ləm, dee d’ur mbi dee gə́ dɔ ta’g lə neḛ el ləm tɔ. Njesigənea̰ ɓa pa bèe.

Malasi 3:18

Ndá seḭ a tel kooje loo to ɓəd lə njemeekarabasur gə njemeeyèr ləm, gə loo to ɓəd lə dəw gə́ njera né kar Ala gə yeḛ gə́ ra né aree el ləm tɔ.

Matiyo 16:27

Mbata Ŋgon-dəw lé a ree gə kuraje ləa gə́ dara na̰’d gə rɔnduba gə́ bɔbeeje a kula dəa’g. Ndəa neelé yeḛ a kuga nana kara gə goo kula rəa-rəa ya.

Matiyo 25:32

Ginkoji dəwje gə raŋg d’a mbo̰ na̰ nea̰’g ɓa yeḛ nja a kɔr kəm dee to gə́ njekulbadje ɔr ne kəm badje ləa gə bya̰je ləa lé bèe ɓəi tɔ.

Matiyo 3:2

Maji kar sí waje ndòo rɔ sí dɔ kaiya’g lə sí mbata ɓeeko̰ gə́ dara lé nai dəb ba ŋga.

Matiyo 3:8

Maji kar sí arje néra sí wa bua tapa sí loo gə́ seḭ waje ndòo rɔ sí dɔ kaiya’g lə sí

Lugu 13:3

Wah! bèe el. Nɛ ma nja m’ula sí təsərə ya, ɓó lé seḭ waje ndòo rɔ sí dɔ kaiya’g lə sí el ndá seḭje lai lé seḭ a kuduje bèe ya tɔ.

Lugu 13:5

Wah! bèe el. Nɛ ɓó lé seḭ waje ndòo rɔ sí dɔ kaiya’g lə sí el ndá seḭ a kuduje to gə́ deḛ bèe ya tɔ.

Néra Njékaḭkulaje 26:20

M’aw Damas kédé ɓa m’aw Jerusalem ləm, gə ɓeeje lai gə́ to ɓeeko̰ gə́ Jude ləma, gə goo ɓeeje lə njépole-magəje lé ləm tɔ lé m’ula dee ta kwa ndòo rɔ dɔ kaiya’g lə dee ləm, gə kɔs badm tel gə́ rɔ Ala’g ləma, gə néra gə́ a kwa bua kwa ndòo rɔ dɔ kaiya’g ləm tɔ.

Njé gə́ Rɔmə 2:5

Dɔkədərə ləi gə meendər dɔ kaiya’g ləi yee ɓa ar Ala turu ne oŋg ləa mée’g saar ndɔ kinja gin oŋg lé gə́ Ala a gaŋg ne ta dɔi’g gə goo rəbee.

Maktub gə́ Jak ula ne ar ngan-Allaje 1:15

Tɔɓəi malee lé a keskèm ɓa a koji kaiya ɓəi. Kaiya lé loo gə́ tɔg as lée mba̰ ndá oji yoo tɔ.

1 Piɛrə 1:17

Yeḛ gə́ ɔr kəm ta lə nana kara gə goo kula rəa ɓó ɔr kəm dəw el lé ɓó lé seḭ ɓareeje Bɔ síje ndá njaaje gə meekaarkərm loo gə́ seḭ naije gə mbáje dɔ naŋg nee ɓəi.

Loo gə́ killa rea kəm Ja̰’g 2:16

Bèe ndá wa ndòo rɔi dɔ kaiya’g ləi, ɓó lé bèe el ndá waga ɓa m’a kaw rɔi’g ndá m’a rɔ sə dee gə kiambas gə́ teḛ tam’g.

Loo gə́ killa rea kəm Ja̰’g 2:5

Bèe ndá maji kari ar məəi olé dɔ loo gə́ i ḭ keneŋ oso lé ɓa ɔs badm tel dɔ nérai gə́ kédé lé, ɓó lé bèe el ndá m’a ree kiŋgai kɔr ne kag pərndɔ ləi gə́ gogo. Ɓó lé i a kəw el ndá m’a ra bèe ya.

Loo gə́ killa rea kəm Ja̰’g 20:12

M’oo njé gə́ d’wəi gə́ to dəwje gə́ boo-boo gə njé gə́ gɔ-gɔ gə́ d’aar no̰ kalimbai’g lé. Yeḛ woḭ mee maktubje, tɔɓəi yeḛ woḭ mee maktub gə́ raŋg’d, yeḛ gə́ to maktub kəmə lé. Ndá deḛ gaŋg rəwta dɔ njé gə́ d’wəi’g lé gə goo ta gə́ ndaŋg mee maktubje’g neelé.

Loo gə́ killa rea kəm Ja̰’g 22:12

Aa ooje, waga ɓa m’a ree ɓəi ndá m’a ree gə né mba kuga ne dɔ ji dəwje kára-kára lai gə goo néra dee ra dee lé.