Ǝbrəje 13:8 - Maktub gə́ To gə Kəmee

⁸ Jeju Kristi lé loo rəa gə́ tagə́nè ya ləm, to bèe ɓogənè ləma, to bèe ya saar-saar gə no̰ ləm tɔ.

Ǝbrəje 13:8 ပူးပေါင်းရင်းမြစ်များ

Gḭ-Néje 21:33

Abrakam maan kagje gə́ ɓar dee tamarisje Beer-Seba. Lée neelé ɓa yeḛ pidi Njesigənea̰, Ala gə́ Njesi gə ləbee-ləbee gə nea̰ keneŋ.

Pakɔsje 103:17

Nɛ meemaji lə Njesigənea̰ lé to saar-saar Mbata lə njéɓəleeje ləm, Meekɔrjol ləa lé to saar-saar Mbata lə ŋgan meḛ ŋgan deeje ya ləm,

Pakɔsje 90:2

Ɓad ɓa kar mbalje to keneŋ ɓəi ləm, Ɓad ɓa kari unda naŋg nee gə dəwje gə́ keneŋ ləm tɔ lé I nja to Ala gə́ si kédé gə́ dɔtar saar gə no̰.

Pakɔsje 90:4

Mbata ləbje gə́ tɔl-dɔg (1.000) lé i oo gə́ ndɔ gə́ tagə́nè gə́ dəs ləm, I oo asəna gə kàr-ŋgəm-loo gə́ loondul’d gə́ dəs kalaŋ bèe ləm tɔ.

Teḛ-Raga 3:14

Ala ula Moyis pana: MA M’TO YEḚ GƎ SI GƎN. Tɔɓəi yeḛ pa pana: Yee ɓa i a kula Israɛlje pana: Yeḛ gə́ ria lə MA M’TO YEḚ GƎ SI GƎN lé ɓa ulam rɔ sí’g ya.

Esai 41:4

See na̰ ɓa ra néje neelé Ar dee d’aw lée’g béréré-béréré wa. To yeḛ nja ɓa ɓar ginka dəwje-dəwje kédé gə́ dɔtar. Ma Njesigənea̰ ya m’to yeḛ gə́ dɔtar ləm, M’a to yeḛ gə́ rudu ləm tɔ.

Esai 44:6

Aa ooje, ta gə́ Njesigənea̰, Mbai lə Israɛlje gə njekoga dɔ dee ləm, Yeḛ gə́ to Njesigənea̰ gə́ njeboo-néje ləm tɔ Pa togə́bè pana: Ma m’to yeḛ gə́ doŋgɔr ləm, Gə yeḛ gə́ rudu ləm tɔ. Ɓó lé ma m’godo ndá Ala kara godo tɔ.

Malasi 3:6

Ma kara m’a tel ree mbata ma lé m’to Njesigənea̰ ɓó m’tel rɔm ɓəd el. Bèe ɓa seḭ ŋgaka Jakob lé seḭ tujije ne el.

2 Njé gə́ Kɔrḭtə 1:19

Mbata Jeju Kristi, Ŋgon-Ala gə́ jeḛ gə Silbɛ̰ gə Timote j’ila mber ta ləa mbuna sí’g lé yee ɓa to ta gə́ ula sí na̰’d el nɛ ta ləa to njaŋg.

2 Njé gə́ Kɔrḭtə 1:20

Mbata ndukunje lə Ala lai lé to ne njaŋg tɔ. Gelee gə́ nee ɓa jeḛ m’pa gə ria-yeḛ m’pana: Amen, j’ula ne rɔnduba dɔ Ala’g lé.

Ǝbrəje 1:12

I a kə́ dee to gə́ kubu gə́ ŋgal yududu bèe Ndá d’a tel to ne ɓəd ya. Nɛ i nja a si to gə́ kédé ləm, Ləb sii kara rudee a kun el ləm tɔ.

Maktub gə́ Jak ula ne ar ngan-Allaje 1:17

Nénoji gə́ maji dum gə́ rara ləm, gə nékarnoji gə́ rara gə́ to maji ɔr njoroŋ ləm tɔ lé d’ḭ rɔ Bɔ lookàrje gə́ dara, yeḛ gə́ rəa ya̰ maree el ləm, loo gə́ ndul ɗig godo rəa’g ləm tɔ.

Jude 1:25

yeḛ nja ɓa gə́ Ala kára ba kiao, gə́ j’aji ne gin Jeju Kristi Mbaidɔmbaije lə sí lé maji kula rɔnduba dəa’g ləm, gə maji karee ur dɔ dəwje’g lai ləm, maji karee dum dɔ loo gə siŋgamoŋ ləa kédé par-par gə ɓasinè ləma, gə saar-saar gə no̰ ləm tɔ. Amen!

Loo gə́ killa rea kəm Ja̰’g 1:11

pana: Né gə́ ma m’oo lé maji kam ndaŋg maktub’g m’ula ne m’ar Eglisəje gə́ siri gə́ to Epesə ləm, gə Smirnə ləm, gə Pergamə ləm, gə Tiatirə ləm, gə Sardes ləm, gə Piladelpi ləma, gə laodise ləm tɔ.

Loo gə́ killa rea kəm Ja̰’g 1:4

Ma Ja̰ m’ula gə maktub m’ar Eglisəje gə́ siri gə́ to Asi. Maji kar meemaji gə meelɔm nai sə sí ya, ka̰ yeḛ gə́ si gən, gə si dɔtar lé, si ree ləm, ka̰ ndilje gə́ siri gə́ d’aar no̰ kalimbai’g ləa ləma,

Loo gə́ killa rea kəm Ja̰’g 1:8

Ma m’to Alpa ləm, gə Omega ləm tɔ, Ala Mbaidɔmbaije ɓa pa bèe. Ma m’to yeḛ gə́ si gən gə si dɔtar lé ləm gə si ree ləm tɔ. Ma m’to Bao-siŋgamoŋ ya.