Ǝbrəje 11:37 - Maktub gə́ To gə Kəmee

³⁷ Deḛ tila dee gə kɔri-ər ləm, gaŋg dee dana gə kiambas ləma, ra sə dee néurti ləm tɔ. Njé gə́ raŋg d’wəi yoo-kiambas ləm, d’aḭ wur-wur d’ula ndar badje gə ndar bya̰je rɔ dee’g ləm, néje lə deḛ lai tuji pugudu-pugudu ləma, d’ula pər kudu dee’g ra sə dee kədərə yaa̰ ləm tɔ.

Ǝbrəje 11:37 ပူးပေါင်းရင်းမြစ်များ

2 Samel 12:31

Yeḛ ar koso-dəwje gə́ mee ɓee’g teḛ raga ndá yeḛ ɔm kulaje gə́ kədərə kədərə dɔ dee’g ar dee ra kula gə kiaje gə́ ka̰ kinja kagje ləm, gə négɔl dɔ naŋg gə́ təa adə gə́ ra gə larndul ləm, gə tinaje gə́ to larndul ləma, gə kula gə́ wɔji dɔ nuŋga bɔrɔje ləm tɔ. Yeḛ ra togə́bè gə ɓee-booje lə Amo̰je lai ya. Tɔɓəi Dabid gə njérɔje ləa lai tel d’aw Jerusalem gogo tɔ.

1 Mbaije 18:13

See d’ula mbai ləm né gə́ ma m’ra loo gə́ Jejabel tɔl ne njéteggintaje lə Njesigənea̰ lé el wa. Ma m’iya njéteggintaje lə Njesigənea̰ as tɔl (100) m’kai dee rɔ-mi rɔ-mi mee bolè mbal’g ləm, ma m’ar dee muru gə mán-kai ləm tɔ.

1 Mbaije 18:4

mbata loo gə́ Jejabel tuji njéteggintaje lə Njesigənea̰ ndá Abdias wa njéteggintaje as tɔl (100) iya dee rɔ-mi rɔ-mi mee bolè mbal’g, tɔɓəi yeḛ ar dee muru ləm, gə mán-kai ləm tɔ.

1 Mbaije 19:1

Akab ɔr goo néje lai gə́ Eli ra ar dené ləa Jejabel oo ləm, aree oo loo tɔl gə́ yeḛ tɔl njéteggintaje lai gə kiambas lé ləm tɔ.

1 Mbaije 19:10

Yeḛ tel ilá keneŋ pana: Ma m’riba dɔ ri Njesigənea̰, Ala gə́ njeboo-néje lé gə goo malee gə́ ram ŋgwɔd-ŋgwɔd ya, mbata Israɛlje d’uba goo manrɔ ləi d’ya̰ ləm, deḛ tɔs loo-nékinjanéməsje ləi tila ləma, deḛ tɔl njéteggintaje ləi gə kiambas ləm tɔ, ma nja m’nai gə karm ba ndá deḛ saŋg loo mba tɔlm tɔ.

1 Mbaije 19:13

Loo gə́ Eli oo ndá yeḛ on kəmee gə kubu ləa gə́ boi yul ləm, yeḛ teḛ aar ta bolè mbal’g ləm tɔ. Aa oo, ndu dəw teḛ oso mbia’g togə́bè pana: Eli, see ɗi ɓa i ree ra loo gə́ nee’g wa.

1 Mbaije 19:14

Yeḛ ilá keneŋ pana: Ma m’riba dɔ ri Njesigənea̰, Ala gə́ njeboo-néje lé gə goo malee gə́ ram ŋgwɔd-ŋgwɔd ya, mbata Israɛlje d’uba goo manrɔ ləi d’ya̰ ləm, deḛ tɔs loo-nékinjanéməsje ləi tila ləma, deḛ tɔl njéteggintaje ləi gə kiambas ləm tɔ, ma nja m’nai gə karm ba ndá deḛ saŋg loo mba tɔlm tɔ.

1 Mbaije 19:19

Eli ḭ lée’g nee aw iŋga Elije, ŋgolə Sapat gə́ aar ndɔ-ndɔ. Maŋgje joo-joo loo dɔg-gir-dee-joo d’aw nea̰’g ndá yeḛ orè goo dee gə dee gə́ d’ɔm dee’g dɔg-gir-dee-joo lé tɔ. Eli aw pər gə́ rəa’g ndá yeḛ ila kubu ləa gə́ boi yul dəa’g.

1 Mbaije 21:10

Tɔɓəi undaje dəwje gə́ njémeeyèrje joo nea̰’g mba kar dee d’ɔm ta dəa’g no̰ koso-dəwje’g pa ne pana: Yeḛ ila ndɔl dɔ Ala’g lé ləm, gə ila ndɔl dɔ mbai’g ləm tɔ! Tɔɓəi oreeje gə́ raga, tiláje gə kɔri-ər tɔleeje.

2 Mbaije 1:8

Deḛ d’ilá keneŋ pana: Yeḛ ula kubu gə́ d’ṵji gə bḭ da ləm, yeḛ wa mée gə ndar ləm tɔ. Yen ŋga Ahajia pana: To Eli, dəw gə́ Tisbe lé ya.

2 Mbaije 2:13

ɓa yeḛ un kubu lə Eli gə́ boi yul gə́ yeḛ ɔr ila aree lé, tɔɓəi yeḛ tel aw aar ta baa gə́ Jurdɛ̰’g gogo.

2 Mbaije 2:8

Yen ŋga Eli ɔr kubu ləa gə́ boi yul kə́ na̰’d unda ne dɔ mán gə́ Jurdɛ̰ ndá mán kai rəa yo gə́ nee, ar dee-deḛ joo bɔr dəs keneŋ loo gə́ tudu’g.

1 Sôrta Gḭka-Israɛlje 20:3

Yeḛ ar dəwje gə́ mee ɓee’g teḛ raga ndá yeḛ gaŋg dee dana gə kia kinja kag ləm, gə né gɔl dɔ naŋg gə́ təa adə gə́ to larndul ləma, gə tinaje ləm tɔ, ɓee-booje lə Amo̰je lai lé Dabid ra togə́bè keneŋ ya. Dabid gə njérɔje lai tel d’aw Jerusalem gogo tɔ.

2 Sôrta Gḭka Israɛlje 24:21

Yen ŋga deḛ d’ula njuma̰ mee na̰’g dəa’g ndá deḛ tilá gə kɔri-ər tarəwkəi’g lə Njesigənea̰ gə goo ndukun lə mbai lé ya.

Jeremi 2:30

Ma m’kunda ŋgan síje kara M’kunda dee pi, Deḛ d’oo ta gɔl ləm gə́ m’gɔl dee lé gə́ né el, Seḭ gaŋgje njéteggintaje lə sí gə kiambas Asəna gə toboḭ gə́ njetuji né bèe.

Jeremi 26:23

Deḛ d’aw d’wa Uri mee ɓee gə́ Ejiptə ree səa ndá mbai Jojakim ar dee tɔlee gə kiambas ndá ila ninee dɔɓar dəwje gə́ raŋg’d.

Jakari 13:4

Mee ndəa’g neelé rɔ njéteggintaje a kul mbata lə némḭdije lə dee gə́ d’oo loo gə́ d’a gə tegginee el ləm, d’a kula kubu gə́ boi yul gə́ d’ṵji gə bḭ daje rɔ dee’g gə mba pa ne taŋgɔmje el ŋga ləm tɔ.

Jakari 13:9

N’a kɔm debee gə́ nai neelé dan pər’d ndá n’a ndiree to gə́ deḛ ndiri ne larnda gə mba kar siḭyee teḛ ləm, n’a naa dee to gə́ deḛ naa ne larlɔr bèe ləm tɔ. Deḛ d’a ɓar ri neḛ ndá n’a koo ta lə dee. N’a pana: To koso-dəwje lə neḛ. Ndá d’a pana: Njesigənea̰ to Ala lə síjeḛ tɔ.

Matiyo 21:35

Njéndɔ-nduúje neelé twa kuraje ləa kunda yeḛ gə́ kára mbugu-mbugu ləm, tɔl yeḛ gə́ kára mbḭ ləma, tila yeḛ gə́ njekɔm dee gə́ munda gə kɔri-ərje ləm tɔ.

Matiyo 3:4

Ja̰ ula kubu gə́ d’ṵji gə bḭ jambal rəa’g, wa mée gə ndar. Gabəraje ɓa gə́ nésəa ləm, ubu tə̰jije gə́ walá ɓa gə́ néko̰ ləa ləm tɔ.

Matiyo 8:20

Jeju ilá keneŋ pana: Bolé to njaaje to gən ga̰ ləm, kəi to yelje kara to gən ga̰ ləm tɔ. Nɛ Ŋgon-dəw lé oo loo gə́ mba kula dəa keneŋ taa kəmə el.

Lugu 13:34

Jerusalem, Jerusalem, i gə́ tila njéteggintaje gə́ d’ula dee rɔi’g gə kɔri-ər tɔl dee lé see gɔl ka̰da ɓa ma m’ndiŋga rɔm gə mba mbo̰ ŋgani gelm’g to gə́ ko̰ kṵja mbo̰ ne ŋganee gel bagee’d bèe nɛ seḭ ndigije el nee wa.

Néra Njékaḭkulaje 14:19

Yen ɓa Jibje gə́ d’ḭ Antiɔs gə Ikɔnə ree d’iŋga dee keneŋ ndá d’ula meḛ koso-dəwje na̰’d, d’ar dee tila Pool gə kɔri-ər, deḛ ndɔree d’ilá ŋgaŋloo’g d’ə̰ji ta meḛ dee’g pana: Yeḛ wəi mba̰.

Néra Njékaḭkulaje 7:52

See njéteggintaje gə́ ra ɓa bɔ síje lé lal kula kəm dee ndòo wa. Deḛ tɔl deḛ gə́ d’ila mber ta ree lə Njemeekarabasur kédé lé yeḛ gə́ seḭ nja wáje uláje ji dee’g ɓasinè ləm, seḭ nja toje gə́ njétɔleeje ləm tɔ.

2 Njé gə́ Kɔrḭtə 12:10

Gelee gə́ nee ɓa, m’isi gə məəm gə́ kulɔm dan rəm’g lé ləm, gə dan tajikil gə́ deḛ tajim ləm, gə dan némeeko̰ gə́ ram’g lé ləm, gə dan kəm gə́ deḛ d’ula ndòo’g ləma, gə dan néyooje gə́ d’aḭ dɔm sub ləm tɔ, yee ɓa to néram gə mba Kristi, mbata loo gə́ m’isi loo rəm’g lé kara yen ɓa, ma m’tel m’to ne njesiŋgamoŋ ya.

Ǝbrəje 11:25

Karee nai gə ŋgan-Alaje dan nékəmndoo’g lə dee lé yee ɓa yeḛ oo gə́ né gə́ maji unda kisi dan kaiya’g waga.

Ǝbrəje 13:3

Arje meḛ sí olé dɔ daŋgaije’g, to gə́ lə seḭje kara seḭ sije sə dee daŋgai’g bèe tɔ. Arje meḛ sí olé dɔ deḛ gə́ mar deeje d’ula kəm dee ndòo to gə́ seḭje kara d’ula kəm sí ndòo bèe tɔ.

Loo gə́ killa rea kəm Ja̰’g 11:3

M’a kun ndum kar njékɔrgootaje ləm gə́ joo lé siŋga dee mba kɔr ne goo ta kar ndɔ dee tɔl-dɔg-giree-joo gə dəa rɔ-misa̰, d’a kaar gə kubu-kwa-ndòo rɔ dee’g.