Ǝbrəje 10:27 - Maktub gə́ To gə Kəmee

²⁷ Nɛ néngina gə́ to ɓəl kədm-kədm gə́ to rəwta-gaŋg lé ləm, gə pər gə́ o̰ bilim-bilim gə́ a gə kuba njékaltaje naŋg bus roo dee ne ləm tɔ.

Ǝbrəje 10:27 ပူးပေါင်းရင်းမြစ်များ

Pakɔsje 21:9

Njéba̰je ləi lé i a kwa dee gə jii peb, Jikɔli kara a kiŋga deḛ lai gə́ d’ḛjii bəḭ-bəḭ tɔ.

Esai 26:11

Njesigənea̰, ji siŋgamoŋ ləi ɓar mèr-mèr ya Nɛ deḛ d’oo bèe el. D’a koo mal koso-dəwje ləi gə́ rai Ndá rɔ dee a kul ne, Pər a roo njéba̰je ləi dula-dula.

Esai 33:14

Njékaiyaje lé deḛ ɓəl mee ɓee gə́ Sio̰’g, Njéra né kori-korije lé d’unda bala tigi-tigi. See na̰ ɓa mbuna sí’g askəm si mbɔr pər gə́ roo loo’g wa. Esé na̰ ɓa mbuna sí’g askəm si mbɔr ndo̰ pərje gə́ to saar-saar gə no̰ lé wa.

Jeremi 4:4

Seḭ Judaje gə seḭ gə́ síje Jerusalem lé Ar deeje d’inja tamɔd sí D’unda sí ne gə kəmee d’ar Njesigənea̰, To kinja tamɔd gə́ wɔji dɔ dɔɓəŋgərə sí, Nà oŋg ləm a kḭ nduba to gə́ pər bèe ləm, A mbudu ko̰ ndá dəw kára kara Gə́ a kaskəm tɔlee lé godo gə mbata néra meeyèr lə sí.

Ejekel 36:5

Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Tɔgərɔ ya, dan pər oŋg’g lə neḛ lé neḛ m’pata n’ila dɔ ginkoji dəwje gə raŋg gə́ raŋg ləm, gə dɔ Edɔmje’g lai ləm tɔ, deḛ gə́ kai na̰ ɓee lə neḛ d’aree to gə́ né ka̰ dee-deḛ gə rɔlel gə́ taa meḛ dee pəl-pəl ləm, gə kḛji loo bəḭ-bəḭ lə dee ləm tɔ mba kodo ne nékiŋgaje lə dee gə́ nébanrɔ lé.

Ejekel 38:19

Neḛ m’pa njaŋg dan kəmkəḭ’g lə neḛ gə dan pər oŋg’d lə neḛ tɔ ndá mee ndəa’g neelé naŋg a yə ɓugu-ɓugu mee ɓee gə́ Israɛl’g.

Loo gə́ killa rea kəm Daniel’g 5:6

Yen ŋga mbai lé kəmee tel to ɓəd ləm, takə̰jije ləa ar mée tila ŋgaḭla-ŋgaḭla ləm tɔ. Bəgərəje tɔr ar kəjeje d’unda bala pad-pad.

Ojee 10:8

Dɔ looje gə́ ndəw gə́ Bet-Aben Loo gə́ Israɛlje ra kaiya keneŋ lé D’a tuji pugudu, Kunje gə kun-pɔrɔrɔje D’a kuba loo-pole-magje’g lə dee. D’a kula mbalje pana: Juraje dɔ sí’g! D’a kula dɔdərlooje pana: Ɓuguje dɔ sí’g!

Nahum 1:2

Njesigənea̰ to Ala gə́ kəmee əḭ dɔ dəwje’g ləa ləm, Yeḛ to njedalba̰ ləm tɔ, Njesigənea̰ to njedalba̰, Oŋg taa mée pəl-pəl, Njesigənea̰ dal ba̰ gə njékoma̰ səaje ləm, Yeḛ ar mée aw biri-biri dɔ njéba̰je’g ləa ləm tɔ.

Soponi 1:18

Larnda lə dee əsé larlɔr lə dee kara D’a kaskəm taa ne dɔ rɔ dee mee ndɔ oŋg-boo’g lə Njesigənea̰ lé el, Pər boo-oŋg ləa a roo ɓeeje lai dula-dula, Mbata yeḛ a tuji dəwje lai Gə́ d’isi mee ɓee’g neelé pugudu-pugudu gə́ léegəneeya.

Soponi 3:8

Njesigənea̰ pa togə́bè pana: Maji kar sí ŋginaje neḛ saar Ndɔ gə́ n’a kḭ taa nébanrɔ ɓa, Mbata neḛ n’wɔji mee neḛ’g njaŋg Gə mba mbo̰ ginkoji dəwje gə raŋg ləm, Gə ɓeeko̰je ləm tɔ Gə mba kɔm oŋg lə neḛ lé dɔ dee’g Boo-oŋg lə neḛ gə́ to asəna gə pər bèe Mbata pər boo-oŋg lə neḛ a roo naŋg nee lai dula-dula ya.

Bula lə Israɛlje 16:35

Pər ḭ rɔ Njesigənea̰’g roo dəwje tɔl-joo gə dɔ dee rɔ-mi (250), to deḛ gə́ tuu né gə́ ə̰də sululu lé ya.

Matiyo 13:42

D’a kɔm dee dan pər gə́ kṵjee teḛ gi-gi’g, to loo gə́ d’a no̰ kar mán kəm dee wa dee jiim-jiim keneŋ ləm, d’a sɔ ŋgaŋ dee keneŋ pəgərə-pəgərə ləm tɔ.

Matiyo 13:50

D’a kɔm njémeeyèrje dan pər gə́ kṵjee teḛ bilim-bilim ləm, d’a no̰ kar mán kəm dee wa dee jiim-jiim ləma, d’a sɔ ŋgaŋ dee keneŋ pəgərə-pəgərə ləm tɔ.

Matiyo 25:41

Gée gə́ gogo yeḛ a kula deḛ gə́ d’isi dɔ jigelee’g pana: Ɔdje tam’g gə́ gogo, seḭ gə́ ndɔl wa dɔ sí lé, ɔdje gə́ dan pər gə́ si o̰ bilim-bilim’g gə no̰ gə́ d’wa dɔ gɔlee d’wɔji ne dɔ njekurai gə kuraje ləa lé.

Matiyo 3:10

Tina to ŋgira kagje’g béréré-béréré mba̰. Kag gə́ rara ɓa gə́ andə gə ka̰dee gə́ maji el ndá d’a tuga badə gaŋg kila pər’d.

Matiyo 3:12

Nékwayiŋga dɔ kó ləa to jia’g. Yeḛ a kwa ne yiŋga dɔ kó loo-kunda-kó’g ləa nɛ yeḛ a mbo̰ kandə kó ləa kɔm dàmá ndá yeḛ a roo yiŋga dəa gə pər gə́ a kwəi nda̰ el lé tɔ.

Matiyo 8:29

Deḛ ra né ɓəgəgə-ɓəgəgə pana: I Ŋgon-Ala lé see ɗi ləi ɓa to rɔ sí’g wa. See i ree mba kula kəm sí ndòo kédé yal ɓa kar ndəa teḛ ɓəi wa.

Lugu 16:24

Yeḛ ula təa no̰’g wəl pana: Bɔm Abrakam, oo kəmtondoo ləm ya kari ndá ula Lajarə aree ula ŋgaw jia mán’g ree ɔs ndɔm’g aree kul ne bəl lɔm, mbata pər ulam ndubu yaa̰.

Lugu 19:27

Ges ta gə́ nai ɓa nee: Njéba̰je ləm gə́ ndigi karm m’o̰ ɓee dɔ dee’g el lé wa deeje gə́ nee amje ndá tɔl deeje kəm’g nee ya.

Lugu 21:26

Dəwje d’a kwəi yoo-ɓəl loo gə́ deḛ d’isi ŋgina ne néje gə́ a gə teḛ dɔ naŋg neelé, mbata nésḭgangə̰gje lə dara d’a yə ɓugu-ɓugu tɔ.

Lugu 23:30

Yen ŋga d’a kula mbalje pana: Juraje dɔ sí’g ləm, d’a kula dɔdərlooje pana: Dəbje dɔ sí’g ləm tɔ!

Tagə́maji gə́ Ja̰ ndang 5:29

Deḛ gə́ to njéra néje gə́ maji lé d’a teḛ gə mba kisi gə kəmə gə́ gə no̰ ya nɛ deḛ gə́ njéra néje gə́ majel lé d’a teḛ gə mba kar dee gaŋg rəwta dɔ dee’g tɔ.

Tel tura Godndu 32:43

Seḭ ginkoji dəwje gə raŋg ɔsje pa Ulaje ne rɔnduba dɔ koso-dəwje’g ləa! Mbata Njesigənea̰ dal ba̰ məs kuraje ləa ləm, Yeḛ dal ba̰ né gə́ njéba̰je ləa Ra ləm tɔ ndá Yeḛ uga dɔ ɓee ləa ləm Gə dɔ koso-dəwje ləa ləm tɔ.

Ǝbrəje 12:25

Meḛ sí dɔ rɔ sí’g! Yeḛ gə́ ula sí ta lé uduje mbi sí dɔ ta’g ləa el. Mbata deḛ gə́ d’udu mbi dee dɔ ta’g lə yeḛ gə́ ndəji dee dɔ naŋg neelé deḛ teḛ ne ta yoo’g el, nɛ ɓəd ɓa see jeḛ gə́ j’udu mbi sí dɔ ta’g lə yeḛ gə́ si dara lé see j’a teḛ ta yoo’g loo gə́ ra wa.

Ǝbrəje 12:29

mbata Ala lə sí lé to pər gə́ roo loo ya.

Ǝbrəje 2:3

ndá ɓó lé jeḛ ndoo bao dɔ boo-kaji gə́ Mbaidɔmbaije ila mberee kédé ləm, deḛ gə́ d’oo ta ləa təa’g d’ɔr ginee d’ar sí j’oo ləm tɔ ndá see j’a kiya rɔ sí ra ɓa mba kar ta wa dɔ sí el wa.

Ǝbrəje 9:27

Tɔɓəi to gə́ dəwje d’wəi gɔl kára ba ɓa ndɔ gaŋg-rəwta teḛ dɔ dee’g ɓəi gə goo rəw gə́ Ala ɓa wɔji,

Maktub gə́ Jak ula ne ar ngan-Allaje 5:3

Larlɔr lə sí gə larnda lə sí d’wɔməs, məs gə́ wɔ néje lə sí lé a kḭ kila ta dɔ sí’g ləm, a bɔr darɔ sí mbuji-mbuji asəna gə doo-pər bèe ləm tɔ. Seḭ mbo̰je nébaoje lə sí mee ndɔje gə́ to ndɔje gə́ rudu lé.

Loo gə́ killa rea kəm Ja̰’g 20:15

Nana ɓa gə́ ria godo mee maktub kəmə’g neelé ndá d’ilá dan pər gə́ tad rəg-rəg’d neelé tɔ.

1 Samel 2:25

Ɓó lé dəw ra kaiya ɔs ne maree rəw ndá Ala a gaŋg rəwta dəa’g ya. Nɛ ɓó lé yeḛ ra kaiya ɔs ne Njesigənea̰ rəw ndá see na̰ ɓa a ra rəwta ləa wa. Nɛ deḛ ndigi koo tapa bɔ deeje lé el mbata Njesigənea̰ ndigi kar dee d’wəi.