Loo gə́ killa rea kəm Daniel’g 1:19 - Maktub gə́ To gə Kəmee

¹⁹ Mbai lé wɔji sə dee ta, ndá mbuna basaje’g lai neelé dəw kára kara gə́ to asəna gə Daniel, gə Hanania, gə Mikaɛl, gə Ajaria lé godo. Togə́bè ɓa deḛ d’andə ne loo kula’g lə mbai lé.

Loo gə́ killa rea kəm Daniel’g 1:19 ပူးပေါင်းရင်းမြစ်များ

Gḭ-Néje 41:46

Ndɔ gə́ Jisəb teḛ aar no̰ Parao̰, mbai gə́ Ejiptə’g lé ndá ləbee aḭ rɔ-munda. Ndá yeḛ ḭ rɔ Parao̰’g aw njaa ŋgaŋ ɓee gə́ Ejiptə’g lai.

1 Mbaije 17:1

Eli, dəw gə́ Tisbe gə́ dɔ naŋg gə́ Galaad lé ula Akab pana: Njesigənea̰ Ala lə Israɛlje gə́ m’to kura ləa lé to Njesikəmba! Mee ləbje’g neelé tàl a kwa el ləm, ndi kara a kər el ləm tɔ nɛ gə goo ta gə́ ma nja m’a pa ɓa.

Gosota-Kəmkàrje 22:29

Ɓó lé i oo dəw gə́ gər gosokula ləa maji ndá Yeḛ a kaar no̰ dəwje gə́ kari ba’g el.

Jeremi 15:19

Gelee gə́ nee ɓa Njesigənea̰ pa ne togə́bè pana: Ɓó lé ma m’naam kaar neḛ’g ndá N’a kilam keneŋ, Tɔɓəi m’a kaar no̰ neḛ’g, Ɓó lé m’ɔr kəm néje gə́ to ŋgonkəm Mbuna néje gə́ mina̰’g ndá M’a to asəna gə ta neḛ tɔ. To ta lə dee-deḛ gə mba tel ree rɔm’g Ɓó to ta ləm-ma ɓa Gə mba tel kaw rɔ dee’g el.

Loo gə́ killa rea kəm Daniel’g 1:18

Ndɔ gə́ mbai Nebukadnesar wɔji mba kar dee d’aw rəa’g gə basaje lai neelé as lée’g mba̰ ndá njekaa dɔ néje gə́ mee kəi’g lə mbai lé aw sə dee nea̰’d.

Loo gə́ killa rea kəm Daniel’g 1:4

basaje gə́ dəb rɔ dee ya̰ maree el ləm, kəm dee turu sia̰-sia̰ ləm, to njékəmkàrje gə njégosonégərje ləm, deḛ gə́ ndoo né gər yaa̰ ləma, deḛ gə́ d’askəm ra kula mee kəi-mbai’g lə mbai ləm tɔ ndá d’a ndoo dee gosonégər gə takɔji lə Kaldeje.

Loo gə́ killa rea kəm Daniel’g 1:5

Mbai lé wɔji rəw mba kai dee nésɔ gə́ to nésəa-yeḛ ləm, gə mán-nduú gə́ mḭ gə́ yeḛ nja aw ai ləm tɔ gə ndɔ dee ndɔ dee, mbata yeḛ wɔji-kwɔji kul dee togə́bè as ləb munda ɓa a kɔm kula lə mbai ji dee’g kar dee ra ɓəi.

Loo gə́ killa rea kəm Daniel’g 1:6

Deḛ gə́ to ginkoji Judaje mbuna deḛ gə́ d’ɔr dee lé ri dee ɓa nee: Daniel gə Hanania gə Mikaɛl gə Ajaria.

Loo gə́ killa rea kəm Daniel’g 1:7

Njekaa dɔ néje gə́ mee kəi’g lə mbai lé unda ri dee togə́bè: Daniel lé yeḛ unda ria lə Belsasar ləm, Hanania lé yeḛ unda ria lə Sadrak ləm, Mikaɛl lé yeḛ unda ria lə Mesak ləma, Ajaria lé yeḛ unda ria lə Abed-Nego ləm tɔ.

Loo gə́ killa rea kəm Daniel’g 2:13

Rəwta-gaŋg neelé d’ila mberee ndá d’aw gə mba tɔl bao-gosɔnégərje. Deḛ saŋg Daniel gə kuramareeje gə mba kar dee-deḛ kara d’udu sə dee guduru tɔ.

Loo gə́ killa rea kəm Daniel’g 3:29

Aa ooje, ɓasinè ndukun ləm ɓa nee: Nana ɓa mbuna koso-dəwje’g əsé ginkoji dəwje gə raŋg’g əsé deḛ gə́ takɔji dee ɓəd-ɓəd gə́ rara kara ɓa gə́ pata gə́ majel ila dɔ Ala’lə Sadrak gə Mesak gə Abed-Nego ndá debee neelé d’a kwá tiee mbidi-mbidi ləm, kəi ləa kara d’a tɔ pɔs-pɔs karee to ɓiri-ɓisi ləm tɔ mbata magə gə́ rara kara gə́ askəm kɔr dəwje kɔm dee tar to gə́ yeḛ bèe lé godo.