2 Samel 12:13 - Maktub gə́ To gə Kəmee

¹³ Dabid ula Natan pana: M’ra kaiya m’ɔs ne ta lə Njesigənea̰ rəw ya. Natan tel ula Dabid pana: Njesigənea̰ ar mée oso lemsé dɔ kaiya’g ləi ndá i a kwəi el ŋga.

2 Samel 12:13 ပူးပေါင်းရင်းမြစ်များ

Gḭ-Néje 39:9

Dəw gə́ njekur dɔm-ma mee kəi’g neelé godo ləm, yeḛ ɔgm né kára kara el ləm tɔ, nɛ i ɓa nai mbata i to dené ləa ɓa. See m’a ra néra gə́ majel gə́ boi bèe ɓa mba ra ne kaiya kɔs ne Ala rəw to gə́ ban wa.

2 Samel 24:10

Gée gə́ gogo goo tura gə́ Dabid ar dee tura bula lə koso-dəwje lé ndá kaaree ɓar ɗigi-ɗigi. Bèe ɓa yeḛ ula Njesigənea̰ pana: Ma m’ra kaiya gə́ boo loo gə́ m’ra né neelé. Ǝi Njesigənea̰, ɓasinè ar məəi oso lemsé dɔ néra kori-kori’g lə kura ləi mbata né gə́ m’ra lé to némbə ya.

2 Samel 24:17

Loo gə́ Dabid oo kura gə́ dara gə́ tɔl koso-dəwje lé ndá yeḛ ula Njesigənea̰ pana: Aa oo, ma nja m’ra kaiya. Ma nja taree wa dɔm nɛ badə-kosoje neelé ɗi ɓa deḛ ra wa. Maji kar jii wɔi dɔm-ma gə dɔ njémeekəije’g lə bɔm ɓa.

1 Mbaije 13:4

Loo gə́ mbai oo ta gə́ dəw lə Ala pa ila ne ndɔl dɔ loo-nékinjaməs’d gə́ Betel lé ndá yeḛ ula jia aree dəs ta dɔ loo-nékinjaməs lé pa ne pana: Wáje! Ndá ji Jeroboam gə́ ula par gə́ dəa’g lé tudu tar kurum aree oo loo kwa gə́ rəa’g el.

1 Mbaije 21:20

Akab dəji Eli pana: I gə́ to njeba̰ ləm lé ɓogənè iŋgam ŋga ta! Ndá yeḛ tel ilá keneŋ pana: Ma m’iŋgai ya mba̰ mbata i un rɔi ndogo gə mba ra ne né gə́ majel kəm Njesigənea̰’g.

1 Mbaije 22:8

Mbai gə́ Israɛl ila Josapat’g pana: Dəw kára gə́ kəm kaw rəa’g dəjee ta lə Njesigənea̰ si keneŋ ya, nɛ ma m’ə̰jee bəḭ-bəḭ mbata yeḛ tegginta né gə́ maji kára kara gə́ wɔji dɔm el nɛ ta né gə́ majel ya ɓa yeḛ tegginee dɔm’g dɔm’g. Yeḛ to Mise, ŋgolə Jimla ya. Ndá Josapat pana: Maji kar mbai pata gə́ togə́bè el!

2 Mbaije 1:9

Yeḛ ula ɓé-njérɔje gə njérɔje ləa gə́ rɔ-mi lé rɔ Eli’g loo gə́ yeḛ si dɔ sém mbal’g lé. Ɓé-njérɔje neelé al aw rɔ Eli’g si dɔ sém mbal’g lé ndá yeḛ ulá pana: I dəw lə Ala, gə́ risi ur naŋg gə goo ndukun lə mbai lé.

1 Sôrta Gḭka-Israɛlje 21:8

Bèe ɓa Dabid ula Ala pana: Ma ɓa m’ra kaiya gə́ boo loo gə́ m’ra né neelé. Ɓasinè, maji kari ar məəi oso lemsé dɔ néra kori-kori’g lə kura ləi mbata né gə́ m’ra lé to némbə ya!

2 Sôrta Gḭka Israɛlje 16:10

Mee Asa ḭ səa pu dɔ njekoota-mee-Ala’g ndá yeḛ wá ilá daŋgai’g mbata mée ea̰ dəa’g. Tɔɓəi mee ndəaje gən ya Asa ula kəm dəwje gə́ na̰je ndòo yaa̰ tɔ.

2 Sôrta Gḭka Israɛlje 25:16

Loo gə́ yeḛ aar pata bèe ɓəi ndá Amasia ulá pana: See jeḛ j’undai gə́ njekwɔji-takəmkar lə mbai wa. Ɔd tam’g! See gelee ban ɓa i ndigi kar dee tɔli wa. Njetegginta lé ɔd təa’g ndá pana: Ma m’gər gao Ala wɔji-kwɔji tujii mbata né gə́ i ra neelé ləm, mbata i ndigi koo takwɔji-kəmkàr ləm el ləm tɔ.

Maktub gə́ wɔji dɔ Jɔb 33:27

Yeḛ ɔs pa no̰ dəwje’g pana: Neḛ n’ra kaiya n’al ne dɔ néra gə́ danasur, Nɛ Ala ar bo̰ néra neḛ ɔs ta neḛ’g to gə́ kəm karee ɔs ta neḛ’g lé el.

Pakɔsje 103:12

To gə́ kḭ bər kaw gə́ dɔ-gó əw yaa̰ lé Kaltaje lə sí kara yeḛ ɔm dee əw sə sí togə́bè tɔ.

Pakɔsje 51:16

Ǝi Ala gə́ to Ala gə́ njekajim lé Maji kari ɔr ta kila məs dəw lé dɔm’g Ndá tam a teḛ kila mber ta meekɔrjol ləi.

Pakɔsje 51:4

Néra kori-korije ləm lé Maji kari togo ɔr ndɔs-ndɔs ləm, Maji kari ɔr kaiya ram ndɔs-ndɔs ləm tɔ.

Pakɔsje 51:6

M’ra kaiya m’ɔs ne ta ləi-i nja rəw ləm, M’ra ne né gə́ to kḛji kəmi’g, Bèe ɓa ta gə́ i a gaŋg lé A to gə dɔ najee ləm, Rəwta-gaŋg ləi kara Dəw a kimi dɔ’g el ləm tɔ.

Teḛ-Raga 9:27

Parao̰ ula kula ɓar Moyis gə Aaro̰ ula dee pana: Ɓasinè lé ma m’ra kaiya ya, Njesigənea̰ ɓa to njera né gə dɔ najee nɛ ma jeḛ gə dəwje ləm lé jeḛ n’toje dəwje gə́ ta wa dɔ sí ya.

Gosota-Kəmkàrje 25:12

Ta gə́ njekəmkàr pa ne gə dəw gə́ ur mbia oo ta lé To asəna gə mbaiŋgira larlɔr ləm, gə néma̰d gə́ ra gə larlɔr gə́ àr ŋgad-ŋgad bèe ləm tɔ.

Gosota-Kəmkàrje 28:13

Dəw gə́ iya dɔ nékaltaje ləa lé a teḛkɔr el, Nɛ yeḛ gə́ tegginee gə́ raga ləm uba ya̰ ləm tɔ ndá Iŋga meekoso lemsé.

Esai 38:17

Aa oo, némeekonje ləm lé Tel to gə́ meekulɔm ləm, Gə mba kunda gə́ I undam dan kəmi’g lé ɓa I ɔrm ne dan bwa-tuji’g ya Mbata i ɔm kaiya ramje lai giri’g gogo.

Esai 43:24

Seḭ ndogoje né gə́ ə̰də sululu gə lar amje el ləm, Ubu nékinjanéməsje lə sí lé seḭ amje m’nda̰ ndanee el ləm tɔ, Nɛ seḭ nja jɔgmje gə kaiya ra síje ləm, Seḭ amje m’dao dao-dao gə mbata néra kori-korije lə sí ləm tɔ.

Esai 44:22

Ma m’bɔr nékaltaje lə sí mbɔji Asəna gə kil-lə-ndi gə́ dəs bèe ləm, M’bɔr kaiyaje lə sí mbɔji Asəna gə mum gə́ sané bèe ləm tɔ, Gə́ telje reeje rɔm’g Mbata ma m’uga dɔ sí mba̰.

Nɔ̰-ndôo gə́ wɔji dɔ Jerusalem 3:32

Lee yeḛ ar nékəmndoo Ra dəw kara Yeḛ tel ar mée aw taḭ-taḭ dəa’g Gə goo boo-meekɔrjol ləa.

Ləbije 20:10

Ɓó lé diŋgam to gə dené gə́ taa ŋgaw ləm, əsé lé to gə dené lə maree gə mɔdkaiya ləm tɔ ndá kaiya-diŋgam gə kaiya-dené neelé kəm tɔl dee gə́ tɔl ya.

Ləbije 24:17

Yeḛ gə́ unda dəw tɔlee ndá kəm tɔlee tɔ.

Jakari 3:4

Kura gə́ dara un ta ula deḛ gə́ d’aar nea̰’g lé pana: Tɔrje kubuje ləa gə́ mina̰ rəa’g. Tɔɓəi yeḛ ulá pana: Aa oo, ma m’ɔr néra kori-korije ləi rɔi’g ndá ma kula kubu ra naḭ ɓa rɔi’g.

Matiyo 14:10

Yeḛ ula dee kəi-daŋgai’g ar dee gaŋg dɔ Ja̰ Njera-batɛm lé.

Lugu 15:21

Ŋgon lé ula bɔbeeje pana: Bɔm, m’ra kaiya, m’ula ne sul dɔ dara’g ləm, gə dɔi-i’g ləm tɔ ɓó m’askəm kari ɓarm ŋgoni gogo el ŋga

Lugu 18:13

Nɛ njetaa lar-gədɓee lé unda rəa ŋgərəŋ, yeḛ ɓəl koo loo kun kəmee tar gə́ dara nɛ yeḛ unda kaaree gə jia rii pana: Wai Ala, ma gə́ m’to gə́ njekaiya lé ar məəi oso lemsé dɔm’g ya kari.

Néra Njékaḭkulaje 2:37

Loo gə́ deḛ d’oo ta neelé ndá ɓəŋgərə dee ti dus ar dee dəji Piɛrə gə njékaḭkulaje gə́ raŋg pana: Ŋgako̰ síjeḛ gə́ dəwje see j’a ra banwa.

Ǝbrəje 9:26

Ɓó lé to togə́bè ndá nékəmndoo a ra Kristi gɔl bula ndɔ tum gel naŋg nee saar, nɛ ɓasinè loo gə́ rudu naŋg nee nai dəb ndá yeḛ unda loo teḛ mba tuji ne kó kaiya gə nékinjaməs gə́ to gə́ darəa-yeḛ ya.

1 Ja̰ 1:7

Nɛ ɓó lé jeḛ njaa dan kàrá to gə́ yeḛ nja nai dan kàrá lé ndá jeḛ j’ɔm meḛ sí na̰’d sad ya, bèe ɓa məs Jeju Ŋgonee ɔr ne won kaiyaje lə sí ɓə̰dərə-ɓə̰dərə tɔ.

Loo gə́ killa rea kəm Ja̰’g 1:5

gə ka̰ Jeju Kristi Njekɔrgoota gə́ to Majikoji gə́ unda loo teḛ dan njé gə́ d’wəi’g doŋgɔr lé yeḛ to Mbai dɔ mbaije gə́ dɔ naŋg nee ləm tɔ. Yeḛ nja unda sí dan kəmee’g, togo ne kaiya lə sí gə məsee ləm,

1 Samel 15:20

Sawul ila Samel keneŋ pana: Ma m’oo ndu Njesigənea̰ maji ya ləm, m’un rəw gə́ Njesigənea̰ ulam keneŋ ya ləm tɔ. Ma m’ree gə Agag, mbai gə́ Amalek kəmba nɛ Amalekje ndá m’tɔl dee mbad-mbad ya.

1 Samel 15:30

Sawul pa ya tɔɓəi pana: Ma m’ra kaiya ya! Ɓasinè, m’ra ndòo rɔi’g, ila riɓar dɔm’g kəm ŋgatɔgje lə koso-dəwje’g ləm ləm, gə kəm Israɛlje’g ləm tɔ. Gə́ tel ree səm ya ndá m’a kunda barmba no̰ Njesigənea̰ Ala’g ləi ya.