2 Njé gə́ Kɔrḭtə 11:3 - Maktub gə́ To gə Kəmee

³ Nɛ lé bèe kara ma m’ɓəl nà banelə to gə́ li ra gosɔyèr su ne kəm Ebe su-su lé takə̰jije lə sí kara a kar sí ndəmje ne kar sí ubaje ne ta lə Kristi gə́ seḭ ndaje meḛ sí kaḭ dəa’g lé kya̰je.

2 Njé gə́ Kɔrḭtə 11:3 ပူးပေါင်းရင်းမြစ်များ

Gḭ-Néje 3:1

Gosɔ lə li lé to yaa̰ ur dɔ ka̰ daje gə́ wala lai gə́ Njesigənea̰ Ala unda dee lé. Yeḛ dəji dené lé pana: See Ala pana: Seḭ a sɔje kandə kagje lai gə́ to mee ndɔ’g lé el, see pa togə́bè tɔgərɔ ya wa.

Gḭ-Néje 3:13

Njesigənea̰ Ala dəji dené lé pana: See ban ɓa i ra togə́bè wa. Dené lé ilá keneŋ pana: Li ɓa su kəm am m’usɔ ya.

Gḭ-Néje 3:20

Adam unda ri dené ləa lə Ebe mbata yeḛ to ko̰ dəwje lai gə́ d’isi kəmba lé.

Gḭ-Néje 3:4

Yen ŋga li ula dené lé pana: Seḭ a kwəije nda̰ el.

Pakɔsje 119:53

Loo gə́ m’oo njémeeyèrje gə́ d’uba godnduije d’ya̰ lé ndá Boo-oŋg ḭ səm jugugu.

Matiyo 24:24

Mbata njéndaji Kristije gə njétegginta gə́ ŋgɔmje d’a kuba na̰ kḭ gə mba ra nékɔbje gə némɔrije gə mba su ne kəm dəwje saar deḛ gə́ d’ɔr dee d’unda dee gə kəmee lé ya kara d’a koso keneŋ ləm tɔ.

Tagə́maji gə́ Ja̰ ndang 8:44

Bausi-seḭje lé nja gə́ njekurai lé ndá né gə́ bɔ síje wɔji ɓa seḭ ndigi raje tɔlje bém. Yeḛ to njetɔ-kó-dəwje kédé gə́ dɔtar saar ɓó yeḛ wa ne bua gə kankəmta el mbata kankəmta gə́ tḛ́-tḛ́ bèe kara godo mée’g. Loo gə́ yeḛ pa taŋgɔm lé yeḛ pata gə́ wɔji dəa-yeḛ mbata taŋgɔm ɓa gə́ né gelee ya. Yeḛ to njepa taŋgɔm ləm, yeḛ to darɔ bɔ njéŋgɔmje lé ləm tɔ.

Njé gə́ Rɔmə 12:8

Yeḛ gə́ to njekolé meḛ mareeje dɔ né’g ndá maji karee olé meḛ dee ya. Yeḛ gə́ to gə́ njekun né kwa nénoji gə njéndooje lé maji karee ra gə meenda ɓó a tura sə dee gée el, yeḛ gə́ to njekɔrno̰ dəwje loo-kwa-dɔ-na̰’g lé ndá maji karee gəd kəmee dɔ’g gəd-gəd. Yeḛ gə́ to gə́ njekwa yɔ-dəwje bur-bur ndá maji karee ra gə rɔlel ɓó a ra gə rɔkim el.

2 Njé gə́ Kɔrḭtə 1:12

Mbata né gə́ jeḛ n’ti ne rɔ sí dɔ’g lé ɓa to nee: Jeḛ lé ta gə́ meḛ sí ula sí ɓa ar sí j’oo gao kaw gə́ jeḛ j’aw dɔ naŋg nee ləm, gə né gə́ jeḛ n’ra gə mbata lə sí ləm tɔ lé jeḛ n’ra gə meenda gə meemaji no̰ Ala’g ya: jeḛ n’ra gə goo noji lə Ala ya ɓó jeḛ n’ra gə goo kəmkàr gə́ ka̰ naŋg nee el.

2 Njé gə́ Kɔrḭtə 11:20

Ɓó lé deḛ d’wa sí ɓər əsé deḛ rum sí əsé deḛ ɓogo sí əsé deḛ d’uba dɔ sí d’isi tar əsé deḛ kunda kwɔji sí kara yee ɓa seḭ ndigije ya.

2 Njé gə́ Kɔrḭtə 11:29

See na̰ ɓa to gə́ yɔ-dəw lé ɓa a kulm gə́ mán wa. See na̰ ɓa oso gə́ koso ɓa məəm a ko̰m gə mbəa el wa.

2 Njé gə́ Kɔrḭtə 2:17

Mbata jeḛ lé jeḛ n’tel ta lə Ala j’ila gel asəna gə ka̰ dəwje gə́ raŋg gə́ ra togə́bè lé el. Nɛ jeḛ ndá ne meḛ sí kaḭ m’pa ne ta mbata lə Ala ləm, jeḛ j’ɔm na̰’d gə Kristi m’pa ne ta no̰ Ala’g ləm tɔ.

2 Njé gə́ Kɔrḭtə 4:2

Nérɔkulje lai gə́ dəwje ra loo-ŋgəḭ lé jeḛ j’unda dee ɓad ləm, jeḛ n’ra goso el ləma, ta lə Ala kara jeḛ n’telee raŋg el ləm tɔ. Nɛ jeḛ n’riba dɔ kankəmta j’wɔji ne dɔ rɔ sí, j’ula taree meḛ dəwje’g kəm Ala’g.

Njé gə́ Galati 1:6

Kaarm wam paḭ mbata seḭ tɔje pum yal, ya̰je goo yeḛ gə́ njeɓar sí gə goo noji gə́ Kristi wa sə sí lé mba kun rəw Tagə́maji gə́ raŋg lé.

Njé gə́ Galati 2:4

Ta neelé oso mbata lə njé gə́ na̰je gə́ d’wa rɔ dee gə́ ŋgako̰ síje nɛ deḛ to gə́ njéhulaije gə́ d’andə mbuna sí’g gə ŋgəḭ ɓa, mba ŋgəḭ sí koo ŋgonkoji gə́ Jeju ɔm sí ne ta lé, yee ɓa deḛ ra gə mba kwa sí ne gə́ ɓər gogo ɓəi tɔ.

Njé gə́ Galati 3:1

Ǝi Galadje, seḭ gə́ kəmkàr na meḛ sí tas lé see na̰ ɓa tel kəm sí wa. Seḭ gə́ deḛ ria sə sí dɔ ɗar gə́ deḛ ɗar Kristi kaar kag’d lé d’aree to raga kəm sí’g pai-pai ya.

Njé gə́ Galati 4:11

Ma m’ɓəl nà banelə kula gə́ m’ra mbata lə sí lé ma m’bəg rɔm keneŋ gə mḭdé ba.

Njé gə́ Epesə 4:14

Yee ɓa j’a to ne asəna gə ŋganje el ŋga, mbata ŋganje lé d’aw yo-yo nee-nee ləm, leltaje biri dee ləma, sutaje gə ta korije lə dəwje lé tel ne kəm dee ləm tɔ.

Njé gə́ Epesə 4:22

mba kar sí bɔrje dɔ sí mbɔji, ɔrje rɔ dəw gə́ ləw gə ndum néreaje lai gə́ su ne kəm sí lé

Njé gə́ Epesə 6:24

Maji kar noji lé nai gə deḛ lai gə́ d’unda Mbaidɔmbaije lə sí Jeju Kristi dan kəm dee’g gə meenda kaḭ ya!

Njé gə́ Kolosə 2:18

Maji kar dəwje gə́ d’wa ndòo rɔ dee pole ne kuraje gə́ kára lé su kəm sí nar sə sí néngwɔd lə sí d’wa d’ɔr ji sí’g el. Débeeje neelé d’ya̰ rɔ dee dan némḭdije’g lə dee ləm, deḛ ti ne rɔ dee hər-hər gə goo takə̰jije lə dee gə́ ka̰ darɔ lé ləm tɔ.

Njé gə́ Kolosə 2:4

Ma m’pata neelé gə mba kar dəw kára kara lèbè kəm sí gə sutaje el.

Njé gə́ Kolosə 2:8

Undaje kəmkàr dɔ rɔ sí’g mba kar dee busu sí gə sutaje el əsé gə kəsta gə́ gə mḭdé-mḭdé ba el. Taje neelé deḛ dum gin dee dɔ néjiɓee’g lə dəwje ləm, gə dɔ négər gə́ dɔtar gə́ ka̰ naŋg nee gə́ tar néje gə́ tar ɓəi ləm tɔ ɓó tum gin dee dɔ Kristi’g el.

1 Njé gə́ Tesalonikə 3:5

Togə́bè ɓa, loo gə́ m’oo loo mba kila məəm po̰ el ŋga ndá m’ula kula goo sí’g mba koo see meekun lə sí to ban wa. Ma m’ɓəl nà banelə njesula dəwje lé a sula sí ɓa a kar kula ra sí lé tel to né gə́ gə mḭdé ba.

1 Timote 1:3

Ma m’olé məəi dɔ ta gə́ ma m’ndəjii loo gə́ m’ḭ rɔi’g mba kaw Masedoinə ɓa m’ɔgi naŋg Epesə mba kari ndəji njé gə́ na̰je kar dee d’un ta ndooje gə́ raŋg ndoo ne mar deeje el ŋga ləm,

1 Timote 2:14

Tɔɓəi Adam ɓa taa ta kər neelé kédé el nɛ dené ɓa d’əree d’aree taa ta sula neelé ar kalta wa ne dəa.

2 Timote 3:13

Nɛ dəwje gə́ njémeeyèrje ləm, gə njékəstaje ləm tɔ lé néra dee gə́ majel a kal dɔ loo gə́ kédé-kédé. D’a sula ne mar deeje kar dee ndəm ne ləm, darɔ dee-deḛ nja kara d’a kigi ne pá ləm tɔ.

Titə 1:10

Tɔgərɔ ya, mbuna njékḭja tamɔd deeje lé njékaltaje bula ləm, gə njépa taje gə́ gə mḭdé-mḭdé ba ləma, gə njésukəmlooje ləm tɔ lé d’isi keneŋ.

Ǝbrəje 13:9

Arje taje ɓəd-ɓəd gə́ d’ḭ ne raŋg lé wa meḛ sí el, maji kar noji lə Ala lé ɓa wa meḛ sí ɓiri ɓó nésɔje gə́ d’ɔr kəm dee gə mḭdé ba el.

2 Piɛrə 3:17

Seḭ gə́ m’unda sí dan kəm’g lé kəm sí inja dɔ ta’g neelé mba̰ ndá maji kar sí tɔsje kəm sí dɔ rɔ sí’g bao-bao nà banelə njémeeyèrje neelé d’a yə sí dɔ loo-kaar-njaŋg’g lə sí, kar sí taaje goo dee ndəmje ne sə dee.

2 Piɛrə 3:3

Kona ta gə́ kəm gər kédé lé ɓa to nee: Ndəa gə́ rudee a gə kun ɗiao lé ndá njédəjinduje d’a kḭ gə ta dəjinduje lə dee lé deḛ gə́ d’a gə ra né gə goo malee gə́ ra dee-deḛ lé

1 Ja̰ 2:18

Ŋganəmje, ɓasinè lé to ndɔ gə́ rudee a gə kun ɗiao ŋga ndá njendaji kəm Kristi gə́ a gə ree lé seḭ ooje taree mba̰, ɓasinè njéndaji Kristije lé deḛ bula ŋga. Yee ɓa jeḛ n’gər gao, ndɔ gə́ rudee a gə kun ɗiao lé nai dəb ba ŋga.

1 Ja̰ 4:1

Seḭ gə́ m’unda sí dan kəm’g lé ɔmje meḛ sí dɔ ndilje’g lai el, nɛ aḭje meḛ ndilje gə mba koo see d’ḭ rɔ Ala’g ya wa. Mbata njéteggintaje gə́ ŋgɔm bula d’unda loo teḛ mbuna dəwje’g dɔ naŋg nee.

Jude 1:4

Mbata dəwje gə́ na̰je d’andə mbuna sí’g wai-wai, nɛ ta gə́ a gə kwa dɔ dee lé deḛ ndaŋg ləw ba. Deḛ neelé deḛ to njéndɔl-Alaje ɓa deḛ d’un noji lə Ala lə sí telee gə́ né lɔm dɔ néra gə́ kori-kori lə dee ləm, Mbaidɔmbaije Jeju Kristi gə́ to ɓée síje kára ba kiao lé deḛ mbadee saar ləm tɔ.

Loo gə́ killa rea kəm Ja̰’g 12:15

Li lé ubu masee njiriri-njiriri aree ula asəna gə mán-baa goo dené’g gə mba kar manee unee aw səa.

Loo gə́ killa rea kəm Ja̰’g 12:9

Deḛ tuba dakɔb gə́ ria lə li-gə́-ləw gə Njekurai, yeḛ gə́ su kəm dəwje lai dɔ naŋg nee su-su lé deḛ d’wá d’ilá dɔ naŋg nee na̰’d gə kuraje ləa tɔ.

Loo gə́ killa rea kəm Ja̰’g 20:2

Yeḛ wa dakɔb gə́ to li gə́ ləw gə́ ria lə njekurai ləm, gə Njeyèr ləm to lé ndá yeḛ teá ilá as ləbee tɔl-dɔg.