2 Njé gə́ Kɔrḭtə 10:7 - Maktub gə́ To gə Kəmee

⁷ Gir né gə́ raga gə́ seḭ ooje puduru ba lé see to né mba̰ wa. Ɓó lé dəw kára ə̰ji ta mée’g pana: Neḛ n’to ka̰ Kristi ndá maji karee oo gao to gə́ jeḛ kara jeḛ n’to ka̰ Kristi tɔ.

2 Njé gə́ Kɔrḭtə 10:7 ပူးပေါင်းရင်းမြစ်များ

Matiyo 23:5

Deḛ ra né gə mba kəm dəwje ba. Yee gə́ bèe ɓa deḛ ndaŋg ji kubuje lə dee d’aree tad bəgə-bəgə ləm, deḛ tɔs kula ta kubuje’g d’aree ŋgal yao-yao ləm tɔ.

Lugu 16:15

Jeju ula dee pana: Seḭ lé seḭ rabje rɔ sí kəm dəwje’g mba kar dee d’oo sí gə́ njémeekarabasurje nɛ Ala gər meḛ sí gao ya. Mbata né gə́ rab rəa kəm dəwje’g raga lé Ala lé oo gə́ ram né ya.

Tagə́maji gə́ Ja̰ ndang 7:24

Né gə́ ooje puduru ba lé maji kar sí gaŋgje rəwta dɔ’g el nɛ gaŋgje rəwta gə dɔ najee ɓa.

1 Njé gə́ Kɔrḭtə 1:12

Ma nja m’a gə tegginee kar sí, seḭ ulaje na̰ pajena: Neḛ n’to ka̰ Pool ɓòo əsé neḛ n’to ka̰ Apolɔs ɓòo əsé neḛ n’to ka̰ Képas ɓòo əsé neḛ n’to ka̰ Kristi ɓòo.

1 Njé gə́ Kɔrḭtə 14:37

Ɓó lé dəw kára la̰ji mée’g pana: Neḛ n’to njetegginta əsé neḛ n’to gə́ dəw gə́ Ndil ula ta mee neḛ’g ndá maji karee gər gao to gə́ ta gə́ ma m’ndaŋg m’ar sí lé to torndu Mbaidɔmbaije ya.

1 Njé gə́ Kɔrḭtə 15:23

Kristi to gə́ doŋgɔr lə dee, nɛ deḛ gə́ to ka̰ Kristi mee ndəa gə́ yeḛ a gə ree lé d’a teḛ korè goo na̰ goo na̰ tɔ.

1 Njé gə́ Kɔrḭtə 3:23

Néje lai to gə́ ka̰ sí ləm, seḭ toje ka̰ Kristi ləma, Kristi kara to gə́ ka̰ Ala ləm tɔ.

1 Njé gə́ Kɔrḭtə 9:1

See ma m’to ŋgonkoji el wa. See ma m’to gə́ njekaḭkula el wa. See ma m’oo Jeju Mbaidɔmbaije lə sí el wa. See seḭ toje kula ramje gin Mbaidɔmbaije’g el wa.

2 Njé gə́ Kɔrḭtə 10:1

Ma Pool lé ma m’ra ndòo rɔ sí’g gə goo kaw yururu gə meemaji lə Kristi lé, ma lé loo gə́ m’isi mbuna sí’g ndá m’əḭ kəm sí’g el nɛ loo gə́ m’isi ŋgərəŋ ndá m’tɔg sí pir.

2 Njé gə́ Kɔrḭtə 11:18

To gə́ dəwje gə́ na̰je bula ti rɔ dee dɔ néje gə́ naŋg neelé ma kara m’a ti ne rɔm togə́bè tɔ.

2 Njé gə́ Kɔrḭtə 11:23

See deḛ to kuraje lə Kristi wa. (Ma m’pata asəna gə dəw gə́ ndilee igee.) Ma lé m’to kura lə Kristi gə́ ur dɔ ɓəi gə goo kula ramje gə́ to yaa̰ unda ka̰ dee-deḛ ləm, gə goo kunda gə́ deḛ kundam yaa̰ unda dee-deḛ ləma, gə goo kisi gə́ m’isi daŋgai’g gɔl bula unda dee ləm tɔ. Ta-ta m’isi ta yoo’g ləm,

2 Njé gə́ Kɔrḭtə 11:4

Ɓó lé dəw ree ila mber ta lə Jeju gə́ raŋg ar sí ɓó yeḛ gə́ jeḛ nja j’ila mber ta ləa j’ar sí lé el ləm, əsé ɓó lé seḭ taaje Ndil gə́ raŋg ɓó yeḛ gə́ seḭ taaje mba̰ lé el ləma, əsé d’ula sí Tagə́maji gə́ raŋg ɓó yeḛ gə́ seḭ ɔmje meḛ sí dɔ’g lé el ləm tɔ ndá seḭ a ndigije səa ya.

2 Njé gə́ Kɔrḭtə 12:11

Ma m’pa tapa dəw gə́ ndilee igee. Nɛ to seḭ nja gə́ ɔsmje ɓɔḭ-ɓɔḭ mba karm m’ra togə́bè. To ta lə sí gə mba pidim ya mbata ɓó lé ma m’to gə́ né el kara deḛ njékaḭkulaje gə́ to dəwje gə́ boo lé deḛ dum ma gə né kára kara el.

2 Njé gə́ Kɔrḭtə 13:3

Mbata ta lə Kristi gə́ yeḛ ula tam’g am m’pa ne sə sí lé yee ɓa seḭ ndigije kooje gəd, mbata Kristi lé yeḛ nai mbuna sí’g gə siŋgamoŋ ləa ɓó yeḛ kul dɔ sí’g kwɔji-kwɔji el.

2 Njé gə́ Kɔrḭtə 5:12

Jeḛ lé jeḛ m’pidi rɔ sí rɔ sí-seḭ’g gɔl kára tɔɓəi el nɛ j’ya̰ loo j’ar sí gə mba kar sí tije rɔ sí dɔ sí’g. Bèe ɓa deḛ gə́ nduba rɔ dee d’wɔji ne dɔ néje gə́ to darɔ dəw gə́ raga ɓó néje gə́ to mee dəw gə́ kəi’g lé el ndá seḭ a kasjekəm kila deeje keneŋ ya.

Njé gə́ Galati 3:29

Ɓó lé seḭ toje gə́ ka̰ Kristi ndá seḭ toje ŋgaka Abrakam ləm, seḭ a toje njékiŋga nédɔjije gə goo ndukun gə́ un aree lé ləm tɔ.

1 Ja̰ 4:6

Jeḛ lé jeḛ n’to gə́ ka̰ Ala, yeḛ gə́ gər Ala lé ndá yeḛ taa ta lə sí ya, nɛ yeḛ gə́ to gə́ ka̰ Ala el ndá yeḛ taa ta lə sí el tɔ. Yee gə́ bèe ɓa jeḛ n’gər ne ndil gə́ ka̰ kankəmta ləm, gə ndil gə́ ka̰ kəsta ləm tɔ.

1 Samel 16:7

Nɛ Njesigənea̰ ula Samel pana: Maji kari oo rəa gə́ raga el ləm, əsé kagrea gə́ ŋgal el ləm tɔ mbata ma mbəree el. Mbata Njesigənea̰ lé oo né to gə́ dəw oo né bèe el. Dəw lé né gə́ oo gə kəmee ɓa yeḛ oo gə́ né, nɛ Njesigənea̰ lé mee dəw ɓa yeḛ oo ya.