1 Samel 23:6 - Maktub gə́ To gə Kəmee

⁶ Loo gə́ Abiatar, ŋgolə Ahimelek aḭ aw rɔ Dabid’g Keyila lé yeḛ aw gə kubu épod jia’g.

1 Samel 23:6 ပူးပေါင်းရင်းမြစ်များ

1 Mbaije 2:26

Mbai lé ula Abiatar, njekinjanéməs tɔɓəi pana: Ɔd aw Anatot dɔ naŋgje’g ləi mbata i lé kəm kari wəi ya tɔ, nɛ m’a kari wəi ɓogənè el mbata i un sa̰duk-manrɔ lə Mbaidɔmbaije gə́ Njesigənea̰ no̰ bɔm Dabid’g ləm, nékəmndooje lai gə́ ra bɔm lé rai səa ləm tɔ.

Teḛ-Raga 28:6

D’a ra kubu épod lé gə kúla gə́ ra gə larlɔr ləm, gə kúla gə́ ndul piro-piro gə́ kas gəḭ gə kas njir-njir ləma, gə kubu gə́ ra gə kúla palégal gə́ sorè ləm tɔ: d’a kɔsee gə ŋgaŋgee béréré-béréré ləm tɔ.

1 Samel 14:18

Yen ŋga Sawul ula Aija pana: Ar dee ree gə sa̰duk-manrɔ lə Ala gə́ nee. Mbata mee ndəa gən lé sa̰duk-manrɔ lə Ala to rɔ Israɛlje’g ya ɓəi.

1 Samel 14:3

Akija, ŋgolə Akitub, ŋgoko̰ I-Kabod gə́ to ŋgolə Pines gə́ to ŋgolə Eli, njekinjanéməs lə Njesigənea̰ loo gə́ Silo’g lé ula kubu épod rəa’g. Njérɔje lé gər to gə́ Jonatan teḛ aw el.

1 Samel 22:20

Ŋgolə Ahimelek, yeḛ gə́ to ŋgolə Ahitub kára teḛ aḭ. Yeḛ lé ria lə Abiatar. Yeḛ aḭ aw rɔ Dabid’g.

1 Samel 23:2

Togə́bè Dabid dəji Njesigənea̰ pana: See m’a kaw rɔ gə Pilistije nee mba dum dee wa. Njesigənea̰ ilá keneŋ pana: Aw ndá i a dum dɔ Pilistije taa ne dɔ njé gə́ Keyila ya.

1 Samel 23:5

Dabid gə dəwje ləa d’ḭ d’aw Keyila ndá deḛ rɔ gə Pilistije. D’ɔr nékulje lə dee ləm, ndum dee mburug-mburug ləm tɔ. Togə́bè ɓa Dabid taa ne dɔ dəwje gə́ d’isi Keyila ya.

1 Samel 23:7

D’ula Sawul ta teḛ gə́ Dabid teḛ Keyila ndá yeḛ pana: Ala ilá jim’g mba̰ mbata yeḛ ree ula rəa dan mee ɓee-boo gə́ pəgərəje to ta rəw-kɔgje’g ləa ya.

1 Samel 23:9

Dabid oo ta némajel gə́ Sawul wɔji gə mba ra səa ndá yeḛ ula Abiatar, njekinjanéməs lé pana: Maji kari ree gə kubu épod lé.

1 Samel 30:7

Yeḛ ula Abiatar, njekinjanéməs gə́ to ŋgolə Ahimelek lé pana: Ree gə kubu épod lé am! Ndá Abiatar ree gə kubu épod lé ar Dabid ya tɔ.