1 Samel 18:17 - Maktub gə́ To gə Kəmee

¹⁷ Sawul ula Dabid pana: Aa oo, m’a kari Merab, ŋgondərm gə́ dené ləi. Maji kari wa rɔi gə́ diŋgam ya ra né am ləm, rɔ rɔje lə Njesigənea̰ ləm tɔ. Nɛ Sawul pa mée’g pana: Ma m’ndigi kun jim kɔrɔ ne rəa el, nɛ maji kar ji Pilistije ɓa ɔrɔ rəa.

1 Samel 18:17 ပူးပေါင်းရင်းမြစ်များ

2 Samel 11:15

Yeḛ ndaŋg ta mee maktub’g neelé pana: Maji kar sí undaje Uri loo gə́ rɔ nuŋga keneŋ kəd-kəd ndá ɔrje rɔ sí rəa’g mba kar dee tɔlee.

2 Samel 12:9

See gelee ban ɓa i ə̰ji ta lə Njesigənea̰ bəḭ-bəḭ ra ne né gə́ majel kəmee’g togə́bè wa. I tɔl Uri, dəw gə́ Het gə kiambas ləm, i taa dené ləa aree tel to dené ləi ləm tɔ nɛ yeḛ lé i tɔlee gə kiambas lə Amo̰je ya.

2 Samel 6:16

Loo gə́ d’andə gə sa̰duk-manrɔ lə Njesigənea̰ mee ɓee’g lə Dabid ndá Mikal, ŋgolə Sawul gə́ dené lé aa loo kəmbolè’g ndá yeḛ oo mbai Dabid gə́ tal ləm, gə la ləm tɔ no̰ Njesigənea̰’g ndá yeḛ ə̰jee bəḭ-bəḭ gə mée ya.

Pakɔsje 12:2

Ǝi Njesigənea̰, gə́ ree la sə sí! Njémeemajije d’isi sané pá ləm, Majikojije d’udu mbuna dəwje’g ləm tɔ.

Pakɔsje 55:21

Yeḛ ula jia ndiŋ Mba kunda deḛ gə́ d’isi səa lɔm kédé ləm, Ndu manrɔ ləa kara yeḛ un kəmee dɔ’g rəw ya ləm tɔ.

Gosota-Kəmkàrje 26:24

Dəw gə́ njekḛji loo bəḭ-bəḭ lé Ta gə́ teḛ təa’g ɓa lɔm ne dɔ rəa, Tɔɓəi yeḛ ar ta sukəmloo to mée’g kɔrɔg.

Gosota-Kəmkàrje 26:25

Loo gə́ yeḛ pata gə ndia gə́ kul yururu lé Ɔm məəi dɔ’g el, Mbata néje gə́ mina̰ siri to mée’g.

Gosota-Kəmkàrje 26:26

Ɓó lé yeḛ iya dɔ kḛji loo bəḭ-bəḭ mée’g su ne kəm loo lé ndá Meeyèr ləa a teḛ raga loo-mbo̰-dɔ-na̰’g lə koso-dəwje ya.

Bula lə Israɛlje 21:14

Gelee gə́ nee ɓa, deḛ pa ne mee maktub gə́ ria lə Maktub-Rɔje lə Njesigənea̰ pana: Baheb gə́ to Supa ləm, gə kəm baa gə́ Arno̰ gə́ ula ləma,

Bula lə Israɛlje 32:20

Moyis ula dee pana: Ɓó lé seḭ raje togə́bè, lé seḭ odoje nérɔje gə mba kaw rɔ ne no̰ Njesigənea̰’g ləm,

Bula lə Israɛlje 32:27

nɛ jeḛ gə́ n’toje kuraje ləi lé, j’a kodoje nérɔje mba kaw rɔ no̰ Njesigənea̰’g to gə́ i mbai lə sí pa ne taree lé ya.

Bula lə Israɛlje 32:29

Yeḛ ula dee pana: Ɓó lé ginkoji Gadje gə ginkoji Rubḛje gaŋg sə sí baa gə́ Jurdɛ̰ gə nérɔje rɔ dee’g gə mba rɔ ne no̰ Njesigənea̰’g ləm, ɓó lé deḛ la sə sí mba kar sí dumje dɔ dee ləm tɔ ndá seḭ a kar deeje dɔ naŋg gə́ Galaad gə́ né ka̰ dee-deḛ ya.

Tel tura Godndu 17:7

Njékɔrgootaje lé ya d’a kun né kilá ne dɔtar mba tɔlee ne ɓa koso-dəwje lai d’a kula ji dee keneŋ ɓəi. Togə́bè ɓa seḭ a kɔrje ne né gə́ majel mbuna sí’g.

1 Samel 14:49

Ri ŋgalə Sawul gə́ diŋgam ɓa nee: Jonatan, gə Jisbi, gə Malki-sua. Ri ŋganeeje gə́ dené gə́ joo lé ɓa nee: yeḛ gə́ tɔg ria lə Merab ləm, yeḛ gə́ ndɔḭ ria lə Mikal ləm tɔ.

1 Samel 17:25

Nana kara pa pana: See ooje dəw gə́ teḛ ree aar neelé ya wa. Yeḛ ree gə mba kuma-rɔ Israɛlje ɓa! Ɓó lé dəw a tɔlee ndá mbai a dəaa gə nébaoje ləm, a karee ŋgonee gə́ dené ləa ləma, njémeekəije lə bɔbeeje kara a kɔr ta dɔ dee’g kar dee d’isi lɔm mee ɓee gə́ Israɛl ləm tɔ.

1 Samel 17:36

To gə́ ma kura ləi m’tɔl ne toboḭ gə da-urs bèe lé ndá a to togə́bè gə dəw gə́ Pilisti gə́ nee gə́ to njelal kinja ta mɔdee lé to mbata yeḛ ula sul dɔ njérɔje’g lə Ala gə́ njesikəmba ya.

1 Samel 17:47

Bèe ɓa koso-dəwje lai neelé d’a gər ne to gə́ kiambas əsé niŋga ɓa Njesigənea̰ aji ne dəw el. Mbata kun baŋga lé to ka̰ Njesigənea̰, yeḛ gə́ ɔm sí ji sí’g lé ya.

1 Samel 18:21

Yeḛ pa mée’g pana: M’a karee ya gə mba karee tel to gum kwá karee oso ne ji Pilistije’g. Bèe ɓa Sawul ula Dabid njekɔm’g gɔl joo tɔɓəi pana: Ɓogənè i a tel to meemje.

1 Samel 18:25

Sawul pana: Seḭ a paje togə́bè karje Dabid pajena: Mbai lé dəji lar dené el nɛ yeḛ ndigi kiŋga ndar tamɔd Pilistije as tɔl (100) gə mba dal ne ba̰ ləa gə njéba̰je ləa. Sawul wɔji mée’g mba kar Dabid oso ne ji Pilistije’g.

1 Samel 18:27

Kédé ɓa kar ndɔ gə́ d’wɔji as ɓəi ndá Dabid ḭ aw gə dəwje ləa aw tɔl ne diŋgamje tɔl-joo (200) mbuna Pilistije’g. Yeḛ ree gə ndar tamɔd dee ar mbai as dɔ lé gə́ yeḛ dəji lé gə mba tel to ne məəm mbaije lé. Togə́bè ɓa Sawul aree ne Mikal, ŋgonee gə́ dené lé gə́ dené ləa ya.

1 Samel 25:28

M’ra ndòo rɔi’g, ar məəi oso lemsé dɔ néra gə́ majel’g lə kura ləi gə́ dené mbata Njesigənea̰ a kar kəi lə mbai ləm kiriŋ naŋg kiriŋ-kiriŋ ya. Ar məəi oso lemsé ya mbata i mbai ləm tɔ njekɔs gel rɔje lə Njesigənea̰ ndá dəw a kiŋga néra gə́ majel məəi’g nda̰ el.

1 Samel 30:26

Loo gə́ Dabid tel ree Siklag ndá yeḛ un ges nébanrɔ ula ne ar ŋgatɔgje gə́ Juda gə́ to baokuraje ləa ula dee ne taje nee pana: Aa ooje, ta nébanrɔ gə́ m’taa ji njéba̰je’g lə Njesigənea̰ ɓa m’wa ne sə sí noji nee ya.