Kəije kára-kára lai gə́ to dɔ maree’d gə́ gugu gir kəi gə́ to gə kəmee lé yeḛ ar dər dee gə́ ḭ gə́ tar as kəmkil dəw mi, tɔɓəi yeḛ nduna dee kaar kəi gə́ to gə kəmee’g lé gə kunda kag-sɛdrəje tɔ.
mee ləb gə́ njekɔm’g dɔg-giree-kára mee naḭ Bul gə́ to naḭ gə́ njekɔm’g jinaijoo lé ɓa, deḛ tɔl kəije lai gə goo leje gə́ d’wɔji lé tɔ. Salomo̰ ra kula kunda kəi neelé as ləb siri.
Tarəw kandə mee ŋgan kəije gə́ gel maree’g naŋg lé to gə́ kel dɔkɔl lə kəi, loo gə́ tuga ɗao-ɗao gə́ tar gə́ ɔr goŋ ɓa d’aw ne mee kəi gə́ dana gə́ dɔ maree’g lé ləm, gə kəi gə́ to dɔ maree’d gə́ njekɔm’g munda lé ləm tɔ.
Bèe ɓa kulaje lai gə́ mbai Salomo̰ ar dee ra mbata kəi lə Njesigənea̰ lé deḛ tɔlee bém. Yen ŋga yeḛ odo larnda gə larlɔr gə nékulaje gə́ bɔbeeje Dabid unda dee gə kəmee lé aw ɔm dee mee kəi-nébao’d gə́ to mee kəi’g lə Njesigənea̰ ya.
Moyis ar dee d’ila ndògo-kubu gir kəi-kubu-si-Ala gə gir loo-nékinjaməs’g ləm, ar dee tɔ pal-kubu tarəwkɔg’g lə ndògo-kubu ləm tɔ. Bèe ɓa Moyis tɔl ne kula neelé bém ya.