1 Mbaije 11:2 - Maktub gə́ To gə Kəmee

² Deḛ to ginkojije gə́ Njesigənea̰ ula Israɛlje kédé pana: Seḭ a taa deeje el ləm, deḛ kara d’a ree rɔ sí’g el ləm tɔ, mbata tɔgərɔ, deḛ d’a tel meḛ sí dɔ magəje’g lə dee. Denéje gə́ dɔ ɓeeje’g neelé ɓa mal dee ndɔr Salomo̰ aree ɔm ne gə ɓeeko̰je neelé na̰’d.

1 Mbaije 11:2 ပူးပေါင်းရင်းမြစ်များ

Gḭ-Néje 2:24

Gelee gə́ nee ɓa diŋgam a kya̰ bɔbeeje gə kea̰je, tɔɓəi a kɔm na̰’d sad gə dené ləa ndá deḛ joo bɔr d’a tel to darɔ gə́ kára ba.

Gḭ-Néje 34:3

Yeḛ ɔm mée dɔ Dina gə́ ŋgolə Jakob’g lé. Yeḛ unda ŋgoma̰də neelé dan kəmee’g ndá yeḛ ulá ta gə́ kul gə mba gɔl ne mée.

1 Mbaije 11:9

Mee Njesigənea̰ ḭ səa jugugu dɔ Salomo̰’g mbata mée gə́ tel to ɓəd dɔ Njesigənea̰, Ala’g lé lə Israɛlje, yeḛ gə́ teḛ dəa’g gɔl joo lé.

2 Sôrta Gḭka Israɛlje 19:2

Jehu, ŋgolə Hanani, njetegginta aw aar nea̰’g ndá yeḛ ula mbai Josapat lé pana: Dəw gə́ njemeeyèr lé see kəm la səa əsé deḛ gə́ d’ə̰ji Njesigənea̰ bəḭ-bəḭ lé see kəm kunda dee dan kəmi’g wa. Gelee gə́ nee ɓa oŋg lə Njesigənea̰ ḭ ne səa pu dɔi’g gə mbəa.

2 Sôrta Gḭka Israɛlje 21:6

Yeḛ un dɔ gɔl mbaije gə́ Israɛl ya lad-lad to gə́ gel-bɔje lə Akab mbata yeḛ taa ŋgolə Akab gə́ dené ləa, bèe ɓa yeḛ ra ne né gə́ majel kəm Njesigənea̰’g tɔ.

Esdras 9:12

Bèe ndá maji kar sí j’ar ŋgan síje gə́ dené taa ŋgan deeje gə́ diŋgam el ləm, j’a taaje ŋgan deeje gə́ dené kar ŋgan síje gə́ diŋgam el ləma, j’a saŋgje goo si dan maji’g lə dee əsé dan nébaoje’g lə dee el ləm tɔ saar gə no̰. Bèe ɓa siŋga sí a kḭ ne dɔ maree’g ləm, j’a sɔje ne némajije lə ɓee neelé ləma, j’a karee to ne gə́ nénduba lə ŋgan síje saar gə no̰ ləm tɔ.

Pakɔsje 139:21

Njesigənea̰, deḛ gə́ d’wai gə meḛ dee lé See m’a kwa dee gə məəm to el wa. Deḛ gə́ d’ḭ səi lé See m’a koo dee gə kəm dɔbee el wa.

Teḛ-Raga 23:31

M’a kwɔji ŋgaŋ loo lə sí gə rəw nimee-nimee un kudee dɔ baa-boo gə́ ria lə Baa-Kas saar teḛ ne baa-boo’g lə njé gə́ Pilisti ləm, gə kḭ dɔdilaloo’g saar teḛ ta baa’g ləm tɔ, mbata m’a kɔm njéɓeeje neelé ji sí’g ndá seḭ a tuba deeje no̰ sí’g tɔ.

Teḛ-Raga 34:12

Məəi dɔ rɔi’g mba kari mán rɔi gə mba kɔm na̰’d gə njéɓeeje gə́ i a gə kandə mbuna dee’g lé nà d’a tel to gə́ gum kwai tɔ.

Teḛ-Raga 34:16

nà banelə seḭ a taaje ŋgan deeje gə́ dené kar ŋgan síje gə́ diŋgam ndá ŋgan deeje gə́ dené lé loo gə́ d’ya̰ rɔ dee dan néje gə́ mina̰’g d’ar magəje lə dee lé d’a ndɔr ŋgan síje gə́ diŋgam kar dee-deḛ kara d’ya̰ rɔ dee dan néje gə́ mina̰’g d’ar magəje lə dee lé tɔ.

Malasi 2:11

Judaje lé d’uba goo manrɔ lə dee d’ya̰ ya. Deḛ ra néraje gə́ ram Jerusalem ləm gə mee ɓee gə́ Israɛl lai ləm tɔ. Mbata né gə́ d’unda gə kəmee d’ar Njesigənea̰ gə́ yeḛ nja unda dan kəmee’g lé Judaje d’ila ndɔl dɔ’g. Deḛ taa denéje gə́ to njépole-magəje.

Njé gə́ Rɔmə 1:32

Godndu Ala gə́ pana: Nana ɓa gə́ ra néje gə́ togə́bè lé a kas yée ya lé deḛ gər gao ya nɛ deḛ nja ra née ləm, mar deeje gə́ ra néje neelé kara deḛ ndigi sə dee ya ləm tɔ.

Njé gə́ Rɔmə 12:9

Maji kar meenoji lə sí to meenoji gə́ gəd ya. Undaje né gə́ majel ɓad gə́ raŋg nɛ rḛ́je dɔ néra gə́ maji’g rḛ́-rḛ́.

1 Njé gə́ Kɔrḭtə 15:33

Ǝrje rɔ sí el: kɔr kura gə dəwje gə́ majel lé ɓa néra sí gə́ maji a tuji ne ya.

Loo gə́ killa rea kəm Ja̰’g 2:4

Nɛ né kára gə́ to gə goo rəbee el lé yee ɓa ma m’ndaŋgi dɔ’g. Kédé lé i undam dan kəmi’g nɛ ɓasinè i ya̰ goom yɔgɔ.