1 Njé gə́ Kɔrḭtə 3:5 - Maktub gə́ To gə Kəmee

⁵ See Apolɔs ɓa gə́ na̰ ɓəi wa. Esé see Pool ɓa gə́ na̰ ɓəi wa. Deḛ joo bɔr to kuraje lə Mbaidɔmbaije gə goo rəw gə́ yeḛ nja ɔr dee ne. Mbɔl dɔ dee-deḛ nja ɓa seḭ ɔmje ne meḛ sí dəa’g.

1 Njé gə́ Kɔrḭtə 3:5 ပူးပေါင်းရင်းမြစ်များ

Matiyo 25:15

Kura ləa gə́ kára lé yeḛ aree ŋgan larlɔr mi, njekɔm’g joo lé yeḛ aree ŋgan larlɔr joo, njekɔm’g munda lé yeḛ aree ŋgon larlɔr kára tɔ, ar dee wɔji ne dɔ rɔ dee rɔ dee ɓa ɔd aw ɓəi.

Lugu 1:2

Deḛ d’ɔr goo taree d’ar sí gə goo tapa deḛ gə́ njékoo tareeje gə kəm dee, un kudee ndəa gə́ dɔtar’g lé ləm, d’ɔm taree ta dee’g mba kar dee d’ɔr gée ləm tɔ.

Tagə́maji gə́ Ja̰ ndang 3:27

Ja̰ ila dee keneŋ pana: Né gə́ dara ya ar dəw ɓa a kiŋga ɓó dəw a kiŋga né gə dɔrea el.

Néra Njékaḭkulaje 18:24

Jib kára ria lə Apolɔs gə́ ɓee-kojee to gə́ Aleja̰dri lé ree si Epesə. Yeḛ to dəw gə́ tapea inja paw ləm, Yeḛ gər ta gə́ to mee maktub gə́ to gə kəmee lé gəd ləm,

Néra Njékaḭkulaje 19:1

Loo gə́ Apolɔs nai Kɔrḭtə ɓəi ndá Pool aw gə loo-loo gə kəmee gə́ kédé ɓeeko̰ gə́ Asi saar teḛ Epesə. Yeḛ iŋga njékwakiláje gə́ na̰je keneŋ dəji dee pana:

Njé gə́ Rɔmə 15:16

ɔrm ne am m’to ne kura lə Jeju Kristi mbuna njépole-magəje’g. Kula gə́ wɔji dɔ Tagə́maji lə Ala lé m’ra gə mba kun ne njépole-magəje gə́ Ndilmeenda ɔr dee unda dee gə kəmee mba kar dee to nékar Ala gə́ a taa kəmee rəgm.

1 Njé gə́ Kɔrḭtə 12:28

Yee ɓa Ala unda ne gin Eglisə, ar deḛ gə́ dɔtar lé to njékaḭkulaje ləm, njékɔm dee’g jooje to njéteggintaje ləma, njékɔm dee’g mṵdaje to njḛ́gɔ-négərje ləm tɔ, njékorè goo deeje gə́ raŋg lé to njéra némɔrije ləm, gə deḛ gə́ d’iŋga nénoji mba kida ne rɔko̰ rɔ dəwje’g ləm, gə njéla gə mar deeje gə́ d’odo nékodoje gə́ wɔi dee ləm, gə deḛ gə́ d’askəm kɔr no̰ mar deeje ləma, gə deḛ gə́ gər pa takɔji dəwje gə́ ɓəd-ɓəd ləm tɔ.

1 Njé gə́ Kɔrḭtə 16:12

Ta gə́ wɔji dɔ ŋgoko̰ sí gə́ Apolɔs lé ma m’ɔsee ɓɔḭ-ɓɔḭ mba karee aw gə ŋgako̰ síjeḛ rɔ sí’g, nɛ yeḛ ndigi kaw ɓasinè el ɓəi. Ndɔ gə́ yeḛ iŋga loo kaw ndá a kaw gə mba koo sí ya.

1 Njé gə́ Kɔrḭtə 3:10

Mbɔl dɔ noji gə́ Ala wa səm ɓa ma m’tum ne gin kəi asəna gə gɔŋgé-tum-gin-kəi ɓa dəw gə́ raŋg rɔd maree dɔ’g ɓəi. Nɛ maji kar nana kara tɔs kəmee dɔ kəi gə́ rɔd dɔ maree’g tar.

1 Njé gə́ Kɔrḭtə 3:22

lé Pool əsé Apolɔs əsé Képas, əsé naŋg nee, əsé kisi gə kəmə, əsé kwəi əsé néje gə́ to gən, əsé néje gə́ d’a gə ree.

1 Njé gə́ Kɔrḭtə 3:7

Bèe ndá dəw gə́ njedubu né to gə́ njea el ləm, dəw gə́ njesaa mán dɔ’g kara to gə́ njea el ləm tɔ. Nɛ Ala gə́ njekaree teḛ mbi gə teḛ boo lé ɓa to gə́ njeaje.

1 Njé gə́ Kɔrḭtə 9:17

Ɓó ma m’ra gə məəm gə́ maji ndá meemaji ɓa gə́ nékoga dɔ jim ya. Nɛ ɓó lé to né gə́ unm lad ilam keneŋ ɓa m’ra kara to kula gə́ d’ɔm jim’g ya.

2 Njé gə́ Kɔrḭtə 11:23

See deḛ to kuraje lə Kristi wa. (Ma m’pata asəna gə dəw gə́ ndilee igee.) Ma lé m’to kura lə Kristi gə́ ur dɔ ɓəi gə goo kula ramje gə́ to yaa̰ unda ka̰ dee-deḛ ləm, gə goo kunda gə́ deḛ kundam yaa̰ unda dee-deḛ ləma, gə goo kisi gə́ m’isi daŋgai’g gɔl bula unda dee ləm tɔ. Ta-ta m’isi ta yoo’g ləm,

2 Njé gə́ Kɔrḭtə 3:3

Tɔgərɔ ya, seḭ toje asəna gə maktub kɔrginrɔ sí gə́ ḭ rɔ Kristi’g gə goo kula gə́ jeḛ n’ra mbuna sí’g. Ta gə́ ndaŋg keneŋ lé jeḛ ndaŋg gə manee kari ba el nɛ Ndil Ala gə́ njesikəmba lé yeḛ nja ɓa gə́ njḛda̰gee ləm, to ta gə́ ndaŋg bəgərə mbal’g el, nɛ seḭ dəwje lé dɔɓəŋgərə sí ɓa gə́ loo ndaŋgee ya ləm tɔ.

2 Njé gə́ Kɔrḭtə 3:6

Yeḛ nja ar sí siŋga sí tel sí ne gə́ njékɔrgoo manrɔ gə́ sigije lé yeḛ gə́ to ka̰ Ndil ɓó yeḛ gə́ deḛ ndaŋg gə́ ndaŋg el. Mbata yeḛ gə́ ndaŋg gə́ ndaŋg lé ɓa gə́ yoo, nɛ yeḛ gə́ ka̰ Ndil ɓa gə́ njekula kəmə meḛ sí’g.

2 Njé gə́ Kɔrḭtə 4:1

Gelee gə́ neelé ɓa, jeḛ gə́ Ala ɔm kula neelé ji sí’g gə goo meekɔrjol ləa lé meḛ sí ila ne kas el.

2 Njé gə́ Kɔrḭtə 4:5

Jeḛ lé j’ɔr ta gə́ wɔji dɔ rɔ síjeḛ ba el, nɛ jeḛ j’ɔr ta gə́ wɔji dɔ Jeju Kristi, Mbaidɔmbaije lé ləm, j’wa rɔ sí gə́ kuraje lə sí-seḭ gə mbata lə Jeju lé ləm tɔ.

2 Njé gə́ Kɔrḭtə 4:7

Nébao neelé jeḛ j’odo gə́ jo-ɓan mba kar dee gər gao siŋgamoŋ neelé to gə́ ka̰ Ala ɓó to gə́ ka̰ síjeḛ el.

2 Njé gə́ Kɔrḭtə 5:18

Néje lai neelé ḭ rɔ Ala’g ya. Mbɔl dɔ Kristi ɓa Ala lé ɔm sí ne səa na̰’d ləm, yeḛ ɔm ne kula kɔm dəwje na̰’d yəg gə Ala ji sí’g ləm tɔ.

2 Njé gə́ Kɔrḭtə 6:1

To gə́ jeḛ n’ra kula na̰’d gə Ala lé jeḛ ndəji sí mba kar noji lə Ala gə́ seḭ iŋgaje lé a teleeje gə́ né gə́ gə mḭdé ba el.

2 Njé gə́ Kɔrḭtə 6:4

Nɛ jeḛ n’ra néje ɓəd-ɓəd gə mba kar dəwje gər sí ne gə́ kuraje lə Ala. J’ila meḛ sí po̰-po̰ dan némeeko̰’g ləm, gə dan né gə́ riŋga sí’g ləma, gə dan néurti’g ləm tɔ.

Njé gə́ Epesə 3:7

Yeḛ ɔm kula neelé jim’g gə goo noji gə́ Ala wa səm lé ɓa am m’tel m’to ne njekɔrgoo Tagə́maji lé gə goo siŋgamoŋ ləa gə́ ɔm dɔm’g lé ya.

Njé gə́ Kolosə 1:23

Nɛ kar sí-seḭ naije dan meekun’g lə sí njaŋg, lal yəje rɔ sí keneŋ ləm, meekundayel gə́ wɔji dɔ Tagə́maji gə́ seḭ ooje mba̰ lé seḭ a tɔje pum kubaje kya̰je el ləm tɔ lé yee ɓa gə́ kuma̰. Tagə́maji neelé d’ila mberee d’ar nékundaje lə Ala lai gə́ d’isi gin dara’g d’oo ya ləm, ma Pool kara d’undam gə́ njekɔrgoo gée ya ləm tɔ.

Njé gə́ Kolosə 1:25

Ma m’tel m’to kura lə Eglisə neelé gə goo kɔm gə́ Ala nja ɔm kula neelé jim’g gə mba kam m’ɔr ne ta lə Ala ndəgəsə gə́ raga m’ar sí.

1 Timote 1:12

Jeju Kristi, Mbaidɔmbaije lə sí gə́ am siŋgam lé m’rəa oiyo mbata yeḛ oom gə́ majikoji ɓa undam gə́ njekula ləa.

1 Piɛrə 4:10

Nana ɓa gə́ Ala aree nénoji lé ndá maji karee ar mareeje mbo̰ səa na̰ dɔ’g. Togə́bè ɓa seḭ a toje ne kankəm njékaa dɔ nénojije lə Ala gə́ ɓəd-ɓəd lé ya.