லேவியராகமம் 4:3 - Saurashtra Bible (BSI)

³ “அபிஷேக் கெர்னி பொடெ மஹா ப்ரதான ப⁴ட்டர் காய்தி பாப் கெரெதி, அஸ்கி மென்க்யான் ஹொல்லெ தெல்லெ சூக் ரா:ய். தேஹாலிம் தெனொ கெரெ பாபுக் பரிஹார்கன் அங்கஹீன் நீ:ஸ்த ஒண்டெ து³டாக் பலி தெ³னொ.

லேவியராகமம் 4:3 ပူးပေါင်းရင်းမြစ်များ

2 சரித்ரு 29:21

அபுல் ராஜ்யமுகுர்சிகின், பரிஸுத்த ஸ்தலமுகுர்சிகின், யூதா தேஸுகுர்சி பாபு பரிஹார பலிகன் தெனு ஸாத் கொ³ருனுக்கின், ஸாத் பெண்டு பில்லாக்கின், ஸாத் ஸெளி பெண்டுனுக் கள்ளி அவடெஸ். பகவான்கெ பலி பீடமும் தெல்லெ மூகுனுக் பலி தெவொ மெனி ரஜொ பட்டர்னுக் ஆக்³ஞொ தகெஸ்.

எஸ்ரா 8:35

பாபிலோனும்ரீ: ஸொடுவி பொந்தி பராட் அவ்யாஸ்தெனு இஸ்ரயேல் தேவுக் பாய்ம் பொடி தகன பலின் தியாஸ். இஸ்ரயேல்னுகெ பாபுனுக் பரிஹார்கன் பா³ர் ஜவ்ணா கொ³ருனுக்கின், 96 (ஸுந்நவது) மெ:டி பெண்டுனுக்கின், 77 (ஸதஸீரு) பெண்டு பில்லல்னுக் பலி தியாஸ். பாபுனுக் பரிஹார்கன் பா³ர் ஸெளி பெண்டுனுக் தகன பலி தியாஸ்.

யாத்ராகமம் 29:14

கொ³ருகெ மாம்ஸு, தெக தொப்டொ, தெக ஸேண் இத்யாதினுக் மென்க்யான் ஜிவரிய தாம்ரீ: பராட் கள்ளி ஜீ ஜேள். ப⁴ட்டர்னுகெ பாபுனுக் பரிஹார்கன் தேரிய பலி எல்லேஸ். (லேவி 5:13; 6:26)

யாத்ராகமம் 29:21

பல்சொ பலி பீடமும் ஸொடெ ரெகதும்கின், அபிஷேக தேலும் ருவ்வயெ ஹெடி, ஆரோன்கெ வஸ்தர் ஹொல்லெகின், தெகொ பெடான்கெ வஸ்தர் ஹொல்லெ சொல்லி ஆரோனுக்கின், தெகொ பெடானுக்கின், தெங்கொ வஸ்தர்னுக் ப்ரதிஷ்டெ கேர்.

யாத்ராகமம் 29:7

அபிஷேக தேலுக் கள்ளி அவி ஆரோன்கெ தொஸ்கர் ஸொடி ப்ரதிஷ்டெ கேர்.

யாத்ராகமம் 30:10

அங்குன் ஒர்ஸு ஒண்டெவாள் ஆரோன் தெல்லெ பீடமுகெ ஸிங்க்³டொ ஹொல்லெ பாபுனுக் ப்ராயஸித்தம்கன் தெனி பொடெ பலிகெ ரெகதுக் லவி பீடமுக் ஸுத்தி⁴ கெர்னொ. இஸனி துரெ ஸந்ததின் மெளி ஒண்டொண்டெ ஒர்ஸு பாபுனுக் ப்ராயஸித்தம்கன் தெனி பொடெ ரெகதுக் லவி, பீடமுக் ஸுத்தி⁴ கெர்னொ. துஸ்ர கொன்னிதெக எல்லெ பீடமுக் உபயோக் கெரஹோனா. பகவானுக் ஸமர்பண கெர்னி பொடெ பரிஸுத்த பீடம் எல்லேஸ்” மெனி ஸங்க்யாஸ்.

எசேக்கியேல் 40:39

ப்ரஹார மண்டபும் தா³ர் லெகுத்த சார் எங்குட் மேஜெகின் எங்குட் தெங்குட் தீ³ மேஜெ ஹொதெஸ். தெக ஹொல்லெ தகன பலின், பாபு பரிஹார பலின், சூகு நிவர்தி பலின் தேஸ்தக் எல்லெ மேஜெம்‍ தொவி மூகுனுக் செக்கன்.

எசேக்கியேல் 43:19

மொகொ ஸேவொ கெரஸ்ததானுக் மொர் ஸந்நிதிக் அவ்ரிய சாதோக்குகெ ஸந்ததின் லேவி கோத்ரு ப⁴ட்டர்னுகெ பாபுனுக் பரிஹார் கெரஸ்தக் ஒண்டெ து³டாக் பலி தெ³னொ மெனி மஹா ப்ரபு பகவான் ஸங்கராஸ்.

எசேக்கியேல் 44:27

பல்சொ தெனு த⁴வ்ராம் ஸேவொ கெரஸ்தக் பரிஸுத்த ஸ்தலமுக் ஜாஸ்தவேளு அபுலுக் ஸுத்தி⁴ கெல்லஸ்தக் பாபு பரிஹார பலி தெ³னொ மெனி மஹா ப்ரபு பகவான் ஸங்கராஸ்.

லேவியராகமம் 1:10

ஒண்டெதெனொ ஸெளி பெண்டுக்தீ, மெ:டி பெண்டுக்தீ தகன பலிகன் தெ³னொ மெனெதி, அங்கஹீன் நீ:ஸ்த ஒண்டெ தல்லொ - பெண்டுக் கள்ளி அவ்னொ.

லேவியராகமம் 1:3

தெனொ தட்சணகன் தேரிய கொ³ரு அங்கஹீன் நீ:ஸ்தக் ர:னொ. பகவான் தெல்லெ தட்சணாக் அங்கிஹார் கெரஸ்தக் தெனொ தெல்லெ கொ³ருக் பரிஸுத்த டேராகெ தார்ஜோள் பெல்லி அவ்னொ.

லேவியராகமம் 16:11

ஆரோன் அபுல் குடும்பமுகெ பாபுனுக் பரிஹார் கெரஸ்தக் கள்ளி அவெ கொ³ருக் பலி தேய்.

லேவியராகமம் 16:3

தீநா:ஸ்தக் தெனொ மஹா பரிஸுத்த ஸ்தலமுக் ஜாஸ்தக் முல்லொ, ஒண்டெ கொ³ருக் பாபு பரிஹார பலிகன்கின், ஒண்டெ மெ:டி பெண்டுக் தகன பலிகன் தீடிஸ் பிஸ்தர் ஜனொ. (எபி 9:7)

லேவியராகமம் 16:5

இஸ்ரயேல்னு அபுல் பாபுனுக் பரிஹார்கன் தீ³ ஸெளி பெண்டுனுக்கின், தகன பலி தேஸ்தக் ஒண்டெ மெ:டி பெண்டுக் கள்ளி அவ்னொ.

லேவியராகமம் 16:6

மென்க்யானுகெ பாபுனுகுர்சி ஆரோன் பரிஹார பலி தேஸ்தக் முல்லொ தெனொ அபுலுகுர்சிகின், அபுல் குடும்பகுர்சிகின், அபுல் கொ⁴ம்மா காம்கெரானுகுர்சி ப்ராயஸித்தம்கன் ஒண்டெ கொ³ருக் பலி தெ³னொ.

லேவியராகமம் 4:14

திஸனி தெனு கெராஸ்தெ பாப் மெனி களாஸ்தவேளு, ஒண்டெ து³டாக் பரிஸுத்த டேராகெ தாரும் பலி தேஸ்தக் பெல்லி அவ்னொ.

லேவியராகமம் 4:23

பல்சொ தெனொ கெரெஸ்தெ பாப் மெனி தெகொ களாஸ்தவேளு, ஸெளி பெண்டுனும் அங்கஹீன் நீ:ஸ்த, தல்லொ - பெண்டுக் கள்ளி அவ்னொ.

லேவியராகமம் 4:28

பல்சொ தெனொ கெரெஸ்தெ பாப் மெனி தெகொ களாஸ்தவேளு, தெகொ பாபுக் பரிஹார்கன் ஸெளி பெண்டுனும் அங்கஹீன் நீ:ஸ்த, ஒண்டெ பெய்ல் - பெண்டுக் கள்ளி அவி,

லேவியராகமம் 4:5

பல்சொ மஹா ப்ரதான ப⁴ட்டர் தெல்லெ து³டாகெ ரெகதுக் ருவ்வயெ கள்ளி, பரிஸுத்த டேரா பிஸ்தர் ஜீ,

லேவியராகமம் 5:6

தெனொ கெரெ பாபுக் அபராத்கன் ஸெளி பெண்டுனும்தீ, மெ:டி பெண்டுனும்தீ ஒண்டெ பெய்ல்-பெண்டுக் பகவான்கெ ஸந்நிதிக் கள்ளி அவ்னொ. தெகொ பாபுக் ப்ராயஸித்தம்கன் ப⁴ட்டர் தெல்லெ பெண்டுக் பலி தேய். தெப்பொ பகவான் தெல்லெ மெனிகுகெ பாபுக் க்ஷமொ கெரன்.

லேவியராகமம் 6:18

ஆரோன்கெ ஸந்ததினும் அய்யான் கெத்தி³ஸ் எல்லெ விஸேஷ க²வ்ணமுக் கனொ. தோ²ர் தோ²ர்னுகன் தெனு எல்லெ நியதின்தானுக் சல்த கெல்லுனொ. பகவானுக் தெனி பொடெ தகன பலிகெ தட்சணாக் ப⁴ட்டர்னு கெத்தீ³ஸ் ஹாத் தெர்னொ. துஸ்ர கொன்னின் ஹாத் தெரஹோனா.

லேவியராகமம் 8:12

பல்சொ ஆரோன்கெ தொஸ்கர் மெளி அபிஷேக தேல் ஸொடி ப்ரதிஷ்டெ கெரெஸ்.

லேவியராகமம் 9:2

தெப்பொ மோசே ஆரோன்ஜோள், “பாபு பரிஹார பலி தேஸ்தக் அங்கஹீன் நீ:ஸ்த ஒண்டெ து³டாக் கள்ளி ஆவ். திஸோஸ் ஒண்டெ மெ:டி பெண்டுக் மெளி தகன பலி தேஸ்தக் கள்ளி ஆவ்” மெனி மெனெஸ்.

லேவியராகமம் 9:3

பல்சொ மோசே இஸ்ரயேல்னுஜோள், “தும்ரெ பாபுனுக் பரிஹார் கெரஸ்தக் ஒண்டெ ஒர்ஸு பூர்தி ஹொயெ அங்கஹீன் நீ:ஸ்த ஒண்டெ தல்லொ- பெண்டுக்கின், து³டாக்கின், ஒண்டெ மெ:டி பெண்டுக் கள்ளி அவொ.

ஸங்க்²யாகமம் 16:22

தெப்பொ மோசேகின் ஆரோன் ஸாஷ்டாங்கம்கன் கா²ல் பொடி, “தேவு, அஸ்கி மென்க்யானுக் உருகெரி ஜீவ் தியெ பகவானு, ஒண்டெ மெனிக் ரகளெ கெரி ர:த, அஸ்கி மென்க்யானுக் துமி ககொ தண்டன தேராஸ்தெ?” மெனி மெல்லியாஸ்.

ஸங்க்²யாகமம் 8:8

தெனு ஒண்டெ து³டாக்கின், தேலும் குஸிரெ நி:னாவ் பீடும் கெரெ தான்ய பலிக் கள்ளி அவந்தக். தூ பாபு பரிஹார பலி தேஸ்தக் அங்குண்டெ து³டாக் கள்ளி ஆவ்.

ரோமர் 8:3

மென்க்யானுகெ பாபுனுக் ஜவடஸ்தக் நியாய ப்ரமாணுக் ஸக்தி நீ: நியாய ப்ரமாண்தானுக் ஜிவஸ்தக் மென்க்யான்ஹால் முஸெனி. தேஹாலிம் நியாய ப்ரமாண்ஹால் முஸுனாஸ்த கார்யமுக் தேவூஸ் கெரி முஸட்யாஸ். கோனக்மெனெதி, அம்கொஸோன் ஸரீர ஸுபா⁴வ் பொ⁴ரெ மெனிகுகன் தேவ் அபுல் பெடாக் தட்டி மென்க்யானுகெ பாபுக் பரிஹார்கன் தெங்கொ பலி தியாஸ். தெனு தெல்லெ ஸரீர ஸுபாவும் ரீ:லி பாபுக் நாஸ் கெர்யாஸ்.

2 கொரிந்தியர் 5:21

கிறிஸ்து வாட்கன் அமி தேவுகெ நீதிக் பாத்யம் கெல்லுனொ மெனி பாப் கெர்னாஸ்த ஏசுக் தேவ் தண்டன தியாஸ். (லேவி 4:25-29)

எபிரேயர் 5:3

தேஹாலிம் தெனொ இஸ்ரயேல்னு கெரெ பாபுனுகுர்சி பலி தேரியஸோன் அபுல்நு கெரெ பாபுனுகுர்சி மெளி பலி தேய். (லேவி 9:7)

எபிரேயர் 9:12

ஸெளி பெண்டு, கா³யுகெ ரெகதுக் கள்ளி கிறிஸ்து மஹா பரிஸுத்த ஸ்தலமும் ஜியானி. அபுல் ஸொந்த ரெகதுக் தட்சணகன் தியாஸ். அமி நித்யம்கன் ரக்ஷண் பொந்தஸ்தக் ஒண்டேவாள் அம்கொ அஸ்கினாகுர்சி மஹா பரிஸுத்த ஸ்தலம் பிஸ்தர் ஜியாஸ்.