எபேசியர் 3:2 - Saurashtra Bible (BSI)

² தும்கொ சொக்கடுகுர்சி தேவுகெ கிருபொஹால் எல்லெ காம் மொகொ தெனி பொட்ரியொ மெனி துமி அய்கினி பொட்ரா:ன்.

எபேசியர் 3:2 ပူးပေါင်းရင်းမြစ်များ

அப்போஸ்தலர் 13:2

தெனு தேவுக் ஆராதன கெரி உபவாஸ் ரீ: ப்ரார்ன கெர்லேத் ர:த, பரிஸுத்த ஆவி தெங்கொஜோள், “பர்னபாக்கின், சவுலுக் மீ விஸேஷ்கன் தீரிய தேவுகெ காமுக் கெரஸ்தக் தெங்கொ ப்ரதிஷ்டெ கெருவொ’’ மெனி ஸங்க்யாஸ்.

அப்போஸ்தலர் 13:46

தெப்பொ பவுல்கின், பர்னபா தைர்யம்கன் தெங்கொஜோள், “முல்லொ தும்கோஸ் தேவுகெ ஸமசார் களட்யாஸ். துமிகீ தெல்லெ வத்தாக் நொக்கொ மெனி தொ³ப்பிதியாஸ். நித்ய ஜிவ்னமுக் தகுதி நீ:ஸ்தெனுகன் துமீஸ் தும்கொ நியாவ் ஸார்வொ கெல்லிடியாஸ். தேஹாலிம், ஏலா, அமி தும்கொ ஸொட்டி, யூத குலமும் உஜுனாஸ்த மென்க்யான்ஜோள் ஜாராஸ்.

அப்போஸ்தலர் 22:21

தேவ்கீ, “தூ நிகிளி ஜா, மீ தொகொ துதூர் ஸேஸ்தெ யூத குலமும் உஜுனா மென்க்யான்ஜோள் தட்டரியொ மெனி ஸங்க்யாஸ்’’ மெனி பவுல் மெனெஸ்.

அப்போஸ்தலர் 9:15

தெல்லெகொ பகவான், “தூ ஜா, காமெனெதி யூத குலமும் உஜுனாஸ்த மென்க்யானுக்கின், ரஜானுக்கின், இஸ்ரயேல்னுக் மீ கோன் மெனி களடஸ்தக் மீ தெகொ களைள்ரியொ.

ரோமர் 1:5

தெல்யெ ஏசு கிறிஸ்து வாட்கன் மீ அப்போஸ்தலன்கன் ஸேவொ கெரஸ்தக் தேவ் மொகொ அனுக்ரஹு கெர்யாஸ். அஸ்கி தேஸு மென்க்யான் ஏசுக் விஸ்வாஸ் கெரி, தெங்கொ வத்தாதானுக் ஜிவஸ்தவேளு தேவுகெ நாவ் மஹிமெ பொந்தரியொ.

ரோமர் 11:13

யூத குலமும் உஜுனாஸ்த தும்கொ மீ அப்போஸ்தலன்கன் ஸேஸ்தெ ஹவ்டி தேவுக் தந்யவாத் ஸங்கரெஸ்.

ரோமர் 12:3

தேவுகெ கிருபொ மொகொ தெனி பொடெஹால் மீ தும்கொ எல்லெஅஸ்கி ஸங்கரியொ: துமீஸ் தும்கொ மெச்சிலி ம:ட்டபோன் பொந்துலஹோனா. தேவ் தும்கொ தீரிய விஸ்வாஸுக் தகெதானுக் ஸேவொ கெருவொ.

1 கொரிந்தியர் 4:1

தேஹாலிம் அமி அஸ்கின் கிறிஸ்துகெ ஸெவ்கனுன் மெனிகின், எக லெங்கு ரகசியம்கன் ஹொதெ தேவுகெ ஞானுக் ப்ரசார் கெரரிய காம் அம்கொ ஸே மெனஸ்த துமி களைளுனொ. (1 பேதுரு 4:10)

கலாத்தியர் 1:13

மீ யூத மார்கும் ரி:யெவேளு கோனக் ஜிவெஸ் மெனி துமி அய்கினி பொட்ரா:ன். தேவுகெ ஸபாக் ஹிம்ஸொ கெரி, நாஸ் கெர்னொ மெனி மீ ஜுகு வைராக்யுகன் ஹொதெஸ். (அப் 8:3; 22:4; 26:9-11)

எபேசியர் 1:10

ஸெர்க ஹொயெ தின்னு அவஸ்தவேளு, தேவ் அபுல் தீர்மான்தானுக் பரலோகும்கின், புலோகுர் ஸேஸ்தெ அஸ்கிதெக கிறிஸ்து ராஜ்ஜலஸ்ததானுக் கெரன்.

எபேசியர் 3:7

தேவுகெ கிருபொஹால் அஸ்கினாக் சொக்கட் ஸமசார் களடரிய பாத்யம் மொகொ அப்பிரியொ. தேவுகெ ஸக்திஹால் மொர்ஜோள் தெனி பொடெ எல்லெ காமுக் மீ ஸெர்ககன் கெரன் முஸரெஸ்.

எபேசியர் 3:8

தேவுகெ மென்க்யானும் மீஸ் ஜுகு ந:ன்தெனொகன் ரி:யெத் மெளி கிறிஸ்துகெ லெ:க்க நீ:ஸ்த ஐஸ்வர்யமுக் நிகர்கன் ஸேஸ்தெ சொக்கட் ஸமசாருக் யூத குலமும் உஜுனா மென்க்யானுக் களடஸ்ததானுக்கின், தேவுகெ ரகசிய யோசன அத்தொ கோனக் பூர்தி ஹோரெஸ் மெனி இவர்கன் ஸங்கஸ்தக் எல்லெ கிருபொ மொகொ அப்பிரியொ.

எபேசியர் 3:9

அஸ்கிதெக உருகெரெ தேவ் எல்லெ யோசனாக் ஆதிம்ரீ: ரகசியம்கன் தொவி ஹொத்யாஸ்.

எபேசியர் 4:21

துமி அஸ்கின் ஏசுகெ ஸத்ய வத்தானுக்கின், போதனானுக் அய்கி ஜிவரியஹால் மீ இஸனி வத்தொ கெரரியொ.

எபேசியர் 4:7

ஹொயெதி கிறிஸ்து அம்கொ அஸ்கினா ஜோள் ப்ரேவ் தொவி அபுல் சித்தம்தானுக் விஷேஸ் ஹொயெ வரமுனுக் வடொ கெரி தீரியாஸ்.

கொலோசெயர் 1:4

துமி கிறிஸ்து ஏசுஜோள் தொவ்ரிய விஸ்வாஸ்கின், தேவுகெ மென்க்யான்ஜோள் துமி தெக்கடரிய ப்ரேவ் கிஸான்யெ மெனி அமி அய்கினி பொட்யாஸ். பரலோகும் தேவ் தும்கொ தேஞ்ஜாரிய ப³ஹுமானுக் எதுர் ஸீ துமி ஜுகு சொக்கட்யெ கெரராஸ்.

கொலோசெயர் 1:6

எல்லெ சொக்கட் ஸமசார் புலோக் பூரா நெர்பயி அஸ்கினாக் ஆஸீர்வாத்கன் ஸே. தேவுகெ கிருபொ பொரெ தெல்லெ சொக்கட் ஸமசாருக் துமி அய்கெ தின்னுரீ: துமி மெளி ஆஸீர்வாத்கன் ஸே. (ஆதி 1:28)

1 தீமோத்தேயு 1:11

மஹிமெ பொரெ தேவ் மொர்ஜோள் ஒப்பிஞ்சி தியெ சொக்கட் ஸமசாரும் நிஜ்ஜம் போதனான் ஸே.

1 தீமோத்தேயு 1:4

ப்ரயோஜன் நீ:ஸ்த கெனினுக் அய்கி, லெ:க்க நீ:ஸ்த ஒள்ட்யானுகெ நாவுனுக் களைளஸ்தெமாம் தெனு நிகொகன் ஸே. இஸான் விஷயமுன் ஏசுக் விஸ்வாஸ் கெரஸ்தக் ஒத்குனா. தேவுகெ க்ரியானுக் பூர்தி கெர்னாஸ்தக் தர்க்கம் கெரஸ்தகூஸ் எல்லெ ஒத்கய்.

1 தீமோத்தேயு 2:7

எல்லெ சொக்கட் ஸமசாருக் போதன கெரரிய அப்போஸ்தலன்கன் தேவ் மொகொ களைளியாஸ். யூத குலமும் உஜுனா மென்க்யானுக் மெளி எல்லெ ஸத்ய வத்தானுக் போதன கெரரிய ஆசான்கன் தேவ் மொகொ ந்யமுன் கெர்யாஸ். மீ ஸங்கஸ்த அஸ்கி நிஜ்ஜம் வத்தொ. சொட்டொ வத்தொ நா: (2 தீமோ 1:11)

2 தீமோத்தேயு 1:11

எல்லெ சொக்கட் ஸமசாருக் ஸங்கி போதன கெரஸ்தக் தேவ் மொகொ அப்போஸ்தலன்கன் ந்யமுன் கெர்யாஸ்.