Filipenses 2:2 - Buglere

² E ulita giti nga suga no chadi, agwa kaire cha takalin ba cha ta gbe suge ma no, ba ulita mo ta gbadale tañachuge salengwli, ba ulita ta dbadale no daba ole ulita, ba ulita chagedale lle amaña alin boi ule Chube alin, ba age ene, chadi nga suga noare ba giti.

Filipenses 2:2 ပူးပေါင်းရင်းမြစ်များ

Juan 3:29

Nege ama chku, kwian kle chage ule ama ole, e giti nga chege suga no no chadi. E salengwli kwian onbre be mo jwen chuialla gbe, ama be skatemanalla gdaite gbe lle ulita gbe biale mo jwen chuiage alin. Mo jwen chuia chke gire onbre, muire kle ule, ulita kle no. E giti skatemanalladi nga be chege suga no no. Ene kaire nga suga no chadi Cristo chku kwian kle chage ule ama ole.

Hechos 1:14

Una Jerusalénge ama ulita kledu mo lite ule diali gerule Chube ole, kaire Jesu daballanu ulita kaire Jesu chebia kadakle María kaire muinga na kledu mo lite diali ule gerule Chube ole.

Hechos 2:1

Bli skute chuia ollade kada Pentecostés, chui e chku gire kwian Jesu gerua gaba ciento y veinte kledu mo litaba ule,

Hechos 2:46

Diali chui ulita ama ulita kledu mo lite ole u gerungwa Chube olege. Kaire mo ullage ama diali kledu bligda girabate modi ulita gute ule nga suga no ole ta trate no mo tale daba na ole tachke diali Jesu jokeda giti.

Hechos 5:12

Kwian Jesu gerua ketanga ulita lle daga ngwale no tanre dodadu Chube kiralla giti kwian ulita gwa giti. Kwian Jesu gerua ganga ulita diali mo litu ole Jesu geruadi u skada kada Salomónge u gerungwa Chube olege.

Romanos 12:16

Ba mo ta gbadale tañachuge salengwli daba na ulita ole kwian gdaitre alin kare. Ba me tañachugadale mo giti mo tale: “Cha kwian no, cha kwian kweri, cha ta suge ma ngle daba nage malen cha me ñage mo ta gbe ule daba na ole daba me kweri daba me ta molen cha kare ole.” Me no tañachuge ene, ma no mo ta gbe ule daba na ulita ole me tañachuge mo giti ma no daba nage.

1 Corintios 1:10

Cha bitalla ulita Jesucristo giti, cha gerule ba ulita ole Jesucristo kiralla giti cha takalin ba ulita mo ta gbadale ule salengwli, ba me kira batadale modi geru giti, ba nodale daba ole, ba mo ta gbadale toi taingwli modi, ba mo ta gbadale tañachuge salengwli modi, ba mo ta gbadale gerule salengwli modi geru ulia giti.

2 Corintios 13:11

Bdagli cha gerule ba ole chada ai giti ba ulita cha bitalla kare Jesucristo giti, cha takalin ba ulita toi ta suga no ole, cha takalin ba ulita mo ta gbe toi trate Chube gwa giti Chube takalin kare ba ulita mo ta gbale kira gbe modi ongoru ongoru chage gwangerugu Jesucristo geruadi ba ulita toidale ta suge salengwli modi ta taingwli ole me kira bate modi, ba ulita toi ene Chube che ta gbanga no daba na ole che ta gbanga nga suga no ole, ama be kle ba ulita ole diali.

2 Corintios 2:3

Sugedu chage ene malen cha chada degangu ba ulita alin, cha geru gbu chada giti alin kagu ba ulita alin, ene cha me ka boadale ba ole agali. Cha me tadu jogekalin agali gwage badi chege ta olire ba ulita kle age giti, cha tañachugu ma no chada degange ba alin, ene ba ulita agali ñage mo ta gbe ba kle age giti chuge ngwadi mo ta gbe ma no age no Chube takalin kare, ba age ene, chadi nga be suga no, kaire ba ulitadi nga be suga no.

2 Corintios 7:7

Tito kleduni ule cha ole e cha ta gbu nga suga no ole, me e alin agwa Tito chiu geru ba giti dbe, e giti nga sugedu ma no chadi. Tito gerudu cha ole nga suga no no amadi ba ulita giti ba kle age giti Chube takalin kare, kaire ama gerudu cha ole ba ulita no cha ole takalin gwage chadi mo gwagwa giti, kaire ama gerudu ba ulita ta suge olire cha giti cha kle ta olire giti ba agedu giti cha dollale. Geru e ulita chku cha kote Tito giti, e cha ta gbu nga suga no no ole.

Filipenses 2:16

ba geru Cristo giti dbe amage, ene geru e giti ama ñage Chube uñe ñage ta jwlite Chube ole, ene bdagli ama be toi Chube ole diali chui tangle. Ba age ene, bdagli nga be suga noare chadi ba giti Cristo chieni chuiage, be suge chage ba geru Cristo giti gau ulia gwangea ba me geru e chugu ngwadi, malen be suge chage cha me chagedu ngwale geru e dbe bage.

Filipenses 2:20

Cha alin kwian na Timoteo kare me kagadale ba ngwadi, kwian na me tañachuge salengwli ama kare, diali Timoteo tañachuge no ba ulita giti, ama no no ba ole ama ta ba chudaboakalin Jesucristo geruadi.

Filipenses 4:2

Cha takalin Evodia me kira bate dare Síntique ole, cha takalin muinga e boke me ka boi dare modi daba ole, ma no ama boke mo ta gbeni no nge kare daba ole, ama boke gdaitre alin Jesucristo giti, Jesucristo ama boke Chugagwalla.

Colosenses 2:5

Ulia cha me kle ba ole ule llani ba kle ngwadi agwa chage suge mo tale cha kle ba ole llani kare. Nga suga no chadi ba kle toi no modi ulita kaire ba ulita kle mo ta gbe kiraske Cristo gerua gai ulia gwangerugu.

2 Tesalonicenses 2:13

Chube be kwian bai me ama gerua Jesucristo giti gai ulia gbe ji chuge tirare, agwa ba kwian una Tesalónicamu mi boi ene, ba kle Chube gerua ulia Jesucristo giti gai mo tale malen cha kle gerule no diali Chube ole ba giti, cha kle gerule ene: “Chube, nga suga noare chadige daba una Tesalónicamu giti. Ba noare ama ole, nge jondege alin ba ama gaubi ba alin ene ama tien gitiru ji chugege age me no gdale. Cha ba gerua ulia Jesucristo giti ketu kwian ege gire ba Oña ama ulita ta gbu ba gerua gai ulia. Nege ama banu ama ta no trate ba gwa giti, ene ama ñage toi ule diali Chugagwalla Jesucristo ole ba ole ba ngwadige nga ngaña giti. Ba Oña kle ama ulita ta gbe toi no diali ba kirallaske age trate no ba takalin kare. Ulia ba noare ama ole.” Cha kle gerule ene ba ulita giti diali Chube ole.

2 Timoteo 1:4

Kaire cha kle tachke chui giti cha jo siere bage suiale cha jo nga nage, e suiale ba chegu olire cha nate. Nege cha kle tachke bage cha ta klekalin ule ba ole nga suga no ole.

Filemón 1:20

Cha daballa Jesucristo giti Filemón, ba Jesucristo gerua gaba cha kare, cha takalin ba cha ta gbe suga no ole, ba cha chudaboadale age no Onésimo alin, ba Jesucristo gerua ganga no malen ba agedale no Onésimo alin.

2 Juan 1:4

Nga suga noare chadi ba gweale giti ba gweale kle toi no trate Chube gerua gerule kare, Chube che Ñenua geru ketu chege toi ama takalin kare giti, geru e kle degaba kare ba kle toi, malen e giti nga suga noare chadi ulia.

3 Juan 1:4

Geru chke uñale chage cha olia gweale Jesucristo giti kle mo ta gbe toi no ulita Chube gerua ulia gerule kare, e giti nga suga no no chadi, malen e giti nga suga no no chadi ba giti.