Filipenses 1:7 - Buglere

⁷ Cha tañachuge cha kle tañachuge no ene ba ulita giti, ulia cha no no ba ulita ole. Ba kle bate chage cha kle bate bage agwa cha me kle ta jogenga ba giti. Cha kle skage cha me kle skage baini kaire cha be kle gerukalin no trate Jesucristo gerua ulia giti kwian ole, gerukalin no trate kwian chugagwalla ole Jesucristo che jwannga siere giti. Ba kle gerule Chube ole cha giti, ba kle cha chudaboi, ene che kle ule kare. Chube age no che alin kaire ule, Chube age no ba alin kaire cha alin.

Filipenses 1:7 ပူးပေါင်းရင်းမြစ်များ

Hechos 20:23

Suge chage una ulitage cha kle joge ngwadi Chube Oña kle cha ta gbe suge baini kaire cha be joge ngwadi cha gbabe skage kaire cha gbabe boi daga ngwale tanre.

Hechos 21:33

Guardia donga chugagwalla jo chke Pablodi ama donga na gbu Pablo ko luge giska hierrole boke giti dbale skadi, gire guardia donga chugagwalla geru kadu kwian ulitage: —¿Onbre ai chema? ¿Ama agedu mine?

1 Corintios 13:7

Ta dbe olire daba giti daba kle age me no giti agwa diali no daba ole, diali mo ta gbe tañachuge no daba ene giti, mo ta gbe no daba manadedi chui gwealege daba ñage mo ta blite nganake no, ta dbe no daba ole diali ni mo ta blite sidri me no daba ole.

1 Corintios 9:23

Cha kle age ene cha takalin Chube gerua Jesucristo giti chke uñale kwian ulitage ama ulita geru Jesucristo giti gai ulia, ene chadi nga chege suga no ule kwian Jesucristo gerua gai ole.

2 Corintios 3:2

Me ene dale, cha me chagedale chada e kare ole. Ba me tañachugadale kwian gweale chada degadale cha giti ene suge bage cha kwian mine, me ene, ba ulita bai nu Cristo gerua gaba ulia tachkedale mo giti, ene be suge trate bage cha chagedu geru dbe no baske, geru e agedu tanre no ba tale, geru e ba ta blitu, ba me kle chage nge kare. Diali cha kle tachke ene ba ulita giti, ba kle cha tale diali cha kle tachke ba ulita giti. Boidu ba ulita tale Cristo gerua giti kle chke uñale kwian tanrege baini kaire cha kle chage ngwadi, ene e giti suge kwian nga ulitamuge cha kle chage Cristo gerua dbe no ulia, e ma no chagé chada olege nga kaire kairege.

2 Corintios 7:3

Cha kle gerule kare ba ole cha me kle gerule badi me no, me ene, uñale bage cha ta mine ba ole, cha gerudu kare ba ole ngeru cha no no ba ole, cha be chege mo ta dbe no ene ba ole diali, cha be jogeda mo ta dbe no ene ba ole.

Gálatas 5:6

Che mo ta gbu Jesucristo gai ulia, che amanu, malen che me tañachugadale mo kwara sidri tkangenga o me mo kwara sidri tkangenga, e giti che me tañachugadale, e ngwale, e me che ta blite joge siere age me noge Chube gwage, agwa Jesucristo alin che ta blite age no Chube takalin kare, che mo ta gbadale ulia Jesucristo gai mo tale diali, ene Jesucristo giti che chege diali mo ta dbe no Chube ole kaire daba ulita ole.

Efesios 3:1

Chube kle kwian israelita kaire kwian me israelita Jesucristo gerua ganga ulita gbe ule kwaitre alin, geru e dbe ba ulitaske giti cha kle skage, geru e Jesucristo giti no ba ulita alin agwa e giti cha kle skage.

Efesios 4:1

Cha kle skage Chube gerua Cristo giti dbe gdale, cha gerule ba ulita ole, Chube agedu tanre no ba ulita alin, Chube ba ulita gau mau alin, malen cha takalin ba mo ta gbe chage trate Chube gwa giti Chube takalin kare kwian ulita Chube uñe toidale kare.

Efesios 6:20

Chube cha kagu nga ulitage ama gerua e kete kwian ulitage, geru e kete kwiange giti cha tkere skage, cha takalin ba gerule Chube ole cha giti diali ene cha me ta kennga gerule Cristo gerua giti kwiange aini cha kle skage ngwadi.

Filipenses 1:12

Cha daballa cha ibotea Jesucristo giti, cha gerule ba ulita ole cha kle skage geru Jesucristo giti dbe gdale, agwa ba me tañachugadale geru Jesucristo giti mi chage dare cha kle skage giti. Me ene dale. Cha takalin chke uñale ba ulitage cha kle skage geru Jesucristo giti gdale agwa cha me kle chege kamne Jesucristo gerua giti, ene cha giti Jesucristo gerua kle chage ma no kwian ulitaske. Guardia donga ulita kwian skage manangage kaire kwian na ulitage uñale cha kle skage Jesucristo giti, ama ulita kle cha keruchuge tanre gerule Jesucristo giti.

Filipenses 1:14

Aini kwian Chubenu tanre kle chke gwage chadi cha kle skage gerule no Jesucristo giti kwian ole, suge daba ene ulitage Chube kle cha manade, daba ene ulita kle kira gai cháge, ama ta suge geru Jesucristo giti dbe kwian nage, suge amage Chube che Chugagwalla be ama manade kaire, ene ama kaire me kle kennga gerule Jesucristo giti kwian na ole.

Filipenses 1:5

Cha tachke ba giti, gwangea cha jo chke Jesucristo gerua trage una Filipoge ba ulita cha chudabo u giti bligda giti igi giti, kaire nege diali ba kle cha chudaboi ngerugu, ene cha ñage chage geru Jesucristo giti trage nga nage.

Filipenses 2:22

Ba ulitage uñale Timoteo kwian noare, ama chagedu lle boi ule cha ole kirolla lle boi mo ñenua ole kare, ama me cha chugu ngwadi gballa geru Jesucristo giti dbe kwian nage,

Filipenses 4:14

Lle cha ole o lle me cha ole, diali nga suga noare chadi, cha gerule ba ulita ole noare ba cha chudabo igi giti.

Filipenses 4:15

Cha jo chke gwangea geru Jesucristo giti dbe kwian ulita nga kweri Macedoniage, cha chagedu geru Jesucristo giti trage kwian ulita ole, ngeru cha bebi joge siere nga Macedoniage gire ba ulita Chubenu una Filipomu nga Macedoniage igi ketu chage mo tale. Uñale bage ba alin cha chudabo ene, kwian Chubenu una nage me cha chudabo ene dale.

Filipenses 4:3

Cha chudaboanga taingwli, cha takalin ba che ibotea boke e Jesucristo giti chudaboi, ba ama boke ta gbeni no daba ole, ene ama mi kira bate dare modi. Cha kledu baske gire muinga boke e lle bo tanre, ama cha chudabo geru Jesucristo giti dbe kwian nage ule Clemente ole, kaire daba na tanre cha chudabo geru dbe kwiange, ama ulita kalla kle degaba nga ngaña giti Chube kle ngwadi, bdagli ama be toi nga ngaña giti diali ule Chube ole.

Colosenses 4:18

Cha Pablo chada ai degangu ulita ba alin, nege cha agali kle mo ka dege chada ai giti mo kodi bdagli cha gbi kage dege mo kodi ba ulita alin, ene chke uñale bage ulia cha kle chada ai kage ba ulita alin. Cha gerule ba ole, ba me ta jogenga gerule cha giti Chube ole cha kle skage Cristo gerua dbe gdale giti. Kaire cha takalin Cristo che Chugagwalla age no ba ulita alin. Geru ai ene ulita cha Pablo chada degangu ba kwian Chubenu ulita una Colosage alin. Che kle meni.

Colosenses 4:3

Kaire ba gerudale diali Chube ole cha giti, cha kle Chube gerua Cristo giti dbe kwian me Chube uñeske. Ba gerule Chube ole cha giti, ene Chube chudaboi kete chage ene kwian ta be kle biale Cristo gerua keruchuge. Cristo gerua amaña dbe giti cha kle skage agwa cha ta chegekalin diali gerule trate Cristo giti kwian ole, ene geru suge kwiange trate, ene kwian ñage geru e gai ulia. Malen cha takalin ba gerule diali Chube ole chudaboi kade Chubege cha alin, ene cha chege Chube kirallaske geru dbe gwangerugu.

1 Tesalonicenses 5:5

Ba ulita bebi Jesucristo gai ulia ba chagedu nga jereske kare me Chube uñe, Chube ba ta gbu suge Jesucristo giti salengwli jichra kle kwian gbe ten kare, gire ba Jesucristo gau ulia, ba chegu Chubenu. Che Chubenu me kle nga jereske kwian me Chube uñe kare, Jesucristo chieni chuiage ngwange che kledale biale ta giti, chui ege kwian me Chube uñe be chege sugekare Chubege agwa che ulita Chubenu be joge toi ule ama ole.

2 Timoteo 1:8

Ba me ibule gerule kwian na ole che Chugagwalla Jesucristo giti, kaire me ibule cha giti cha kle skage ama gerua giti. Ba boi daga ngwale cha boakle kare ba me geru Jesucristo giti chugadale ngwadi, ba Jesucristo gerua dbadale ngerugu kwiange, Chube kiralla giti Chube be ba kira gbe.

2 Timoteo 2:9

Jesucristo gerua giti cha kle boi daga ngwale skage, kwian me no geru e ole cha tku skage cha kwian jiskenga kare, ama tañachuge ama cha tke skage ene geru Jesucristo giti me chage dare, me dale ene, cha kle skage Jesucristo gerua giti agwa Jesucristo gerua me kle skage, Jesucristo gerua be chage diali kwianske.

Filemón 1:13

Cha kle aini skage Jesucristo gerua dbe giti cha tañachugu ma no cha Onésimo gaida aini ba kle cha ole kare cha tañachugu Onésimo gai ba giti tangle. Agwa cha me ñage tañachuge cha ama gaida aini cha takalin kare ma no cha ama kageni ba ngwadi.

Hebreos 3:1

Cha bitalla ulita Jesucristo giti, Chube che ulita gau mau alin ama che ta gbu Jesucristo gai ulia, malen ba ole cha gerule ene: Ba mo ta gbadale tañachuge ulia Jesucristo giti Jesucristo Chube gerua ulia ketanga kwian ulitage, ama giti suge chege Chube takalin che toi mine, kaire Jesucristo gerunga Chube ole che Chubenu alin che kle age me no giti, ama gerunga che alin Chube ole ma no trate ama ma kweri gerunga na Chube ole ulitage. Gire ene sugedale chege Jesucristo ñage che chudaboi ma no chudaboanga na ulitage.

1 Pedro 4:13

Ba boi daga ngwaleske ba mo ta gbadale suga no, sugedale bage Cristo boidu daga ngwale kaire, ene kaire ba amanu boidale daga ngwale, ba mo ta gbe suga no boi daga ngwaleske nege nga dba ai giti, ene kaire nga be suga no no badi Cristo chieni chuiage, chui ege Cristo be chkeni mo kiralla giti, gire be suge ba ulitage Cristo no Cristo kweri.

1 Pedro 5:1

Nege cha gerule ba daba Chubenu chugagwalla ulita ole, cha daba Chubenu chugagwalla ba ulita kare. Cha gwagedu mo gwagwa giti Cristodi ji chuge dagale nga dba ai giti, Cristo chieni chuiage che ulita be gwage Cristodi ule, chui ege che ulita be joge toi ule ama ole nga ngaña giti.

2 Pedro 1:13

Cha kle gwade cha tañachuge cha gerudale no diali ene ba ulita ole ba ta gbe tachke diali, ene ba ulita mi ta jogenga.

1 Juan 3:14

Agwa ulia che Chubenu mo ta dbe no daba na ole gire e giti suge chege ulia che ta me ngeru kare che bebi Chube gerua Jesucristo giti gai ulia gire. Ne suiale che chegu sugekare Chubege che me Chube uñu malen che me mo ta du no daba ole. Agwa che me chegu e kare malen che mi joge boadalenga daga ngwale ji chuge tanre ngwadi che agedu me no kbiale, nege tangle Jesucristo gerua gai ulia giti che ta kle Chube ole, che kle mo ta dbe no daba ole giti suge chege che Chubenu ulia, che be toi chui tangle Chube ole. Suge chege kwian bai kaire me kle mo ta dbe no daba ole kwian e me Chubenu, ama be toi diali sugekare Chubege ama me Jesucristo gerua gai ulita giti.